ꓞꓽ ꓐꓯ ꓡꓯ. (ꓞꓽ ꓐꓯ ꓪꓳꓽ) ꓔꓯ ꓟꓽ ꓟꓳꓻ ꓠꓬꓲ ꓢꓴ ꓟꓽ ꓜꓽ ꓠꓬꓲ ꓢꓴ ꓟꓽ ꓙꓳ ꓐꓰ ꓐꓯ ꓓ,ˍ ꓡꓳ꓿ ꓬꓲ ꓒꓬꓽ ꓗꓪ ꓚꓳ. ꓬꓲ ꓚꓰ ꓗꓪ ꓛꓲ ꓜꓽ ꓐ ꓡˍ ꓟ ꓥ ꓡꓳ꓿ ꓧꓪꓽ ꓚꓬ.ˍ ꓕꓯ ꓬꓲ ꓐꓵꓽ ꓟꓽ ꓛꓱꓽ ꓠꓱ ꓠ, ꓟ꓾ ꓬꓲ ꓐꓵꓽ ꓫꓬ ꓠ, ꓟ ꓣꓱꓽˍ ꓡꓳ꓿ ꓬꓲ ꓜꓲꓽ ꓑꓯ. ꓜꓽ ꓫꓳꓽ ꓜꓽˍ ꓡꓳ꓿ ꓡ, ꓝꓲꓼ ꓐꓰ ꓔꓲ. ꓜꓽˍ ꓡꓳ꓿ ꓕꓲ ꓐꓱ ꓠꓬ ꓬꓲ ꓐꓵꓽ ꓔꓯ ꓟꓽ ꓠꓵꓻ꓿
ꓖꓳ ꓡꓱ ꓥ ꓠꓬꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱꓽ ꓔꓬ ꓟ ꓞꓽ ꓐꓯ ꓪꓳꓽ (ꓞꓽ ꓐꓯ ꓡꓯ.) ꓠꓬ ꓮ ꓡꓲ ꓕꓲ ꓒꓳ, ꓗꓪ ꓙꓲꓻ ꓖꓴ ꓙꓳ ꓔꓬ ꓡ ꓐꓯ ꓟ ꓚꓱ, ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓞꓽ ꓐꓯ ꓪꓳꓽ (ꓞꓽ ꓐꓯ ꓡꓯ.) ꓕꓱ ꓟ ꓠꓬ ꓠꓯꓻ ꓞꓲꓼ ꓒꓬꓱꓼˍ ꓟ ꓬꓲ ꓜꓲ ꓕꓲ ꓙꓰꓽ ꓥ ꓡꓳ꓿ (ꓐ ꓑꓳ,) ꓐꓱ ꓶ꓾ ꓫꓵꓽ ꓒꓬ. ꓠꓻ ꓐꓱ ꓶ ꓣꓱꓽ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓞꓽ ꓐꓯ ꓪꓳꓽ (ꓞꓽ ꓐꓯ ꓡꓯ.) ꓠꓬ ꓟꓬ‐ꓟ ꓕꓲ ꓗꓴꓷꓼ ꓡꓱꓸꓼ ꓗꓪ ꓙꓳˍ ꓐꓯ ꓥ ꓟꓲ꓾ ꓗ‐ꓛꓲ ꓗꓴꓷꓼ ꓫꓴ ꓐꓰ ꓐꓶ ꓬꓲꓻ ꓗꓴꓷꓼ ꓫꓴ ꓐꓴ ꓗꓪ ꓟꓬꓽ ꓠꓬꓲ ꓟꓳꓻ ꓪ ꓓ, ꓟ ꓥ ꓡꓳ꓿
ꓠꓯꓻ ꓞꓲꓼ ꓔꓯ ꓟꓳ. ꓙꓲꓻ ꓖꓴ ꓙꓳˍ ꓟ ꓚꓱ, ꓔꓯ ꓧꓪ ꓟꓰ, ꓠꓬꓲ ꓟꓶ ꓔ ꓟ ꓗꓪ ꓠꓬ ꓞꓽ ꓐꓯ ꓪꓳꓽ (ꓞꓽ ꓐꓯ ꓡꓯ.) ꓠꓬ ꓦꓲꓣꓴꓢ ꓐꓴ꓾ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ꓾ ꓢꓰ,‐ꓛꓬꓳ ꓠꓻ ꓐꓰ ꓐꓵꓼ ꓟꓵ ꓗꓪ ꓐꓶꓽ ꓓꓲꓻ ꓓꓵꓽ ꓡꓰˍ ꓟ ꓐꓰ꓾ ꓠꓱ. ꓐꓯ ꓠꓻ ꓮ ꓟꓬ, ꓐꓱ ꓶ ꓮ ꓘꓶ. ꓙꓲꓻˍ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓳʼˍ ꓟ ꓔꓯ ꓓꓻ ꓡꓰ ꓝꓲ ꓓꓴ ꓐꓱ ꓶ ꓧꓶꓽ ꓞꓳ ꓫꓵꓽ ꓐꓴ ꓠꓬ ꓮ ꓠꓱ ꓕꓯ ꓡꓰ ꓣꓱꓽ ꓩꓴ ꓡˍ ꓟ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓐ‐ꓑꓳ, ꓠꓻ ꓙꓳ ꓢꓴ ꓐꓱ ꓶ ꓠꓬ꓾ ꓬꓲ ꓒꓬꓽ ꓬꓲ ꓪꓵꓽ ꓬꓲ ꓚꓰ ꓔꓯ 5 ꓜꓲ ꓚꓵ, ꓗꓷ ꓢꓲ ꓬꓲꓻ ꓙꓬ ꓞꓲꓽ ꓫꓬ ꓗꓷ ꓢꓲ ꓠꓬꓲ꓾ ꓬꓲ ꓙꓬꓻ 3 ꓗꓶ. ꓧꓳꓽ ꓢꓲ ꓚꓬ. ꓚꓺ ꓗꓷ꓿ ꓬꓲꓻ ꓙꓬ ꓕꓲ ꓗꓶ. ꓤ ꓡꓰꓽ ꓤꓰꓻ ꓗꓪ ꓛꓲ ꓚꓬ. ꓗꓷ ꓢꓲ ꓕꓲ ꓠꓬꓲ ꓕꓲ ꓗꓶ.꓾ ꓦ ꓐ ꓕꓲꓽ ꓟ ꓛꓲ ꓓꓳꓻ ꓖꓶˍ ꓠꓬ꓾ ꓐ‐ꓑꓳ, ꓓꓻ ꓡꓰˍ ꓡꓳ꓾ ꓐꓰ ꓢꓷ. ꓢꓴ ꓕꓲ ꓐꓱ ꓡꓰ ꓐꓯˍ ꓡꓳ꓿
ꓝꓮꓲ ꓞꓽ ꓐꓯ ꓪꓳꓽ (ꓞꓽ ꓐꓯ ꓡꓯ.) ꓗꓪ ꓠꓬ ꓮꓠꓔꓲꓳꓫꓲꓓꓮꓠꓔ ꓮ ꓟꓬ, ꓓꓵˍ ꓟ ꓑꓶ. ꓓꓴ ꓖꓳ ꓓꓱꓽ ꓠꓯꓸꓼ ꓗꓪ ꓢꓯꓼ ꓙꓳ ꓡꓰ ꓝꓲˍ ꓡꓳ꓿
ꓟꓳꓽ ꓡꓰ ꓢꓻˍ ꓟ ꓐꓰ ꓠꓻ ꓮ ꓟꓬ, ꓔꓯ ꓗꓽ ꓕ. ꓙ ꓖꓶ ꓐ ꓡˍ ꓟ ꓬꓲ ꓢꓯꓼ ꓙꓳˍ ꓡꓳ꓿
ꓖꓳ ꓓꓱꓽ ꓠꓯꓸꓼ ꓗꓪ ꓠꓻ ꓤ ꓒꓬꓽ ꓤ ꓟꓽ ꓓꓵ ꓡ ꓠ ꓗꓽ ꓕ. ꓙˍ ꓟ ꓬꓲ ꓢꓯꓼ ꓔꓯ ꓬꓰ ꓙ ꓠ, ꓟ ꓐꓱ ꓶ ꓪꓧꓲꓔꓰ ꓐꓡꓳꓳꓓ ꓚꓰꓡꓡꓢ ꓟꓬꓽ ꓡ ꓪꓴꓽ ꓡˍ ꓟ ꓚꓱ, ꓔꓯ ꓢꓯꓼ ꓡꓴꓽ ꓖꓶ ꓐ ꓡˍ ꓡꓳ꓿
ꓬꓲ ꓪꓴꓻ ꓚꓱ, ꓔꓯ ꓔꓬ, ꓢꓻ ꓡꓰ ꓝꓲˍ ꓡꓳ꓿
ꓦꓲꓣꓴꓢ ꓐꓶꓽ ꓓꓲꓻ ꓐꓴ ꓔꓯ ꓖꓼ ꓓꓳ ꓖꓶˍ ꓡꓳ꓿
ꓳʼˍ ꓟ ꓔꓯ ꓗꓽ ꓕ. ꓙ ꓖꓶˍ ꓡꓳ꓿
ꓕꓲ ꓫꓵꓽ ꓫꓵꓽ ꓐꓰ ꓟꓽ ꓕꓽ ꓟ꓾ ꓟꓽ ꓪꓽ ꓟ ꓔꓯˍ ꓟꓲ ꓓꓻ ꓡꓰ ꓝꓲˍ ꓡꓳ꓿
ꓢꓰ,‐ꓛꓬꓳ ꓠꓻ ꓓꓻ ꓡꓰ ꓝꓲˍ ꓡꓳ꓿
ꓧꓪꓽ ꓗꓴ, ꓙꓲꓻ ꓔꓯˍ ꓟꓲ ꓔꓬ, ꓢꓻ ꓡꓰ ꓝꓲˍ ꓡꓳ꓿
ꓐꓵꓼ ꓟꓵ ꓔꓯ ꓥˍ ꓟꓲ ꓔꓬ, ꓢꓻ ꓡꓰ ꓝꓲˍ ꓟ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿
