ꓢꓲꓺ ꓒ ꓡꓰ ꓟ. ꓔ ꓟ ꓪꓽ ꓘꓴ ꓓꓴ (Daily reflection)
ꓧꓪ. ꓧꓪ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 11ꓽ1‐4 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓙꓰ ꓢꓲ ꓠꓬꓲ ꓮ ꓡꓲ ꓐꓰ ꓪꓽ ꓘꓴ ꓠ, ꓟ ꓟ. ꓖꓶ ꓠ, ꓟ ꓠ ꓠꓬꓲˍ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓢꓲꓺ ꓒ ꓡꓰ ꓟ. ꓔ ꓟ ꓪꓽ ꓘꓴ ꓓꓴ ꓔꓯ ꓟ. ꓖꓶ ꓟ ꓥ ꓡꓳ꓿
ꓪꓽ ꓘꓴ ꓟ ꓠꓬ ꓟ ꓠꓬ ꓐ, ꓐ ꓪꓴ‐ꓢ ꓐꓰ ꓙꓻ ꓡꓯꓽ ꓘꓳ, ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓐ, ꓐ ꓪꓴ‐ꓢ ꓔꓯ ꓣꓳ ꓮ‐ꓐ ꓐꓰ ꓘꓴ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓪꓽ ꓘꓴ ꓐꓰ ꓐ, ꓐ ꓪꓴ‐ꓢ ꓔꓯ ꓣꓳ ꓮ‐ꓐ ꓐꓰ ꓙꓵꓻ ꓢꓲ ꓠꓬꓲ ꓣꓳ ꓕꓲ ꓤꓶꓻ ꓡꓱ ꓔꓯ ꓬꓲ ꓔꓯ ꓡꓯꓼ ꓙꓱ ꓠ, ꓟ ꓣꓳ ꓚꓵˍ ꓡꓳ꓿
ꓐ, ꓐ ꓪꓴ‐ꓢ ꓟꓬꓱꓺ ꓔꓯ ꓞꓳ ꓒꓵꓽ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓫ. ꓕꓱ ꓘꓶꓽ ꓗꓪ ꓐꓰ ꓟꓽ ꓞꓲ ꓐ, ꓐ ꓪꓴ‐ꓢ ꓔꓯ ꓓꓳ ꓟꓳ ꓠ, ꓟ ꓣꓳ ꓚꓵˍ ꓡꓳ꓿ ꓬꓲ ꓔꓯ ꓞꓳ ꓒꓵꓽ ꓠꓯ, ꓟ꓾ ꓬꓲ ꓔꓯ ꓠꓲ, ꓠꓵ ꓠ, ꓟ꓾ ꓬꓲ ꓔꓯ ꓬꓰ ꓙ ꓔꓳ, ꓙ ꓠ, ꓟ ꓐꓰ ꓬꓲ ꓟꓬꓱꓺ ꓔꓯ ꓫꓱ, ꓖꓶ ꓠ, ꓟ ꓥ ꓡꓳ꓿
ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱ ꓬꓯꓼ ꓟ ꓜ ꓓꓴ ꓖꓶ ꓜ ꓡꓯ ꓐꓰ ꓪꓽ ꓘꓴ ꓟ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓐ, ꓐ ꓪꓴ‐ꓢ ꓔꓯ ꓙꓵꓻ ꓠ, ꓟ ꓟ. ꓖꓶ ꓔ ꓡꓳ꓿
ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓦꓻ ꓜ ꓓꓴ ꓠꓬ ꓪꓴ‐ꓢ ꓐꓯ ꓘꓶꓽ ꓐꓰ ꓢꓲꓽ ꓫꓬ ꓖꓳ ꓓꓱ ꓔꓯ ꓘꓳ, ꓣꓴ ꓠ, ꓟ ꓣꓳ ꓥ ꓟ ꓥ ꓡꓳ꓿
ꓣꓳ ꓛꓬ ꓡꓰ ꓥꓳꓽ ꓡꓰ ꓝꓴꓲ ꓔꓯ ꓭ ꓠ, ꓟ ꓣꓳ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓪꓴ‐ꓢ ꓣꓱ ꓛꓰ ꓣꓱ ꓬꓯ ꓟ. ꓐꓰ ꓣꓳ ꓬꓰ ꓛꓬ ꓡꓰ ꓝꓴꓲ ꓔꓯ ꓐ, ꓐ ꓪꓴ‐ꓢ ꓔꓯ ꓭ ꓠ,ꓟ ꓪꓴ‐ꓢ ꓠꓲ, ꓒꓴ ꓡꓳ꓿ ꓪꓴ‐ꓢ ꓝꓴꓲ ꓔꓯ ꓓꓵ ꓙ ꓢꓲ ꓠꓬꓲ ꓬꓲ ꓠꓯ, ꓗꓪ ꓡ ꓠ, ꓟ ꓣꓳ ꓔꓯ ꓡꓳ. ꓔꓬ ꓟ ꓥ ꓡꓳ꓿
ꓣꓳ ꓔꓯ ꓛꓬ ꓡꓰ ꓢꓴ ꓔꓯ ꓥ ꓟꓲ ꓝꓴꓲ ꓖꓼ ꓖꓶ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓪꓴ‐ꓢ ꓡꓰ ꓣꓳ ꓝꓴꓲ ꓔꓯ ꓖꓼ ꓖꓶ ꓠ, ꓟ ꓶꓻ ꓓꓰ ꓢꓴ ꓠꓬ ꓢꓴ ꓡꓰ ꓛꓬ ꓡꓰ ꓟ ꓝꓴꓲ ꓔꓯ ꓥ ꓟꓲ ꓖꓼ ꓖꓶ ꓠ, ꓟ ꓣꓳ ꓚꓵˍ ꓡꓳ꓿
ꓣꓳ ꓠꓲ, ꓟ ꓗꓪ ꓟꓽ ꓙꓲ ꓟ ꓔꓯ ꓡꓰ ꓐꓲ ꓔꓬ ꓐꓶ ꓠꓬ ꓣꓳ ꓠꓲ, ꓟ ꓮ ꓘꓶ. ꓪꓴꓽ ꓧꓶꓽ ꓟ ꓥ ꓡꓳ꓿ ꓖꓳ ꓡꓰ ꓠꓬ ꓠꓵꓻ ꓠꓲ, ꓗꓪ ꓟꓬꓱꓽ ꓬꓰ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
