ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓧꓪ. ꓧꓪ.꓾ ꓢꓯꓼ ꓟꓬ ꓖꓶˍ ꓟ ꓪꓴ‐ꓢ ꓐꓯ ꓘꓶ ꓔꓯ ꓣꓳ ꓧꓶ. ꓕꓯ ꓠ ꓠ, ꓓꓴ ꓬꓰ ꓡꓯ꓿ ꓟ‐ꓕꓲ ꓕꓳꓽ ꓶ 16ꓽ21‐27 ꓥ ꓡꓳ꓿

ꓖꓳ ꓕꓲ ꓝꓲ. ꓕ ꓑꓳ. ꓬꓰ‐ꓢꓴ ꓡꓰ꓾ ꓬꓲ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓙꓰ ꓢꓲ꓾ ꓞꓳ ꓪꓴꓽ ꓞꓳ ꓔꓲ ꓐꓴˍ ꓐꓰ ꓔꓲ ꓒ ꓪꓴ. ꓓꓵ ꓣꓱꓽ ꓢꓴˍ ꓐꓰ꓾ ꓙꓵꓽ ꓗ ꓟ. ꓒ ꓐꓴ ꓡꓯ ꓒꓯ, ꓗꓪ ꓫ. ꓙꓵˍ ꓟ ꓮꓽ ꓟꓬ, ꓜꓲꓽ ꓠ ꓗ, ꓟˍ ꓐꓰ꓾ ꓢꓰꓼ ꓗꓷˍ ꓟˍ ꓟꓲ ꓔꓳ, ꓜꓳꓽ ꓢꓲ ꓢ ꓠꓬꓲ ꓕꓲ ꓠꓬꓲ ꓗꓪ ꓢꓯ. ꓬꓲꓼ ꓡ ꓠ ꓗ, ꓟ ꓾ ꓬꓲ ꓛꓳꓽ ꓒꓯ, ꓐꓴ ꓔꓯ ꓔꓱ, ꓔꓱˍ ꓐꓯ ꓟ. ꓖꓶ ꓪꓴ. ꓔꓴˍ ꓡꓳ꓿

ꓖꓳ ꓕꓯ ꓒꓲ‐ꓕꓱ ꓡꓰ ꓬꓲ ꓔꓯ ꓧꓳꓽ ꓓꓳ ꓙꓰ ꓢꓲ꓾ ꓢꓲ ꓒꓽꓳ꓾ ꓮ ꓡꓲ ꓥˍ ꓟꓲ ꓠꓴ ꓔꓯ ꓖꓳ ꓡꓱ ꓕꓽ ꓗꓷ ꓡꓰ ꓝꓲ꓾ ꓐꓯˍ ꓡꓳ꓿ ꓬꓲ ꓠꓬ ꓔꓲ, ꓒꓳ, ꓢꓲ ꓒꓲ‐ꓕꓱ ꓔꓯ꓾ ꓢ‐ꓓꓯꓳ꓾ ꓥꓪ ꓔꓯ ꓕꓽ ꓕꓲ ꓡꓯ꓿ ꓮ ꓡꓰꓳ ꓐꓯˍ ꓠꓬ ꓠꓴ ꓠꓽ ꓥꓪ ꓛꓲ ꓕꓲꓽ ꓓꓴ ꓥ ꓡꓳ꓿ ꓠꓴ ꓓꓵꓽ ꓙˍ ꓟ ꓠꓬ ꓪꓴ‐ꓢ ꓠꓲ, ꓡꓶꓽ ꓔꓯ ꓟꓽ ꓧꓳ,꓿ ꓠꓴ ꓠꓽ ꓞꓳ ꓤ ꓓꓵꓽ ꓙ ꓚꓱ, ꓗꓪˍ ꓡꓰꓽ ꓓꓵꓵꓽ ꓙ ꓔꓬ ꓐꓷ꓾ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓬꓰ‐ꓢꓴ ꓡꓰ ꓬꓲ ꓛꓳꓽ ꓒꓯ, ꓐꓴ ꓔꓯ꓾ ꓮꓽ ꓟ ꓥꓪ ꓔꓯ ꓛꓳ ꓠꓲ, ꓫꓵˍ ꓠꓬ꓾ ꓚꓲ. ꓛꓬ ꓙꓲ ꓖꓴ ꓡꓳ ꓗꓷ ꓢꓲ꓾ ꓬꓲ ꓡꓯ ꓐꓳ ꓔꓶ. ꓓꓴ ꓑꓱ. ꓔ ꓢꓲ ꓠꓬꓲ ꓥꓪ ꓔꓯ ꓛꓳ ꓡ ꓠꓯ, ꓡꓳ꓿ ꓬꓲ ꓚꓲ ꓛꓬ ꓢꓯꓼ ꓟꓬ ꓔꓯ ꓠꓲ, ꓥꓳ ꓢꓴ ꓮꓽ ꓟˍ ꓟꓲ ꓬꓲ ꓢꓯꓼ ꓟꓬ ꓒꓲꓼ ꓬꓰˍ ꓥꓳ꓿ ꓥꓪ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓟꓽ ꓠꓲ, ꓥꓳ ꓢꓴ ꓠꓽ ꓬꓲ ꓢꓯꓼ ꓟꓬ ꓧꓪ ꓟꓶˍ ꓥꓳ꓿

ꓞꓳ ꓤ ꓠꓬ ꓟꓵꓽ ꓗꓳ, ꓓꓵ ꓓꓵ ꓮ ꓙꓵꓽ ꓡꓱꓸꓼ ꓒꓳ, ꓟꓶˍ ꓟꓲ꓾ ꓚꓲ ꓛꓬ ꓢꓯꓼ ꓟꓬ ꓑ ꓗꓷ ꓠꓬ ꓮ ꓫꓵꓽ ꓙꓲ ꓖꓴ ꓟꓶˍ ꓥꓳ ꓪ? ꓞꓳ ꓤ ꓠꓬ ꓮ ꓫꓵꓽ ꓡꓰ ꓬꓲ ꓚꓲ ꓛꓬ ꓢꓯꓼ ꓟꓬ ꓑ ꓟꓶ ꓓ, ꓢꓰꓽ? ꓡ‐ꓞꓳ‐ꓮ‐ꓐꓲ ꓠꓬ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ ꓠꓯꓸꓼ ꓗꓪ꓾ ꓟꓴ ꓗꓪ ꓝꓲ ꓓꓴ ꓐꓴˍ ꓐꓰ ꓬꓯꓼ ꓡˍ ꓥꓳ꓿ ꓖꓳ ꓕꓯ ꓮꓽ ꓟ ꓔꓯˍ ꓟꓲ ꓬꓲ ꓬꓰ ꓗꓷ ꓟ ꓟꓬꓱꓽ ꓔꓯ ꓛꓳ ꓢꓲ ꓚꓱ, ꓖꓶˍ ꓥꓳ꓿ ꓠꓴ ꓪ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓕꓱ ꓗꓪ ꓦꓼ ꓞ, ꓢꓴ ꓕꓲ ꓐꓱ ꓠꓬ꓾ ꓡ‐ꓞꓳ‐ꓮ‐ꓐꓲ ꓬꓲ ꓗꓴꓷꓼ ꓠꓯꓸꓼ ꓗꓪ ꓡˍ ꓟ ꓔꓯ ꓟꓽ ꓟꓳ ꓕ ꓑꓳ.꓾ ꓮ ꓡꓲ ꓥˍ ꓟꓲ ꓟꓽ ꓫꓵꓻ꓾ ꓐꓯ ꓖꓶˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓬꓲ ꓐꓯ ꓘꓶ ꓥ ꓡꓳ꓿