ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓠꓬ ꓶꓼ ꓙꓳ ꓫꓱ, ꓙꓳ ꓢꓴ ꓐꓯ ꓟ ꓮ ꓡꓲ ꓫꓵꓽ ꓔꓯ ꓐꓯˍ ꓡ꓿ ꓟꓲ ꓠꓯ ꓡꓰ ꓟꓳ. ꓖꓶˍ ꓟ ꓶꓼ ꓙꓳ ꓫꓱ, ꓙꓳ ꓢꓴ ꓠꓬ ꓐꓳ ꓢꓴ꓾ ꓟꓵꓽ ꓮ ꓟꓬ, ꓙꓳ ꓢꓴ꓾ ꓟꓳ‐ꓓꓳ ꓮ ꓟꓬ, ꓙꓳ ꓢꓴ꓾ ꓒꓴ ꓫꓵ ꓮ ꓟꓬ, ꓙꓳ ꓢꓴ ꓔꓯ ꓶꓼ ꓙꓳ ꓫꓱ, ꓙꓳ ꓢꓴ ꓐꓰ ꓐꓯ ꓗꓴ.ˍ ꓡꓳ꓿ ꓢꓷ. ꓠꓲ, ꓙꓳ ꓢꓴ꓾ ꓦꓲꓻ ꓘꓴꓽ ꓠꓯꓸꓼ ꓗꓪ ꓮ ꓫꓵꓽˍ ꓟꓲ ꓓꓵꓽ ꓙ ꓫ. ꓟꓽ ꓛꓵ ꓢꓴ ꓔꓯ ꓶꓼ ꓙꓳ ꓫꓱ, ꓙꓳ ꓢꓴ ꓐꓰ ꓐꓯ ꓗꓴ.ˍ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽ ꓪˍ ꓟ ꓠꓬ꓾ (ꓡꓴ‐ꓘ 6ꓽ17,20‐26) ꓗꓪ ꓠꓬ꓾ ꓶꓼ ꓙꓳ ꓫꓱ, ꓙꓳ ꓢꓴ ꓡꓽ ꓞꓳ ꓐꓯ ꓟ ꓮ ꓡꓲ ꓫꓵꓽ ꓔꓯ ꓐꓯˍ ꓡ ꓐꓯ ꓟ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓫꓬꓽ ꓫꓬꓽ ꓡꓰꓽ ꓐꓯ ꓟ. ꓖꓶ ꓡ ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ꓾ ꓞꓳ ꓫ. ꓐꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓝꓮꓲ ꓦꓰꓼ ꓟꓷꓼ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓬ ꓐꓳ ꓡꓰˍ ꓥꓳ꓿ ꓠꓲ, ꓥꓴꓻ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓬ ꓐꓽ ꓫꓱ, ꓐꓽ ꓠꓲꓼ꓾ ꓐꓽ ꓧꓷꓼ ꓧꓷꓼ ꓗꓷ ꓡꓰˍ ꓥꓳ꓿ ꓢꓲ ꓒ ꓬꓰ‐ꓢꓴ ꓐꓱ ꓶ ꓠꓲ, ꓫ. ꓟꓬ ꓫ. ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓬ ꓪꓴ‐ꓢ ꓤ ꓠꓱ ꓒꓬꓱꓼ ꓡˍ ꓥꓳ꓿ ꓟꓴꓽ ꓗꓪ ꓗꓴꓷꓼ ꓠꓬ ꓬꓲ ꓪ ꓔꓯ ꓟ ꓥ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓐꓯ ꓔ ꓟ ꓠꓬ ꓫꓬꓽ ꓫꓬꓽ ꓡꓰꓽ ꓥ ꓡꓳ꓿ ꓟꓲ ꓠꓯ ꓕꓲ ꓒꓳ, ꓡꓰ ꓟꓳ. ꓖꓶˍ ꓟ ꓶꓼ ꓙꓳ ꓫꓱ, ꓙꓳ ꓢꓴ ꓔꓯ ꓟꓽ ꓫꓱ.꓿ ꓟꓲ ꓠꓯ ꓡꓰ ꓒꓴ ꓫꓵ ꓙꓳ ꓢꓴ꓾ ꓢꓷ. ꓠꓲ, ꓙꓳ ꓢꓴ ꓔꓯ ꓶꓼ ꓙꓳ ꓫꓱ, ꓙꓳˍ ꓡꓳ ꓐꓯ ꓥ ꓟꓲ꓾ ꓢꓲ ꓒ ꓬꓰ‐ꓢꓴ ꓠꓬ ꓫ. ꓢꓴ ꓟꓷꓼ ꓢꓴ꓾ ꓦꓰꓼ ꓟꓷꓼ ꓢꓴ꓾ ꓠꓲ, ꓥꓴꓻ ꓢꓴ ꓶꓼ ꓙꓳ ꓫꓱ, ꓙꓳˍ ꓡꓳ ꓐꓰ ꓐꓯ ꓔ ꓡꓳ꓿
ꓮ ꓫꓵꓽ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓕꓱ ꓡꓱ ꓐꓯˍ ꓡ꓿ ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓦꓲ ꓘꓴꓽ ꓗꓪ ꓤ ꓫꓵ. ꓤ ꓠꓱ ꓙꓳ ꓢꓴ ꓮꓽ ꓐ ꓮ ꓟ ꓔꓯ ꓡꓳ. ꓠꓬꓲ꓿ ꓤ ꓫꓵ. ꓤ ꓠꓱ ꓮ ꓟꓬ, ꓙꓳˍ ꓟ ꓘꓴꓽ ꓗꓪ ꓟꓽ ꓓꓻ ꓣꓳꓺ ꓓꓰ ꓡꓰˍ ꓟ꓾ ꓟꓽ ꓥ ꓠꓬ ꓢꓯꓼ ꓐꓽ ꓓꓰ ꓡꓰˍ ꓟ ꓔꓯ ꓮꓽ ꓐ ꓮ ꓟ ꓠꓬ ꓟꓬꓽ ꓠꓬꓲ ꓠꓲ, ꓠꓵˍ ꓡꓳ꓿ ꓠꓱ. ꓐꓯ ꓤ ꓫꓵ. ꓤ ꓠꓱ ꓢꓶ. ꓟꓽ ꓞꓲꓺ ꓦꓲ ꓘꓴꓽ ꓠꓯꓸꓼ ꓗꓪ ꓟꓽ ꓠꓽ ꓠꓽ ꓠꓻ ꓔꓬ ꓟ ꓤ ꓠꓱ ꓤ꓾ ꓥ ꓠꓬ꓾ ꓮꓽ ꓐ ꓮ ꓟ ꓠꓵꓻ ꓠꓲ, ꓔꓯ ꓪ ꓜꓲ ꓣꓱꓽ ꓞ, ꓟ ꓤ ꓠꓱ ꓤ ꓖꓳ ꓟ ꓠꓬ ꓮꓽ ꓐ ꓟ ꓠꓵꓻ ꓠꓲ, ꓟꓬꓽ ꓠꓬꓲ ꓟꓶˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓠꓬ ꓠꓵꓻ ꓠꓲ, ꓮ ꓘꓶ. ꓣꓱꓽ ꓞ, ꓟ ꓑꓶ. ꓓꓴ ꓥ ꓡꓳ꓿
ꓕꓱ ꓟˍ ꓡꓰ ꓐꓰ ꓪꓴ‐ꓢ ꓥˍ ꓟꓲ ꓫ. ꓢꓴ ꓟꓷꓼ ꓢꓴ ꓔꓯ ꓠꓲ, ꓠꓵꓻˍ ꓡꓳ ꓐꓰ ꓣꓳ ꓑ ꓙꓽˍ ꓡꓳ꓿ ꓣꓳ ꓫ. ꓠꓬꓲ꓾ ꓣꓳ ꓠꓲ, ꓥꓴꓻ ꓠꓬꓲ ꓐ, ꓐ ꓪꓴ‐ꓢ ꓠꓬ ꓣꓳ ꓒ ꓕꓲ ꓗꓪ ꓣꓳ ꓕꓲ ꓛꓱꓽ ꓗꓪ ꓔꓬ ꓡꓳ꓿ ꓦꓲꓻ ꓕꓲ ꓦꓲꓻ ꓗꓪ ꓠꓻˍ ꓟ ꓒꓬꓽˍ ꓟ ꓤ ꓠꓱ ꓤ ꓠꓬ ꓪ ꓜꓲ ꓠꓵꓻ ꓠꓲ, ꓟꓶˍ ꓟ ꓡꓰ ꓐꓰ ꓫ. ꓢꓴ ꓟꓷꓼ ꓢꓴ ꓗꓪ ꓥˍ ꓟꓲ ꓬꓲ ꓪ ꓕꓲ ꓦꓲ ꓗꓪ ꓪꓴ‐ꓢ ꓮ ꓕꓯ ꓟꓲ ꓔꓬ ꓡꓳ꓿ ꓪꓴ‐ꓢ ꓠꓵꓻ ꓠꓲ, ꓒ ꓐꓲ ꓟꓶ ꓔꓬ ꓡꓳ ꓐꓯ ꓟ ꓣꓳ ꓔꓯ ꓐꓯ ꓟ. ꓖꓶ ꓡ ꓔꓬ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓫ. ꓢꓴ ꓟꓷꓼ ꓢꓴ ꓮ ꓫꓵꓽ ꓑꓶ. ꓓꓴ ꓶꓼ ꓙꓳ ꓫꓱ, ꓙꓳˍ ꓡ ꓐꓰ ꓐꓯ ꓕꓯ꓾ ꓬꓲ ꓪ ꓠꓲ, ꓟ ꓠꓬ ꓪꓴ‐ꓢ ꓔꓯ ꓡꓰꓽ ꓠꓲ, ꓥꓳ ꓓ, ꓡꓳ꓿ ꓬꓲ ꓪ ꓦ ꓡꓱ ꓖꓴ꓾ ꓬꓲ ꓪ ꓠꓲ, ꓟ ꓔꓽ ꓪꓴꓽ ꓖꓴ꓾ ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓬꓲ ꓪ ꓥꓳ ꓔ ꓟ ꓠꓬ ꓪꓴ‐ꓢ ꓕꓲ ꓣꓳˍ ꓡꓰꓽ ꓙꓳˍ ꓟ ꓑꓶ. ꓓꓴ ꓥ ꓡꓳ꓿ ꓒꓴ ꓫꓵ ꓮ ꓟꓬ, ꓙꓳ ꓢꓴ ꓠꓬ꓾ ꓬꓲ ꓪ ꓠꓲ, ꓟ ꓠꓬ ꓒꓴ ꓫꓵ ꓔꓯ ꓥꓳ ꓓ, ꓟ꓾ ꓪꓴ‐ꓢ ꓔꓯ ꓟꓽ ꓦ ꓡꓱ ꓡꓱ ꓚꓲ. ꓛꓬ ꓛꓳꓽ ꓚꓲ. ꓛꓬꓽ ꓦ ꓡꓱˍ ꓟ ꓗꓷ ꓡꓰ ꓗꓴ.ˍ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓟ ꓠꓬ꓾ ꓞꓳ ꓐꓳ ꓠꓬ ꓶꓼ ꓟꓽ ꓙꓳ ꓫꓱ, ꓟꓽ ꓙꓳ ꓐꓰ ꓐꓯ ꓟ ꓟꓽ ꓥ꓿ ꓚꓵ ꓚꓵ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓮ ꓙꓵꓽ ꓟ ꓕꓯꓽ ꓢꓲ ꓗꓪ ꓪꓴ‐ꓢ ꓔꓯ ꓠꓲ, ꓥꓳ ꓠ, ꓟ ꓐꓰ꓾ ꓢꓲ ꓒ ꓬꓰ‐ꓢꓴ ꓐꓱ ꓶ ꓠꓲ, ꓫ. ꓟꓬ ꓫ. ꓠ, ꓟ ꓣꓳ ꓔꓯ ꓬꓲꓼ ꓠꓬꓲ. ꓖꓶ ꓔꓬ ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓐꓱ ꓶ ꓠꓲ, ꓫ. ꓟꓬ ꓫ. ꓐꓯ ꓟ ꓮ ꓡꓲ ꓥ ꓡ꓿ ꓔꓯ ꓥꓳꓽ꓾ ꓣꓳ ꓒꓴ ꓫꓵ ꓙꓳˍ ꓕꓯ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓣꓳ ꓖꓶ ꓙ ꓟꓳˍ ꓟ꓾ ꓣꓳ ꓖꓶ ꓙꓲꓽ ꓙꓳˍ ꓟ꓾ ꓢꓲ ꓒ ꓬꓰ‐ꓢꓴ ꓡꓰ ꓫ. ꓢꓴ ꓟꓷꓼ ꓢꓴ ꓔꓯ ꓬꓰ ꓙ ꓐꓰ ꓐꓯ ꓔ ꓟ ꓡꓰ ꓐꓰ꓾ ꓣꓳ ꓔꓯ ꓙꓳˍ ꓟ ꓖꓴꓽ ꓙꓴꓽ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓒꓬꓱꓽ ꓟꓬ ꓔꓯ ꓡꓳ. ꓢꓲ ꓠꓬꓲ ꓖꓶ ꓐ ꓡˍ ꓟ꓾ ꓕꓱ ꓟ ꓔꓯ ꓬꓲ ꓐꓯ ꓠꓲ, ꓫꓵˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓐꓱ ꓶ ꓣꓳ ꓟꓽ ꓠꓲ, ꓫꓵ ꓟ꓾ ꓣꓳ ꓬꓰ ꓠꓲ, ꓟꓽ ꓫꓵ ꓟ꓾ ꓣꓳ ꓠꓯꓸꓼ ꓗꓪ ꓙꓳˍ ꓟ ꓣꓳ ꓫ ꓔ ꓟ ꓒꓴ ꓫꓵ ꓕꓱ ꓟ ꓔꓯ ꓢꓲ ꓒ ꓬꓰ‐ꓢꓴ ꓒꓬꓱꓽ ꓟꓬ ꓔꓯ ꓡꓳ. ꓢꓲ ꓬꓰˍ ꓟ꓾ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓫ. ꓙꓵˍ ꓟ ꓬꓲ ꓚꓱ, ꓕꓲ ꓚꓱ, ꓥ ꓡꓳ꓿ ꓠꓱ. ꓐꓯ ꓢꓴ ꓣꓳ ꓔꓯ ꓢꓰꓼ ꓡ ꓢꓲ꓾ ꓠꓱ. ꓐꓯ ꓢꓴ ꓣꓳ ꓔꓯ ꓤꓲ ꓡˍ ꓕꓯ ꓡꓰꓽ ꓟꓽ ꓥ ꓥ ꓐꓰ꓾ ꓣꓳ ꓒꓵꓽ ꓶ ꓙꓳˍ ꓟ ꓕꓲ ꓙꓰꓽ ꓙꓰꓽ ꓔꓯ ꓢꓲ ꓒ ꓬꓰ‐ꓢꓴ ꓐꓱ ꓶ ꓬꓰ_ ꓟ ꓗꓪ ꓣꓳ ꓫꓵꓽ ꓧꓪꓽ ꓠꓯꓼ ꓠꓬ ꓬꓰ ꓠꓲ, ꓟꓽ ꓫꓵ꓾ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓐꓱ ꓶ ꓣꓳ ꓬꓰˍ ꓥꓳ ꓐꓯ ꓕꓯ꓾ ꓮꓽ ꓟ ꓥˍ ꓟꓲ ꓶꓼ ꓙꓳ ꓫꓱ, ꓙꓳˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓢꓯꓼ ꓖꓶ ꓔꓬ ꓡꓳ꓿ ꓠꓲ, ꓫ. ꓟꓬ ꓫ. ꓔꓬ ꓡ꓾ ꓠꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓴꓷꓼ ꓠꓬ ꓠꓴ ꓐꓱ ꓶ ꓥꓳ꓿ ꓠꓴ ꓦꓰꓼ ꓟꓷꓼ ꓔꓬ ꓡ꓾ ꓟꓬꓽ ꓠꓬꓲ ꓠꓴ ꓠꓵꓻ ꓠꓲ, ꓦꓰꓼ ꓟꓷꓼ ꓔꓬ ꓡ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓠꓴ ꓒ ꓕꓲ ꓗꓪ ꓔꓬ ꓡꓳ꓿ ꓠꓴ ꓔꓯ ꓬꓲ ꓟꓽ ꓖꓴ ꓡꓰ ꓟ ꓠꓵꓻ ꓠꓲ,꓾ ꓟꓽ ꓐꓬ ꓡꓰ ꓟ ꓠꓵꓻ ꓠꓲ,꓾ ꓟꓽ ꓛꓵꓽ ꓡꓰ ꓟ ꓠꓵꓻ ꓠꓲ, ꓡꓰ ꓠꓴ ꓔꓯ ꓠꓲ, ꓠꓵꓻ ꓔꓬ ꓡꓳ꓿
ꓠꓴ ꓠꓬ ꓠꓲ, ꓟ ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓐꓱ ꓶ ꓠꓲ, ꓫ. ꓟꓬ ꓫ. ꓔꓬ ꓡ꓿ ꓟꓽ ꓙꓵꓻ ꓢꓴ ꓐꓴ ꓠꓬ ꓮ ꓫꓵꓽ ꓜꓽ ꓠꓲ, ꓫꓵˍ ꓟ꓾ ꓮ ꓫꓵꓽ ꓓꓳꓻ ꓠꓲ, ꓫꓵˍ ꓟ꓾ ꓮ ꓡꓲ ꓬꓰ ꓠꓲ, ꓫꓵˍ ꓟ ꓬꓰ ꓔꓬ ꓥ ꓟꓲ ꓠꓴ ꓠꓬ ꓙꓵꓻ ꓢꓴ ꓕꓲ ꓣꓳ ꓥ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓲ, ꓡꓶꓽ ꓛꓳ ꓠ ꓗꓷ ꓡꓰˍ ꓟ꓾ ꓢꓲ ꓒ ꓦꓬꓼ ꓠꓬꓲ ꓗꓪ ꓠꓽ ꓠ ꓗꓷ ꓡꓰˍ ꓟ꓾ ꓪꓽ ꓘꓴ ꓠ ꓗꓷ ꓡꓰˍ ꓟ ꓐꓱ ꓶ ꓠꓴ ꓠꓬ ꓠꓲ, ꓫ. ꓟꓬ ꓫ. ꓔꓬ ꓡ꓿ ꓕꓽ ꓙꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓠꓬꓲ. ꓠꓬꓲ ꓬꓲ ꓒ ꓕꓲ ꓗꓪ ꓔꓬ ꓢꓴ ꓔꓯ ꓬꓲ ꓠꓲ, ꓠꓵˍ ꓡꓳ꓿ ꓬꓲ ꓔꓯ ꓙꓵꓻ ꓢꓴ ꓔꓯ ꓬꓲ ꓠꓵꓻˍ ꓡꓳ ꓐꓰ ꓐꓯ ꓔ ꓡꓳ꓿
ꓣꓳ ꓮ ꓙꓵꓽ ꓠꓬ ꓪꓴ‐ꓢ ꓬꓲ ꓤ ꓬꓲ ꓮ ꓟꓲꓽ ꓥ ꓟ ꓕꓲ ꓡꓰ, ꓟꓲ ꓠꓯ ꓡꓰ ꓓꓳ ꓟꓴ, ꓡ ꓟ꓾ ꓟꓲ ꓠꓯ ꓡꓰ ꓮ ꓟꓴ. ꓟꓴ ꓚꓰ, ꓖꓶ ꓡ ꓟ ꓔꓯ ꓟꓽ ꓣꓴ ꓣꓴ ꓟꓽ ꓧꓪ ꓧꓪ ꓐꓰ꓾ ꓪꓴ‐ꓢ ꓡꓰ ꓚꓰ, ꓖꓶ ꓡˍ ꓟ ꓠꓲ, ꓟ ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓐꓱ ꓶ ꓠꓲ, ꓫ. ꓟ꓾ ꓠꓲ, ꓥꓴˍ ꓟ ꓔꓯ ꓠꓲ, ꓠꓵˍ ꓟ ꓪꓴ‐ꓢ ꓬꓲ ꓠꓵꓻ ꓠꓲ, ꓔꓯ ꓙꓵˍ ꓟ꓾ ꓕꓱ ꓡꓱ ꓫꓵꓽ ꓪꓴ‐ꓢ ꓣꓳ ꓔꓯ ꓢꓯꓼ ꓪ ꓖꓶ ꓔꓬ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓖꓶ ꓡˍ ꓟ ꓠꓬꓲ ꓟꓳꓻ ꓓꓴ ꓔꓯ ꓣꓳ ꓣꓴ ꓢꓲ ꓠꓬꓲ꓾ ꓣꓳ ꓤꓶꓻ ꓗꓪ ꓕꓱ ꓡꓱ ꓫꓵꓽ ꓔꓳ, ꓜꓳꓽ ꓡˍ ꓟ ꓦꓬꓼ ꓠꓬꓲ ꓗꓪ ꓠꓲ, ꓟ ꓟꓽ ꓫ. ꓫ.꓾ ꓠꓲ, ꓟ ꓟꓽ ꓙꓬ ꓙꓬ ꓐꓰ ꓣꓳ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ꓾ ꓡꓯꓼ ꓫꓵ ꓢꓯꓼ ꓕꓵꓼ ꓙꓰ ꓡꓯ꓿
