ꓦꓲ‐ꓟ‐ꓪꓰ‐ꓔ ꓠꓲꓺ ꓪꓽ ꓚꓲ ꓘꓪꓼ ꓞꓰ ꓡ ꓟ ꓑꓶ. ꓓꓴ ꓠꓰꓑꓮꓡ ꓐꓰ ꓔꓲ.‐ꓐꓯꓼ ꓟꓵ: ꓐꓴ ꓗꓪ ꓒꓬꓱꓼ ꓗꓷ ꓟ ꓬꓲ ꓓꓽ ꓟ ꓐꓬ ꓡꓰ ꓟ ꓬꓲꓻ ꓙꓬ ꓙꓵꓽ ꓟꓶ. ꓡꓰ ꓟ ꓐꓱ ꓶ ꓔꓲꓺ ꓒ ꓪ ꓔꓲ. ꓡꓰꓳ 14 ꓠꓬ ꓠꓲ, ꓟ ꓫ.ˍ ꓡꓳ ꓐꓯ ꓢꓲ ꓪꓽ ꓘꓴ ꓙ ꓖꓶ ꓗꓷꓳ꓿
ꓠꓲꓺ ꓪꓽ ꓚꓲ ꓘꓪꓼ ꓞꓰꓻ ꓡ ꓟ ꓪꓴ. ꓠꓬꓲ ꓬꓲꓻ ꓠꓬ ꓠꓰꓑꓮꓡ ꓐꓰ ꓧꓶꓽ ꓗꓴꓷꓼ ꓕꓲ ꓛꓱꓽ ꓗꓪ ꓙꓳˍ ꓟ ꓦꓲ꓾ ꓙ ꓖꓴ꓾ ꓓꓽ ꓖꓴꓽ ꓐꓰ ꓮ ꓔꓳ. ꓙꓼ ꓐꓴ ꓔꓯ ꓐꓬ ꓡꓰ ꓝꓲ ꓗꓷꓳ꓿ ꓠꓲꓺ ꓪꓽ ꓚꓲ ꓘꓪꓼ ꓞꓰꓻ ꓡˍ ꓟ ꓬꓲ ꓢꓯꓼ ꓠꓬ ꓟꓵꓽ ꓓꓵꓺ (ꓟꓵꓽ ꓙꓴꓽ ꓚꓵ,ˍ ꓟ) ꓟ ꓡꓰ ꓐꓰ ꓗ, ꓡꓳ꓾ ꓐꓰ ꓓꓵꓽ ꓙꓽ ꓔꓬ ꓖꓴˍ ꓡꓳ꓿
ꓠꓰꓑꓮꓡ ꓗꓪ ꓡ ꓞꓳ 350 ꓣꓳ ꓟꓽ ꓞꓲ ꓫꓵꓻ ꓢꓲ 900 ꓣꓳ ꓟꓽ ꓞꓲꓺ ꓟꓶꓽ ꓡꓰ ꓒꓲꓼ ꓡꓰ ꓟˍ ꓡꓰ ꓐꓰ꓾ ꓔꓲ.‐ꓐꓯꓼ ꓗꓪ ꓥˍ ꓟꓲ ꓬꓲ ꓦꓬꓻ ꓣꓳ ꓟꓽ ꓞꓲꓺ ꓔꓯ ꓧꓪ ꓟꓽ ꓟꓳꓻ ꓟ ꓥ ꓡꓳ꓿ ꓒꓲꓼ ꓡꓰ ꓟꓶꓽ ꓡꓰ ꓢꓴ ꓐꓴ ꓠꓯꓸꓼ ꓗꓪ ꓠꓬ ꓗꓮꓲꓡꓮꓢꓧ ꓗꓪ ꓪꓽ ꓘꓴ ꓡ ꓢꓴ ꓠꓱ. ꓐꓯ ꓗꓴꓷꓼ ꓗꓪ ꓚꓳ. ꓡ ꓢꓴ ꓮ ꓟꓬ, ꓙꓳˍ ꓟ ꓥ ꓡꓳ꓿
ꓠꓱ. ꓐꓯ ꓗꓴꓷꓼ ꓐꓰ ꓙ ꓡꓯ ꓘꓳ ꓢꓲꓽ ꓒ ꓚꓮꓣꓓꓲꓠꓮꓡ ꓑꓲꓰꓔꓣꓳ ꓑꓮꓣꓳꓡꓲꓠ ꓗꓪ ꓐꓰ ꓕꓲ ꓝ. ꓔꓲꓺ ꓒ ꓪ ꓔꓲ. ꓖꓶ ꓩꓴ ꓡˍ ꓟ ꓕꓳꓽ ꓶ ꓗꓪ ꓔꓲꓺ ꓒ ꓪ ꓔꓲ. ꓠꓬ ꓫꓵꓻ ꓢꓴ ꓐꓴ ꓐꓱ ꓶ ꓪꓴ‐ꓢ ꓔꓬ ꓗꓪ ꓶꓼ ꓓꓰꓽ ꓪꓽ ꓘꓴ ꓙ ꓖꓶ ꓗꓷ ꓢꓲ ꓠꓬꓲ꓾ ꓤꓰꓻ ꓞ, ꓟ ꓕꓲ ꓦꓲ ꓢꓴ ꓐꓴ ꓐꓰˍ ꓟꓲ ꓕꓲ ꓪˍ ꓠꓲ, ꓟ ꓫ. ꓔꓬ ꓟ꓾ ꓚꓬꓴ. ꓙ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓐꓰ ꓫ. ꓙꓵ ꓡꓰ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓔꓬ ꓟ ꓔꓯ ꓐꓳ ꓔˍ ꓡꓳ꓿
ꓚꓬꓴ. ꓙ ꓬꓰ ꓙ ꓢꓴ ꓬꓲ ꓔꓴꓺ ꓣꓳ ꓟꓽ ꓞꓲ ꓠꓬ ꓧꓰꓡꓲꓚꓳꓑꓔꓰꓣ ꓐꓴ ꓔꓯ ꓣꓱꓽ ꓢꓲ ꓬꓰ ꓙ ꓔꓬ ꓟ ꓐꓰ ꓡꓲ, ꓡ ꓢꓴ ꓐꓴ ꓔꓯ ꓚꓬꓴ. ꓓꓳˍ ꓟ ꓟꓬꓱꓽ ꓬꓰ ꓔꓬ ꓥˍ ꓟꓲ꓾ ꓟꓵꓽ ꓘꓪꓼ ꓡꓰ ꓟ ꓐꓰ ꓐꓬ ꓡꓰ ꓟ ꓦꓲꓻ ꓑꓶ. ꓓꓴ ꓬꓰ ꓫ. ꓔꓬ ꓡꓳ꓿ ꓴꓠ ꓐꓰ ꓠꓰꓑꓮꓡ ꓒ ꓕꓲ ꓗꓪ ꓟ ꓠꓱ. ꓐꓯ ꓗꓴꓷꓼ ꓐꓰ ꓟꓵꓽ ꓗꓳ, ꓓꓵ ꓓꓵ ꓗꓪ ꓐꓰ ꓬꓰ ꓙ ꓜꓴ ꓐꓴ ꓥˍ ꓟꓲ ꓖꓳ ꓗꓪ ꓛꓲ ꓬꓰꓳ꓾ ꓐꓰ ꓢꓷ. ꓪˍ ꓡꓳ꓿
ꓮ ꓟꓶ ꓠꓬ ꓟꓵꓽ ꓞꓻ ꓡ ꓔꓬ ꓟ ꓑꓶ. ꓓꓴ ꓦꓲ‐ꓟ‐ꓪꓰ‐ꓔ ꓠꓲꓺ ꓪꓽ ꓚꓲ ꓠꓬ ꓙꓲ ꓡꓰ ꓢꓲ ꓬꓲꓻ ꓙꓬ ꓝꓮꓲ ꓙꓵꓽ ꓟꓶ ꓡˍ ꓟ ꓔꓯ ꓙꓳꓺ ꓔꓬ ꓡꓳ꓾ ꓐꓰ ꓢꓷ. ꓪˍ ꓡꓳ꓿
Credit to Vatican News
