ꓢꓲꓺ ꓒꓽ ꓬꓰ-ꓢꓴ ꓬꓲ ꓟꓸ ꓟꓲ ꓚˍ ꓕꓯ ꓔꓯ ꓥꓳꓽ ꓐꓯˍ ꓟ꓾ ꓮꓽ ꓙꓵꓽ ꓠꓯꓸꓼ ꓗꓪ ꓟꓵꓽ ꓘꓳꓼ ꓚꓱꓹ ꓙꓱꓽ ꓤꓽ ꓟ ꓞꓲ ꓚꓱꓹ ꓧꓪꓽ ꓫꓵꓽ ꓧꓪꓽ ꓙꓰꓽ ꓚꓱꓹ꓾ ꓠꓬꓹ ꓫꓵꓽ ꓠꓬꓹ ꓙꓰꓽ ꓚꓱꓹ꓾ ꓢꓲꓹ ꓜꓲ ꓡꓳ ꓜꓲ꓾ ꓜ ꓫꓵꓸ ꓡꓳ ꓫꓵꓸ ꓕꓱ ꓡꓱ ꓫꓵꓽ ꓮꓽ ꓙꓵꓽ ꓐꓹ ꓟ ꓥ ꓪ= ꓬꓲ ꓠꓬ ꓜ ꓫꓵꓸ ꓫꓵꓸ ꓔ ꓟ ꓚꓱꓹ (ꓬꓳ‐ꓦ꓿10ꓽ 1-18) ꓗꓪ ꓠꓬ ꓙꓲˍ ꓟ ꓮꓸ ꓣꓳ ꓡꓳꓸ ꓢꓴ ꓟꓽ ꓙꓲꓻ ꓟ ꓮꓸ ꓣꓳ ꓡꓳꓸ ꓢꓴ ꓚꓱꓹ ꓔꓯ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓟꓸ ꓖꓶ ꓡˍ ꓟ ꓙꓳˍ ꓡꓳ= ꓬꓲ ꓡꓰ ꓔꓯ ꓥꓳꓽ ꓐꓯˍ ꓟ ꓠꓯꓸꓼ ꓗꓪ ꓦ ꓟꓲ ꓚꓱꓹ ꓟꓵꓽ ꓚꓱꓹ꓾ ꓟꓵꓽ ꓗꓪ ꓣꓱꓻˍ ꓟ ꓬꓲ ꓫꓵꓸ ꓢꓲꓹ ꓪꓰ ꓚꓱꓹ ꓕꓱ ꓡꓱ ꓫꓵꓽ ꓢꓲꓹ ꓪꓰ ꓡꓳ ꓪꓰ ꓚꓱꓹ ꓔꓯ (ꓡꓴ-ꓘ 12ꓽ 27) ꓗꓪ ꓣꓳꓽ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓟꓵꓽ ꓪꓴꓽ ꓗꓪ ꓐꓱ ꓔꓬˍ ꓟ ꓠꓬꓹ ꓤꓽ ꓐꓴ ꓚꓱꓹ ꓖꓳ ꓟ ꓡꓰ ꓟꓽ ꓞꓲ ꓡꓴ-ꓘ 9ꓽ58 ꓗꓪ ꓪꓴꓸ ꓓꓵꓽ ꓚꓱꓹ ꓕꓱ ꓡꓱ ꓫꓵꓽ ꓔꓯꓸ ꓔꓯ ꓥꓳꓽ ꓐꓯ ꓟꓸ ꓖꓶ ꓡˍ ꓡꓳ=
ꓢꓲꓺ ꓒꓽ ꓬꓰ-ꓢꓴ ꓠꓬ ꓚꓰꓼ ꓢꓴ ꓢꓲꓺ ꓒꓽ ꓥ ꓡꓳ= ꓚꓰꓼ ꓔ ꓟ ꓠꓯꓸꓼ ꓗꓪ ꓬꓲ ꓥˍ ꓟꓲ ꓐˍ ꓡꓳ= ꓬꓲꓻ ꓡꓴꓽ ꓐꓱ ꓗꓪ ꓬꓲ ꓡꓯꓼ ꓟꓰꓽ ꓓꓶꓽ ꓡˍ ꓟ ꓔꓯ ꓠꓽ ꓡꓰ ꓝꓲˍ ꓟ ꓢꓲꓺ ꓡꓲ ꓐꓰ ꓗꓷ ꓡꓰ ꓝꓲˍ ꓟ (ꓟ-ꓘꓳ 4ꓽ 35-41ꓹ ꓟ-ꓕꓲ 8ꓽ 22-25) ꓕꓱ ꓡꓱ ꓫꓵꓽ ꓗꓪ ꓡꓳꓸ ꓟꓳ ꓪ ꓓˍ ꓡꓳ=
ꓖꓳ ꓟ ꓡꓰꓽ ꓟꓽ ꓞꓲ (ꓟ-ꓘꓳ 5ꓽ 48- 49) ꓗꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓬꓲ ꓙꓬ ꓕꓯꓽ ꓢꓲ ꓙ ꓫꓱꓽˍ ꓟ ꓚꓱꓹ (ꓟ-ꓕꓲ 14ꓽ 13- 21꓾ ꓟ-ꓘꓳ 8ꓽ 1- 16꓾ ꓡꓴ-ꓘ 9ꓽ 16- 17꓾ ꓬꓳ-ꓦ 6ꓽ 1- 13) ꓗꓪ ꓠꓬ ꓜꓽ ꓪꓳ ꓡꓳꓸ ꓪꓳ ꓔꓯ ꓟꓬꓽ ꓡ ꓝꓲˍ ꓟ ꓑꓸ ꓑꓸ ꓔꓯ ꓟꓬꓽ ꓡ ꓝꓲˍ ꓟ ꓚꓱꓹ ꓕꓱ ꓡꓰ ꓐꓳ ꓔ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓬ ꓠꓻ ꓢꓴ ꓒꓬꓽ ꓢꓴ ꓔꓯ ꓠꓻ ꓫꓬꓹ ꓒꓬꓽ ꓫꓬꓹ ꓖꓶˍ ꓡꓳ= ꓬꓲ ꓠꓬ ꓠꓻ ꓓꓴ ꓑꓻ ꓓꓴ ꓒꓬꓽ ꓓꓴ ꓔꓳꓹ ꓜꓳꓽ ꓔꓬ ꓢꓴ ꓔꓯ ꓬꓰ ꓙ ꓔ ꓙˍ ꓡꓳ= ꓓꓻ ꓡꓰ ꓝꓲˍ ꓡꓳ=
ꓛꓲ ꓫꓳꓸ ꓡꓯꓽ ꓫꓳꓸ ꓔꓯ ꓠꓻ ꓫꓬ, ꓒꓬꓽ ꓫꓬ, ꓖꓶˍ ꓡꓳ꓿ (ꓟ-ꓘꓳ 3ꓽ 1-12) ꓗꓪ ꓕꓱ ꓡꓱ ꓐꓯ ꓔ ꓡꓳ= ꓡꓯꓽ ꓒꓯꓹ ꓕꓲꓽ ꓐꓽ ꓫꓵꓻ ꓢꓴ ꓤꓽ ꓑꓸ ꓤꓼ ꓔꓯ ꓓ ꓡꓰ ꓝꓲˍ ꓟ꓾ (ꓟ-ꓘꓳ 3ꓽ 1- 6) ꓗꓪ ꓮꓽ ꓟꓬꓹ ꓘꓳꓼ ꓓꓯꓽ ꓝꓲꓸ ꓘꓳꓸ ꓔꓬˍ ꓟ ꓤꓽ ꓟꓶꓼ ꓤꓼ ꓔꓯ ꓓꓻ ꓡꓰ ꓝꓲˍ ꓟ꓾ (ꓟ-ꓘꓳ 13ꓽ 10- 17) 38 ꓘꓳꓼ ꓖꓳ ꓓꓱꓽ ꓕꓲꓽ ꓐꓶꓽ ꓫꓵꓻ ꓢꓴ ꓔꓯ ꓠꓻ ꓫꓬꓹ ꓒꓬꓽ ꓫꓬꓹ ꓖꓶˍ ꓟ꓾ (ꓬꓳ-ꓦ 5ꓽ 1- 15) ꓒꓬꓱꓽ ꓟꓳ ꓡ ꓕꓲꓽ ꓠꓬꓲ ꓗꓪ ꓚꓳ. ꓡꓰ ꓟꓬ ꓢꓶ ꓟꓽ ꓟꓳˍ ꓟ꓾ (ꓬꓳ-ꓦ 9ꓽ 1-14) ꓗꓪ ꓕꓱ ꓡꓰ ꓠꓻ ꓫꓬꓹ ꓒꓬꓽ ꓫꓬꓹ ꓖꓶˍ ꓟ ꓔꓯ ꓣꓳꓽ ꓡꓳꓸ ꓟꓳꓻ ꓪ ꓓˍ ꓡꓳ= ꓢꓲꓺ ꓒꓽ ꓬꓰ-ꓢꓴ ꓡꓰ ꓠꓻ ꓫꓬꓹ ꓒꓬꓽ ꓫꓬꓹ ꓖꓶˍ ꓟ ꓠꓬ ꓞꓳ ꓤꓽ ꓔꓯ ꓢꓲ ꓚꓰ. ꓢꓲ ꓫꓬꓹ ꓖꓶˍ ꓟ ꓟꓽ ꓥ=
ꓬꓲ ꓠꓬ ꓞꓳ ꓫꓵꓽ ꓘꓶꓽˍ ꓟ ꓟꓽ ꓙꓳ꓿ ꓙꓵꓻ ꓢꓴ ꓞꓳ ꓤꓽ ꓟꓽ ꓙꓵꓻ ꓢꓴ ꓞꓳ ꓤꓽ ꓕꓱ ꓡꓰ ꓘꓶꓽˍ ꓟ ꓥˍ ꓟꓲ ꓟꓽ ꓙꓳ꓿ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓕꓯꓽ ꓢꓲ ꓛꓳꓽ ꓢꓲ ꓞꓳ ꓤꓽ ꓔꓯ ꓘꓶꓽˍ ꓟ ꓥˍ ꓟꓲ ꓟꓽ ꓙꓳ= ꓦ ꓡꓱ ꓢꓴ ꓟꓽ ꓦ ꓡꓱ ꓢꓴ ꓙꓵ꓾ ꓠꓲꓹ ꓟꓽ ꓙꓳ ꓢꓴ ꓙꓳ ꓢꓴ ꓐꓶꓽ ꓞꓳ ꓔꓯ ꓥˍ ꓟꓲ꓾ ꓠꓲꓽ ꓔꓯ ꓦ ꓡꓱ ꓔꓬ ꓢꓴ ꓔꓯ ꓥˍ ꓟꓲ ꓮꓽ ꓙꓵꓽ ꓔꓯ ꓬꓲ ꓠꓬ ꓠꓻ ꓫꓬꓹ ꓒꓬꓽ ꓫꓬꓹ ꓖꓶˍ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓠꓬ ꓪꓴ-ꓢ ꓠꓬ ꓪꓴꓽˍ ꓟ ꓫꓱꓸ ꓤ ꓠꓲꓹ ꓙꓳ ꓢꓴ ꓪꓴ-ꓢ ꓥˍ ꓡꓳ ꓐꓯˍ ꓟ ꓔꓯ ꓢꓷꓸ ꓡꓰ ꓝꓲˍ ꓟ꓾ ꓠꓻ ꓢꓴ ꓒꓬꓽ ꓢꓴ ꓔꓯ ꓠꓻ ꓫꓬꓹ ꓒꓬꓽ ꓫꓬ ꓖꓶˍ ꓟ ꓠꓬ ꓪꓴ-ꓢ ꓔꓯ ꓫꓱꓸ ꓖꓶ ˍ ꓟ ꓞꓳ ꓤꓽ ꓠꓯꓸꓼ ꓗꓪ ꓟꓬꓽ ꓠꓬꓲ ꓪꓴꓽ ꓡ ꓟꓴ ꓡ ꓠˍ ꓟ ꓐꓱ ꓶ ꓓꓵꓽ ꓙ ꓢꓲ ꓬꓰˍ ꓟ ꓥ ꓪ=
ꓢꓲꓺ ꓒꓽ ꓬꓰ-ꓢꓴ ꓡꓰ ꓟꓸ ꓟꓲꓽ ꓚˍ ꓟ ꓠꓯꓸꓼ ꓗꓪ ꓬꓲ ꓠꓬ ꓬꓲꓻ ꓙꓬ ꓡꓰ ꓐꓰ ꓞꓳ ꓤꓽ ꓔꓯ ꓢꓯꓸ ꓡꓰ ꓝꓲˍ ꓟ ꓬꓲ ꓢꓯꓸ ꓥˍ ꓡꓳ= ꓑꓸ ꓑꓸ ꓐꓰ ꓜꓽ ꓪꓳ ꓡꓳꓸ ꓪꓳ ꓡꓰ ꓐꓰ ꓢꓯꓼ ꓟꓬ ꓖꓶ ꓢꓴ ꓥˍ ꓡꓳ= ꓬꓲ ꓠꓬ ꓠꓬꓲ ꓟꓳ ꓓꓴˍ ꓟꓲ ꓥˍ ꓡꓳ꓾ ꓐꓰ (ꓬꓳ-ꓦ꓿4ꓽ13-14ꓹ ꓬꓳ-ꓦ꓿6ꓽ 48ꓹ ꓬꓳ-ꓦ꓿8ꓽ12) ꓗꓪ ꓕꓱ ꓡꓰ ꓐꓳ ꓔ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓬ ꓙꓲˍ ꓟ ꓮꓸ ꓣꓳ ꓡꓳꓸ ꓒꓽ ꓥˍ ꓡꓳ ꓐꓯˍ ꓟ ꓔꓯ ꓟꓸ ꓖꓶ ꓗꓷꓳ= ꓬꓲ ꓠꓬ ꓞꓳ ꓤꓽ ꓮꓽ ꓙꓵꓽ ꓔꓯ ꓢꓯꓼ ꓟꓬ ꓟꓶ ꓠ, ꓟ ꓐꓲ ꓜꓲꓼˍ ꓟ ꓢꓯꓼ ꓟꓬ ꓔꓯ ꓘꓳꓹ ꓣꓴ ꓟꓶ ꓠ, ꓟ ꓡˍ ꓟ ꓥ ꓡꓳ꓾ (ꓬꓳ-ꓦ 10ꓽ 10) ꓗꓪ ꓕꓱ ꓡꓰ ꓐꓯ ꓔ ꓡꓳ=
