ꓞꓳ ꓫꓵꓽ ꓕꓲꓽ ꓫꓵꓽ ꓡꓲꓽ ꓒꓰꓼ ꓠꓬ ꓬꓲꓸ ꓒꓵꓽ ꓐꓯ ꓞꓷꓹ ꓟꓽ ꓓꓻ ꓟ ꓥ ꓡꓳ= ꓞꓳ ꓤ ꓠꓬ ꓛꓳ ꓚꓱꓹ ꓙꓳ ꓢꓲ ꓬꓲꓸ ꓗꓳꓸ ꓬꓲꓸ ꓡꓽ ꓟꓽ ꓥ ꓟ ꓢꓯꓸ ꓫꓵꓽ ꓕꓲꓽ ꓫꓵꓽ ꓥ ꓡꓳ= ꓞꓳ ꓤ ꓠꓬ ꓡꓲꓽ ꓒꓰꓼ ꓒꓬꓱꓼ ꓡ ꓠ, ꓟ ꓬꓰ ꓢꓴ꓾ ꓡꓲꓽ ꓒꓰꓼ ꓚꓱꓹ ꓠꓯꓸꓼ ꓗꓪ ꓣꓱꓽ ꓠ, ꓟ ꓶꓻ ꓤꓼ ꓔꓯ ꓒꓬꓱꓼ ꓡ ꓠ ꓬꓰ ꓢꓴ꓾ ꓡꓲꓽ ꓒꓰꓼ ꓚꓱꓹ ꓔꓯ ꓟꓳꓸ ꓐꓳ ꓢꓴ ꓐꓴ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓞꓳ ꓤ ꓠꓬ ꓡꓲꓽ ꓒꓰꓼ ꓬꓲꓸ ꓝꓳꓹ ꓟꓶ ꓐꓰ ꓓꓽ ꓪꓴꓸ ꓥ ꓡꓳ= ꓡꓲꓽ ꓒꓰꓼ ꓐꓯˍ ꓟ ꓠꓬ ꓞꓳ ꓤ ꓡꓰ ꓒꓬꓱꓼ ꓡ ꓝꓲˍ ꓟ ꓕꓱ ꓟ ꓮꓽ ꓙꓵꓽ ꓔꓯ ꓡꓲꓽ ꓒꓰꓼ ꓐꓯˍ ꓟ ꓥ ꓪ=
ꓔꓲꓺ ꓒ ꓪ ꓔꓲ ꓬꓳ-ꓦ ꓒꓳ-ꓡꓳ ꓲꓲ ꓡꓰ ꓩ-ꓖꓴꓳ ꓗꓴꓷꓼ ꓗꓪ ꓴꓠꓰꓢꓚꓳ ꓐꓯˍ ꓟ ꓟꓲ ꓠꓯ ꓕꓲꓽ ꓚꓳ ꓡꓳ ꓗꓪ ꓟ ꓮꓽ ꓠꓱ ꓕꓯ ꓡꓰ ꓫꓬ, ꓦˍ ꓟ ꓡꓳ ꓒꓱ ꓡꓲꓽ ꓒꓰꓼ ꓕꓲꓽ ꓫꓵꓽ ꓡꓰ ꓕꓲꓽ ꓫꓵꓽ ꓔꓯ ꓧꓪ ꓟꓰꓹ ꓢꓲ ꓟꓽ ꓐꓬ ꓡꓰ ꓠ ꓡꓳꓸ ꓢꓴ ꓕꓱ ꓡꓱ ꓫꓵꓽ ꓬꓲ ꓜꓴ ꓐꓰ ꓫꓸ ꓕꓱ ꓡꓯꓽ ꓘꓳ,ˍ ꓕꓯ ꓡꓲꓽ ꓒꓰꓼ ꓐꓯˍ ꓟ ꓔꓯ ꓕꓱ ꓡꓱ ꓐꓯˍ ꓡꓳ= ꓡꓲꓽ ꓒꓰꓼ ꓐꓯˍ ꓟ ꓠꓬ ꓞꓳ ꓫꓵꓽ ꓕꓲꓽ ꓫꓵꓽ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳꓽˍ ꓟ ꓞꓳ ꓫꓵꓽ ꓕꓲꓽ ꓫꓵꓽ ꓒꓬꓱꓼ ꓡ ꓝꓲˍ ꓟ ꓞꓳ ꓫꓵꓽ ꓕꓲꓽ ꓫꓵꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓕꓱ ꓡꓱ ꓫꓵꓽ ꓟꓽ ꓐꓹ ꓠꓬ ꓡꓲꓽ ꓒꓰꓼ ꓐꓯˍ ꓟ ꓠꓬ ꓢꓷꓸ ꓠ, ꓟ ꓮꓽ ꓘꓶꓸ ꓫꓸ ꓔ ꓟ ꓗꓷ ꓡꓰ ꓓꓴ ꓥꓳ=
ꓐꓯ ꓠꓲ, ꓫꓵˍ ꓟ ꓠꓬ ꓡꓲꓽ ꓒꓰꓼ ꓠꓯꓸꓼ ꓗꓪ ꓠꓬ ꓞꓳ ꓤ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳꓽˍ ꓟ ꓐꓰ ꓞꓳ ꓫꓵꓽ ꓒꓬꓱꓼ ꓡˍ ꓟ ꓚꓱꓹ ꓥ ꓕ ꓑꓳꓸꓼ ꓐ ꓠꓬꓲ ꓔ ꓥ ꓐꓯˍ ꓟ ꓥˍ ꓡꓳ= ꓮ ꓡꓲꓳ ꓐꓯ ꓠꓬ ꓞꓳ ꓤꓽ ꓠꓬ ꓡꓲꓽ ꓒꓰꓼ ꓒꓬꓱꓼ ꓡ ꓠˍ ꓟ ꓐꓱ ꓶ ꓟꓽ ꓓ ꓬꓳꓸ ꓚꓵˍ ꓟ ꓬꓲꓸ ꓝꓳꓹ ꓟꓶ ꓥ ꓢꓲ ꓓꓽ ꓪꓴꓸ ꓥˍ ꓟꓲ ꓥˍ ꓟ ꓪꓴꓸ ꓠꓬꓲ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓞꓳ ꓤꓽ ꓠꓬ ꓡꓲꓽ ꓒꓰꓼ ꓮ ꓡꓲ ꓢꓲ ꓒꓬꓱꓼ ꓡ ꓠ, ꓟ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓥ ꓪ= ꓞꓳ ꓫꓵꓽ ꓕꓲꓽ ꓫꓵꓽ ꓠꓬ ꓡꓲꓽ ꓒꓰꓼ ꓠꓯꓸꓼ ꓗꓪ ꓡꓰ ꓢꓲ ꓚꓲ. ꓛꓬ ꓠꓬ ꓮ ꓡꓲ ꓫꓵꓽ ꓞꓳ ꓫꓵꓽ ꓥ ꓟ ꓔꓯ ꓟꓸ ꓖꓶ ꓐ ꓡˍ ꓡꓳ꓾ ꓐꓰ ꓔꓲꓺ ꓒ ꓪꓸ ꓔꓲ ꓡꓰ ꓕꓱ ꓡꓰ ꓐꓯˍ ꓟ ꓥ ꓪ= ꓞꓳ ꓤ ꓠꓬ ꓡꓲꓽ ꓒꓰꓼ ꓓꓽ ꓪꓴꓸ ꓥ ꓢꓲ ꓠꓬꓲ ꓕꓱ ꓡꓰ ꓡꓲꓽ ꓒꓰꓼ ꓒꓬꓱꓼ ꓡ ꓝꓲˍ ꓟ ꓔꓯ ꓚꓵꓸ ꓚ ꓕꓯ ꓣꓱꓽ ꓫꓶꓸ ꓡˍ ꓟ ꓛꓳ ꓚꓱꓹ꓾ ꓶꓼ ꓖꓪꓽ꓾ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓬꓰˍ ꓟ ꓟꓬꓱꓽ꓾ ꓫꓶꓹ꓾ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓕꓱ ꓡꓱ ꓫꓵꓽ ꓮꓽ ꓙꓵꓽ ꓠꓬ ꓬꓲ ꓒꓵꓽ ꓒꓵꓽˍ ꓟ ꓥ ꓢꓲ꓾ ꓞꓳ ꓫꓵꓽ ꓕꓲꓽ ꓫꓵꓽ ꓞꓳ ꓜꓴ ꓕꓲꓽ ꓜꓴ ꓟꓵꓽ ꓕꓲꓽ ꓟꓵꓽ ꓕꓱ ꓡꓰ ꓗꓷ ꓡꓰ ꓠ ꓬꓰ ꓖꓶˍ ꓟ ꓥ ꓡꓳ= ꓡꓲꓽ ꓒꓰꓼ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳˍ ꓟ ꓞꓳ ꓫꓵꓽ ꓞꓳ ꓙꓰꓽ ꓠꓯꓸꓼ ꓗꓪ ꓞꓳ ꓫꓵꓽ ꓕꓲꓽ ꓫꓵꓽ ꓬꓲ ꓪꓽ ꓙ ꓜꓲꓼ ꓠꓲꓹ ꓢꓷꓸ ꓠꓲꓹ꓾ ꓢꓳˍ ꓟ ꓢꓷꓸ ꓠꓲꓹ ꓕꓱ ꓟ ꓔꓯ ꓪꓴꓽ ꓡ ꓟꓴ ꓡ ꓝꓲ ꓢꓲ ꓬꓲꓸ ꓒꓵꓽ ꓐꓯ ꓞꓷꓹ ꓟꓽ ꓓꓻ ꓟ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳꓽˍ ꓟ ꓔꓯ ꓒꓬꓱꓼ ꓡ ꓝꓲˍ ꓟ ꓥ ꓪ=
