ꓠꓲ, ꓠꓵˍ ꓟ ꓮ ꓬꓲꓼ ꓠꓬꓲ ꓤ ꓮ ꓐꓽ ꓮ ꓟ ꓐꓴꓳ꓾
ꓘ‐ꓣꓲ‐ꓢ‐ꓟꓮꓢ ꓓꓳꓽ ꓐꓯ ꓠ, ꓟ ꓐꓱ ꓶ ꓮ ꓟꓬ, ꓘꓳꓼ ꓛꓲ ꓓꓳꓽ ꓕꓱ ꓟ ꓔꓯ ꓡꓰꓽ ꓐꓯ ꓔꓬ ꓪˍ ꓥꓳ꓿ ꓕꓱ ꓟ ꓠꓬ “Glory to God in the Highest, and Peace on Earth” “ꓟꓴꓽ ꓗꓪ ꓗꓪ ꓪꓴ‐ꓢ ꓔꓯ ꓐꓬꓱꓼ ꓡꓱꓼ ꓡꓱꓼ ꓟ ꓙꓳ ꓝꓲ꓾ ꓟꓲ ꓠꓯ ꓗꓪ ꓥˍ ꓟꓲ ꓢꓲ ꓡꓲ ꓟ ꓙꓳ ꓝꓲ”
ꓘ‐ꓣꓲ‐ꓢ‐ꓟꓮꓢ ꓑꓮꓲꓽ ꓛꓲ ꓡˍ ꓕ ꓑꓳꓸꓼ ꓠꓵꓻ ꓠꓲ,꓾ ꓢꓲ ꓡꓲ ꓟ꓾ ꓗ, ꓛꓲˍ ꓟ ꓐꓯ ꓟ ꓐꓯ ꓘꓶꓽ ꓐꓴ ꓠꓬ ꓟꓲꓽ ꓦꓲ ꓗꓪ ꓮʼ ꓚꓳꓻ ꓔꓬ ꓡꓳ꓿ ꓣꓳ ꓗꓳ ꓡꓳ ꓗꓪ ꓕꓱ ꓟ ꓠꓬ ꓐꓯ ꓘꓶꓽ ꓕꓲ ꓟˍ ꓡꓰꓽ ꓟꓽ ꓥ ꓥ꓾ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓲ, ꓟ ꓘꓴꓽ ꓗꓪ ꓠꓵꓻ ꓠꓲ,꓾ ꓢꓲ ꓡꓲˍ ꓟ ꓐꓰ ꓗ, ꓛꓲꓽˍ ꓟ ꓔꓯ ꓒ ꓐꓲꓺ ꓘꓳ ꓣꓴ ꓟꓶ ꓡꓰ ꓝꓲ꓾ ꓐꓰ ꓧꓶ. ꓕꓯ ꓪꓽ ꓘꓴ ꓙ ꓖꓶˍ ꓡꓳ꓿
2024 ꓘꓳꓼ ꓡꓳ, ꓬꓰ ꓢꓲ 2025 ꓘꓳꓼ ꓘꓴꓽ ꓗꓪ ꓥꓳ ꓡꓳ. ꓓꓴ ꓒ ꓐꓲꓺ ꓐꓰ ꓓꓵꓽ ꓙꓰ ꓐ ꓡ ꓠ, ꓟ ꓐꓱ ꓶ꓾ 1 ꓦ 1 ꓠꓬꓲ ꓗꓪ ꓛꓲ ꓡ ꓟ (58) ꓧꓪ, ꓟ ꓟꓵꓽ ꓗꓳ, ꓓꓵ ꓓꓵ ꓢꓲ ꓡꓲ ꓟ ꓠꓬꓲ ꓐꓱ ꓶ ꓔꓲ ꓒ ꓪ ꓔꓲ. ꓝꓣꓮꓠꓚꓲꓢ ꓖꓶꓽ ꓩꓴ ꓡˍ ꓟ ꓕꓳꓽ ꓶ ꓔꓯ ꓠꓴ ꓪ ꓔꓯ ꓐꓯ ꓟ. ꓖꓶ ꓠꓲ, ꓫꓵˍ ꓡꓳ꓿ ꓕꓳꓽ ꓶ ꓕꓱ ꓟ ꓔꓯ “Forgive us our trespassed: grant us your peace – ꓥꓪ ꓠꓴꓽ ꓛꓬ ꓗꓷ ꓟ ꓔꓯ ꓖꓼ ꓖꓶ ꓡꓯ꓿ ꓥꓪ ꓠꓴꓽ ꓔꓯ ꓢꓲ ꓡꓲ ꓟ ꓖꓶꓽ ꓡꓯ” ꓐꓰ ꓬꓲ ꓕꓲꓽ ꓟꓴꓽ ꓖꓶ ꓔ ꓡꓳ꓿
ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ 2025 ꓘꓳꓼ ꓔꓯ ꓙꓴꓐꓲꓡꓰꓰ ꓘꓳꓼ ꓑꓮꓲꓽ ꓬꓰˍ ꓥꓳ꓿ 2000 ꓘꓳꓼ ꓕꓯ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓙꓴꓐꓲꓡꓰꓰ ꓑꓮꓲꓽ ꓓꓽ ꓟ ꓔꓯ ꓬꓰ ꓗꓷꓳ꓿ ꓙꓴꓐꓲꓡꓰꓰ ꓘꓳꓼ ꓔꓯ ꓬꓲ ꓦꓬꓼ ꓠꓬꓲ ꓔꓲ. ꓢꓲ ꓑꓮꓲꓽ ꓬꓰˍ ꓟ ꓠꓬ ꓗꓳ. ꓡ ꓟ ꓮ ꓟꓬ, ꓔꓴ ꓘꓳꓼ ꓛꓲ ꓕꓯ ꓪꓴ‐ꓢ ꓬꓲ ꓑ ꓫꓬ ꓐꓴ ꓥ ꓟ ꓬꓲ‐ꓢꓷ‐ꓡꓰ ꓐꓴ ꓡꓰ ꓑꓮꓲꓽ ꓔꓯ ꓬꓰ ꓪꓴ. ꓔꓴ ꓗꓷꓳ꓿ ꓙꓴꓐꓲꓡꓰꓰ ꓘꓳꓼ ꓐꓯ ꓢꓲ ꓐꓯ ꓑꓶ ꓗꓷˍ ꓟ ꓡꓰ ꓡ ꓞꓳ ꓮ ꓙꓵꓽ ꓐꓱ ꓶ ꓝꓴꓲ. ꓖꓼ ꓖꓶˍ ꓟ ꓐꓰ ꓩꓴ ꓗꓷˍ ꓟ ꓥ ꓡꓳ꓾ ꓐꓰ ꓢꓷ. ꓔ ꓖꓴˍ ꓡꓳ꓿ ꓙꓴꓐꓲꓡꓰꓰ ꓘꓳꓼ ꓥꓳ ꓐꓰ ꓐꓯ ꓑꓶ ꓗꓷ ꓠꓬ ꓪꓴ‐ꓢ ꓬꓲ ꓙꓲꓻ ꓔꓱ,ˍ ꓟ ꓔꓯ ꓝꓮꓲ ꓫꓬ ꓔꓱ,ˍ ꓟ ꓐꓯ ꓟ ꓔꓯ ꓮ ꓙꓵꓽ ꓢꓷ. ꓔ ꓡꓳ꓿ ꓟꓬꓽ ꓠꓬꓲ ꓠꓬ ꓫ. ꓢꓴ ꓐꓴ ꓐꓰ ꓠꓬꓲ. ꓞ, ꓟ ꓟꓶ ꓢꓴ ꓐꓴ ꓐꓱ ꓶ ꓩꓴ ꓗꓷ ꓟꓶˍ ꓟ ꓓꓳꓽ ꓔꓯ ꓐꓯ ꓑꓶ ꓖꓶˍ ꓟ ꓥ ꓡꓳ꓿ ꓙꓴꓐꓲꓡꓰꓰ ꓘꓳꓼ ꓑꓮꓲꓽ ꓔꓯ ꓬꓰˍ ꓕꓯ ꓮ ꓡꓲ ꓕꓲ ꓣꓳˍ ꓟꓲ ꓠꓬꓲ. ꓤꓲꓻ ꓟꓶ ꓠ, ꓟ ꓐꓱ ꓶ ꓒꓬꓱꓽ ꓟꓳ ꓡˍ ꓟ ꓟꓽ ꓥ ꓐꓯ ꓟ ꓔꓯ ꓓꓵꓽ ꓙ ꓟꓶ ꓡ ꓝꓲ ꓢꓲ꓾ ꓣꓳ ꓮ ꓙꓵꓽ ꓠꓬ ꓕꓲ ꓣꓳˍ ꓟ ꓪꓴ‐ꓢ ꓬꓲ ꓤꓽ ꓮ ꓟꓲꓽ ꓐꓴ ꓥ ꓡꓳ꓾ ꓮ ꓬꓲꓼ ꓠꓬꓲ ꓤ ꓐꓴ ꓥ ꓡꓳ ꓐꓯ ꓟ ꓔꓯ ꓢꓷ. ꓡꓰ ꓝꓲˍ ꓟ ꓥ ꓡꓳ꓿
ꓙꓴꓐꓲꓡꓰꓰ ꓘꓳꓼ ꓔꓯ ꓗ, ꓛꓲꓽ ꓛꓲꓽ ꓡꓰꓽ ꓬꓰ ꓐ ꓡ ꓠ, ꓟ ꓐꓱ ꓶ꓾ ꓝꓴꓲ. ꓖꓼ ꓖꓶˍ ꓟ ꓐꓰ ꓥꓳ ꓡꓳ.ˍ ꓟ ꓔꓯ ꓡꓵ, ꓫꓴ ꓗꓷ ꓢꓲ ꓞꓳ ꓙꓳ ꓢꓯ. ꓔꓬ ꓝꓲ ꓠ, ꓟ ꓐꓱ ꓶ “ꓥꓪ ꓠꓴꓽ ꓛꓬ ꓗꓷ ꓟ ꓔꓯ ꓖꓼ ꓖꓶ ꓡꓯ” ꓐꓰ ꓐꓯ ꓠ ꓔ ꓟ ꓥ ꓡꓳ꓿ ꓟꓬꓽ ꓠꓬꓲ ꓟꓲ ꓠꓯ ꓔꓯ ꓠꓻ ꓡꓰ ꓝꓲˍ ꓟ꓾ ꓟꓵꓽ ꓘꓳꓼ ꓔꓯ ꓐꓬ ꓡꓰ ꓝꓲˍ ꓟ꓾ ꓟꓲ ꓠꓯ ꓒꓵꓽ ꓡꓳ ꓔꓯ ꓢꓰꓼ ꓡꓯ ꓘꓳ ꓓꓴ ꓐꓱ ꓶˍ ꓡꓰꓽ ꓣꓱꓽˍ ꓟ꓾ ꓠꓱ. ꓐꓯ ꓕꓲ ꓖ ꓗꓪ ꓐꓰ ꓚꓵ. ꓡ ꓢꓴ ꓐꓴ ꓔꓯ ꓞꓳ ꓤ ꓟꓽ ꓚꓬ, ꓟ꓾ ꓕꓱ ꓟꓬ ꓫꓵꓽ ꓛꓬ ꓡꓰ ꓟ ꓝꓴꓲ. ꓐꓱ ꓶ ꓣꓳ ꓐꓴ ꓠꓬ ꓖꓼ ꓖꓶꓽ ꓟꓶ ꓠ, ꓟ ꓓꓰꓽ ꓠ ꓔ ꓡꓳ꓿ ꓟꓲ ꓠꓯ ꓐꓰ ꓡ ꓞꓳ ꓥꓴꓻ ꓢꓯꓼ ꓔꓯ ꓠ ꓠ, ꓢꓲ꓾ ꓫꓬ, ꓔꓱ, ꓠ ꓔ ꓟ ꓔꓯ ꓫꓬ, ꓔꓱ, ꓠ, ꓟ ꓔꓲ ꓒ ꓪ ꓔꓲ. ꓡꓰ ꓕꓵꓼ ꓪ ꓖꓶ ꓔ ꓡꓳ꓿
ꓔꓲ ꓒ ꓪ ꓔꓲ. ꓡꓰ꓾ ꓒꓳ, ꓡꓶ. ꓫꓬ, ꓔꓱ,ˍ ꓟ ꓗꓪ ꓕꓲ ꓣꓳ ꓕꓲ ꓣꓳ ꓡꓰꓽ ꓫꓬ, ꓔꓱ, ꓟ ꓢꓶ. ꓟꓽ ꓞꓲ “Culture ꓮ ꓕꓯ ꓟꓲ ꓬꓰ ꓔꓬ ꓟ ꓚꓱ, ꓐꓴ” ꓐꓰ “Structure ꓫꓬ, ꓔꓶ ꓚꓱ, ꓐꓴ” ꓔꓯ ꓫꓬ, ꓔꓱ, ꓠ, ꓟ ꓓꓰꓽ ꓔ ꓡꓳ꓿ ꓕꓱ ꓡꓱ ꓬꓰˍ ꓕꓯ ꓡꓰꓽ ꓮ ꓟꓬ, ꓘꓳꓼ ꓕꓶ ꓞ,ˍ ꓟ ꓫꓬ, ꓔꓱ, ꓚꓱ, ꓔꓯ ꓟꓶ ꓐ ꓡˍ ꓟ ꓥ ꓡꓳ꓿
ꓔꓲ ꓒ ꓪ ꓔꓲ ꓠꓬ ꓕꓲ ꓗꓴꓷꓼ ꓐꓰ ꓕꓲ ꓗꓴꓷꓼ ꓙ ꓡꓯ ꓘꓳ,ˍ ꓟ ꓗꓪ ꓢꓷ. ꓔ ꓠꓯ, ꓟ ꓬꓲ ꓚꓱ, (2) ꓚꓱ, ꓔꓯ ꓖꓴ ꓟ. ꓖꓶ ꓔ ꓡꓳ꓿ ꓬꓲ ꓪꓴ. ꓕꓲ ꓠꓬ꓾ ꓟꓲ ꓠꓯ ꓗꓪ ꓙꓳˍ ꓟ ꓒꓵꓽ ꓡꓳ ꓐꓴ ꓠꓬ ꓡ ꓞꓳ ꓕꓲ ꓐꓱ ꓐꓱ ꓶˍ ꓡꓰꓽ ꓟꓽ ꓥ꓾ ꓡ ꓞꓳ ꓮ ꓙꓵꓽ ꓐꓱ ꓶ ꓥ ꓡꓳ꓿ ꓣꓳ ꓐꓴ ꓐꓳ ꓶ ꓙꓳˍ ꓟ ꓠꓬ ꓪꓴ‐ꓢ ꓡꓰ ꓖꓶ ꓔ ꓟ ꓣꓱꓽ ꓛꓰꓽ ꓥ ꓡꓳ꓾ ꓐꓯ ꓟ ꓔꓯ ꓚꓲ. ꓔ ꓠ ꓗ, ꓡꓳ꓿ ꓖꓳ ꓡꓱ ꓠꓬ ꓡ ꓞꓳ ꓮ ꓟꓬ, ꓐꓰ ꓐꓱ ꓡꓯ ꓘꓳ ꓗꓴ. ꓡˍ ꓥꓳ꓿ ꓠꓬꓲꓽ ꓚꓱ, ꓕꓲꓽ ꓚꓱ, ꓠꓬ꓾ ꓟꓵꓽ ꓗꓳ, ꓓꓵ ꓓꓵ ꓒꓴ ꓐꓵꓻ ꓞ, ꓟ ꓫꓵꓽ ꓪꓴ ꓥ ꓡꓳ꓿ ꓟꓵꓽ ꓗꓳ, ꓓꓵ ꓓꓵ ꓒꓴ ꓐꓵꓻ ꓞ, ꓐꓯˍ ꓟ ꓠꓬ ꓐꓳ ꓶ ꓙꓳˍ ꓟ ꓗꓴꓷꓼ ꓐꓴ ꓠꓬ ꓫ.ˍ ꓟ ꓗꓴꓷꓼ ꓐꓴ ꓔꓯ ꓧꓪ. ꓜꓽ ꓔꓬ ꓟ ꓥ ꓡꓳ꓿ ꓚꓲ. ꓛꓬ ꓶꓻ ꓡꓯꓼ ꓟꓬꓱꓽ ꓪꓴꓽ ꓡ ꓟꓴ ꓡ ꓠ, ꓟ ꓐꓱ ꓶ ꓫ.ˍ ꓟ ꓗꓴꓷꓼ ꓗꓪ ꓙꓳˍ ꓟ ꓒꓵꓽ ꓡꓳ ꓐꓴ ꓐꓰ ꓞꓳ ꓤ ꓢꓯꓼ ꓪ ꓔꓯ ꓬꓲ ꓪ ꓠꓲ, ꓫꓵˍ ꓟ ꓡꓰ ꓙꓵꓽ ꓔꓬ ꓟ ꓥ ꓡꓳ꓿
ꓫꓵꓽ ꓪꓴ ꓕꓱ ꓟ ꓗꓪ ꓐꓰ ꓡꓲ, ꓓꓳ ꓙꓰ ꓠ, ꓟ ꓠꓬ ꓣꓳ ꓮ ꓙꓵꓽ ꓠꓬ ꓪꓴ‐ꓢ ꓬꓲ ꓤ ꓠꓱ ꓐꓴ ꓥ ꓡꓳ꓾ ꓢꓯ. ꓔꓬ ꓠ, ꓟ ꓐꓱ ꓶ ꓕꓲ ꓣꓳ ꓐꓰ ꓕꓲ ꓣꓳ ꓦ ꓡꓱ ꓔꓬ ꓪˍ ꓡꓳ꓾ ꓞꓳ ꓤ ꓮ ꓙꓵꓽ ꓔꓯ ꓶꓻ ꓙꓳˍ ꓡꓳ ꓐꓯˍ ꓟ ꓔꓯ ꓘꓳ ꓣꓴˍ ꓕꓯ ꓡꓰꓽ ꓟꓶ ꓐ ꓡˍ ꓟ ꓥ ꓡꓳ꓿
ꓔꓲꓺ ꓒ ꓪ ꓔꓲ. ꓝꓣꓮꓠꓚꓲꓢ ꓡꓯꓼ ꓕꓲ ꓣꓱꓽ ꓬꓰ ꓠ, ꓟ ꓐꓱ ꓶ ꓬꓲ ꓚꓱ, (3) ꓚꓱ, ꓔꓯ ꓓꓰꓽ ꓔ ꓡꓳ꓿
ꓬꓲ ꓪꓴ. ꓠꓬ꓾ ꓙꓴꓐꓲꓡꓰꓰ ꓘꓳꓼ ꓦꓬꓼ ꓠꓬꓲ ꓗꓪ ꓔꓲꓺ ꓒ ꓪ ꓔꓲ. ꓬꓳ‐ꓦ ꓒꓳ‐ꓡꓳ (2) ꓡꓰ ꓓꓰꓽ ꓔ ꓟ ꓕꓲ ꓡꓰ, ꓟꓲ ꓠꓯ ꓗꓴꓷꓼ ꓐꓴ ꓔꓯ ꓙꓳꓺ ꓗꓽ ꓔꓬ ꓟ ꓟꓵꓽ ꓗꓳ, ꓓꓵ ꓓꓵ ꓐꓵꓻ ꓞ, ꓟ ꓔꓯ ꓮ ꓔꓲ. ꓤ ꓟꓽ ꓥ ꓠꓬ꓾ ꓮ ꓙꓵꓽ ꓡꓱꓸꓼ ꓖꓽ ꓖꓶ ꓗꓷ꓿ ꓟꓬꓽ ꓠꓬꓲ ꓮ ꓘꓶ. ꓫ. ꓢꓲ ꓮ ꓡꓲ ꓬꓰˍ ꓟꓲ ꓡꓲ. ꓖꓶ ꓟꓽ ꓐ ꓡ ꓟ ꓐꓵꓻ ꓞ, ꓟ ꓔꓯ ꓖꓽ ꓖꓶ ꓩꓴꓻ ꓖꓶ ꓗꓷ꓿
ꓠꓬꓲꓽ ꓙꓰꓽ ꓕꓲ ꓙꓰꓽ ꓠꓬ꓾ ꓞꓳ ꓤ ꓢꓯꓼ ꓟꓬ ꓔꓯ ꓒꓵꓽ꓿ ꓡ ꓞꓳ ꓕꓲ ꓣꓳ ꓦꓵꓻ ꓓꓳ ꓡˍ ꓕꓯ ꓡꓰ ꓪꓴ. ꓔꓴ ꓢꓲ ꓫꓵꓻˍ ꓗꓪ ꓛꓲ ꓬꓲ ꓒꓵꓽ ꓙꓳ ꓙꓳ ꓡꓰꓽ ꓞꓳ ꓙꓳ ꓐ ꓡ ꓠ, ꓟ ꓬꓰ ꓙ ꓖꓶ ꓡꓯ꓿ ꓮ ꓡꓲ ꓕꓲ ꓣꓳ ꓬꓲ ꓟꓲ ꓙꓬ ꓢꓲ ꓟ ꓤꓶꓻ ꓔꓯˍ ꓟꓲ ꓛꓲ ꓕꓲꓽ ꓓꓴ ꓕꓽ ꓗꓷ ꓡꓰ ꓝꓲ꓿ ꓟꓬꓽ ꓠꓬꓲ ꓞꓳ ꓡꓯ. ꓕꓲ ꓣꓳ ꓠꓬ ꓬꓲ ꓟꓲ ꓙꓬꓽ ꓢꓲ ꓟ ꓦꓬꓼ ꓠꓬꓲ ꓟꓽ ꓙꓳ ꓗꓷ ꓡꓰ ꓠꓬ ꓥꓳ ꓡꓳ. ꓓꓴ ꓐꓰ ꓢꓯ. ꓔꓬ ꓠ, ꓟ ꓠꓬ ꓒꓬꓱꓼ ꓡ ꓟꓽ ꓓꓻ꓿ ꓖꓳ ꓟ ꓑꓶ. ꓓꓴ ꓓꓰꓽ ꓠꓲ, ꓫꓵˍ ꓟ ꓠꓬ “ꓫꓵꓻ ꓝꓲˍ ꓟ ꓝꓴꓲ. ꓒꓵꓽ” ꓔꓯ ꓒꓬ, ꓩꓴ ꓗꓷ꓿ “ꓫꓵꓻ ꓝꓲˍ ꓟ ꓝꓴꓲ. ꓒꓵꓽ” ꓠꓬ ꓞꓳ ꓤ ꓢꓯꓼ ꓟꓬ ꓔꓯ ꓬꓲ ꓒꓵꓽ ꓞꓰꓻ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲ ꓞꓳ ꓤ ꓕꓲ ꓣꓳ ꓖꓼ ꓖꓶ ꓟꓶˍ ꓟ ꓐꓰ ꓚꓲ. ꓛꓬ ꓖꓳ ꓓꓱꓽ ꓔꓯ ꓒꓳ, ꓡꓶ. ꓠ, ꓟ ꓙꓵꓽ ꓪ ꓔꓯ ꓥˍ ꓟꓲ ꓐꓬ ꓡꓰ ꓝꓲˍ ꓟ ꓥ ꓡꓳ꓿
(3) ꓚꓱ, ꓕꓲ ꓚꓱ, ꓓꓰꓽ ꓘꓶꓽ ꓠꓬ ꓔꓲ ꓒ ꓪ ꓔꓲ. ꓒꓳ‐ꓡꓳ(5) ꓐꓰ ꓔꓲꓺ ꓒ ꓪ ꓔꓲ ꓐꓰ‐ꓠ‐ꓓꓲ ꓐꓴ ꓓꓰꓽ ꓔ ꓟ ꓡꓰ ꓐꓰ꓾ ꓢꓰꓼ ꓡꓯ ꓘꓳ ꓠ, ꓟ ꓐꓱ ꓶ ꓒꓴ ꓣꓱꓽˍ ꓟ ꓢꓶ. ꓟꓽ ꓞꓲ ꓞꓳ ꓤ ꓪꓴꓽ ꓡ ꓟꓴ ꓡ ꓠ, ꓟ ꓐꓱ ꓶ ꓪ ꓜꓲ ꓣꓱꓽ ꓠ, ꓟ ꓥ ꓡꓳ꓿ ꓫ.ˍ ꓟ ꓗꓴꓷꓼ ꓐꓴ ꓗꓪ ꓦꓰꓼ ꓟꓷꓼˍ ꓟ ꓔꓯ ꓠꓲ. ꓡꓰ ꓝꓲ ꓠ, ꓟ꓾ ꓢꓷ. ꓠꓲ, ꓐꓱ ꓶ ꓐꓰ ꓟꓵꓽ ꓔꓯ ꓟꓽ ꓐꓬ ꓡꓰ ꓝꓲ ꓠ ꓗꓽ ꓕ. ꓠ, ꓟ ꓐꓱ ꓶ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓒꓴ ꓧꓳꓽ ꓢꓲ ꓣꓱꓽ ꓠ, ꓟ ꓕꓵꓼ ꓪ ꓖꓶˍ ꓡꓳ꓿
ꓕꓱ ꓓꓰꓽ ꓘꓶ (3) ꓚꓱ, ꓔꓯ ꓘꓳ ꓣꓴ ꓛꓳ ꓫꓱꓽ ꓢꓴ ꓐꓴ ꓠꓬ ꓮ ꓫꓵ. ꓫꓵ ꓟ ꓢꓲ ꓡꓲ ꓟ ꓔꓯ ꓟꓶ ꓡꓰˍ ꓥꓳ꓿ ꓟꓴꓽ ꓖꓪ 85ꓽ10 ꓗꓪ “ꓫꓱ. ꓤˍ ꓟ ꓐꓰ ꓔꓱ,ˍ ꓟ ꓜꓲꓻ ꓡꓯ ꓘꓳ ꓡꓰꓳ꓿ ꓙꓲ ꓫꓬ ꓟˍ ꓐꓰ ꓢꓲ ꓡꓲ ꓟˍ ꓟꓲ ꓐꓳꓼ ꓡꓯ ꓘꓳ ꓗꓷꓳ꓿” ꓢꓲꓽ ꓫꓬ ꓕꓳꓽ ꓶ ꓝꓲ. ꓕꓱ ꓟ ꓡꓰ ꓐꓰ ꓢꓲ ꓡꓲˍ ꓟ ꓔꓯ ꓣꓳ ꓚꓵ ꓚꓵ ꓟꓶ ꓡˍ ꓥꓳ꓿
ꓝ. ꓢꓲ ꓔꓲꓺ ꓒ ꓪ ꓔꓲ. ꓠꓬ ꓣꓳ ꓠꓲ, ꓟ ꓗꓪ ꓚꓲ. ꓛꓬ ꓐꓱ ꓶˍ ꓡꓰꓽ ꓓꓵꓽ ꓙˍ ꓟ꓾ ꓛꓴꓽ ꓙꓳ ꓡꓯ ꓘꓳˍ ꓟ ꓐꓰ ꓟꓲꓽ ꓙꓬ ꓢꓲ ꓐꓱ ꓶ ꓠꓲ, ꓫ. ꓟꓬ ꓫ.ˍ ꓟ ꓔꓯ ꓡꓳ ꓗꓷ ꓢꓲ꓾ ꓖꓶ ꓠꓲ, ꓒꓴˍ ꓟ꓾ ꓖꓼ ꓖꓶˍ ꓟ ꓐꓰ ꓥꓳ ꓡꓳ.ˍ ꓟ ꓔꓯ ꓓꓱꓼ ꓔ ꓠ, ꓟ ꓓꓰꓽˍ ꓡꓳ꓿
ꓔꓲꓺ ꓒ ꓪ ꓔꓲ. ꓡꓰ ꓐꓳ ꓔ ꓟ ꓪꓽ ꓘꓴ ꓓꓴ ꓗꓪ ꓐꓰ ꓬꓲ ꓟꓶꓽ ꓢꓰꓼ ꓓꓴ ꓥꓳ꓿
ꓳ ꓢꓲ ꓒꓽꓳ꓾ ꓥꓪ ꓠꓴꓽ ꓠꓬ ꓠꓱ. ꓐꓯ ꓢꓴ ꓔꓯ ꓖꓼ ꓖꓶˍ ꓟ ꓡꓰ ꓐꓰ ꓥꓪ ꓠꓴꓽ ꓛꓬꓻ ꓗꓷ ꓟ ꓝꓴꓲ. ꓐꓴ ꓔꓯ ꓖꓼ ꓖꓶ ꓡꓯ꓿
‐ ꓚꓲ. ꓛꓬ ꓠꓲ, ꓟ ꓗꓪ ꓙꓳˍ ꓟ ꓟꓽ ꓙꓲꓻ ꓟ ꓔꓯ ꓡꓳ ꓗꓷ ꓢꓴ ꓐꓴ
‐ ꓚꓲ. ꓛꓬ ꓬꓲꓼ ꓤ ꓠꓬꓲ ꓤ ꓐꓴ ꓡꓰ ꓐꓵꓻ ꓞ, ꓟ ꓐꓴ ꓔꓯ ꓥꓳ ꓡꓳ.ˍ ꓟ ꓠꓯꓸꓼ ꓗꓪ ꓖꓽ ꓖꓶ ꓢꓴ ꓐꓴ
‐ ꓢꓲ ꓒ ꓠꓴ ꓕꓯꓽ ꓢꓲ ꓗꓪ ꓙꓳ ꓔꓬ, ꓟ ꓚꓲ. ꓛꓬ ꓐꓵꓻ ꓞ, ꓟ ꓐꓴ ꓔꓯ ꓣꓷꓠ. ꓠ, ꓟ ꓟꓽ ꓙꓳꓺ ꓢꓴ ꓐꓴ
‐ꓫ. ꓢꓴ ꓐꓴ ꓬꓲ ꓪ ꓥꓴꓻ ꓢꓯꓼ ꓘꓴꓽ ꓠꓯꓸꓼ ꓗꓪ ꓐꓰ ꓚꓲ. ꓛꓬ ꓠ. ꓑꓳ ꓔꓯ ꓟꓽ ꓚꓵ. ꓔ ꓢꓴ ꓐꓴ ꓕꓱ ꓡꓱ ꓫꓵꓽ ꓔꓯ ꓢꓲ ꓒ ꓕꓲ ꓣꓳˍ ꓡꓰꓽ ꓖꓶ ꓐ ꓡˍ ꓟ ꓢꓲ ꓡꓲˍ ꓟ ꓔꓯ ꓝꓴꓲ. ꓖꓼ ꓖꓶˍ ꓟ ꓠꓯꓸꓼ ꓗꓪ ꓙꓳ ꓔꓬ, ꓟ ꓥꓪ ꓠꓴꓽ ꓔꓯ ꓖꓶ ꓙ ꓡꓯ ꓢꓲ ꓒꓽꓳ꓿
