ꓙꓵꓻ ꓢꓴ ꓠꓬ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪ ꓥ ꓟ (ꓡꓴ‐ꓘ꓿ 8ꓽ19‐21)
ꓖꓳ ꓕꓯ ꓬꓰ‐ꓢꓴ ꓬꓲ ꓟ, ꓟˍ ꓐꓰ ꓬꓲ ꓠꓬꓲ ꓤ ꓐꓴ ꓠꓬ ꓬꓲ ꓔꓯ ꓡˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪ ꓠꓽ ꓞꓳ ꓜꓴ ꓑꓶ. ꓓꓴ ꓬꓲ ꓒ ꓕꓲ ꓗꓪ ꓡ ꓟꓽ ꓠ꓿ ꓖꓳ ꓡꓱ ꓠꓬꓲ ꓡ ꓞꓳ ꓕꓲ ꓣꓳ ꓡꓰ ꓬꓰ‐ꓢꓴ ꓔꓯ꓾ ꓠꓴ ꓟ, ꓟˍ ꓐꓰ ꓠꓴ ꓠꓬꓲ ꓤ ꓐꓴ ꓠꓬ ꓠꓱ. ꓫꓱ. ꓗꓪ ꓦꓰꓼ ꓞ, ꓢꓲ ꓠꓴ ꓔꓯ ꓟꓳ ꓠꓲ, ꓫꓵˍ ꓡꓳ꓾ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓬꓰ‐ꓢꓴ ꓡꓰ ꓬꓲ ꓔꓯ ꓒꓳ, ꓖꓶ ꓢꓲ꓾ ꓪꓴ‐ꓢ ꓐꓯ ꓘꓶꓽ ꓑ ꓙꓽ ꓢꓲ ꓛꓳ ꓬꓰ ꓢꓴ ꓠꓬ ꓥꓪ ꓟ, ꓟˍ ꓐꓰ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓥꓳ꓾ ꓐꓯ ꓖꓶˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓞꓳ ꓤ ꓐꓴ ꓗꓳ ꓡꓳ ꓗꓪ ꓮꓽ ꓐ꓾ ꓤ ꓠꓱ꓾ ꓠꓬꓲꓽ ꓢ ꓫꓵ. ꓐꓴ ꓠꓬ ꓠꓱ. ꓐꓯ ꓢꓴ ꓢꓶ. ꓟꓽ ꓞꓲ ꓣꓳ ꓐꓰ ꓪ ꓜꓲ ꓠꓶꓽˍ ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓪꓴ‐ꓢ ꓐꓰ ꓣꓳ ꓠꓯꓸꓼ ꓗꓪ ꓙꓳˍ ꓟ ꓙ ꓡꓯ ꓘꓳˍ ꓟ ꓠꓬ ꓟꓲ ꓠꓯ ꓞꓳ ꓤ ꓐꓰ ꓫꓵꓽ ꓤ ꓧꓪ ꓤ ꓜꓳꓽˍ ꓟ ꓢꓶ. ꓟꓽ ꓜꓲ ꓪ ꓜꓲ ꓐꓲ ꓜꓲꓼˍ ꓡꓳ꓾ ꓒꓵꓽˍ ꓡꓳ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ꓿
ꓪꓴ‐ꓢ ꓐꓰ ꓣꓳ ꓙ ꓡꓯ ꓘꓳˍ ꓟ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓟ ꓗꓪ ꓐꓰ ꓪ ꓜꓲ ꓕꓶ ꓞ, ꓡˍ ꓡꓳ꓿
ꓪꓴ‐ꓢ ꓐꓯ ꓘꓶ ꓔꓯ ꓠ ꓠ, ꓕꓲ ꓖꓼ ꓟꓽ ꓥ꓾ ꓪꓴ‐ꓢ ꓐꓯ ꓘꓶꓽ ꓖꓳ ꓟ ꓔꓯ ꓪꓽ ꓘꓴˍ ꓟ ꓐꓰ ꓓꓵꓽ ꓙꓽ ꓠꓬꓲ ꓠ ꓗ, ꓡꓳ꓿
ꓝꓮꓲ ꓪꓴ‐ꓢ ꓐꓯ ꓘꓶ ꓔꓯ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ ꓤꓶꓻ ꓠꓯꓸꓼ ꓗꓪ ꓡꓯꓼ ꓕꓲꓺ ꓣꓱꓽ ꓬꓰ ꓠ ꓗ, ꓡꓳ꓿ ꓠꓱ. ꓐꓯ ꓢꓴ ꓔꓯ ꓠꓲ, ꓠꓵˍ ꓟ꓾ ꓠꓱ. ꓐꓯ ꓢꓴ ꓔꓯ ꓬꓰ ꓙˍ ꓟ꓾ ꓣꓱꓽ ꓙˍ ꓟ ꓕꓱ ꓡꓱ ꓫꓵꓽ ꓔꓯ ꓬꓰ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓠꓯꓸꓼ ꓗꓪ ꓞꓳ ꓙꓳ ꓟꓳ. ꓖꓶ ꓠ ꓗ, ꓡꓳ꓿
ꓖꓳ ꓟ ꓑꓶ. ꓓꓴ ꓪꓽ ꓘꓴˍ ꓟ ꓙꓵ, ꓠꓬ ꓪꓴ‐ꓢ ꓐꓯ ꓘꓶ ꓔꓯ ꓕꓲ ꓠꓬꓲ ꓕꓲ ꓠꓬꓲ ꓠ ꓠ, ꓪˍ ꓟ ꓬꓲ ꓙꓵ, ꓥ ꓡꓳ꓿ ꓣꓳ ꓪꓽ ꓘꓴˍ ꓕꓯ ꓣꓳ ꓚꓲ. ꓛꓬꓽ ꓡꓰꓽ ꓓꓰꓽ ꓠ, ꓟ ꓟꓽ ꓥ ꓥ꓾ ꓪꓴ‐ꓢ ꓡꓰ ꓐꓯ ꓖꓶ ꓡˍ ꓟ ꓔꓯ ꓥˍ ꓟꓲ ꓢꓲ ꓡꓲ ꓔꓬ ꓢꓲ ꓠ ꓠ, ꓠ ꓗ, ꓡꓳ꓿ ꓕꓱ ꓡꓱ ꓠ ꓠ, ꓟ꓾ ꓔꓱ, ꓕ ꓓꓵꓽ ꓙ ꓠꓬꓲˍ ꓟ ꓐꓰ ꓡꓯꓼ ꓕꓲꓺ ꓣꓱꓽ ꓬꓰˍ ꓟ ꓗꓪ ꓐꓰ ꓣꓳ ꓪꓴ‐ꓢ ꓐꓰ ꓙ ꓡꓯ ꓘꓳˍ ꓟ ꓠꓬ ꓕꓲ ꓠꓬꓲ ꓗ ꓠꓯ. ꓕꓲ ꓠꓬꓲ ꓪ ꓜꓲ ꓠꓶꓽ ꓡˍ ꓟ ꓥ ꓡꓳ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓡ ꓔꓬ ꓡꓳ꓿
