ꓡꓴ‐ꓘ 4ꓽ16‐30
ꓢꓲ ꓒ ꓬꓰ‐ꓢꓴ ꓠꓬ ꓠꓽ ꓦꓬꓼ ꓠꓬꓲ ꓕꓯ ꓜꓲꓼ ꓦꓲ ꓗꓪ ꓓꓵꓽ ꓙꓰ ꓕꓯ ꓟꓷꓼ ꓠꓷ, ꓝ. ꓢꓴ ꓬꓲ‐ꓢ‐ꓬ ꓕꓳ ꓶ ꓔꓯ ꓵ_ ꓡꓳ꓿ ꓪꓳꓽ ꓞ, ꓢꓴ ꓔꓯ ꓩꓴ ꓗꓷ ꓟ꓾ꓟꓬ ꓔꓶ ꓠꓬꓲ ꓟꓳ ꓡ ꓠ, ꓟ꓾ꓠꓬꓲ. ꓬꓯꓼ ꓢꓴ ꓔꓯ ꓩꓴ ꓗꓷ ꓠ, ꓟ ꓬꓲ ꓔꓯ ꓝꓲ ꓩꓴ ꓡ ꓟ ꓚꓱ, ꓔꓯ ꓵ_ ꓡꓳ꓿ ꓢꓲ ꓒ ꓬꓰ‐ꓢꓴ ꓚ ꓖꓶ ꓟ ꓔꓯ ꓠ ꓠ, ꓢꓴ ꓐꓴ ꓓꓵꓽ ꓙ ꓟꓶ ꓡꓰ ꓥ ꓟꓲ ꓟꓽ ꓘꓳ, ꓣꓴ꓾ ꓟꓬꓱꓽ ꓬꓰ ꓢꓴ ꓤ ꓠꓬ ꓕꓱ ꓡꓱ ꓫꓵ ꓚ ꓡꓳ꓾ ꓠꓱ. ꓐꓯꓼ ꓢꓴ ꓔꓯ ꓟꓽ ꓫꓬ, ꓢꓲ ꓕꓯ ꓚꓲ. ꓛꓬ ꓧꓶ. ꓕꓯ ꓫꓬ, ꓢꓰ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓠꓬꓲ ꓟꓽ ꓟꓴ ꓬꓰ_ ꓡꓳ꓿ ꓮꓽ ꓟ ꓟꓷꓼ ꓠꓷ, ꓝ. ꓢꓴ ꓔꓯ ꓥ ꓟꓲ ꓚꓲ. ꓛꓬ ꓔꓬ ꓟ ꓗꓪ ꓐꓰ ꓡ ꓞꓳ ꓐꓴ ꓠꓬ ꓟꓽ ꓘꓳ, ꓣꓴ ꓟ꓾ ꓠꓬꓲ ꓟꓽ ꓟꓴ_ ꓟ꓾ ꓟꓬꓱꓺ ꓓꓳꓽ ꓟꓽ ꓖꓶ_ ꓟ ꓥ ꓡꓳ꓿
ꓬꓲ ꓪ ꓠꓬ 30 ꓘꓳꓼ ꓛꓲ ꓠ‐ꓢ‐ꓡꓱ ꓗꓪ ꓪꓴꓽ ꓡ ꓟ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓪ ꓢꓷ. ꓔ ꓐꓰ ꓓꓵꓽ ꓙ ꓡꓳ꓾ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓡ ꓞꓳ ꓕꓲꓽ ꓣꓳ ꓐꓯ_ ꓟ ꓗ. ꓠꓯ. ꓗꓪ ꓪꓴ‐ꓢ ꓥ ꓟ ꓔꓯ ꓬꓲ ꓪ ꓟꓽ ꓢꓷ.꓾ ꓠꓶꓽ ꓞ, ꓡꓳ ꓐꓰ ꓓꓵꓽ ꓙ ꓥ ꓟꓲ ꓟꓽ ꓠꓶꓽ ꓞ, ꓡꓳ꓿ ꓕꓲ ꓧꓪ, ꓧꓪ, ꓣꓳ ꓤꓶꓻ ꓗꓪ ꓥ ꓟꓲ ꓖꓳ ꓟ ꓡꓰ ꓐꓰ ꓥꓳ꓾ ꓣꓳꓺ ꓟ ꓕꓲꓽ ꓙꓵ, ꓕꓯ ꓡꓰ ꓙꓲ‐ꓢꓴ ꓢꓲ ꓤ ꓥ ꓟ ꓑꓶ ꓓꓴ ꓙꓲ‐ꓢꓴ ꓢꓲ ꓤ ꓒꓬꓱꓼ ꓡ ꓟ꓾ ꓙꓵꓻ ꓠꓲ, ꓢꓷ. ꓡꓰ ꓓꓴ꓾ ꓦ ꓕꓲꓽ ꓒꓳ, ꓗꓪ ꓠꓬ ꓮꓽ ꓟꓴ ꓕꓲ ꓕꓽ ꓡꓰ ꓗꓷ ꓡꓰ ꓗꓴ._ ꓡꓳ꓿ ꓙꓵꓻ ꓠꓲ, ꓔꓯ ꓥ ꓟꓲ ꓟꓽ ꓕꓶ ꓞ,꓾ ꓣꓳ ꓢꓷ. ꓔ ꓥ ꓟꓲ ꓚꓵ ꓚꓵ ꓟꓽ ꓢꓷ. ꓫꓵ ꓗꓷ ꓡꓰ ꓗꓴ._ ꓡꓳ꓿ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓬꓰ ꓔꓬ ꓥ ꓟꓲ ꓟꓳ ꓔꓬ ꓥ ꓟꓲ ꓒꓵꓽ ꓠ ꓔ ꓟ ꓟꓽ ꓢꓷ.꓾ ꓮ ꓟꓴ ꓕꓲꓽ ꓕ ꓐꓰ ꓓꓵꓽ ꓙ ꓟ ꓗ. ꓠꓯ. ꓗꓪ ꓕꓱ ꓟ ꓓꓰ ꓢ ꓬꓲ. ꓚꓱ, ꓠꓯ. ꓟ ꓙꓳ ꓡꓰ ꓗꓴ._ ꓡꓳ꓿ ꓪꓴ‐ꓢ ꓔꓯ ꓚꓵ ꓚꓵ ꓢꓷ. ꓠ, ꓟ ꓘꓳ, ꓣꓴ ꓢꓴ ꓗꓷ ꓡꓰ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
