ꓮ‐ꓕꓲ‐ꓬꓼ ꓡꓳ ꓒꓱ ꓠꓬ ꓮ ꓟꓬ, ꓔꓶ. ꓗꓪ ꓐ, ꓡꓳ꓿ ꓟꓬꓽ ꓠꓬꓲ ꓠꓬ (ꓝꓲ‐ꓓꓴ꓿11ꓽ20) ꓗꓪ “ꓮ‐ꓕꓲ‐ꓬꓼ ꓗꓪ ꓛꓲ ꓡ ꓕꓯ ꓦꓲ‐ꓡꓲ ꓡ ꓞꓳ ꓐꓰ ꓫ. ꓕꓱ ꓡꓯ ꓘꓳ ꓢꓲ꓾ ꓢꓲ ꓒ ꓬꓰ‐ꓢꓴ ꓟ. ꓟꓲꓽ ꓚ ꓟ. ꓖꓶˍ ꓡꓳ꓾” ꓐꓰ ꓐꓳ ꓔ ꓡꓳ꓿ ꓮ‐ꓕꓲ‐ꓬꓼ ꓐꓯ ꓟ ꓡꓳ ꓒꓱ ꓕꓱ ꓕꓲ ꓘꓴ ꓗꓪ ꓡꓳ. ꓟꓳꓻˍ ꓡꓳ꓿
ꓮ‐ꓕꓲ‐ꓬꓼ ꓡꓳ ꓒꓱ ꓔꓯ ꓠꓬ ꓖꓣꓰꓰꓗ ꓐꓯˍ ꓟ ꓦꓲ‐ꓡꓲ ꓥꓳꓽ ꓗꓪ ꓐꓰ Antiókheia ꓐꓰ ꓐꓯ ꓡꓳ꓿ ꓕꓱ ꓟ ꓠꓬ ꓦꓲ‐ꓡꓲ ꓞꓳ ꓤ ꓐꓴ ꓡꓳ ꓒꓱ ꓐꓰꓽ ꓕꓲ ꓟ ꓥ ꓡꓳ꓿ ꓡꓳ ꓒꓱ ꓕꓱ ꓟ ꓔꓯ Orontes ꓬꓲꓻ ꓟ ꓗꓪ ꓔꓶ ꓔ ꓟ ꓡꓳ ꓒꓱ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓠꓬ ꓔꓴ‐ꓣ‐ꓗꓲ ꓗꓴꓷꓼ Antakya ꓡꓳ ꓒꓱ ꓒ ꓕꓲ ꓗꓪ ꓙꓳˍ ꓟ ꓕꓲ ꓔꓶ. ꓥ ꓡꓳ꓿
ꓡꓳ ꓒꓱ ꓕꓱ ꓟ ꓔꓯ ꓠꓬ ꓢꓲ ꓒ ꓬꓰ‐ꓢꓴ ꓟꓽ ꓛꓲ ꓡ ꓕꓯ ꓐꓚ 400 ꓘꓳꓼ ꓛꓲ ꓕꓯ Celeucus (1) Nicator ꓪ ꓔꓲ. ꓡꓰ ꓔꓶ ꓔ ꓟ ꓥ ꓡꓳ꓿ ꓡꓳ ꓒꓱ ꓕꓱ ꓟ ꓠꓬ ꓟꓵꓽ ꓔꓯ ꓢꓲ ꓥˍˍ ꓟꓲ꓾ ꓟꓯꓼ ꓓꓶꓽ ꓡꓯ ꓘꓳ ꓕꓲ ꓛꓱꓽ ꓗꓪ ꓥˍ ꓟꓲ꓾ ꓶꓻ ꓡꓯꓼ ꓟꓬꓱꓽ ꓬꓰ ꓖꓴ ꓕꓲ ꓒꓳ, ꓗꓪ ꓥˍ ꓟꓲ ꓮ. ꓓꓲꓽ ꓙꓲꓻ ꓖꓴ ꓙꓳˍ ꓟ ꓥ ꓡꓳ꓿ ꓡꓳ ꓒꓱ ꓕꓱ ꓟ ꓠꓯꓸꓼ ꓗꓪ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳꓽ ꓪꓳꓽ ꓒꓬꓽ ꓗꓪ ꓗꓶ ꓜꓽˍ ꓟ ꓗꓶ ꓫꓵꓽ ꓗꓶ ꓙꓰꓽ ꓶꓻ ꓡꓯꓼ ꓟꓴˍ ꓟ ꓥ ꓢꓲ ꓠꓬꓲ꓾ ꓕꓱ ꓕꓲ ꓘꓴ ꓗꓪ ꓠꓬ ꓰꓴꓣꓳꓑꓰ ꓐꓰ ꓮꓢꓲꓮ ꓔꓯ ꓝ. ꓔ ꓟ ꓢꓲꓡꓗ ꓣꓳꓮꓓ ꓐꓰ ꓐꓯ ꓟ ꓐꓵꓽ ꓚ ꓚꓱ, ꓐꓰ ꓕꓱ ꓡꓰ ꓐꓰ ꓐꓳ ꓔ ꓟ ꓚ ꓚꓱ, ꓕꓱ ꓟ ꓔꓯ ꓕꓱ ꓕꓲ ꓘꓴ ꓗꓪ ꓙ ꓡꓰˍ ꓫꓵꓽ ꓥ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲꓺ ꓣꓳꓬꓮꓡ ꓣꓳꓮꓓ ꓐꓯˍ ꓟ ꓪ ꓔꓲ. ꓐꓴ ꓕꓲ ꓗꓴꓷꓼ ꓡꓰ ꓕꓲ ꓗꓴꓷꓼ ꓝ. ꓡꓯ ꓘꓳˍ ꓟ ꓚ ꓚꓱ, ꓓꓽ ꓟ ꓙꓳˍ ꓟ ꓥ ꓡꓳ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓟꓽ ꓛꓲ ꓡ ꓢꓰꓽ ꓕꓯ ꓐꓚ 63 ꓘꓳꓼ ꓗꓪ ꓛꓲ Seleucid Empire ꓐꓯˍ ꓟ ꓗꓴꓷꓼ ꓮ ꓟꓬ, ꓟ ꓔꓯ Seleucid ꓪ ꓔꓲ. ꓡꓰ ꓙꓵꓽˍ ꓟ ꓡꓳ ꓒꓱ ꓠꓯꓸꓼ ꓗꓪ ꓟꓽ ꓓꓻ ꓬꓲ ꓚꓰ ꓡꓳ ꓒꓱ ꓕꓲ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓐꓚ 63 ꓘꓳꓼ ꓗ ꓠꓯ. ꓢꓲ ꓗꓪ ꓠꓬ ꓣꓳ‐ꓟ ꓪ ꓔꓲ. ꓐꓴ ꓡꓰ ꓢꓰꓼ ꓧꓪ. ꓡꓰ ꓓꓶꓽ ꓧꓪ. ꓡꓰ ꓢꓲ ꓠꓬꓲ꓾ ꓣꓳ‐ꓟ ꓪ ꓔꓲ. ꓐꓴ ꓙꓵꓽˍ ꓟ ꓙꓵ, ꓛꓲ ꓡˍ ꓡꓳ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓗ ꓠꓯ. ꓢꓲ ꓗꓪ ꓮꓓ 300‐400 ꓘꓳꓼ ꓠꓬꓲꓽ ꓗꓴ. ꓚꓸꓼ ꓗꓪ ꓛꓲ꓾ ꓣꓳ‐ꓟ ꓪ ꓔꓲ. ꓐꓴ ꓡꓰ ꓙꓵꓽˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓕꓲ ꓙꓵ, ꓗꓪ ꓠꓬ ꓣꓳ‐ꓟ ꓪ ꓔꓲ. ꓐꓴ ꓡꓯꓽ ꓒꓯ, ꓗꓪ ꓙꓳˍ ꓟ ꓡꓳ ꓒꓱ ꓓꓽ ꓟ ꓡꓳ ꓒꓱ ꓓꓽ ꓟ ꓕꓲ ꓟ ꓥ ꓡꓳ꓿
ꓡꓳ ꓒꓱ ꓕꓱ ꓟ ꓠꓬ ꓣꓳ‐ꓟ ꓪ ꓔꓲ. ꓐꓴ ꓕꓲ ꓞꓲꓼ ꓗꓪ (26) ꓔꓶ. ꓔꓯ ꓙꓵꓽ ꓔꓶ. ꓕꓲ ꓟ ꓥ ꓡꓳ꓿ ꓖꓳ ꓟ ꓡꓰ ꓐꓰ ꓕꓲ ꓡꓰ, ꓕꓱ ꓕꓲ ꓘꓴ ꓗꓪ ꓦꓲ‐ꓡꓲ ꓬꓴ‐ꓔ ꓡ ꓞꓳ ꓐꓴ ꓐꓱ ꓶ ꓟꓽ ꓓꓻ ꓬꓲ ꓚꓰ ꓕꓲ ꓔꓶ.ˍ ꓟꓲ ꓥ ꓡꓳ꓿ ꓕꓱ ꓟ ꓠꓬ ꓮ ꓓꓲꓽ ꓬꓳ. ꓚꓵˍ ꓟ ꓡꓳ ꓒꓱ ꓥ ꓐꓯ ꓢꓲ꓾ ꓐꓶꓻ ꓓꓳ ꓕꓲ ꓛꓱꓽ ꓐꓰ ꓟꓰꓓꓲꓔꓰꓣꓲꓮꓠ ꓬꓲꓻ ꓡꓳ ꓐꓱ ꓬꓲ ꓘꓶꓽ ꓗꓪ ꓙꓳˍ ꓟ ꓡꓳ ꓒꓱ ꓐꓴ ꓔꓯ ꓛꓳꓽ ꓠ, ꓟ꓾ ꓡꓳ. ꓠ, ꓟ ꓐꓱ ꓶ ꓣꓳ‐ꓟ ꓪ ꓔꓲ. ꓐꓴ ꓐꓱ ꓶ ꓟꓽ ꓓꓻ ꓬꓳ. ꓚꓵˍ ꓟ ꓡꓳ ꓒꓱ ꓕꓲ ꓟ ꓥ ꓡꓳ꓿ ꓡꓳ ꓒꓱ ꓕꓱ ꓟ ꓠꓬ 2100 ꓰ‐ꓗ ꓗꓪ ꓛꓲ ꓪꓴꓽˍ ꓟ ꓡꓳ ꓒꓱ ꓥ ꓢꓲ ꓠꓬꓲ꓾ ꓡꓲ. ꓩꓴ ꓕꓲ ꓩꓴ ꓠꓬ ꓪ ꓙꓵꓽ ꓥ ꓢꓲ꓾ ꓣꓳ‐ꓟ ꓪ ꓔꓲ. ꓐꓴ ꓠꓬ ꓪ ꓙꓵꓽ ꓗꓪ ꓚꓳ ꓡꓳ ꓡꓳ ꓕꓴꓽ ꓦˍ ꓟ ꓡꓳ ꓒꓱ ꓥ ꓡꓳ꓿
ꓮ‐ꓕꓲ‐ꓬꓼ ꓡꓳ ꓒꓱ ꓠꓬ ꓙꓲ‐ꓢꓴ ꓢꓲ ꓤ ꓐꓴ ꓐꓱ ꓶ ꓢꓷ. ꓠ ꓔ ꓟ ꓕꓲ ꓔꓶ.ˍ ꓟꓲ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓚꓧꓣꓲꓢꓔꓲꓮꓠ ꓐꓯ ꓟ ꓬꓲ ꓪꓴ. ꓔꓴ ꓡˍ ꓟ ꓠꓬ ꓕꓱ ꓕꓲ ꓘꓴ ꓗꓪ ꓚꓳ. ꓥ ꓟ ꓑꓶ. ꓓꓴ ꓥ ꓡꓳ꓿ ꓮ‐ꓕꓲ‐ꓬꓼ ꓡꓳ ꓒꓱ ꓗꓪ ꓚꓳ. ꓙꓲ‐ꓢꓴ ꓢꓲ ꓤ ꓐꓴ ꓐꓯ ꓢꓲ ꓠꓬꓲ꓾ ꓬꓲ ꓟ. ꓟꓲꓽ ꓠꓬ ꓙꓲ‐ꓢꓴ ꓗ ꓠꓯ. ꓢꓲ ꓗꓪ ꓖꓼ ꓢꓴ ꓐꓯ ꓟ ꓬꓲ ꓟ. ꓟꓲꓽ ꓗꓪ ꓚꓳ. ꓬꓲ ꓪꓴ. ꓔꓴ ꓡˍ ꓟ ꓔꓯ ꓡꓳ. ꓟꓳꓻˍ ꓡꓳ꓿ ꓕꓱ ꓕꓲ ꓘꓴ ꓠꓬ ꓦꓲ‐ꓡꓲ ꓬꓴ‐ꓔ ꓡ ꓞꓳ ꓐꓴˍ ꓐꓰ ꓦꓲ‐ꓡꓲ ꓡ ꓞꓳ ꓐꓴ ꓠꓬ ꓦꓻ ꓕꓲ ꓒꓳ, ꓗꓪ ꓟꓬꓽ ꓡ ꓐꓷ, ꓡ ꓠ, ꓟ ꓐꓱ ꓶ ꓮ ꓓꓲꓽ ꓬꓳ. ꓚꓵˍ ꓟ ꓕꓲ ꓔꓶ. ꓥ ꓡꓳ꓿
ꓕꓱ ꓟ ꓠꓬ ꓢꓲ‐ꓣꓲ‐ꓬ ꓞꓳ ꓤ ꓐꓴ ꓐꓱ ꓶ ꓟꓽ ꓓꓻ ꓬꓳ. ꓚꓵˍ ꓟ ꓡꓲ ꓔꓶ. ꓗꓪ ꓚꓳ. ꓕꓲ ꓔꓶ. ꓥ ꓡꓳ꓿ Augustus ꓙꓵꓽˍ ꓟ ꓕꓲ ꓝꓲ. ꓗꓪ ꓠꓬ ꓞꓳ ꓤ 200.000 ꓞꓲ ꓔꓬ, ꓟ ꓡꓳ ꓒꓱ ꓓꓽ ꓟ ꓕꓲ ꓟ ꓥ ꓡꓳ꓿ ꓗ ꓠꓯ. ꓠꓬ ꓟꓵꓽ ꓙꓴꓽ ꓚꓵ, ꓠꓬꓲ꓾ ꓟꓯꓼ ꓢꓰꓼ ꓡꓯ ꓘꓳ ꓓꓶꓽ ꓡꓯ ꓘꓳ ꓗꓷ ꓡꓰ ꓢꓲ ꓠꓬꓲ꓾ ꓡꓳ ꓒꓱ ꓕꓱ ꓟ ꓠꓬ ꓐꓬ ꓡꓰ ꓫꓵꓽ ꓥ ꓡꓳ꓿ ꓡꓳ ꓒꓱ ꓕꓱ ꓟ ꓔꓯ ꓠꓬ ꓮꓓ 637 ꓘꓳꓼ ꓕꓯ ꓮꓣꓮꓐ ꓞꓳ ꓤ ꓐꓴ ꓡꓰ ꓓꓶꓽ ꓧꓪ. ꓡꓰ ꓢꓰꓼ ꓧꓪ. ꓡꓰ ꓢꓲ ꓠꓬꓲ ꓡꓳ ꓒꓱ ꓔꓯ ꓙꓵꓽ ꓗꓷ ꓟ ꓥ ꓡꓳ꓿
ꓖꓳ ꓡꓱ ꓢꓲ ꓠꓬꓲ ꓮꓓ 962 ꓘꓳꓼ ꓗꓪ ꓠꓬ Byzantine ꓪ ꓔꓲ. ꓥ ꓟ Nikephoros 2 Phokas ꓡꓰ ꓕꓱ ꓟ ꓔꓯ ꓝꓮꓲ ꓕꓲ ꓧꓪ, ꓓꓶꓽ ꓧꓪ. ꓡꓰ ꓢꓰꓼ ꓧꓪ. ꓡꓰ ꓢꓲ ꓠꓬꓲ꓾ ꓕꓱ ꓕꓲ ꓘꓴ ꓠꓬ Byzantine ꓐꓯ ꓟ Orthodox ꓐꓴ ꓙꓵꓽ ꓡ ꓟ ꓕꓲ ꓤꓶꓻ ꓗꓷ ꓡꓰꓳ꓿ ꓖꓳ ꓟ ꓡꓰꓽ ꓟꓽ ꓞꓲ Islam ꓙꓵꓻ ꓠꓲ, ꓠꓯꓸꓼ ꓗꓪ ꓟ Muslim ꓐꓴˍ ꓐꓰ ꓙꓲ‐ꓢꓴ ꓢꓲ ꓤ ꓐꓴ ꓢꓰꓼ ꓡꓯ ꓘꓳˍ ꓟ 1908 ꓘꓳꓼ ꓛꓲ ꓕꓯ ꓮꓣꓮꓐ ꓐꓴ ꓝꓮꓲ ꓕꓲ ꓧꓪ, ꓧꓪ. ꓡꓰ ꓢꓲ ꓮ ꓟꓶ ꓗꓪ ꓛꓲ ꓕꓱ ꓕꓲ ꓘꓴ ꓗꓪ ꓠꓬ Muslim ꓐꓴ ꓟꓬꓽ ꓟ ꓗꓴꓷꓼ ꓗꓷ ꓡꓰ ꓫꓵꓽ ꓥ ꓡꓳ꓿ ꓠꓬꓲ. ꓠꓬꓲ ꓟ ꓕꓲ ꓞꓲꓼ ꓗꓪ ꓠꓬ ꓞꓳ ꓤ ꓟꓽ ꓔꓬ, ꓟ ꓡꓳ ꓒꓱ ꓐꓰꓽ ꓐꓰ ꓕꓱ ꓡꓱ ꓙꓳˍ ꓢꓲ ꓠꓬꓲ꓾ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓟ ꓞꓳ ꓤ ꓮ ꓟꓬ, ꓚꓳꓻ ꓡˍ ꓟ ꓬꓲ ꓔꓶ. ꓕꓲ ꓔꓶ. ꓥ ꓡꓳ꓿ ꓕꓱ ꓟ ꓠꓬ ꓮ‐ꓕꓲ‐ꓬꓼ ꓡꓳ ꓒꓱ ꓚ ꓟꓲꓽ ꓥ ꓡꓳ꓿
