ꓠꓬꓲ. ꓠꓬꓲ ꓗꓪ ꓠꓬ ꓞꓲꓽ ꓘꓳꓼ ꓛꓲ ꓙ ꓡꓰ ꓔꓬ ꓟ ꓤ ꓠꓱ ꓤ ꓐꓴ ꓔꓶ., ꓙꓱꓼ ꓟꓶ ꓡꓰ ꓔꓬ ꓟ ꓚꓱ, ꓔꓯ ꓗꓷ ꓡꓰ ꓝꓲˍ ꓟ ꓚꓱꓼ ꓔꓯ ꓐꓯ ꓟ. ꓖꓶ ꓩꓴ ꓡ ꓥꓳ꓿ ꓣꓳ ꓤ ꓠꓱ ꓤ ꓐꓴ ꓔꓶ. ꓙꓰꓼ ꓟꓶ ꓔꓬ ꓡ? ꓟꓬ ꓠꓬꓲ ꓐꓭ ꓠꓬꓲ ꓐꓴˍꓔꓬ ꓪ ꓡꓰ ꓗꓷ ꓠꓯ,ꓼˍ ꓡ? ꓚꓵ ꓚꓵ ꓕꓱ ꓡꓱ ꓗꓷ ꓔꓬ ꓟ ꓠꓬ ꓔꓶ., ꓙꓱꓼ ꓟꓶ ꓡꓰ ꓔꓬ ꓟ ꓥ ꓡꓳ꓿ ꓮꓽ ꓐ ꓮꓽ ꓟ ꓣꓱꓽ ꓢꓴ ꓐꓴꓠꓬ ꓣꓳ ꓤ ꓠꓱ ꓤ ꓐꓴ ꓔꓶ. ꓙꓰꓼ ꓟꓶ ꓡꓰ ꓔꓬ ꓟ ꓬꓲ. ꓚꓱ, ꓔꓯ ꓧꓪꓽ ꓢꓲ꓾ ꓬꓲ. ꓪ ꓤꓶ., ꓐꓱ ꓶ ꓫꓬ ꓐꓭ ꓖꓶ ꓠꓽ ꓗ. ꓟ ꓥ ꓡꓳ꓿ ꓕꓱ ꓡꓱ ꓬꓰ ꓖꓶ ꓕꓯ ꓢꓲ꓾ ꓔꓶ., ꓙꓱꓼ ꓗꓪ ꓛꓲ ꓡꓰ ꓢꓲ꓾ ꓧꓪꓼ ꓡꓰ ꓢꓴ ꓕꓲ ꓣꓳ ꓒꓬꓱꓼ ꓡ ꓥꓳ꓿
ꓮ ꓫꓵꓽ ꓑꓶ. ꓓꓴ ꓔꓶ., ꓙꓱꓼ ꓟꓶ ꓡꓰ ꓔꓬ ꓡ? ꓟꓽ ꓥ꓾ ꓠꓬ ꓮꓽ ꓐ ꓮꓽ ꓟ ꓣꓱꓽ ꓢꓴ ꓐꓴ ꓗꓪ ꓐꓰ ꓝꓴꓲ. ꓓꓲ ꓔꓬ ꓢꓴ ꓥˍ ꓡ? ꓞꓳ ꓤ ꓕꓲ ꓣꓳ ꓡꓰ ꓐꓰ ꓘꓴꓽ ꓣꓴˍꓟ ꓟꓽ ꓟꓶ ꓟ ꓪꓴ. ꓠꓬꓲ ꓥˍ ꓡ? ꓣꓳ ꓓꓵ ꓙ ꓢꓲ꓾ ꓤ ꓠꓱ ꓤ ꓐꓴ ꓐꓰ ꓞꓳ ꓟꓳ ꓠꓬꓲ. ꓖꓳ ꓚ. ꓗꓪ ꓓꓵ ꓙ ꓟ ꓚꓱ, ꓪꓽ ꓠ, ꓟ ꓮꓽ ꓓꓰ ꓣꓳ ꓯꓬꓼ ꓟ ꓥ ꓡꓳ꓿ ꓕꓱ ꓡꓱ ꓞꓲꓽ ꓘꓳꓼ ꓛꓲ ꓙ ꓡꓰ ꓢꓴ ꓐꓴ ꓔꓯ ꓡꓳ. ꓟꓳ ꓪ ꓟ ꓠꓬ ꓬꓲ. ꓪ ꓠꓬ ꓪꓴ ꓡ ꓟ ꓑꓶ. ꓓꓴ ꓬꓲ. ꓪ ꓬꓰ ꓠꓲ., ꓫꓵꓼˍꓪ ꓡꓰ ꓬꓰ ꓠꓲ., ꓫꓵꓼ ꓡꓳ꓿ ꓞꓳ ꓟꓳ ꓡꓰ ꓟ. ꓖꓶ ꓟ ꓔꓯ ꓟꓽ ꓠꓲ., ꓫꓵꓽ ꓕꓱ ꓡꓱ ꓗꓷ ꓡ ꓔꓬ ꓟ ꓥ ꓡꓳ꓿
ꓕꓱ ꓗꓪ ꓣꓳ ꓮꓽ ꓐ ꓮꓽ ꓟ ꓣꓱꓽ ꓢꓴ ꓐꓴ ꓠꓬ ꓬꓲ. ꓪ ꓔꓯ ꓠꓽ ꓡꓳ. ꓢˍꓟ ꓫ. ꓪ ꓕꓱ ꓢꓲ꓾ ꓙꓲˍꓟ ꓔꓶ. ꓙꓰꓼ ꓗꓪ ꓛꓲ ꓡꓰ ꓠ, ꓟ ꓢꓯꓼ ꓕꓵꓼ ꓠꓽ ꓗ. ꓡꓳ꓿ ꓮꓽ ꓫꓵꓼ ꓬꓰ ꓥˍꓟꓲ ꓬꓲ. ꓙꓵꓽ ꓛꓬ ꓦ ꓢꓲ꓾ ꓬꓰ ꓜꓳꓽ ꓠ, ꓟ ꓟ. ꓖꓶ ꓠꓽ ꓗ. ꓡꓳ꓿ ꓕꓲ ꓖ ꓕꓲ ꓧꓪꓽ ꓣꓳ ꓤ ꓠꓱ ꓗ, ꓛꓲ ꓔꓬ ꓡ? ꓠꓲ., ꓟ ꓫ. ꓔꓬ ꓡ? ꓟꓽ ꓞꓲꓼ ꓣꓱꓽ ꓬꓯꓼ ꓟ ꓮꓽ ꓫꓵꓽ ꓙꓳˍꓡ? ꓣꓳ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓟꓽ ꓠ ꓠꓽ ꓙ ꓠꓬꓲ ꓡꓳ. ꓠꓬꓲ ꓖꓶ ꓠꓽ ꓗ. ꓡꓳ꓿ ꓕꓱ ꓡꓱ ꓠꓲ., ꓟ ꓗ, ꓟ ꓛꓲ ꓓꓴ ꓙꓳ ꓕꓯ ꓥˍꓟꓲ ꓔꓶ. ꓙꓰꓼ ꓟꓶ ꓡꓰ ꓟ ꓗꓷ ꓡ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓮ ꓫꓵꓽ ꓗ. ꓠꓬꓲ ꓥ? ꓐꓯˍꓟ ꓚꓱ, ꓔꓯ ꓮꓽ ꓐ ꓮ ꓟ ꓐꓴ ꓢꓷ. ꓠꓽ ꓗ. ꓡꓳ꓿ ꓕꓱ ꓡꓱ ꓬꓰ ꓕꓯ ꓢꓲ꓾ ꓣꓳ ꓐꓯ ꓖꓶ ꓥˍꓟꓲ ꓮꓽ ꓤ ꓤ ꓠꓽ ꓡꓳ. ꓡ ꓢꓲ꓾ ꓣꓳ ꓤ ꓣꓳ ꓠꓱ ꓐꓴ ꓠꓬ ꓧꓪꓼ ꓡꓰ ꓟ ꓐꓰ ꓗ, ꓛꓲ ꓟ ꓔꓯ ꓘꓴꓽ ꓣꓴ ꓟꓶ ꓡ ꓥꓳ꓿
