ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓓ ꓔꓯ ꓙꓲ ꓟ ꓟꓵꓽ ꓘꓳꓼ ꓒꓬꓱꓼ ꓡ ꓝꓲ ꓠ, ꓟ ꓮ ꓡꓲ ꓬꓰ ꓠꓯ, ꓟ (Laudatosi)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓚꓱ, ꓗꓪ ꓐꓰ ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓓ ꓔꓯ ꓙꓲ ꓟ ꓟꓵꓽ ꓘꓳꓼ ꓒꓬꓱꓼ ꓡ ꓝꓲ ꓠ, ꓟ ꓮ ꓡꓲ ꓬꓰ ꓠꓯ, ꓟ ꓐꓰ ꓐꓯ ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓩꓴ ꓡ ꓥꓳ꓿
2015 ꓘꓳꓼ ꓕꓯ ꓑꓳꓑꓰ ꓝꓣꓮꓠꓚꓲꓢ ꓡꓰ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓔꓯ ꓮ ꓡꓲ ꓐꓰ ꓬꓰ ꓠꓯ, ꓐꓱ ꓐꓳ ꓔ ꓟ ꓡꓮꓴꓓꓮꓔꓳ ꓢꓲ ꓔꓯ ꓣꓳ ꓐꓴ ꓡꓳ. ꓠꓬꓲ ꓓꓴ ꓬꓰ ꓡꓯ꓿
ꓪꓴꓽ ꓟꓴ ꓔꓬ ꓟ ꓗꓴꓷꓼ ꓐꓰ ꓶꓼ ꓦꓲꓻ ꓓ ꓐꓴ ꓠꓬ ꓟꓲ ꓠꓯ ꓗꓪ ꓙꓳ ꓟ ꓒꓵꓽ ꓫꓵꓽ ꓒꓵꓽ ꓙꓰ ꓐꓰ ꓟꓲ ꓠꓯ ꓔꓯ ꓮ ꓘꓶ. ꓛꓲ ꓣꓱ ꓢꓲ ꓠꓬꓲ ꓶꓻ ꓡꓯ ꓬꓰ ꓟ ꓑꓶ. ꓓꓴ ꓟꓲ ꓠꓯ ꓟꓽ ꓙꓲ ꓡꓰ ꓝꓲ ꓟ ꓑꓡꓮꓢꓔꓲꓚ ꓐꓰ ꓟꓽ ꓢꓲꓽ ꓫꓬ ꓟ ꓑꓶ. ꓛꓵꓽ ꓐꓴ ꓐꓰ ꓟꓴ ꓘꓴ ꓐꓴ ꓠꓬ ꓟꓲ ꓠꓯ ꓗꓴꓷꓼ ꓮ ꓟꓬ, ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓟꓬ, ꓛꓲ ꓟꓬ ꓡ ꓟ ꓑꓶ. ꓓꓴ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓔꓯ ꓒꓬꓱꓼ ꓡ ꓝꓲ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓪꓴꓽ ꓟꓴ ꓔꓬ ꓟ ꓗꓴꓷꓼ ꓡꓰ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓔꓯ ꓮ ꓟꓬ, ꓬꓰ ꓟ ꓑꓶ. ꓓꓴ ꓟꓵꓽ ꓘꓳꓼ ꓒꓳ, ꓡ ꓢꓲ ꓠꓬꓲ ꓫꓵꓽ ꓪꓴꓽ ꓒꓬꓱꓼ ꓡ ꓠꓬ ꓢꓯꓼ ꓐ ꓟ ꓗꓴꓷꓼ ꓐꓴ ꓐꓰ ꓞꓳ ꓫ. ꓐꓴ ꓠꓬ ꓫꓵꓽ ꓪꓴꓽ ꓔꓯ ꓮ ꓟꓬ, ꓛꓲ ꓔꓳ, ꓜꓳ ꓡꓰ ꓟ ꓥ ꓡꓳ꓿
ꓮ ꓟꓶ ꓟ ꓙꓵ, ꓗꓪ ꓟꓬ‐ꓟ ꓗꓴꓷꓼ ꓗ‐ꓛꓲ ꓗꓴꓷꓼ ꓫꓴ ꓗꓪ ꓥ ꓟꓲ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓟꓬꓱꓽ ꓔꓯ ꓗꓳ. ꓗꓷ ꓟ ꓙꓵ, ꓕꓯ ꓮ ꓟꓬ, ꓬꓰ ꓗꓷ ꓟ ꓑꓶ. ꓕꓲ ꓘꓳꓼ ꓡꓰ ꓕꓲ ꓘꓳꓼ ꓬꓲꓻ ꓙꓬ ꓙꓵˍ ꓟ꓾ ꓟꓵꓽ ꓡꓶꓽ ꓫꓵꓽ ꓪꓴꓽ ꓮ ꓟꓬ, ꓔꓯ ꓔꓳ, ꓜꓳ ꓔꓬ ꓟ ꓥꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓪꓴꓽ ꓟꓴ ꓔꓬ ꓟ ꓗꓴꓷꓼ ꓔꓯ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓗꓽ ꓕꓽ ꓟ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓮ ꓘꓶ. ꓛꓲ ꓶꓻ ꓙꓳ ꓟ ꓪꓴ. ꓠꓬꓲ ꓬꓲ ꓪ ꓔꓯ ꓬꓰ ꓝꓲ ꓠ,ꓟ ꓒꓴ ꓓꓰꓽ ꓢꓲ ꓠꓬꓲ ꓗꓽ ꓕꓽ ꓟ ꓟꓬꓱꓽ ꓬꓰ ꓝꓲ ꓔꓬ ꓟ ꓥ ꓡꓳ꓿
ꓟꓵꓽ ꓘꓳꓼ ꓦꓬꓼ ꓠꓬꓲ ꓐꓰ ꓟꓲ ꓠꓯ ꓞꓳ ꓙꓳ ꓚꓱ, ꓠꓬ ꓝ. ꓡꓯꓽ ꓘꓳ, ꓟ ꓔꓯ ꓣꓳ ꓐꓴ ꓡꓳ. ꓠꓬꓲ ꓓꓴ ꓬꓰ ꓡꓯ꓿
ꓡꓮꓴꓓꓮꓔꓳꓢꓲ ꓕꓳ ꓶ ꓗꓪ ꓮ ꓘꓶ. ꓛꓲ ꓣꓳ ꓚꓵˍ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫꓵꓽ ꓪꓴꓽ ꓔꓳ, ꓜꓳ ꓟ ꓐꓰ ꓟꓲ ꓠꓯ ꓡ ꓞꓳ ꓐꓴ ꓫ. ꓔꓬ ꓟ ꓠꓬ ꓪꓽ ꓡꓯ ꓘꓳ, ꓟ ꓚꓱ, ꓔꓯ ꓟ. ꓖꓶ ꓔ ꓡꓳ꓿
ꓠꓬꓲ. ꓠꓬꓲ ꓟꓲ ꓠꓯ ꓦꓲꓻ ꓓ ꓠꓬ ꓫꓵꓻ ꓠ ꓗꓪ ꓛꓲ ꓥꓴꓻ ꓔꓬ ꓡꓳ꓿ ꓣꓳ ꓐꓴ ꓬꓲ ꓢꓯꓼ ꓔꓯ ꓠ ꓠ, ꓖꓶ ꓠ, ꓟ ꓬꓲ ꓙꓵ, ꓛꓲ ꓔꓬ ꓟ ꓥ ꓡꓳ꓿ ꓝꓮꓲ ꓡꓲ ꓛꓴ ꓟꓵꓽ ꓢꓲ, ꓠꓯ ꓗꓪ ꓢꓲ, ꓜꓲ ꓡꓳ ꓜꓲ ꓟꓽ ꓙꓳ ꓟ ꓑꓶ. ꓓꓴ ꓟꓵꓽ ꓘꓳꓼ ꓒꓳ, ꓡ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓟꓵꓽ ꓘꓳꓼ ꓒꓳ,ꓡ ꓟ ꓑꓶ. ꓓꓴ ꓬꓲꓻ ꓙꓬ ꓮ ꓘꓶ. ꓟꓽ ꓙꓲ ꓟ ꓡꓳ. ꓗ ꓠꓬ ꓮ ꓘꓶ. ꓙꓵˍ ꓡꓳ꓿ ꓝꓮꓲ ꓬꓲꓻ ꓙꓬ ꓠꓬ ꓟꓽ ꓢꓲꓽ ꓫꓬ ꓬꓲꓻ ꓙꓬ ꓮ ꓟꓬ, ꓙꓳ ꓡꓰ ꓢꓲ ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓐꓰ ꓙꓶꓻ ꓤ ꓐꓴ ꓓꓳ ꓟꓽ ꓙꓲ ꓟ ꓬꓲꓻ ꓙꓬ ꓒꓬꓱꓼ ꓡꓰ ꓟ ꓥ ꓡꓳ꓿
ꓕꓱ ꓡꓰ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ (ꓰꓠꓦꓲꓣꓳꓠꓟꓰꓠꓔꓮꓡ ꓙꓴꓢꓔꓲꓚ) ꓟꓽ ꓙꓳ ꓠꓬ (ꓢꓳꓚꓲꓮꓡ ꓙꓴꓢꓔꓲꓚ) ꓥ ꓟꓲ ꓮ ꓕꓯ ꓥ ꓟꓲ ꓙꓳ ꓡ ꓓꓴ ꓟꓽ ꓙꓳ ꓐꓰ ꓐꓯ ꓖꓶ ꓔ ꓡꓳ꓿ ꓖꓳ ꓡꓱ ꓠꓬ ꓟꓲ ꓠꓯ ꓔꓯ ꓐꓬ ꓡꓰ ꓝꓲ ꓟ ꓚꓱ, ꓮ ꓙꓵꓽ ꓔꓯ ꓗꓽ ꓕꓽ ꓖꓶ ꓟ ꓠꓬ ꓟꓲ ꓠꓯ ꓗꓪ ꓔꓬ ꓟ ꓞꓳ ꓤ ꓐꓴ ꓮ ꓙꓵꓽ ꓔꓯ ꓗꓽ ꓕꓽ ꓖꓶ ꓟ ꓐꓰ ꓕꓲ ꓡꓰ ꓥ ꓡꓳ꓿
ꓟꓲ ꓠꓯ ꓔꓯ ꓐꓬ ꓡꓰ ꓝꓲ꓾ ꓟ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓟꓬꓱꓽ ꓬꓰ ꓢꓴ ꓡꓰ ꓧꓪ. ꓜ ꓢꓴ ꓐꓴ ꓠꓬ ꓗꓪ ꓞꓳ ꓫ. ꓐꓴ ꓐꓰ ꓕꓲ ꓠꓬꓲ ꓬꓰ ꓕꓲ ꓠꓬꓲ ꓜ ꓓꓴ ꓑ ꓫꓬ ꓐꓴ ꓔꓯ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ ꓟꓵꓽ ꓘꓳꓼ ꓒꓳ, ꓡ ꓔꓯ ꓔꓳ, ꓜꓳ ꓡ ꓟ ꓙꓵ, ꓔꓯ ꓬꓲ ꓪ ꓠꓬ ꓫꓵꓻ ꓢꓴ ꓐꓴ ꓐꓰ ꓠꓻ ꓓꓴ ꓡꓰ ꓫ. ꓓꓴ ꓟꓷ ꓓꓴ ꓔꓯ ꓮ ꓘꓶ. ꓔꓳ, ꓜꓳ ꓢꓴ ꓐꓴ ꓥ ꓟ ꓪꓴ. ꓠꓬꓲ ꓥ ꓡꓳ꓿
ꓖꓳ ꓡꓱ ꓠꓬ ꓞꓳ ꓡꓱ ꓞꓳ ꓡꓯ. ꓐꓴ ꓠꓬꓲ. ꓠꓬꓲ ꓣꓳ ꓐꓴ ꓙꓲ ꓟ ꓟꓵꓽ ꓘꓳꓼ ꓔꓯ ꓗꓽ ꓕꓽ ꓖꓶ ꓠ, ꓟ ꓮ ꓡꓲ ꓬꓰ ꓠꓯ, ꓡ
ꓠꓬꓲ. ꓠꓬꓲ ꓣꓳ ꓐꓴ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓖꓶ ꓠ, ꓟ ꓢꓲ, ꓜꓲ ꓔꓶ ꓡꓰ ꓟꓽ ꓞꓲ꓾ ꓟꓽ ꓔꓱ ꓟꓽ ꓜꓳ ꓟ ꓚꓱ, ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓔꓯ ꓟꓽ ꓙꓲ ꓟ ꓟꓬꓱꓽ ꓔꓯ ꓝꓮꓲ ꓟꓽ ꓬꓰ ꓠ, ꓟ ꓐꓯ ꓠ, ꓟ ꓙꓳ ꓟ ꓥꓡꓳ꓿ ꓝꓮꓲ ꓛꓲ ꓡ ꓟ ꓙꓵ, ꓗꓪ ꓣꓳ ꓮ‐ꓟꓲ ꓮ‐ꓐꓲ ꓐꓴ ꓔꓯ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓖꓶ ꓐ ꓡ ꓢꓴ ꓒꓬꓱꓼ ꓠ, ꓟ ꓣꓳ ꓐꓴ ꓢꓯꓼ ꓕꓵꓼ ꓡꓯ꓿
ꓝꓮꓲ ꓶꓻ ꓡꓯꓼ ꓬꓰ ꓢꓴ ꓐꓴ ꓥ ꓟꓲ ꓟꓲ ꓠꓯ ꓔꓯ ꓐꓬ ꓡꓰ ꓟ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓔꓯ ꓤ ꓟꓳ ꓖꓶ ꓠ, ꓟ ꓐꓯ ꓖꓶ ꓠ, ꓟ ꓥꓡꓳ꓿
ꓝꓮꓲ ꓑꓶ ꓛꓵꓽ ꓔꓯ ꓮ ꓔꓳ ꓔꓳ ꓟꓽ ꓡꓳ ꓖꓶ ꓠ, ꓟ ꓐꓰ ꓑꓡꓮꓢꓔꓲꓚ ꓔꓯ ꓤ ꓟꓳ ꓠ, ꓟ ꓥ ꓡꓳ꓿
ꓣꓳ ꓔꓬ ꓟ ꓦꓲꓻ ꓘꓴꓽ ꓜꓴꓻ ꓮ ꓙꓵꓽ ꓗꓪ ꓢꓷ. ꓠꓲ, ꓚꓴ ꓬꓲꓻ ꓖꓶ ꓠ,ꓟ ꓢꓯꓼ ꓕꓵꓼ ꓡꓯ꓿
ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓘꓳ, ꓣꓴ ꓪ ꓝꓲ ꓫ. ꓟꓳ ꓪ꓿
