ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓠꓬ ꓜ ꓜꓽ ꓑꓮꓲꓽ ꓓꓽ ꓟ ꓕꓲ ꓟ ꓫꓬ, ꓢꓲ ꓣꓳ ꓔꓯ ꓘꓴ ꓔꓬ ꓡꓳ꓿ ꓖꓳ ꓕꓯ ꓣꓳ ꓠꓬ ꓪꓴ‐ꓢ ꓐꓱ ꓶ ꓬꓲ ꓙꓵ, ꓖꓶ ꓠ, ꓟ ꓙꓽ ꓖꓶ ꓔ ꓡ? ꓕꓲ ꓠꓬꓲ ꓕꓲ ꓠꓬꓲ ꓣꓳ ꓞꓳ ꓙꓳ ꓔꓬ ꓟ ꓠꓯꓸꓼ ꓗꓪ ꓬꓰ ꓓꓴ ꓟꓬꓱꓽ ꓟꓬꓽ ꓔꓬ ꓥ ꓟꓲ ꓪꓴ‐ꓢ ꓡꓰ ꓘꓴˍ ꓟ ꓔꓯ ꓟꓽ ꓡꓲ, ꓗꓷ ꓠ, ꓟ ꓐꓰ ꓪꓴ‐ꓢ ꓔꓯ ꓬꓲ ꓪꓴ. ꓠ‐ꓐ ꓕꓲ ꓗꓪ ꓗꓶ ꓔ ꓐ ꓡ ꓠ, ꓟ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓡꓰ ꓣꓳ ꓔꓯ ꓘꓴ ꓔꓬ ꓟ ꓥ ꓡꓳ꓿
ꓡꓴ‐ꓘ ꓕꓳꓽ ꓶ 14ꓽ15‐24 ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓠ ꓠ, ꓓꓴ ꓬꓰ ꓡꓯ꓿
ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓪꓴ‐ꓢ ꓠꓬ ꓞꓳ ꓫꓵꓽ ꓮ ꓙꓵꓽ ꓔꓯ ꓚꓬꓴ. ꓙ ꓠ, ꓟ ꓘꓴ ꓔꓬ ꓢꓴ ꓥ ꓡꓳ ꓐꓯ ꓟ ꓔꓯ ꓡꓴ‐ꓘ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔˍ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓘꓴꓻ ꓔˍ ꓟ ꓔꓯ ꓬꓲ ꓚꓱ, ꓬꓲ ꓫꓵꓽ ꓬꓲ ꓙꓰꓽ ꓣꓱꓽ ꓢꓲ ꓠꓬꓲ ꓘꓴꓻ ꓔˍ ꓟ ꓗꓪ ꓟꓽ ꓙꓰ ꓟ ꓔꓯ ꓟꓳꓻ ꓪˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓚꓲ. ꓛꓬ ꓬꓰ ꓠ ꓔˍ ꓟ ꓔꓯ ꓡꓰꓽ ꓠꓲ, ꓟ ꓗꓪ ꓗꓶ ꓔ ꓟ ꓑꓶ. ꓓꓴ ꓥ ꓡꓳ꓿ ꓣꓳ ꓥˍ ꓟꓲ ꓟꓲ ꓠꓯ ꓚꓱ,꓾ ꓦꓲ ꓘꓴꓽ ꓫꓵꓽ ꓪꓴ꓾ ꓶꓻ ꓡꓯꓼ ꓟꓬꓱꓽ ꓚꓱ, ꓗꓪ ꓡꓰꓽ ꓠꓲ, ꓟ ꓗꓶ ꓔˍ ꓕꓯ ꓪꓴ‐ꓢ ꓡꓰ ꓘꓴˍ ꓟ ꓔꓯ ꓒꓳ, ꓖꓶ ꓟꓽ ꓐ ꓡꓺꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓰ‐ꓢꓴ ꓙꓲ‐ꓢꓴ ꓬꓲ ꓙ ꓣꓳ ꓠꓲ, ꓡꓰ ꓟꓲ ꓠꓯ ꓞꓳ ꓤ ꓒꓬꓱꓽ ꓣꓴ ꓡˍ ꓟ ꓠꓬ ꓪꓴ‐ꓢ ꓬꓲ ꓠꓵꓻ ꓠꓲ, ꓓꓽ ꓟ ꓔꓯ ꓟ. ꓖꓶ ꓠ, ꓟ ꓐꓰ꓾ ꓪꓴ‐ꓢ ꓡꓰ ꓫꓬ, ꓔ ꓖꓶˍ ꓟ ꓟꓴ ꓗꓪ ꓗꓴꓷꓼ ꓜꓽ ꓓꓴ ꓑꓮꓲ ꓗꓪ ꓣꓳ ꓔꓯ ꓘꓴ ꓔꓯ, ꓙꓰ ꓠ, ꓟ ꓐꓱ ꓶ ꓥ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓠꓬ ꓪꓴ‐ꓢ ꓘꓴ ꓢꓯꓼ ꓔꓯ ꓓꓽ ꓔꓳ, ꓠ, ꓟ ꓙꓽ ꓖꓶ ꓔ ꓓꓴ ꓬꓰ ꓡꓯ꓿
