ꓮ ꓙꓵꓽ ꓢꓴ ꓔꓯ “Happy Christmas ꓗ, ꓛꓲꓽˍ ꓟ ꓬꓰ‐ꓢꓴ ꓦꓵꓻ ꓑꓮꓲꓽ” ꓐꓰ ꓐꓯ ꓢꓲ ꓧꓪ. ꓧꓪ. ꓐꓯ ꓩꓴ ꓡˍ ꓥꓳ꓿ ꓠꓬꓲ. ꓠꓬꓲ ꓮ ꓓꓲꓽ ꓗ, ꓛꓲꓽˍ ꓟ ꓦꓬꓼ ꓠꓬꓲ ꓕꓲꓽ ꓠꓬꓲ ꓗꓪ ꓣꓳꓽ ꓥꓳ ꓡꓳ. ꓔꓬ, ꓟ ꓢꓲꓺ ꓒ ꓪꓴ‐ꓢ ꓬꓲ ꓤ ꓔꓲ. ꓢꓲ ꓒ ꓬꓰ‐ꓢꓴ ꓠꓬ ꓠꓬꓲ. ꓠꓬꓲ ꓞꓳ ꓒꓬꓱꓽ ꓟꓳꓻ ꓡꓺꓳ꓿ ꓗ, ꓛꓲꓽ ꓡꓯ꓿ ꓠꓴ ꓐꓱ ꓶ ꓥꓪ ꓐꓱ ꓶ ꓬꓲ ꓠꓬ ꓟꓲ ꓠꓯ ꓕꓱ ꓟ ꓗꓪ ꓬꓯꓼ ꓡꓺꓳ꓿ ꓬꓲ ꓟꓬꓱ ꓠꓬ ꓲ‐ꓟ‐ꓠꓴ‐ꓡꓰ ꓐꓰ ꓐꓯˍ ꓟ ꓕꓲꓽ ꓡꓰ,꓾ ꓬꓲ ꓠꓬ ꓣꓳ ꓐꓰ ꓕꓲ ꓡꓰ, ꓔꓬ ꓡꓳ꓾ ꓗ, ꓛꓲꓽ ꓡꓯ꓿
ꓠꓬꓲ. ꓠꓬꓲ ꓗ, ꓛꓲꓽˍ ꓟ ꓠꓬꓲ ꓕꓲ ꓠꓬꓲ ꓗꓪ ꓮ ꓙꓵꓽ ꓢꓴ ꓔꓯ ꓟ. ꓟꓲꓽ ꓚ ꓟ. ꓖꓶ ꓠ, ꓫꓵˍ ꓡꓳ꓿ ꓕꓱ ꓟ ꓠꓬ ꓔꓯ ꓐꓬꓱꓽ ꓟ. ꓟꓲꓽ ꓕꓲ ꓟ ꓥ ꓡꓳ꓿ ꓠꓱ ꓫꓳ. ꓟ. ꓗꓪ ꓚꓵ ꓚꓵ ꓒꓬꓱꓼ ꓗꓷ ꓟ ꓟꓽ ꓥ꓿ ꓖꓳ ꓡꓱ ꓐꓯˍ ꓥ ꓟꓲ ꓣꓳꓽ ꓐꓱ ꓶ ꓣꓳ ꓤꓶꓻ ꓐꓱ ꓶ ꓢꓳ ꓣꓴ ꓓꓴ ꓮ ꓟꓬꓹ ꓙꓳˍ ꓟ꓾ ꓘ-ꓣꓲ-ꓢ-ꓟꓮꓢ ꓑꓮꓲꓽ ꓬꓲꓸ ꓬꓲ ꓢꓲ ꓔꓯ ꓟꓬꓽ ꓠꓬꓲ ꓟꓳꓸ ꓖꓶˍ ꓟ ꓑꓶꓸ ꓓꓴ ꓐꓯ ꓟꓳꓸ ꓖꓶ ꓠꓲꓹ ꓫꓵˍ ꓡꓳ=
ꓮ ꓠꓱ ꓕꓯ ꓮ ꓘꓶꓸ ꓫꓸˍ ꓟ ꓮ ꓣꓳ ꓡꓳꓸ ꓢꓴ ꓕꓲ ꓣꓳ ꓙꓳˍ ꓡꓳ= ꓬꓲ ꓠꓬ ꓞꓳ ꓫꓵꓼ ꓤ꓾ ꓮ ꓟꓶ ꓕꓯ ꓒꓬꓱꓽ ꓟꓳꓻ ꓡ ꓟ ꓢꓲ ꓒ ꓬꓰ-ꓢꓴ ꓔꓯ ꓖꓶ ꓓꓴ ꓡꓯꓼ ꓫꓴ ꓕꓲ ꓟˍ ꓟꓲ ꓟꓽ ꓙꓳ= ꓬꓳ-ꓢꓷ ꓐꓰ ꓟ-ꓡꓲ ꓠꓬ ꓮ ꓠꓬꓲꓽ ꓡꓳ ꓕꓴ ꓗꓪ ꓔꓬ ꓢꓲ ꓠꓬꓲ ꓢꓴ ꓡꓰ ꓖꓶ ꓡˍ ꓟ ꓡꓯꓼ ꓫꓴ ꓕꓲ ꓟ ꓡꓰ ꓕꓲ ꓟ ꓔꓯ ꓘꓳ ꓣꓴ ꓔꓬ ꓡꓳ= ꓞꓳ ꓤ ꓮ ꓟꓬꓹ ꓥ ꓟꓲ ꓬꓲ ꓪ ꓡꓯꓼ ꓫꓴ ꓔꓯ ꓬꓰ-ꓢꓴ ꓐꓱ ꓶ ꓐꓯ ꓢꓲ ꓠꓬꓲ꓾ ꓢꓲꓽ ꓫꓬ ꓟ-ꓡꓲ-ꓬ ꓐꓰ ꓬꓳ-ꓢꓷ ꓔꓯ ꓖꓶˍ ꓡꓳ=
ꓡ ꓞꓳ ꓮ ꓟꓬꓹ ꓠꓬ ꓡꓯꓼ ꓫꓴ ꓖꓶ ꓔꓬ ꓟ ꓑꓶꓸ ꓓꓴ ꓮ ꓢꓳ ꓕꓯ ꓞꓳ ꓫꓸ ꓤ ꓡꓯꓼ ꓫꓴ ꓖꓶ ꓟꓽ ꓐ ꓡ ꓢꓴ ꓕꓲ ꓣꓳ ꓠꓬ ꓟꓬ ꓐꓲ ꓞꓰꓻ ꓢꓲ ꓠꓬꓲ ꓬꓲ ꓘꓶꓽ ꓗꓪ ꓡꓳꓸ ꓠꓬꓲ ꓔꓬ ꓡꓳ= ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓠꓬ ꓖꓶ ꓓꓴ ꓮ ꓫꓵꓽ ꓟꓲ ꓟꓽ ꓙꓳ ꓟ ꓑꓶꓸ ꓓꓴ ꓢꓴ ꓡꓰ ꓖꓶ ꓔꓬ ꓟ ꓔꓯ ꓡꓳꓸ ꓠꓬꓲ ꓔꓬ ꓡꓳ= ꓖꓳ ꓕꓯ ꓟ-ꓡꓲ-ꓬ ꓡꓰ ꓞꓳ ꓫꓸ ꓤ ꓖꓳ ꓕꓲ ꓣꓳ ꓔꓯ ꓘꓴꓻ ꓢꓲ ꓠꓬꓲ꓾ ꓞꓳ ꓫꓵꓼ ꓤ ꓬꓰ-ꓢꓴ ꓔꓯ ꓬꓯꓹ ꓔ ꓠꓹ ꓟ ꓐꓱ ꓶ ꓬꓲ ꓔꓯ ꓖꓶˍ ꓡꓳ= ꓮ ꓡꓲꓳ ꓐꓯ ꓠꓬ ꓮ ꓣꓳ ꓡꓳꓸ ꓤ ꓖꓳ ꓕꓲ ꓣꓳ ꓬꓲ ꓡꓯꓽ ꓒꓯꓹ ꓗꓪ ꓮ ꓫꓵꓽˍ ꓟꓲ ꓟꓽ ꓓꓹ ꓟ ꓑꓶꓸ ꓓꓴ ꓬꓲ ꓡꓯꓽ ꓒꓯꓹ ꓡꓯꓼ ꓕꓱꓽ ꓔꓬ ꓟ ꓑꓶꓸ ꓓꓴ꓾ ꓬꓲ ꓔꓯ ꓬꓰ-ꓢꓴ ꓖꓶ ꓔꓯꓹ ꓖꓶˍ ꓡꓳ= ꓬꓳ-ꓢꓷ ꓐꓰ ꓟ-ꓡꓲ ꓠꓬ ꓡꓯꓼ ꓫꓴ ꓘꓳ ꓣꓴ ꓠꓹ ꓟ ꓐꓱ ꓶ ꓡꓯꓽ ꓒꓯꓹ ꓡꓯꓼ ꓟꓽ ꓕꓱꓽ ꓟ ꓑꓶꓸ ꓓꓴ ꓤ ꓠꓱ ꓤ ꓔꓯ ꓬꓲ ꓔꓯ ꓔꓯꓹ ꓝꓲˍ ꓡꓳ=
ꓖꓳ ꓕꓯ ꓞꓳ ꓫꓸ ꓤ ꓮ ꓣꓳ ꓡꓳꓸ ꓒ ꓖꓳ ꓕꓲ ꓣꓳ ꓠꓬ ꓟꓵꓽ ꓚꓰꓼ ꓟꓲ ꓚꓰꓼ ꓢꓴ ꓬꓲ ꓡꓯꓽ ꓒꓯꓹ ꓗꓪ ꓔꓬ ꓡˍ ꓟ꓾ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓠꓬ ꓬꓲ ꓡꓯꓼ ꓚꓳꓸ ꓡꓯꓼ ꓖꓳꓼ ꓗꓪ ꓔꓬ ꓡ ꓟ ꓔꓯ ꓬꓲ ꓟꓶ ꓡꓰꓳ= ꓬꓲ ꓠꓬ ꓚꓵ ꓚꓵ ꓗꓹ ꓛꓲꓽ ꓡꓰ ꓢꓲ ꓠꓬꓲ꓾ ꓮ ꓡꓲ ꓥˍ ꓟꓲ ꓕꓱ ꓡꓱ ꓗꓹ ꓛꓲꓽˍ ꓟ ꓕꓲ ꓧꓪꓹˍ ꓟꓲ ꓟꓽ ꓔꓳꓹ ꓜꓳꓽ ꓠꓬꓲ= ꓖꓳ ꓡꓱ ꓠꓬꓲ ꓬꓲ ꓡꓰ ꓬꓰ-ꓢꓴ ꓤ ꓤ ꓔꓯ ꓪꓳꓻ ꓫꓳꓸ ꓢꓲ ꓠꓬꓲ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓟꓳꓸ ꓖꓶ ꓙꓰˍ ꓡꓳ=
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓸ ꓟꓲꓽ ꓠꓬ ꓕꓱ ꓟ ꓡꓰꓽ ꓥ ꓡꓳ= ꓠꓬꓲꓸ ꓠꓬꓲ ꓠꓴ ꓠꓬ ꓪꓴ-ꓢ ꓔꓯ ꓡꓯꓼ ꓫꓴ ꓓꓽ ꓪꓴꓸ ꓖꓶ ꓟꓽ ꓐ ꓡ ꓠꓬꓲ ꓠꓲꓹ ꓟ ꓫꓸ ꓔꓬ ꓡ= ꓠꓬꓲꓸ ꓠꓬꓲ ꓠꓴ ꓥꓪ ꓝꓴꓲꓸ ꓗꓪ ꓐꓰ ꓪꓴ-ꓢ ꓔꓯ ꓘꓳ ꓣꓴ ꓟꓽ ꓐ ꓡꓺꓳ꓾ ꓥꓪ ꓠꓲꓹ ꓟ ꓠꓬ ꓮ ꓘꓶꓸ ꓣꓳꓺˍ ꓡꓳ꓾ ꓐꓰ ꓐꓯ ꓢꓲ ꓠꓬꓲ ꓥꓴꓻ ꓔꓬ ꓡ= ꓕꓱ ꓡꓱ ꓥꓳ ꓐꓯˍ ꓠꓬ ꓠꓬꓲꓸ ꓠꓬꓲ ꓘ-ꓣꓲ-ꓢ-ꓟꓮꓢ ꓦꓬꓼ ꓠꓬꓲ ꓠꓬ ꓠꓴ ꓐꓱ ꓶ ꓥꓪ ꓐꓱ ꓶ ꓥ ꓡꓳ= ꓟꓴ ꓡꓳꓹ ꓬꓰˍ ꓟ ꓢꓲ ꓒ ꓪꓴ-ꓢ ꓠꓬ꓾ ꓬꓲ ꓠꓬ ꓮ ꓟꓴ ꓛꓲ ꓮ ꓪꓴ ꓛꓲ ꓙꓳˍ ꓥ ꓟꓲ ꓞꓳ ꓤ ꓠꓲꓹ ꓟ ꓠꓯꓸꓼ ꓗꓪ꓾ ꓞꓳ ꓤ ꓡꓯꓽ ꓒꓯꓹ ꓠꓯꓸꓼ ꓗꓪ ꓓꓵꓽ ꓡ ꓠꓹ ꓟ ꓐꓱ ꓶ ꓬꓲ ꓠꓬ ꓮꓸ ꓠꓬꓲꓽ ꓡꓳ ꓕꓴ ꓗꓪ ꓬꓲ ꓚꓲꓸ ꓛꓬ ꓬꓲ ꓣꓳꓺ ꓡꓰ ꓠꓹ ꓟ ꓐꓱ ꓶ꓾ ꓬꓲ ꓠꓬ ꓞꓳ ꓤ ꓒꓬꓱꓼ ꓡˍ ꓡꓳ=
ꓣꓳꓺˍ ꓟ ꓣꓳꓽ ꓠꓲꓹ ꓟ ꓗ ꓘꓶꓽ ꓗꓪ ꓓꓵꓽ ꓡ ꓠꓹ ꓟ ꓐꓱ ꓶ ꓣꓳ ꓡꓰ ꓐꓰ ꓬꓲ ꓠꓬ ꓞꓳ ꓤ ꓕꓲ ꓣꓳ ꓒꓬꓱꓼ ꓡꓺꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓠꓴ ꓥꓪ ꓗꓹ ꓛꓲꓽ ꓡꓯ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓠꓲꓹ ꓠꓵˍ ꓟ ꓑꓶꓸ ꓓꓴ ꓬꓲ ꓠꓬ ꓮ ꓘꓶꓸ ꓫꓸ ꓙꓵˍ ꓟ ꓒꓬꓱꓽ ꓟꓳꓻ ꓡˍ ꓟ ꓗꓪ ꓐꓰ ꓬꓲ ꓠꓬ ꓒꓬꓱꓽ ꓟꓳꓻ ꓡꓺꓳ= ꓕꓱ ꓟ ꓠꓬ ꓬꓲ ꓠꓲꓹ ꓡꓶꓽ ꓥ ꓡꓳ=
ꓞꓳ ꓫꓸ ꓕꓲ ꓣꓳ ꓡꓰ ꓐꓰ ꓒꓬꓱꓽ ꓟꓳꓻ ꓡ ꓠꓹ ꓟ ꓠꓬ ꓬꓲ ꓠꓲꓹ ꓡꓶꓽ ꓥ ꓡꓳ= ꓬꓲ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓥ ꓟ ꓑꓶꓸ ꓓꓴ ꓬꓲ ꓠꓲꓹ ꓫꓵˍ ꓠꓬ ꓬꓲ ꓠꓬ ꓞꓳ ꓐꓳ ꓦꓲꓻ ꓘꓴꓽ ꓠꓯꓸꓼ ꓗꓪ ꓒꓬꓱꓽ ꓟꓳꓻ ꓐ ꓡˍ ꓡꓳ= ꓖꓳ ꓡꓱ ꓐꓯˍ ꓥ ꓟꓲ ꓞꓳ ꓫꓸ ꓕꓲ ꓣꓳˍ ꓡꓰ ꓐꓰ ꓬꓲ ꓒꓬꓱꓽ ꓟꓳꓻ ꓡ ꓢꓲ ꓠꓬꓲ꓾ ꓠꓬꓲꓸ ꓠꓬꓲ ꓠꓴ ꓥꓪ ꓝꓴꓲꓸ ꓮ ꓙꓵꓽ ꓔꓯ ꓬꓲ ꓡꓰ ꓣꓴ ꓔꓯꓹ ꓙꓰ ꓖꓶˍ ꓥꓳ=
ꓖꓳ ꓡꓱ ꓠꓬꓲ ꓠꓴ ꓠꓲꓹ ꓟ ꓣꓳꓺˍ ꓟ꓾ ꓠꓲꓹ ꓟ ꓫꓸˍ ꓟ ꓬꓲ ꓫꓵꓽ ꓬꓲ ꓙꓰꓽ ꓮ ꓙꓵꓽ ꓔꓯ ꓢꓲ ꓒ ꓬꓰ-ꓢꓴ ꓔꓯ ꓡꓯꓼ ꓙꓱ ꓗꓷ ꓢꓲ ꓠꓬꓲ ꓞꓳ ꓙꓳ= ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓠꓴ ꓐꓱ ꓶ ꓥꓪ ꓐꓱ ꓶ ꓛꓲ ꓡꓺꓳ= ꓧꓮꓑꓑꓬ ꓚꓧꓣꓲꓢꓔꓟꓮꓢ ꓐꓯ ꓢꓲ ꓧꓪꓸ ꓧꓪꓸꓼ ꓐꓯ ꓩꓴ ꓡˍ ꓥꓳ= ꓗꓹ ꓛꓲꓽ ꓛꓲꓽ ꓡꓰꓽ ꓞꓳ ꓙꓳ ꓢꓲ ꓠꓬꓲ ꓕꓲ ꓑꓹ ꓤ ꓡꓰꓽ ꓟꓶ ꓔꓬ ꓟ ꓤꓶꓻ ꓕꓱ ꓟ ꓔꓯ ꓠꓲꓹ ꓡꓱ ꓡꓱ ꓠꓲꓹ ꓒꓴ ꓒꓴ ꓡꓰꓽ ꓞꓳ ꓙꓳ ꓙꓰ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=
