ꓢꓲ ꓒ ꓬꓰ‐ꓢꓴ ꓠꓬ ꓟꓳꓻ ꓓ, ꓟ ꓕꓲ ꓒꓳ, ꓗꓪ ꓐꓰ ꓙꓵꓻ ꓔꓬ ꓟ ꓢꓶ. ꓟꓽ ꓞꓲ ꓠꓲ, ꓟ ꓔꓱ, ꓜꓳꓽˍ ꓟ ꓔꓯ ꓪ ꓜꓲ ꓠꓲ, ꓒꓴˍ ꓟ ꓥ ꓡꓳ꓿ ꓞꓲ ꓐꓱ ꓕꓲ ꓐꓱ ꓖꓶˍ ꓟ ꓡꓰ ꓐꓰ ꓟꓳꓻ ꓓ, ꓟ ꓕꓲ ꓒꓳ, ꓗꓪ ꓙꓲˍ ꓟ ꓔꓯ ꓬꓰ ꓔꓬ ꓥˍ ꓟꓲ꓾ ꓔꓱ, ꓜꓳꓽˍ ꓟ꓾ ꓫꓱ. ꓤ ꓠꓲ, ꓐꓰ ꓙꓵꓻ ꓠꓲ, ꓟꓽ ꓙꓳ ꓕꓯ ꓠꓽ ꓟꓽ ꓐꓲ ꓜꓲꓼ ꓡꓰ ꓢꓰꓽ꓿ ꓖꓳ ꓟ ꓑꓶ. ꓓꓴ ꓬꓰ‐ꓢꓴ ꓡꓰ ꓣꓳ ꓔꓯ ꓚꓲ. ꓛꓬ ꓕꓯꓽ ꓢꓲ ꓕꓲ ꓒꓳ, ꓟ ꓔꓯ ꓡꓰꓽ ꓟꓽ ꓡꓳ. ꓡꓳ.꓾ ꓣꓳ ꓠꓲ, ꓟ ꓠꓯꓸꓼ ꓗꓪ ꓙꓵꓻ ꓠꓲ,꓾ ꓠꓵꓻ ꓠꓲ, ꓐꓰ ꓦ ꓡꓱ ꓐꓳ ꓠꓲ, ꓙꓳ ꓟꓽ ꓙꓳ꓾ ꓓꓵꓽ ꓙꓽ ꓚꓬ, ꓠꓬꓲ ꓠ, ꓟ ꓘꓴꓻ ꓔꓬ ꓡꓳ꓿

ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓟ‐ꓕꓲ 23ꓽ23‐26 ꓥ ꓡꓳ꓿

ꓣꓳ ꓑ ꓙꓽ ꓗꓷ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓣꓱꓽ ꓢꓴ ꓐꓴ ꓠꓬ ꓕꓯꓽ ꓢꓲ ꓟꓳꓻ ꓓˍ ꓕꓲ ꓒꓳ, ꓛꓳ ꓫꓱꓽ ꓚꓱ, ꓔꓯ ꓟꓬꓽ ꓠꓬꓲ ꓛꓳ ꓒꓵꓽˍ ꓥ ꓟꓲ꓾ ꓔꓱ, ꓚꓵˍ ꓟ꓾ ꓫꓱ. ꓤˍ ꓟ ꓐꓰ ꓙꓵꓻ ꓠꓲ, ꓔꓯˍ ꓠꓬ ꓟꓲ ꓡꓰ, ꓔꓬ ꓟ ꓔꓯ ꓖꓴ ꓟ. ꓖꓶˍ ꓟ ꓔꓯ ꓣꓳ ꓑ ꓙꓽˍ ꓡꓳ꓿ ꓕꓯꓽ ꓢꓲ ꓟꓳꓻ ꓓˍ ꓟ ꓕꓲ ꓒꓳ, ꓗꓪ ꓢꓲꓽ ꓫꓬ ꓢꓲ ꓡꓳ. ꓐꓲˍ ꓥ ꓟꓲ꓾ ꓠꓲ, ꓟ ꓠꓯꓸꓼ ꓗꓪ ꓠꓬ ꓟꓬꓻ ꓠꓯꓻˍ ꓟ꓾ ꓐꓰ ꓟꓽ ꓔꓱ, ꓟ ꓠꓲ, ꓟ ꓡꓰꓽ ꓐꓲ ꓞ, ꓔꓬ ꓗꓴ.ˍ ꓡꓳ꓿

ꓖꓳ ꓟ ꓑꓶ. ꓓꓴ ꓣꓳ ꓥˍ ꓟꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓓꓵꓽ ꓙꓽ ꓕ ꓠꓬꓲ ꓠ ꓗ, ꓡꓳ꓿ ꓡꓳ. ꓟꓳˍ ꓟ ꓕꓲ ꓒꓳ, ꓗꓪ ꓙꓵꓻ ꓠꓲ, ꓕꓶ ꓢꓴˍ ꓡꓰ ꓐꓰ ꓗ, ꓥ ꓟꓲ꓾ ꓠꓲ, ꓟ ꓠꓯꓸꓼ ꓗꓪ ꓠꓽ ꓠꓵꓻ ꓠꓲ,꓾ ꓙꓵꓻ ꓠꓲ,꓾ ꓐꓰ ꓦ ꓡꓱ ꓐꓳ ꓠꓲ, ꓙꓳˍ ꓡ꓿ ꓣꓳ ꓐꓯˍ ꓟ ꓡꓰ ꓞꓳ ꓙꓳ ꓔꓬ ꓡ꓾ ꓐꓯˍ ꓟ ꓔꓯ ꓓꓵꓽ ꓙꓽ ꓠꓬꓲ ꓠ ꓗ, ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓔꓱ, ꓚꓵˍ ꓟ ꓔꓯ ꓧꓪ ꓢꓴ꓾ ꓫꓱ. ꓤ ꓠꓲ, ꓙꓳ ꓢꓴ꓾ ꓦ ꓡꓱ ꓐꓳ ꓢꓴ ꓒꓬꓱꓼ ꓡ ꓢꓲ꓾ ꓣꓳ ꓙꓵꓻ ꓠꓲ, ꓔꓯ ꓟꓷꓽ ꓠꓷ, ꓗꓪ ꓐꓰˍ ꓡꓰꓽ ꓟꓽ ꓞꓲꓺ ꓡꓯꓼ ꓕꓲꓺ ꓢꓷ. ꓙ ꓟꓳ ꓙ ꓐ ꓡ ꓠ, ꓟ ꓐꓱ ꓶ ꓣꓳ ꓔꓯ ꓬꓰ ꓙ ꓠ, ꓟ ꓢꓲ ꓒ ꓬꓰ‐ꓢꓴ ꓔꓯ ꓓꓰꓽ ꓓꓴ ꓬꓰ ꓡꓯ꓿