ꓒ‐ꓡꓲ‐ꓢꓷ ꓐꓴ ꓮ ꓡꓲ ꓗˍ ꓟ (Daily reflection )
ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 7ꓽ31‐35 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓒ‐ꓡꓲ‐ꓢꓷ ꓐꓴ ꓠꓬ ꓝꓴꓲ ꓔꓯ ꓡꓰ ꓧꓪ ꓔꓬ ꓟ ꓐꓰ ꓒ‐ꓡꓲ‐ꓢꓷ ꓐꓴ ꓬꓲ ꓪ ꓚꓲ. ꓛꓬ ꓟꓬꓱꓺ ꓓꓳ ꓽ ꓖꓶ ꓠꓲ, ꓟ ꓠꓬꓲ ꓔꓱ ꓣꓱ ꓢꓴ ꓐꓴ ꓥ ꓟ ꓚꓱ, ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓝꓴꓲ ꓧꓪ, ꓟ ꓠꓲ, ꓟ ꓙꓳ ꓟ ꓔꓯ ꓤ ꓟꓳ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿ ꓕꓲ ꓧꓪ ꓧꓪ ꓣꓳ ꓠꓬ ꓢꓲꓺ ꓒ ꓐꓯ ꓘꓶꓽ ꓶꓼ ꓓꓳ ꓫꓱ, ꓔꓯ ꓟꓽ ꓘꓳ, ꓣꓴ ꓟ ꓙꓵ, ꓕꓯ ꓢꓴ ꓔꓯ ꓝꓴꓲ ꓧꓪ, ꓢꓽ ꓥ ꓡꓳ꓿
ꓕꓱ ꓟ ꓔꓯ ꓤ ꓟꓳ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
ꓝꓮꓲ ꓪꓴ‐ꓢ ꓔꓯ ꓣꓳ ꓠꓲ, ꓟ ꓗꓪ ꓐꓰ ꓣꓳ ꓠꓲ, ꓫꓵˍ ꓪ ꓡꓰ ꓟꓽ ꓓꓴ ꓙ ꓠ, ꓟ ꓥ ꓡꓳ꓿
ꓖꓳ ꓓꓱ ꓔꓶ ꓒ ꓬꓳ‐ꓦ ꓠꓬ ꓮ ꓘꓶ. ꓛꓲ ꓫ. ꓫ ꓐꓰ ꓔꓬ ꓖꓳ ꓗꓷ ꓟ ꓡꓰ ꓐꓰ ꓢꓲꓺ ꓒ ꓬꓰ‐ꓢꓴ ꓠꓬ ꓠꓵꓻ ꓠꓲ, ꓐꓯ ꓟ ꓮ ꓫꓵꓽ ꓥ ꓡ ꓐꓰ ꓟ. ꓖꓶ ꓗꓷ ꓟ ꓥ ꓡꓳ꓿ ꓪꓴ‐ꓢ ꓠꓬ ꓟꓲ ꓠꓯ ꓡ ꓞꓳ ꓡꓰ ꓕꓲ ꓣꓳ ꓠꓯ, ꓗꓪ ꓟꓽ ꓡꓯꓽ ꓘꓳ, ꓟ ꓚꓱ, ꓗꓪ ꓬꓲ ꓗ. ꓠꓯ ꓢꓲ ꓛꓳꓽ ꓠ, ꓟ ꓘꓴ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓮ ꓙꓵꓽ ꓢꓴ ꓪꓴ‐ꓢ ꓔꓯ ꓙ ꓣꓳ ꓠꓲ, ꓟ ꓗꓪ ꓐꓰ ꓬꓲ ꓐꓯ ꓘꓶꓽ ꓔꓯ ꓠ ꓠ, ꓠ, ꓟ ꓣꓳ ꓚꓵˍ ꓡꓳ꓿
ꓙꓵꓻ ꓠꓲ, ꓔꓯ ꓣꓳ ꓫ. ꓕꓱ ꓘꓶꓽ ꓡꓰ ꓙꓵꓻ ꓠ, ꓟ ꓟꓽ ꓥ꓾ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓪꓴ‐ꓢ ꓔꓯ ꓦꓻ ꓡꓱ ꓢꓴ ꓐꓴ ꓠꓬ ꓫ. ꓕꓱ ꓘꓶꓽ ꓗꓪ ꓛꓳ ꓡꓰ ꓪꓴ‐ꓢ ꓔꓯ ꓙꓵꓻ ꓠ, ꓟ ꓟꓽ ꓥ꓾ ꓞꓳ ꓙ ꓫꓱ, ꓚꓱ, ꓞꓳ ꓙꓳ ꓚꓱ, ꓬꓰ ꓟ ꓟꓬꓱꓽ ꓮ ꓙꓵꓽ ꓗꓪ ꓐꓰ ꓪꓴ‐ꓢ ꓔꓯ ꓙꓵꓻ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓣꓳ ꓠꓲ, ꓟ ꓠꓯ, ꓗꓪ ꓠꓵꓻ ꓠꓲ, ꓙ ꓗꓳ ꓠꓲ,꓾ ꓝꓴꓲ ꓭ ꓖꓶ ꓐ ꓡ ꓠꓲ, ꓟ꓾ ꓢꓴ ꓔꓯ ꓬꓰ ꓙ ꓟ ꓠꓲ, ꓟ ꓙꓲ ꓟ ꓟꓬꓱꓽ ꓮ ꓟꓬ, ꓔꓯ ꓬꓰ ꓐ ꓡ ꓠ, ꓟ ꓣꓳ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
ꓢꓴ ꓔꓯ ꓝꓴꓲ ꓧꓪ, ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓪꓴ‐ꓢ ꓐꓯ ꓘꓶꓽ ꓔꓯ ꓒꓴ ꓛꓳ ꓢꓲ ꓠꓬꓲ ꓙ ꓫꓱ, ꓓꓴ ꓬꓰ ꓡꓯ꓿
