ꓕꓱ ꓕꓲ ꓠꓽ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓓꓴ ꓚꓱ, ꓔꓯ ꓐꓯ ꓟꓳ. ꓖꓶˍ ꓟ ꓙꓵ, ꓗꓪ꓾ ꓣꓳ ꓗꓳ ꓡꓳ ꓗꓪ ꓢꓻ ꓢꓻ ꓡꓰꓽ ꓪ ꓓꓻˍ ꓟ ꓐꓬꓽ ꓔꓯ‐ꓑ‐ꓬ ꓬꓲꓻ ꓙꓲꓻ ꓖꓴ ꓙꓳˍ ꓟ ꓚꓱ, ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓐꓬꓽ ꓬꓲꓻ ꓐꓰ ꓔꓯ‐ꓑ‐ꓬ ꓬꓲꓻ ꓓꓳꓻˍ ꓟ ꓗꓪ ꓐꓰ ꓟꓶ ꓡˍ ꓟ ꓙꓲꓻ ꓖꓴ
ꓐꓬꓽ ꓔꓯ‐ꓑ‐ꓬ‐ꓬꓲꓻ ꓐꓯˍ ꓟ ꓠꓬ ꓐꓬꓽ ꓬꓲꓻ ꓐꓰ꓾ ꓔꓯ‐ꓑ‐ꓬ‐ꓢꓶꓽ ꓬꓲ ꓬꓲꓻ ꓐꓰ ꓞꓼ ꓐꓳ ꓮ ꓔꓲ. ꓤ ꓔꓯ꓾ ꓬꓲꓻ ꓡꓱ ꓥ ꓠꓬ ꓬꓲꓻ ꓙꓬ ꓐꓰ ꓑꓯ. ꓗꓷ ꓢꓲ ꓬꓲ ꓬꓲꓻ ꓫꓬ, ꓔ ꓟ ꓔꓯ ꓐꓯˍ ꓟ ꓥ ꓡꓳ꓿ ꓪꓴꓽ ꓧꓶˍ ꓟ ꓔꓯ ꓓꓻ ꓡꓰ ꓝꓲˍ ꓟˍ ꓡꓰ ꓐꓰ ꓪꓴ. ꓟꓶ ꓟꓶ ꓪꓴ. ꓓꓵ ꓠꓻˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲ ꓐ ꓡˍ ꓡꓳ꓿
ꓓꓳꓻ ꓟꓲˍ ꓟ ꓓꓳꓻ ꓙꓲˍ ꓟ ꓐꓬꓽ ꓔꓯ‐ꓑ‐ꓬ ꓬꓲꓻ ꓔꓯ ꓓꓳꓻ ꓖꓶˍ ꓠꓬ ꓕꓱ ꓡꓱ ꓫꓵꓽ ꓙꓲꓻ ꓖꓴ ꓙꓳˍ ꓟ ꓥ ꓡꓳ꓿
ꓦꓰꓼ ꓟ ꓙꓲꓺ ꓢꓻˍ ꓡꓳ꓾
ꓐꓬꓽ ꓔꓯ‐ꓑ‐ꓬ ꓬꓲꓻ ꓠꓬ ꓜꓽ ꓓꓴ ꓙꓲꓺ ꓢꓻ ꓡꓰ ꓠ ꓬꓰ ꓙ ꓖꓶˍ ꓡꓳ꓿ ꓜꓽ ꓓꓴ ꓔꓯ ꓙꓲꓺˍ ꓟ ꓮꓚꓲꓓ ꓔꓯ ꓓꓳ ꓡ ꓝꓲˍ ꓡꓳ꓿ ꓦꓰꓼ ꓟ ꓐꓰ ꓬꓲ ꓪꓴꓻ ꓠꓬ ꓜꓽ ꓓꓴ ꓗꓪ ꓐꓰ ꓟꓶˍ ꓟ ꓬꓲ ꓢꓯꓼ ꓐꓴ ꓔꓯ ꓛꓵꓼ ꓣꓴˍ ꓟ ꓢꓯꓼ ꓪꓽ ꓠꓬꓲ ꓡ ꓝꓲˍ ꓡꓳ꓿
ꓖꓳ ꓡꓱ ꓠꓬꓲ ꓕꓲ ꓙꓰꓽ ꓙꓰꓽ ꓜꓽ ꓗꓷ ꓗ ꓠꓯ. ꓦꓰꓽ ꓛꓲꓽ ꓠꓬ ꓔꓰ, ꓔꓰ, ꓡꓰꓽ ꓗ, ꓕꓯ ꓐꓬꓽ ꓔꓯ‐ꓑ‐ꓬ ꓬꓲꓻ ꓔꓯ ꓓꓳꓻ ꓖꓶ ꓐ ꓡˍ ꓡꓳ꓿ ꓦꓰꓽ ꓛꓲꓽ ꓞꓶˍ ꓟ ꓔꓯ ꓥˍ ꓟꓲ ꓢꓻ ꓡꓰ ꓝꓲˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓬꓲ ꓓꓳꓼ ꓐꓴ ꓔꓯ ꓫꓬꓻ ꓡꓰ ꓝꓲˍ ꓡꓳ꓾
ꓐꓬꓽ ꓔꓯ‐ꓑ‐ꓬ ꓬꓲ ꓙꓲꓻ ꓖꓴ ꓙꓳˍ ꓟ ꓝꓮꓲ ꓕꓲ ꓚꓱ, ꓠꓬ꓾ ꓖꓳ ꓓꓱꓽ ꓠꓯꓸꓼ ꓗꓪ ꓓꓵˍ ꓟ ꓬꓲ ꓓꓳꓼ ꓐꓴ ꓔꓯ ꓢꓷ. ꓓꓻ ꓓꓻ ꓡꓰꓽ ꓣꓴ ꓓꓳ ꓖꓶ ꓐ ꓡˍ ꓡꓳ꓿
ꓧꓪꓽ ꓗꓴ, ꓙꓲꓻ꓾ ꓫꓵꓽ ꓒꓬ.꓾ ꓢꓯꓼ ꓦ ꓚ ꓗꓪ ꓙꓳ ꓔꓬ ꓟ ꓬꓲ ꓓꓳꓼ ꓐꓴ ꓔꓯ ꓣꓴ ꓦ ꓖꓶ ꓐ ꓡˍ ꓡꓳ꓿
ꓖꓳ ꓓꓱꓽ ꓠꓯꓸꓼ ꓗꓪ ꓢꓯꓼ ꓙꓳ ꓡ ꓝꓲˍ ꓡꓳ꓾
ꓣꓳ ꓖꓳ ꓓꓱꓽ ꓗꓪ ꓢꓯꓼ ꓟꓽ ꓙꓳ ꓗꓷ ꓡꓰˍ ꓕꓯ ꓠꓻ ꓤ ꓒꓬꓽ ꓤ ꓮ ꓟꓬ, ꓓꓵꓽ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓙꓬꓻ ꓓꓵꓽ ꓡꓰ ꓢꓻˍ ꓟ ꓟꓽ ꓙꓳ ꓙꓳ꓾ ꓖꓳ ꓓꓱꓽ ꓢꓯꓼ ꓙꓳ ꓠ, ꓟ ꓐꓱ ꓶ ꓠꓬ ꓐꓬꓽ ꓔꓯ‐ꓑ‐ꓬ ꓔꓯ ꓓꓳꓻ ꓖꓶ ꓐ ꓡˍ ꓡꓳ꓿ ꓕꓲ ꓫꓵꓽ ꓫꓵꓽ ꓐꓰ ꓟꓽ ꓕꓽ ꓟ ꓔꓯ ꓥˍ ꓟꓲ ꓓꓻ ꓡ ꓠ, ꓟ ꓐꓱ ꓶ ꓬꓰ ꓙ ꓖꓶ ꓐ ꓡˍ ꓡꓳ꓿
ꓡꓰ‐ꓐꓰ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾
ꓡꓰ ꓐꓰ ꓠꓻˍ ꓕꓯ ꓐꓬꓽ ꓔꓯ‐ꓑ‐ꓬ ꓬꓲꓻ ꓓꓳꓻ ꓖꓶˍ ꓟˍ ꓟꓲ ꓙꓲꓻˍ ꓟ ꓕꓲ ꓚꓱ, ꓥ ꓡꓳ꓿ ꓐꓮꓚꓔꓰꓣꓲꓮ ꓐꓴ ꓔꓯ ꓖꓼ ꓓꓳ ꓐ ꓡ ꓢꓲ꓾ ꓢꓯꓼ ꓦ ꓚ ꓚꓱ, ꓗꓪ ꓐꓶꓽ ꓓꓲꓻ ꓓꓵꓽ ꓡꓰˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲ ꓐ ꓡˍ ꓡꓳ꓿
ꓡꓰ ꓐꓰ ꓠꓻˍ ꓕꓯ ꓐꓬꓽ ꓔꓯ‐ꓑ‐ꓬ ꓬꓲꓻ ꓗꓪ ꓚꓬꓻ(ꓛꓳꓽ ꓒꓲꓻ) ꓧꓳꓽ ꓖꓶˍ ꓠꓬ ꓪ ꓜꓲ ꓙꓲꓻˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓫꓵꓽ ꓓꓯꓻˍ ꓟ ꓔꓯ ꓥˍ ꓟꓲ ꓞꓰꓻ ꓡꓰ ꓝꓲ ꓐ ꓡˍ ꓡꓳ꓾
ꓐꓬꓽ ꓔꓯ‐ꓑ‐ꓬ ꓬꓲꓻ ꓠꓬ ꓫꓵꓽ ꓓꓯꓻ ꓢꓴ ꓐꓴ ꓐꓱ ꓶ ꓮ ꓘꓶ. ꓙꓲꓻˍ ꓟ ꓓꓳꓻ ꓓꓴ ꓕꓲ ꓙꓰꓽ ꓥꓳ꓿ ꓪꓴ. ꓓꓵ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓟˍ ꓡꓰ ꓐꓰ ꓫꓵꓽ ꓓꓯꓻˍ ꓟ ꓔꓯ ꓥˍ ꓟꓲ ꓫꓵꓽ ꓢꓯꓼ ꓞꓰꓻ ꓡꓰ ꓝꓲ ꓐ ꓡˍ ꓡꓳ꓿
ꓖꓳ ꓟ ꓡꓰꓽ ꓟꓽ ꓞꓲꓺ ꓐꓬꓽ ꓔꓯ‐ꓑ‐ꓬ ꓬꓲꓻ ꓠꓬ ꓠꓲ, ꓟ ꓔꓯ ꓔꓬ, ꓢꓻ ꓝꓲ ꓢꓲ ꓠꓬꓲ꓾ ꓪꓳꓽ ꓓꓲꓻ ꓗꓪ ꓟ ꓡꓳ ꓓꓰ ꓐꓴ ꓔꓯ ꓧꓶ ꓡꓰ ꓝꓲ ꓐ ꓡˍ ꓡꓳ꓿ ꓫꓵꓽ ꓒꓬ. ꓔꓯ ꓥˍ ꓟꓲ ꓔꓬ, ꓢꓻ ꓡꓰ ꓝꓲˍ ꓡꓳ꓿
ꓣꓳ ꓖꓳ ꓓꓱꓽ ꓠꓬ ꓡꓲꓽ ꓡꓲꓽ ꓡꓰꓽ ꓗ, ꓢꓲ꓾ ꓢꓯꓼ ꓟꓽ ꓙꓳ ꓟ ꓡꓰ ꓗ, ꓕꓯ꓾ ꓬꓲꓻ ꓡꓱꓻ ꓕꓲ ꓗꓶ. ꓗꓪ ꓔꓯ‐ꓑ‐ꓬ ꓢꓶꓽ ꓕꓲ ꓐꓶꓽ ꓛꓲ ꓔꓯ ꓬꓲ ꓬꓲꓻ ꓛꓵ, ꓧꓳꓽ ꓗꓷ ꓢꓲ꓾ ꓐꓬꓽ ꓬꓲꓻ ꓕꓲ ꓬꓲ, ꓖꓴ ꓛꓲ ꓧꓳꓽ ꓗꓷ ꓢꓲ ꓓꓳꓻ ꓖꓶˍ ꓠꓬ꓾ ꓢꓰ ꓢꓰ ꓡꓰꓽ ꓗꓷ ꓡꓰˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓖꓳ ꓟ ꓪꓴ. ꓠꓬꓲ ꓐꓬꓽ ꓔꓯ‐ꓑ‐ꓬ ꓠꓬ ꓣꓳꓽ ꓖꓳ ꓓꓱꓽ ꓐꓱ ꓶ ꓮ ꓘꓶ. ꓙꓲꓻˍ ꓟ ꓓꓳꓻ ꓓꓴ ꓕꓲ ꓙꓰꓽ ꓥ ꓡꓳ꓾ ꓐꓰ ꓐꓯ ꓖꓶ ꓠꓲ, ꓫꓵˍ ꓡꓳ꓿
