ꓢꓲ ꓒ ꓬꓰ‐ꓢꓴ ꓡꓰ ꓒ‐ꓡꓲ‐ꓢꓷ ꓐꓴ ꓠꓬ ꓕꓯꓽ ꓢꓲ ꓕꓲ ꓒꓳ, ꓟ ꓔꓯ ꓡꓰꓽ ꓟꓬꓽ ꓠꓬꓲ ꓛꓳ ꓫꓱꓽˍ ꓟ ꓔꓯ ꓐꓯ ꓖꓴ ꓖꓶ ꓗꓷ ꓢꓲ꓾ ꓚꓵ ꓚꓵ ꓞꓳ ꓤ ꓐꓴ ꓔꓯ ꓟꓽ ꓫꓬ ꓗꓷ ꓡꓰ ꓝꓲˍ ꓟ ꓠꓬ ꓬꓲ ꓕꓯꓽ ꓢꓲ ꓕꓲ ꓒꓳ, ꓗꓪ ꓟ ꓟꓽ ꓥ ꓥ꓾ ꓠꓲ, ꓟ ꓠꓯꓸꓼ ꓗꓪ ꓐꓰ ꓓꓳ ꓡˍ ꓟ ꓡꓰꓽ ꓥ ꓡꓳ꓾ ꓐꓰ ꓐꓯ ꓟ. ꓖꓶˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓢꓲꓽ ꓫꓬˍ ꓟ ꓐꓯˍ ꓟ ꓬꓲ. ꓟ. ꓟꓲꓽ ꓚꓵ ꓔꓯ ꓝꓮꓲ ꓕꓲ ꓧꓪ, ꓓꓵꓽ ꓙ ꓔꓱ, ꓕ ꓠꓬꓲ ꓝꓲ ꓢꓲ ꓠꓬꓲ꓾ ꓒꓵꓽ ꓒ ꓐꓴ ꓡꓲꓽ ꓒꓰꓼ ꓔꓯ ꓛꓳ ꓫꓱꓽˍ ꓟ ꓢꓶ. ꓟꓽ ꓞꓲ ꓠꓲ, ꓟ ꓠꓯꓸꓼ ꓗꓪ ꓒꓳ, ꓡꓶ.ˍ ꓟ ꓠꓬ ꓮ ꓡꓲ ꓟꓬ ꓛꓲ ꓬꓳ. ꓚꓰꓽˍ ꓟ ꓣꓳ ꓔꓯ ꓐꓯ ꓟ. ꓖꓶ ꓡ ꓔꓬ ꓡꓳ꓿
ꓔꓲꓺ ꓒ ꓪ ꓔꓲ. ꓝꓣꓮꓠꓚꓲꓢ ꓡꓰ “ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓚꓲ. ꓛꓬ ꓠꓲ, ꓟ ꓠꓯꓸꓼ ꓗꓪ ꓐꓰ꓾ ꓝꓮꓲ ꓞꓳ ꓤ ꓗꓳ ꓡꓳ ꓗꓪ ꓙꓳ ꓔꓬ ꓟ ꓟꓽ ꓫꓱ. ꓡꓯ ꓘꓳ ꓟꓽ ꓪꓽ ꓡꓯ ꓘꓳ ꓟ ꓔꓯ ꓫꓬ, ꓔꓱ, ꓖꓶ ꓐ ꓡ ꓠ, ꓟ ꓐꓱ ꓶ ꓠꓲ, ꓟ ꓔꓯ ꓧꓶ. ꓕꓯ ꓒꓳ, ꓡꓶ. ꓗꓷ ꓠ ꓗ, ꓡꓳ꓾ ꓐꓰ ꓙꓳꓺ ꓗꓽ ꓖꓶ ꓔ ꓡꓳ꓿
ꓠꓲ, ꓟ ꓢꓲꓽ ꓫꓬ ꓟ ꓐꓯˍ ꓟ ꓠꓬ ꓝꓴꓲ ꓔꓯ ꓤ ꓟꓳ ꓠ, ꓟ ꓟꓽ ꓥ ꓥ꓾ ꓪꓴ‐ꓢ ꓐꓰ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓠꓵ ꓠꓲ, ꓚꓵ ꓡꓰ ꓠꓲ, ꓠꓵ ꓗꓴ.ˍ ꓟ ꓤꓶꓻ ꓔꓯ ꓫꓬ, ꓔꓶ ꓠ, ꓟ ꓡꓰꓽ ꓥ ꓡꓳ꓿ ꓖꓳ ꓡꓱ ꓠꓲ, ꓟ ꓔꓯ ꓬꓲ ꓫꓵꓼ ꓫꓬ, ꓔꓶˍ ꓟ ꓗꓪ ꓐꓰ ꓙꓵꓻ ꓢꓴ ꓐꓴ ꓠꓬ ꓫꓱ. ꓤ ꓠꓲ, ꓐꓰ ꓔꓱ, ꓚꓵˍ ꓟ ꓟꓬ ꓢꓶꓽ ꓡꓰ ꓟꓲ ꓠꓯ ꓔꓯ ꓟꓳ ꓗꓴ. ꓡꓰ ꓝꓲ ꓢꓲ꓾ ꓢꓴ ꓔꓯ ꓝꓴꓲ. ꓓꓰˍ ꓟ ꓐꓯ ꓞꓷ,ˍ ꓟ ꓗꓪ ꓐꓰ ꓟꓽ ꓥ ꓥ ꓠꓵ ꓠꓲ, ꓗꓪ ꓐꓰ ꓫꓬ, ꓔꓶˍ ꓟ ꓙꓲ‐ꓢꓴ ꓢꓲ ꓤ ꓐꓴ ꓤꓶꓻ ꓔꓯ ꓫꓬ, ꓔꓶ ꓐ ꓡˍ ꓡꓳ꓿
ꓣꓳ ꓞꓳ ꓫꓱꓽ ꓣꓱꓽ ꓬꓰ ꓔꓬ ꓟ ꓮ ꓙꓵꓽ ꓠꓬ ꓠꓲ, ꓟ ꓗꓪ ꓐꓰˍ ꓡꓰꓽ ꓓꓳ ꓡˍ ꓟ ꓔꓯ ꓙꓽ ꓜꓲꓼ ꓡꓰˍ ꓕꓯ ꓣꓳ ꓠꓬ ꓪꓴ‐ꓢ ꓐꓰ ꓪ ꓜꓲ ꓙ ꓡꓯ ꓘꓳ ꓐ ꓡ ꓢꓲ꓾ ꓕꓱ ꓡꓱ ꓙ ꓡꓯ ꓘꓳˍ ꓟ ꓗꓪ ꓐꓰ ꓣꓳ ꓔꓯ ꓙꓲ ꓫꓬˍ ꓟ ꓤꓶꓻ ꓗꓪ ꓧꓳꓽ ꓙꓰˍ ꓟ ꓥ ꓡꓳ꓿
