ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ 9 ꓦ ꓟ 15 ꓠꓬꓲ ꓣꓳ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓗꓪ ꓐꓰ Our Lady of Sorrows ꓠꓲ, ꓫ ꓟꓬ ꓫˍ ꓟ ꓟ, ꓟ ꓔꓯ ꓚꓲ. ꓟꓶ ꓓꓴ ꓑꓮꓲ ꓬꓰ ꓔꓬ ꓟ ꓥ ꓡꓳ꓿ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓢꓯꓼ ꓟꓬ ꓖꓶ ꓔꓬ ꓕꓯ ꓟ, ꓟ ꓟ‐ꓡꓲ ꓡꓰ ꓤ ꓔꓲ. ꓬꓲ ꓠ ꓜꓲꓽ ꓢꓲ ꓫ. ꓙꓵ ꓔꓬ ꓟ ꓔꓯ ꓬꓲ ꓥˍ ꓟꓲ ꓫ. ꓙꓵ ꓜꓲꓽ ꓢꓲ ꓠꓬꓲ꓾ ꓡꓯꓼ ꓐꓳ ꓔꓶ. ꓓꓴ ꓒ ꓕꓲ ꓗꓪ ꓦꓰꓼ ꓞ, ꓔꓬˍ ꓟ ꓔꓯ ꓓꓵꓽ ꓙꓽ ꓠꓬꓲ ꓓꓴ ꓥꓳ꓿ ꓟ‐ꓡꓲ ꓬꓲ ꓤꓶꓻ ꓗꓪ ꓠꓲ, ꓟ ꓫ ꓓꓴ ꓮ ꓟꓬ, ꓔꓳ, ꓜꓳꓽ ꓗꓳ. ꓗꓷ ꓥˍ ꓟꓲ ꓬꓲ ꓙꓵꓻ ꓠꓲ, ꓗꓪ ꓮ ꓕꓯ ꓟꓲ ꓟꓽ ꓧꓶ. ꓙꓰ꓿ ꓖꓳ ꓟ ꓑꓶ. ꓓꓴ ꓣꓳ ꓐꓴ ꓥˍ ꓟꓲ ꓤꓶꓻ ꓗꓪ ꓠꓻ ꓙꓵ ꓓꓴ ꓐꓰ ꓠꓲ, ꓫ ꓟꓬ ꓫ ꓓꓴ ꓔꓳ, ꓜꓳꓽ ꓡˍ ꓕꓯ ꓟ‐ꓡꓲˍ ꓡꓰ ꓐꓰ ꓪꓴ‐ꓢ ꓔꓯ ꓝ. ꓢꓲ ꓙꓵꓻ ꓐ ꓡ ꓠ, ꓟ ꓠꓬꓲ. ꓠꓬꓲ ꓟ ꓣꓳ ꓕꓲ ꓪˍ ꓓꓵꓽ ꓙꓽ ꓠꓬꓲ ꓓꓴ ꓬꓰ ꓡꓯ꓿
ꓠꓬꓲ. ꓠꓬꓲ ꓗꓪ ꓣꓳ ꓔꓯ ꓢꓯꓼ ꓪ ꓖꓶ ꓡ ꓔꓬ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓠ ꓠ, ꓓꓴ ꓬꓰ ꓡꓯ꓿ ꓬꓳ‐ꓦ ꓕꓳꓽ ꓶ 19ꓽ25‐27 ꓥ ꓡꓳ꓿
ꓖꓳ ꓡꓱ ꓠꓬꓲ ꓟꓯꓼ ꓒ ꓐꓴ ꓬꓲ ꓖꓳ ꓡꓱ ꓬꓰˍ ꓡꓳ꓿ ꓬꓲ ꓟ, ꓟˍ ꓐꓰ ꓬꓲ ꓟ, ꓟ ꓬꓲ ꓠꓬꓲ ꓟ꓾ ꓘ,‐ꓡꓳ‐ꓒ ꓤ ꓟꓶ ꓟ‐ꓡꓲˍ ꓐꓰ ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓠꓬ꓾ ꓬꓰ‐ꓢꓴ ꓡꓯꓼ ꓐꓳ ꓔꓶ. ꓓꓴ ꓒ ꓕꓲ ꓗꓪ ꓦꓰꓼ ꓔꓬ ꓡꓳ꓿ ꓬꓲ ꓟ, ꓟˍ ꓐꓰ ꓬꓲ ꓠꓲ, ꓠꓵˍ ꓟ ꓛꓳꓽ ꓒꓯ, ꓠꓬ ꓒ ꓕꓲ ꓗꓪ ꓦꓰꓼ ꓞ, ꓟ ꓔꓯ ꓬꓰ‐ꓢꓴ ꓟꓳ ꓗꓷ ꓠꓬ꓾ ꓬꓲ ꓡꓰ ꓬꓲ ꓟ, ꓟ ꓔꓯ꓾ ꓤ ꓟꓶ ꓤꓽꓳ ꓠꓬꓲ ꓠ,꓾ ꓠꓴ ꓮ ꓐꓲ꓾ ꓐꓯˍ ꓡꓳ꓿ ꓝꓮꓲ ꓬꓲ ꓡꓰ ꓛꓳꓽ ꓒꓯ, ꓖꓳ ꓕꓲ ꓣꓳ ꓔꓯ꓾ ꓠꓬꓲ ꓠ,꓾ ꓠꓴ ꓟ, ꓟ꓾ ꓐꓯ ꓖꓶˍ ꓡꓳ꓿ ꓖꓳ ꓕꓲ ꓙꓵ, ꓗꓪ ꓐꓰ ꓛꓳꓽ ꓒꓯ, ꓖꓳ ꓕꓲ ꓣꓳ ꓡꓰ ꓬꓲ ꓟ, ꓟ ꓔꓯ ꓬꓲ ꓦꓲ ꓗꓪ ꓧꓳꓽ ꓙꓰ ꓢꓲ ꓔꓬ ꓝꓲˍ ꓡꓳ꓿
ꓕꓱ ꓟ ꓠꓬ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓥ ꓡꓳ꓿
