ꓙꓲꓻ ꓫꓬ ꓢꓴ ꓕꓲꓽ ꓣꓳ ꓥ ꓡ꓾ ꓟꓽ ꓥ ꓡ ꓐꓰ ꓮ ꓡꓲ ꓢꓷ. ꓓ_ ꓡ?
ꓘꓴ ꓜꓲꓼ ꓞꓳ ꓗꓪ ꓐꓰ ꓠꓬ ꓡ ꓞꓳ ꓕꓱ ꓕꓲꓽ ꓣꓳ ꓠꓬ ꓙꓲꓻ ꓫꓬ ꓢꓴ ꓥ ꓡꓳ ꓙꓲꓻ ꓫꓬ ꓢꓴ ꓒꓬꓱꓼ ꓡꓰꓳ ꓐꓯ ꓢꓲ ꓐꓯ ꓟꓳ. ꓟ ꓐꓯ ꓟ. ꓖꓶ_ ꓟ ꓕꓱ ꓟ ꓠꓬ ꓮ ꓡꓰ ꓗꓰ ꓡꓳ. ꓢꓲ ꓠꓬꓲ ꓬꓰ ꓔꓬ ꓡ ꓐꓯ_ ꓟ ꓬꓲ. ꓚꓱ, ꓔꓯ ꓟ. ꓖꓶ ꓡ ꓥꓳ꓿
ꓙꓲꓻ ꓫꓬ ꓢꓴ ꓕꓲꓽ ꓣꓳ ꓠꓬ ꓬꓲ ꓫꓵꓻ ꓘꓪ ꓡꓰ ꓗ. ꓠꓯ. ꓟꓴ ꓗꓪ ꓗꓴꓷꓼ ꓗꓪ ꓐ, ꓐ ꓪꓴ‐ꓢ ꓬꓲ ꓐꓬꓱꓼ ꓡꓱ ꓡꓱ ꓟ ꓗꓪ ꓔ, ꓓꓵꓽ ꓡꓰ ꓟ ꓕꓲꓽ ꓣꓳ ꓟ ꓔꓯ ꓐꓯ_ ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓬꓲ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓕꓱ ꓡꓱ ꓓꓵꓽ ꓡꓰ ꓟꓽ ꓓꓵꓽ ꓡꓰ ꓙꓲꓻ ꓫꓬ ꓢꓴ ꓒꓬꓱꓼ ꓡꓰ ꓟꓽ ꓒꓬꓱꓼ ꓡꓰ ꓐꓯ_ ꓟ ꓔꓯ ꓮ ꓡꓲ ꓐꓰ ꓘꓶꓽ ꓢꓲ ꓢꓷ. ꓓ_ ꓡ?
ꓠꓬꓲ. ꓠꓬꓲ ꓣꓳ ꓘꓴ ꓜꓲꓼ ꓞꓳ ꓗꓪ ꓠꓬ ꓬꓲ. ꓚꓱ, 5 ꓚꓱ, ꓕꓱ ꓡꓱ ꓐꓰ ꓙꓳ_ ꓟ ꓥ ꓡꓳ꓾ ꓬꓲ. ꓪꓴ. ꓠꓬ ꓡ ꓞꓳ ꓕꓱ ꓕꓲꓽ ꓣꓳ ꓠꓬ ꓙꓲꓻ ꓫꓬ ꓢꓴ ꓥ ꓡꓳ ꓐꓰ ꓣꓳ ꓕꓱ ꓡꓱ ꓚꓬ, ꓪ ꓥꓳ꓾ ꓣꓳ ꓕꓱ ꓡꓱ ꓐꓰ ꓢꓷ. ꓠꓯ, ꓡꓳ ꓐꓯ ꓠꓬ ꓬꓲ. ꓠꓬ ꓫꓵꓻ ꓘꓪ ꓡꓰ ꓗ. ꓠꓯ. 5 ꓘꓳꓼ ꓟ. ꓖꓶ ꓓꓴ ꓟꓳ. ꓖꓶ ꓓꓴ ꓪꓴ‐ꓢ ꓬꓲ ꓐꓬꓱꓼ ꓡꓱꓼ ꓡꓱꓼ_ ꓟ ꓟꓳ. ꓖꓶ ꓓꓴ ꓕꓲ ꓫꓵ ꓬꓲ. ꓗꓪ ꓐꓰ ꓫꓵꓻ ꓘꓪ ꓡꓰ ꓗ. ꓠꓯ. ꓟ. ꓖꓶ ꓡ ꓓꓴ ꓙꓳ_ ꓟ ꓥ ꓡꓳ꓿ ꓖꓳ ꓟ ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ ꓜꓲ ꓜꓲ ꓟꓴ ꓟꓴ ꓐꓰ ꓧꓪ ꓟꓰ, ꓠꓬꓲ ꓬꓰ_ ꓟ ꓥ ꓡꓳ꓿ ꓠꓬꓲꓽ ꓠꓬ ꓬꓲ ꓔꓯ ꓪꓴ‐ꓢ ꓬꓲ ꓚꓳ ꓑ. (ꓥ ꓠꓬ) ꓪꓴ‐ꓢ ꓬꓲ ꓝꓲ ꓓꓴ ꓐꓰ ꓕꓱ ꓡꓱ ꓐꓰ ꓚꓰ, ꓔ ꓥꓳ ꓐꓯ ꓠꓬ ꓬꓲ ꓟꓽ ꓫꓵꓻ ꓕꓯ ꓠꓯ. ꓗꓪ ꓐꓰ ꓫꓵꓻ ꓗꓪ ꓛꓲ ꓬꓲ ꓮ ꓡꓲ ꓐꓰ ꓞꓳ ꓙꓳ ꓗꓳ. ꓡ꓾ ꓮ ꓡꓲ ꓐꓰ ꓪꓴꓽ ꓡ ꓟꓴ ꓡ ꓐꓰ ꓐꓯ_ ꓟ ꓔꓯ ꓬꓲ ꓡꓳ ꓒꓱ ꓖꓳ ꓗꓪ ꓔꓬ ꓟ ꓘꓴ ꓜꓲꓼ ꓞꓳ ꓪꓴ. ꓓꓴ ꓐꓴ ꓠꓬ ꓧꓪ ꓢꓲ ꓠꓬꓲ ꓖꓳ ꓟ ꓔꓯ ꓟꓰ, ꓠ ꓠꓬꓲ_ ꓟ ꓥ ꓡꓳ꓿ ꓬꓲ ꓢꓯ. ꓔꓬ ꓕꓯ ꓮ ꓡꓲ ꓐꓰ ꓢꓯ. ꓔꓬ ꓗꓳ. ꓡ_ ꓡ? ꓕꓱ ꓡꓱ ꓠ ꓠꓬꓲ ꓖꓳ ꓑꓳ. ꓠꓬ ꓝꓮꓲ ꓪꓴ. ꓓꓴ ꓗꓪ ꓣꓱꓽ ꓢꓴ ꓥ ꓠꓬ ꓡꓳ ꓒꓱ ꓖꓳ ꓟ ꓗꓪ ꓧꓳꓽ ꓣꓱ ꓔꓬ ꓢꓴ ꓠꓬ ꓕꓱ ꓗꓪ ꓐꓰ ꓕꓲ ꓝ. ꓘꓴ ꓜꓲꓼ ꓞꓳ ꓬꓲ. ꓚꓰ ꓥ ꓟ ꓖꓳ ꓗꓪ ꓝꓮꓲ ꓕꓲꓽ ꓝ. ꓖꓶ ꓩꓴ ꓓꓴ ꓥ ꓡꓳ꓿ ꓕꓱ ꓡꓱ ꓖꓶ ꓩꓴ ꓗꓷ ꓠꓬ ꓘꓴ ꓜꓲꓼ ꓞꓳ ꓬꓲ. ꓚꓰ ꓗꓪ ꓐꓰ ꓪꓴꓽ ꓢꓴ ꓟꓴ ꓢꓴ ꓘꓴ ꓜꓲꓼ ꓞꓳ ꓪꓴ. ꓓꓴ ꓣꓱꓽ ꓢꓴ ꓐꓴ ꓠꓬ ꓖꓳ ꓟ ꓔꓯ ꓝꓮꓲ ꓝ. ꓢꓲ ꓠ ꓠꓬꓲ ꓧꓪ ꓠꓬꓲ ꓕꓱ ꓡꓱ ꓬꓰ_ ꓟ ꓬꓲ. ꓚꓱ, ꓥ ꓡꓳ꓿ ꓢ ꓠꓬ ꓐꓯ ꓗꓳ. ꓗꓷ ꓟ ꓡꓰ ꓐꓰ ꓫꓵꓻ ꓘꓪ ꓡꓰ ꓢꓴ ꓕꓱ ꓕꓲ ꓣꓳ ꓠꓬ ꓙꓲꓻ ꓫꓬ ꓢꓴ ꓒꓬꓱꓼ ꓡꓰꓳ ꓐꓯ ꓠꓬ ꓬꓲ ꓠꓬ ꓮ ꓡꓰ ꓥ ꓟꓲ ꓬꓲ ꓠꓬ ꓟꓲ ꓠꓯ ꓗꓪ ꓔꓬ ꓢꓴ ꓔꓯ ꓓꓰꓽ ꓙ ꓬꓰ ꓙ ꓪꓴ‐ꓢ ꓬꓲ ꓪꓽ ꓠꓬꓲ_ ꓟ ꓟꓳ. ꓖꓶ ꓓꓴ ꓕꓲ ꓫꓵ ꓠꓬ ꓟꓳ. ꓖꓶ ꓟ ꓥ ꓡꓳ꓿ ꓕꓱ ꓡꓱ ꓟꓳ. ꓖꓶ ꓟꓽ ꓐ ꓡ ꓠꓬ ꓬꓲ ꓠꓬ ꓙꓲꓻ ꓫꓬ ꓢꓴ ꓕꓲꓽ ꓣꓳ ꓐꓯ ꓟꓽ ꓐ ꓡ꓿ ꓮ ꓫꓵ ꓑꓶ ꓓꓴ ꓐꓯ ꓠꓬ ꓟ. ꓟꓲꓽ ꓗꓪ ꓥ ꓟꓲ ꓙꓲꓻ ꓫꓬ ꓢꓴ ꓘꓴ ꓓꓰ ꓘꓶꓽ ꓠꓬ ꓪꓴ‐ꓢ ꓬꓲ ꓓꓽ ꓔꓳ, ꓟ ꓥ ꓡꓳ꓾ ꓐꓯ_ ꓟ ꓕꓲ ꓡꓲ, ꓕꓱ ꓕꓲ ꓣꓳ ꓠꓬ ꓙꓲꓻ ꓫꓬ ꓢꓴ ꓥ ꓡꓳ ꓐꓰ ꓣꓳ ꓠꓲ, ꓟ ꓗꓪ ꓕꓱ ꓡꓱ ꓚꓬ, ꓔ ꓟꓶ ꓠꓬ ꓬꓲ ꓔꓯ ꓣꓳ ꓪꓴ‐ꓢ ꓔꓬ ꓗꓪ ꓘꓴ ꓙ ꓖꓶ ꓐꓰ ꓓꓰ_ ꓕꓯ ꓬꓲ ꓠꓬ ꓣꓳ ꓔꓯ ꓟꓳ. ꓖꓶ ꓓꓴ ꓪꓽ ꓠꓬꓲ_ ꓟ ꓕꓲ ꓫꓵ ꓟꓳ. ꓖꓶ ꓡ ꓥꓳ꓿ ꓔꓯ ꓥꓳꓽ ꓣꓳ ꓠꓯꓼ ꓗꓪ ꓫꓵꓻ ꓗꓪ ꓛꓲ ꓦꓰꓼ ꓟ ꓠꓻ ꓔꓬ ꓡꓳ꓾ ꓬꓲ ꓠꓬ ꓮ ꓡꓰ ꓥ ꓟꓲ ꓫꓵꓻ ꓡ ꓟ ꓥ ꓡꓳ꓾ ꓖꓳ ꓡꓱ ꓥ ꓟꓲ ꓙꓲꓻ ꓫꓬ ꓢꓴ ꓖꓳ ꓕꓲꓽ ꓣꓳ ꓔꓯ ꓬꓲ ꓠꓬ ꓪꓴ‐ꓢ ꓔꓯ ꓪꓽ ꓘꓴ ꓙ ꓠ, ꓟ ꓬꓰ ꓙ ꓐꓰ ꓘꓴ ꓓꓰ_ ꓕꓯ ꓖꓳ ꓕꓲꓽ ꓣꓳ ꓠꓻ ꓔꓬ ꓟ ꓠꓬ ꓞꓼ ꓐꓰ ꓓ ꓡꓰ_ ꓟ ꓕꓱ ꓟ ꓡꓰ ꓐꓰ ꓪꓽ ꓠꓬꓲ_ ꓟ ꓟꓳ. ꓖꓶ ꓡ ꓠꓬ ꓬꓲ ꓔꓯ ꓠꓬ ꓙꓲꓻ ꓫꓬ ꓢꓴ ꓒꓬꓱꓼ ꓡꓰ ꓠ, ꓟ ꓚꓰ, ꓔ ꓟ ꓥ ꓡꓳ꓿ ꓝꓮꓲ ꓠꓬ ꓬꓲ ꓠꓬ ꓙꓲꓻ ꓫꓬ ꓢꓴ ꓥ ꓡꓰꓳ ꓐꓰ ꓢꓷ. ꓓꓴ ꓠꓬ ꓮ ꓡꓰ ꓥ ꓡ ꓐꓯ ꓠꓬ ꓝꓮꓲ ꓧꓶ. ꓕꓯ ꓟ ꓡꓰ ꓐꓰ ꓪꓴ‐ꓢ ꓬꓲ ꓪꓽ ꓠꓬꓲ_ ꓟ ꓠꓬ ꓟꓲ ꓠꓯ ꓗꓪ ꓕꓲꓽ ꓣꓳ ꓣꓳ ꓘꓳ, ꓣꓴ ꓟꓶ_ ꓟ ꓥ ꓡꓳ꓿ ꓪꓽ ꓠꓬꓲ_ ꓟ ꓠꓬꓲꓽ ꓫꓵ ꓟꓳ. ꓖꓶ ꓗ. ꓠꓯ. ꓬꓲ ꓞꓳ ꓙꓳ ꓡ ꓟ ꓮ ꓙꓵ ꓟꓰ, ꓠ ꓠꓬꓲ ꓗ. ꓠꓯ. ꓬꓲ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟ ꓥ ꓡꓳ꓾ ꓬꓲ ꓚꓲ. ꓛꓬ ꓥ ꓟꓲ ꓪꓴ‐ꓢ ꓡꓰ ꓥ ꓟꓲ ꓟꓳ. ꓖꓶ ꓡ ꓟ ꓥ ꓡꓳ꓾ ꓐꓰ ꓐꓯ_ ꓟ ꓔꓯ ꓢꓷ. ꓗꓴ ꓡꓰ ꓕꓯ ꓘꓴ ꓜꓲꓼ ꓞꓳ ꓠꓬ ꓕꓱ ꓕꓲꓽ ꓣꓳ ꓠꓬ ꓙꓲꓻ ꓫꓬ ꓢꓴ ꓒꓬꓱꓼ ꓬꓰꓳ꓾ ꓙꓲꓻ ꓫꓬ ꓢꓴ ꓥ ꓡꓳ꓾ ꓐꓰ ꓐꓯ ꓟꓳ. ꓟ ꓥ ꓡꓳ꓿
ꓠꓲ, ꓠꓵꓻ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓲꓻ ꓫꓬ ꓢꓴ ꓕꓲꓽ ꓣꓳ ꓠꓬ ꓣꓳ ꓘꓴ ꓜꓲꓼ ꓞꓳ ꓗꓪ ꓐꓰ ꓚꓰ, ꓔ ꓟ ꓟꓽ ꓥ꓾ ꓪꓴ‐ꓢ ꓗꓪ ꓐꓰ ꓙꓲꓻ ꓫꓬ ꓢꓴ ꓠꓬ ꓧꓶ. ꓕꓯ ꓬꓲ ꓫꓵꓻ ꓟ ꓡꓰ ꓐꓰ ꓒꓬꓱꓼ ꓬꓰ ꓟ ꓥ ꓡꓳ꓿ ꓒꓬꓱꓼ ꓬꓰ ꓗ. ꓠꓯ. ꓬꓲ ꓗꓪ ꓐꓰ ꓟꓳ. ꓖꓶ ꓡ ꓟ ꓔꓯ ꓡꓳ. ꓠꓬꓲ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓝꓮꓲ ꓕꓲꓽ ꓧꓪ, ꓐꓯ ꓞꓷ, ꓗꓷ ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓠꓬꓲ. ꓠꓬꓲ ꓙꓲꓻ ꓫꓬ ꓢꓴ ꓕꓲꓽ ꓣꓳ ꓒꓬꓱꓼ ꓡ ꓠ, ꓟ ꓠꓬ ꓮ ꓘꓶ. ꓫ. ꓟ ꓥ ꓡꓳ꓾ ꓕꓱ ꓟ ꓠꓬ ꓪꓴ‐ꓢ ꓬꓲ ꓪꓽ ꓠꓬꓲ_ ꓟ ꓟꓽ ꓚꓬꓼ ꓡ ꓠꓬ ꓒꓬꓱꓼ ꓡ ꓟꓽ ꓓ꓾ ꓖꓳ ꓡꓱ ꓥ ꓟꓲ ꓪꓴ‐ꓢ ꓠꓬ ꓣꓳ ꓔꓯ ꓮ ꓙꓵ ꓢꓲ ꓫꓬ ꓠ, ꓟ ꓙꓲꓻ ꓫꓬ ꓢꓴ ꓕꓲ ꓣꓳ ꓒꓬꓱꓼ ꓡ ꓠ, ꓟ ꓐꓱ ꓶ ꓣꓳ ꓔꓯ ꓘꓴ ꓔ ꓟ ꓑꓶ ꓓꓴ ꓣꓳ ꓥ ꓟꓲ ꓙꓲꓻ ꓫꓬ ꓢꓴ ꓠꓯꓼ ꓗꓪ ꓔ, ꓓꓵꓽ ꓐ ꓡ ꓠ, ꓟ ꓪꓴ‐ꓢ ꓣꓱ ꓛꓰ ꓗꓪ ꓐꓰ ꓛꓳ ꓫꓱꓽ ꓓꓴ ꓬꓰ ꓡꓯ꓿
