ꓟ‐ꓕꓲ 14ꓽ22‐36
ꓬꓰ‐ꓢꓴ ꓬꓲꓻ ꓙꓬ ꓕꓯꓽ ꓢꓲ ꓫꓱꓽ_ ꓟ
ꓬꓰ-ꓢꓴ ꓡꓰ ꓞꓳ ꓜꓴꓻ ꓔꓯ ꓬꓲꓼ ꓙꓰ ꓝꓲ ꓔꓬ ꓕꓯ꓾ ꓬꓲ ꓠꓬ ꓞꓼ ꓐꓰ ꓛꓳꓽ ꓒꓯꓹ ꓐꓴ ꓔꓯ ꓡꓲ ꓗꓪ ꓓꓵꓽ ꓡꓰ ꓝꓲ ꓢꓲ꓾ ꓬꓲ ꓪꓽ ꓔꓯ ꓧꓶꓸ ꓕꓯ ꓖꓳ ꓐꓽ ꓢꓲ ꓗꓪ ꓙꓰ ꓝꓲˍ ꓡꓳ꓿ꓞꓳ ꓜꓴꓻ ꓔꓯ ꓬꓲꓼ ꓙꓰ ꓝꓲ ꓗꓷ ꓠꓬ꓾ ꓬꓲ ꓠꓽ ꓬꓲ ꓕꓲ ꓣꓳˍ ꓡꓰꓽ ꓪꓽ ꓘꓴ ꓠꓹ ꓟ ꓪꓽ ꓚꓲ ꓗꓪ ꓓꓯ ꓙꓰ ꓢꓲ꓾ ꓟꓰꓻ ꓬꓰˍ ꓟꓲ ꓬꓲ ꓕꓲ ꓣꓳˍ ꓡꓰꓽ ꓖꓳ ꓗꓪ ꓔꓬ ꓡꓳ꓿ꓖꓳ ꓡꓱ ꓥ ꓟꓲ ꓛꓳꓽ ꓒꓯꓹ ꓐꓴ ꓜꓶꓽ ꓔ ꓟ ꓡꓲ ꓠꓽ꓾ ꓬꓲꓻ ꓡꓴꓽ ꓐꓱꓻ ꓘꓶꓽ ꓗꓪ ꓐꓰ ꓶ ꓤ ꓗꓳꓹ ꓞ ꓕꓯ꓾ ꓟꓲꓽ ꓦꓲ ꓓꓶꓽ ꓡ ꓢꓲ ꓬꓲꓻ ꓡꓯꓼ ꓟꓰꓼ ꓡꓰ ꓡꓲ ꓔꓯ ꓶꓹ ꓡꓰ ꓔꓬ ꓡꓳ꓿ꓠꓯꓼ ꓡꓲ ꓙꓵꓹ ꓛꓲ ꓗꓪ ꓬꓰ-ꓢꓴ ꓠꓬ ꓬꓲ ꓪꓽ ꓔꓬ ꓗꓪ ꓬꓲꓻ ꓡꓴꓽ ꓐꓱ ꓕꓯꓽ ꓢꓲ ꓫꓱꓽ ꓡ ꓡꓳ꓿ꓬꓲꓻ ꓡꓴꓽ ꓐꓱ ꓕꓯꓽ ꓢꓲ ꓗꓪ ꓬꓲ ꓫꓱꓽ ꓔꓬ ꓟ ꓔꓯ ꓛꓳꓽ ꓒꓯꓹ ꓐꓴ ꓟꓳꓻ ꓗꓷ ꓠꓬ ꓦꓲꓸ ꓡꓰ ꓢꓲ꓾ ꓫꓵꓻ ꓗꓴꓸ ꓫꓵ ꓦ ꓥ ꓠꓳꓹ꓾ ꓐꓯ ꓢꓲ ꓙꓳꓺ ꓠꓬꓲ ꓘꓴꓻ ꓔꓴ ꓡ ꓡꓳ꓿ꓬꓰ-ꓢꓴ ꓠꓽ ꓞꓼ ꓐꓰ ꓬꓲ ꓪꓽ ꓔꓯ ꓫ ꓕꓱ ꓡ ꓢꓲ꓾ ꓠꓲꓹ ꓪꓴꓽ ꓪꓴꓽ ꓔꓬ꓿ ꓥꓪ ꓥ ꓡꓳ꓾ ꓕꓽ ꓙꓳ꓾ ꓐꓯ ꓖꓶˍ ꓡꓳ꓿ꓒꓲ-ꓕꓱ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓢꓲ ꓒꓽꓳ꓾ ꓠꓴ ꓥ ꓠꓬ꓾ ꓬꓲꓻ ꓙꓬ ꓕꓯꓽ ꓢꓲ ꓫꓱꓽ ꓢꓲ ꓠꓴ ꓔꓬ ꓗꓪ ꓡ ꓠꓹ ꓟ ꓥꓪ ꓔꓯ ꓕꓵꓼ ꓪꓽ ꓖꓶ ꓡꓯ꓾ ꓐꓯˍ ꓡꓳ꓿ꓬꓰ-ꓢꓴ ꓡꓰ꓾ ꓡꓯ꓾ ꓐꓯ ꓗꓷ ꓠꓬ꓾ ꓒꓲ-ꓕꓱ ꓠꓽ ꓡꓲ ꓗꓪ ꓐꓰ ꓬꓯꓼ ꓡꓰ ꓢꓲ꓾ ꓬꓲꓻ ꓙꓬ ꓕꓯꓽ ꓢꓲ ꓬꓰ-ꓢꓴ ꓔꓬ ꓗꓪ ꓫꓱꓽ ꓙꓰˍ ꓡꓳ꓿ꓖꓳ ꓡꓱ ꓥ ꓟꓲ ꓟꓲꓽ ꓦꓲ ꓓꓽ ꓟ ꓙꓱꓼˍ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓙꓳꓺ ꓡꓰ ꓠꓬꓲ ꓦꓱꓺ ꓓꓵꓽ ꓡꓰˍ ꓐꓰ ꓗꓹ ꓡꓳ꓿ ꓖꓳ ꓕꓯ ꓬꓲ ꓡꓰ꓾ ꓢꓲ ꓒꓽꓳ꓾ ꓥꓪ ꓔꓯ ꓚꓬꓴ ꓙ ꓡꓯ꓾ ꓐꓰ ꓘꓴˍ ꓡꓳ꓿ꓬꓰ-ꓢꓴ ꓠꓬ ꓞꓼ ꓐꓰ ꓬꓲ ꓡꓯ ꓒꓯꓹ ꓛꓱ ꓓꓳ ꓡ ꓢꓲ꓾ ꓒꓲ-ꓕꓱ ꓔꓯ ꓖꓳꓻ ꓖꓶ ꓢꓲ ꓠꓬꓲ꓾ ꓙꓵꓻ ꓠꓲꓹ ꓣꓳꓺ ꓢꓴꓳ꓾ ꓮꓸ ꓫꓵ ꓪꓴꓸ ꓠꓬꓲ ꓓꓵꓽ ꓙ ꓟꓬꓽˍ ꓡ?꓾ ꓐꓯˍ ꓡꓳ꓿ꓬꓲ ꓪꓽ ꓠꓬꓲꓽ ꓣꓳ ꓡꓲ ꓗꓪ ꓓꓵꓽ ꓡꓰ ꓠꓬ ꓟꓲꓽ ꓦꓲ ꓙꓱꓼ ꓠꓽ ꓡꓰꓳ꓿ꓡꓲ ꓗꓪ ꓔꓬ ꓢꓴ ꓠꓬ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓠꓴ ꓠꓽ ꓚꓵ ꓚꓵ ꓪꓴ-ꓢ ꓮ ꓐꓲ ꓥꓳ꓾ ꓐꓯˍ ꓡꓳ꓿ꓬꓲ ꓪꓽ ꓡꓲ ꓗꓴꓸ ꓢꓲ ꓙꓰ ꓗꓷ ꓠꓬ꓾ ꓖꓶ-ꓠꓲ-ꓢ-ꓡꓱ ꓟꓵꓽ ꓗꓪ ꓛꓲ ꓬꓰˍ ꓡꓳ꓿ꓖꓳ ꓗꓪ ꓔꓬ ꓢꓴ ꓐꓴ ꓬꓰ-ꓢꓴ ꓛꓲ ꓡ ꓟ ꓢꓷꓸ ꓗꓷ ꓠꓬ꓾ ꓬꓲ ꓪꓽ ꓡꓰ ꓖꓳ ꓕꓲ ꓟꓵꓽ ꓚꓳ ꓡꓳ ꓗꓪ ꓡꓽ ꓞꓳ ꓝꓲ ꓩꓴ ꓗꓷ ꓢꓲ꓾ ꓠꓻ ꓢꓴ ꓒꓬꓽ ꓢꓴ ꓮꓽ ꓙꓵ ꓔꓯ ꓬꓲ ꓔꓬ ꓗꓪ ꓧꓳꓽ ꓡ ꓡꓳ꓿ꓬꓲ ꓪꓽ ꓠꓬ ꓬꓲ ꓐꓵ ꓞꓶꓽ ꓟꓶꓽ ꓗꓪˍ ꓡꓰꓽ ꓫꓱꓹ ꓠꓹ ꓟ ꓬꓲ ꓔꓯ ꓓꓰꓽ ꓢꓲ꓾ ꓖꓳ ꓡꓱ ꓫꓱꓹ ꓪ ꓢꓴ ꓮꓽ ꓙꓵ ꓓꓻ ꓡꓰˍ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓬꓲꓻ ꓙꓬ ꓕꓯꓽ ꓢꓲ ꓙ ꓫꓱ_ ꓟ ꓔꓯ ꓝꓲ ꓓꓴ ꓐꓴ ꓡꓳ. ꓟꓳ ꓕꓯ ꓫꓵꓻ ꓗꓴ. ꓫꓵ ꓦ ꓐꓰ ꓙꓳꓺ ꓦꓲ. ꓡꓰ ꓟ ꓥꓳ꓿ ꓟꓲꓽ ꓦꓲ ꓙꓱꓼ ꓟ ꓐꓰ ꓬꓲꓻ ꓡꓯꓼ ꓟꓰꓼ ꓙꓳꓺ ꓙꓳ, ꓔ ꓟ ꓥ ꓟꓲ ꓬꓲ ꓪ ꓔꓯ ꓟꓬ ꓠꓬꓲ ꓙꓳꓺ ꓔꓬ ꓝꓲ_ ꓡꓳ꓿ ꓕꓱ ꓟ ꓡꓰ ꓐꓰ ꓣꓳ ꓮ ꓙꓵ ꓥ ꓟꓲ ꓙꓳꓺ ꓓꓴ ꓙꓳ_ ꓡꓳ꓿ ꓕꓲ ꓐꓱ ꓠꓬ ꓮ ꓔꓳ ꓟꓽ ꓣꓱ ꓬꓯꓼ ꓟ ꓔꓯ ꓥ ꓟꓲ ꓙꓳꓺ ꓔꓬ ꓡꓳ꓾ ꓟꓽ ꓒꓬꓱꓼ ꓡ ꓢꓰ ꓟ ꓔꓯ ꓥ ꓟꓲ ꓙꓳꓺ ꓔꓬ ꓡꓳ꓾ ꓙꓬ ꓫ. ꓔꓬ ꓟ ꓕꓱ ꓡꓱ ꓫꓵ ꓔꓯ ꓠꓬ ꓪꓴ‐ꓢ ꓠꓬ ꓟꓽ ꓠꓲ, ꓫꓵ꓾ꓠꓴ ꓪ ꓕꓽ ꓙꓳꓺ ꓕꓽ ꓙꓳꓺ ꓐꓰ ꓢꓲ ꓫꓬ ꓕꓳ ꓶ ꓗꓪ ꓥ ꓟꓲ ꓡꓳ. ꓟꓳ ꓪ ꓡꓳ꓿ ꓙꓳꓺ ꓟ ꓔꓯ ꓒꓳ, ꓠꓬ ꓙꓵꓻ ꓠꓲ, ꓥ ꓡꓳ꓿ ꓪꓴ‐ꓢ ꓠꓬ ꓬꓲ ꓔꓯ ꓙꓵꓻ ꓬꓲ ꓔꓬ ꓡꓳ꓾ ꓕꓽ ꓙꓳꓺ ꓐꓰ ꓐꓯ ꓢꓲ ꓮ ꓕꓯ ꓟꓲ ꓐꓯ ꓔꓬ ꓟ ꓙꓳ ꓡꓳ꓿ ꓬꓲ ꓠꓬ ꓣꓳ ꓠꓯꓼ ꓗꓪ ꓔꓬ ꓡꓳ꓾ ꓪꓴ‐ꓢ ꓔꓬ ꓡꓳ ꓐꓰ ꓠꓲ, ꓟ ꓗꓪ ꓗꓷ ꓔ ꓟ ꓠꓬ ꓣꓳ ꓔꓯ ꓠꓲ, ꓡꓱ ꓝꓲ_ ꓡꓳ꓿ ꓮ ꓫꓵ ꓔꓯ ꓙꓳ ꓓꓴ ꓙꓳ_ ꓡ꓾ ꓮ ꓫꓵ ꓔꓳ, ꓜꓳ ꓡ ꓥ ꓟꓲ ꓪꓴ‐ꓢ ꓔꓯ ꓟꓬ ꓠꓬꓲ ꓔꓱ ꓔꓱ, ꓐꓰ ꓕꓶꓻ ꓞ, ꓟ ꓙꓵꓻ ꓠꓲ, ꓐꓰ ꓙꓵꓻ ꓢꓲ ꓙ ꓫꓱꓽ ꓠꓬ ꓮ ꓫꓵ ꓔꓯ ꓥ ꓟꓲ ꓗꓳ. ꓙꓰ ꓐ ꓡ ꓟ ꓥ ꓡꓳ꓾
