ꓢꓲ ꓒ ꓬꓰ‐ꓢꓴ ꓠꓬ ꓡ ꓞꓳ ꓐꓴ ꓦꓬꓼ ꓟꓷꓼ ꓟ ꓔꓯ ꓐꓳ ꓡꓰ ꓝꓲ_ ꓡꓳ꓾
ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓑ ꓑ ꓥꓪꓽ ꓟ ꓐꓰ ꓥꓪ. ꓠꓬꓲꓽ ꓟ ꓢꓷ. ꓡꓰ ꓓꓴ ꓔꓯ ꓓꓵꓽ ꓙ ꓔꓱ, ꓕ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓐꓰ ꓜꓲ ꓡꓯ ꓘꓳ ꓟ ꓠꓬ ꓚꓲ ꓛꓬ ꓮ ꓘꓶ. ꓣꓱ ꓬꓯꓼ ꓟ ꓔꓯ ꓐꓲ ꓡꓰ ꓝꓲ_ ꓟ ꓦ ꓢꓯꓼ ꓪ ꓥ ꓟ ꓔꓯ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ ꓐꓯ ꓔ ꓡꓳ꓿
ꓟ‐ꓕꓲ ꓕꓳ ꓶ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓲ ꓒ ꓬꓰ‐ꓢꓴ ꓬꓲ ꓡꓰ ꓟ. ꓖꓶ ꓔ ꓟ ꓓꓵꓽ ꓙ ꓟꓶ ꓓꓴ ꓢꓷ. ꓡꓰ ꓓꓴ ꓠꓬ ꓓꓵꓽ ꓙ ꓟꓶ ꓓꓴ ꓡꓰ ꓟꓽ ꓥ꓾ ꓪꓴ‐ꓢ ꓬꓲ ꓠꓵꓻ ꓠꓲ, ꓐꓰ ꓪꓴ‐ꓢ ꓟꓴ ꓗꓪ ꓗꓴꓷꓼ ꓠꓶꓽ ꓡ ꓟ ꓔꓯ ꓟ. ꓖꓶ_ ꓟ ꓚꓱ, ꓟꓲ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓬꓲꓼ ꓠꓬꓲ. ꓟ. ꓖꓶ ꓔ ꓟ ꓠꓬ ꓐꓲ ꓜꓲꓼ ꓟ ꓠꓬꓲ ꓙ ꓟ꓾ ꓢꓲ ꓒ ꓬꓰ‐ꓢꓴ ꓐꓰ ꓜꓲ ꓟ ꓠꓬꓔꓱ, ꓟ ꓐꓰ ꓢꓯ. ꓔꓬ ꓟ ꓐꓱ ꓶ ꓡ ꓞꓳ ꓐꓴ ꓦꓬꓼ ꓟꓷꓼ ꓟ ꓔꓯ ꓐꓳ ꓡꓰ ꓝꓲ_ ꓡꓳ꓿ ꓓꓵꓽ ꓙ ꓟꓶ ꓓꓴ ꓢꓷ. ꓡꓰ ꓓꓴ ꓟ. ꓖꓶ ꓗ. ꓠꓯ. ꓞꓰ ꓞ, ꓟ 12 ꓠꓳ. ꓘꓴ ꓙꓳ ꓟ ꓡꓰ ꓐꓰ ꓪꓴ‐ꓢ ꓠꓬꓲ ꓙ ꓡꓳ. ꓙ ꓟ ꓠꓬ ꓮ ꓕꓯ ꓥ ꓟꓲ ꓟꓽ ꓣꓳ ꓡꓰ ꓝꓲ꓿
ꓶ ꓤ ꓧꓪ ꓜꓲꓼ ꓟ ꓐꓰ ꓣꓱ ꓟ ꓐꓯ_ ꓟ “ꓦ ꓠꓻ ꓫꓵ” ꓕꓯ ꓟ. ꓖꓶ ꓢꓲ ꓕꓱ ꓟ ꓠꓬ ꓢꓰꓼ ꓡꓯ ꓘꓳ ꓟ ꓐꓰ ꓛꓴꓽ ꓙꓳ ꓟ ꓗꓪ ꓦꓬꓼ ꓟꓷꓼ ꓔꓬ ꓢꓴ ꓫ. ꓔꓬ ꓢꓴ ꓐꓴ ꓔꓯ ꓟꓳ ꓡꓰ ꓟꓽ ꓘꓴ ꓟ ꓠꓲ, ꓟ ꓔꓯ ꓐꓲ. ꓞ, ꓡꓰ ꓝꓲ_ ꓡꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓑ ꓑ ꓔꓯ ꓶꓽ ꓥꓳꓽ ꓙꓱ ꓢꓲ ꓘꓰ. ꓖꓶ ꓟ (ꓬꓲ. ꓟꓶꓽ ꓟꓶ ꓘꓶꓼ ꓜ ꓜ ꓟ) ꓔꓯ ꓓꓵꓽ ꓙ ꓡꓰ ꓝꓲ ꓢꓲ꓾ ꓢꓲ ꓫꓬ ꓖꓳ ꓓꓱ ꓑ ꓑ ꓣꓱ ꓛꓰ ꓔꓯ ꓚꓵ ꓚꓵ ꓣꓱ ꓠ, ꓟ ꓘꓴ ꓔ ꓡꓳ꓿ ꓕꓲꓽ ꓦꓲꓻ ꓢꓴ ꓐꓰ ꓕꓲ ꓪ ꓜ ꓫꓵ ꓔꓯ ꓪꓽ ꓘꓴ ꓡꓯꓼ ꓙꓱ_ ꓟ꓾ ꓣꓱ ꓬꓯꓼ ꓢꓴ ꓔꓯ ꓬꓰ ꓙ_ ꓟ꓾ ꓢꓲ ꓡꓲ, ꓟ ꓔꓯ ꓧꓳꓽ ꓣꓱ ꓠ, ꓟ ꓕꓱ ꓡꓱ ꓬꓰ ꓠ, ꓟ ꓢꓯꓼ ꓖꓶ_ ꓡꓳ꓿ ꓚꓲ ꓛꓬ ꓢꓯ. ꓔꓬ ꓟ ꓤꓶꓻ ꓗꓪ ꓠꓵꓻ ꓠꓲ, ꓐꓰ ꓙꓵꓻ ꓠꓲ, ꓟꓬ ꓡ ꓠ, ꓟ ꓟ, ꓟ ꓟ‐ꓡꓲ ꓠꓯꓼ ꓗꓪ ꓪꓽ ꓘꓴ ꓖꓶ ꓢꓲ ꓬꓲ. ꓟꓶꓽ ꓢꓰꓼ ꓗꓷ ꓟ ꓥꓳ꓿
