ꓬꓰ˗ꓢꓴ ꓢꓯꓸ ꓬꓲꓼ ꓡ ꓟ (Daily reflection)
ꓧꓪ. ꓧꓪ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ ꓗꓷ ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 20ꓽ1‐2, 11‐18 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓫꓵꓻ ꓗꓪ ꓐꓰ ꓢꓯ. ꓬꓲ ꓡ ꓟ ꓚꓱ, ꓥ ꓡꓳ꓿
ꓟ‐ꓖ‐ꓓ‐ꓡꓲ ꓟ‐ꓡꓲ ꓠꓬ ꓢꓲꓺ ꓒ ꓬꓰ‐ꓢꓴ ꓔꓵ ꓔ ꓟ ꓡꓯꓼ ꓜꓴ ꓗꓪ ꓡ ꓢꓲ ꓠꓬꓲ ꓡꓳ. ꓠꓬꓲ ꓗꓷ ꓟ ꓙꓵ, ꓕꓯ ꓡꓯ ꓜꓴ ꓔꓯ ꓑꓲ. ꓔ ꓭ. ꓠꓬ ꓡꓱ ꓒꓴ ꓔ ꓟ ꓔꓯ ꓡꓳ. ꓟꓳ ꓡꓰ ꓢꓲ ꓠꓬꓲ ꓡꓱ ꓜꓴ ꓘꓴꓽ ꓗꓪ ꓡꓳ. ꓠꓬꓲ ꓗꓷ ꓕꓯ ꓢꓲꓺ ꓒ ꓬꓰ‐ꓢꓴ ꓔꓯ ꓟꓽ ꓟꓳ ꓗꓷ ꓡꓰ ꓠꓬ ꓝꓲ ꓓꓴ ꓐꓴ ꓔꓯ ꓐꓯ ꓟ. ꓖꓶ ꓗꓷꓳ꓿
ꓟ‐ꓡꓲ ꓠꓬ ꓠꓯ ꓞꓲ ꓗꓷ ꓟ ꓡꓱ ꓜꓴꓻ ꓘꓴ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳ. ꓠꓬꓲ ꓠ, ꓟ ꓙꓰ ꓗꓷ ꓟ ꓥ ꓡꓳ꓿ ꓕꓱ ꓠꓯ ꓞꓲ ꓟ ꓟ ꓠꓬ ꓣꓳ ꓧꓪꓽ ꓖꓳ ꓓꓱ ꓕꓲ ꓒꓳ, ꓗꓪ ꓞꓳ ꓙꓳ ꓔꓬ ꓟ ꓙꓵ, ꓕꓯ ꓣꓳ ꓔꓳ, ꓜꓳ ꓡ ꓟ ꓤ ꓠꓬꓲ ꓫꓵꓽ ꓠꓬꓲ ꓓꓴ ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿
ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓠꓬ ꓡꓯ ꓜꓴ ꓗꓪ ꓢꓲꓺ ꓒ ꓬꓰ‐ꓢꓴ ꓧꓪ ꓖꓳ ꓓꓱ ꓔꓯ ꓟꓽ ꓟꓳ ꓟ ꓑꓶ. ꓓꓴ ꓠꓲ, ꓟ ꓫ. ꓢꓴ ꓥꓴ ꓗꓷ ꓟ ꓥ ꓡꓳ꓿
ꓕꓱ ꓡꓰ ꓗꓷ ꓡꓰ ꓟ ꓙꓵ, ꓕꓯ ꓣꓳ ꓠꓲ, ꓟ ꓘꓴꓽ ꓗꓪ ꓢꓲꓺ ꓒ ꓬꓰ‐ꓢꓴ ꓟꓽ ꓔꓬ ꓐꓰ ꓓꓴ ꓙ ꓖꓴ ꓟ ꓙꓵ, ꓥ ꓡꓳ ꓐꓰ ꓐꓯ ꓖꓶ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓦꓻ ꓠꓬ ꓢꓲꓺ ꓒ ꓔꓯ ꓟꓽ ꓠꓽ ꓠꓽ ꓧꓪ, ꓔꓬ ꓟ ꓪꓴ. ꓠꓬꓲ ꓚꓬꓴ ꓢꓲꓺ ꓒ ꓢꓯꓼ ꓟꓬ ꓢꓲꓺ ꓒ ꓔꓯ ꓧꓪ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
ꓟꓴ ꓗꓪ ꓝꓲ ꓓꓴ ꓐꓰ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳ. ꓟꓳ ꓗꓷ ꓟ ꓙꓵ, ꓔꓯ ꓟ‐ꓡꓲ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓖ ꓘꓶꓽ ꓡꓳ. ꓢꓴ ꓐꓰ ꓓꓴ ꓙ ꓡꓰ ꓟ ꓥ ꓡꓳ꓿ ꓖꓳ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓪꓴ‐ꓢ ꓢꓯꓼ ꓪ ꓙꓳ ꓟ ꓑꓶ. ꓓꓴ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓙꓲ ꓟ ꓮ ꓣꓳ ꓡꓳ. ꓒ ꓥ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥꓡꓳ꓿ ꓮ ꓣꓳ ꓐꓴ ꓠꓬ ꓬꓲ ꓢꓯꓼ ꓔꓯ ꓢꓷ. ꓡꓳ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓙꓲ‐ꓢꓴ ꓢꓲꓺꓤ ꓐꓴ ꓠꓬ ꓪꓴ‐ꓢ ꓔꓯ ꓣꓳ ꓠꓲ, ꓟ ꓘꓴꓽ ꓗꓪ ꓘꓳ, ꓣꓴ ꓢꓲꓠ ꓬꓲ ꓣꓳ ꓚꓲ. ꓛꓬ ꓞꓳ ꓙꓳ ꓢꓯ. ꓔꓬ ꓟ ꓕꓯ ꓢꓲꓺ ꓒ ꓠꓲ, ꓡꓶꓽ ꓔꓯ ꓛ 22.7.ꓳ ꓠ, ꓟ ꓣꓳ ꓚꓵˍ ꓟ ꓥꓡꓳ
ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓝꓮꓲ ꓢꓯ. ꓬꓲꓼ ꓡ ꓟ ꓚꓱ, ꓔꓯ ꓟ. ꓖꓶ ꓗꓷ ꓟ ꓙꓵ, ꓕꓯ ꓥꓪ ꓔꓯ ꓕꓽ ꓣꓴ ꓔ꓿ ꓖꓳ ꓔꓯ ꓕꓽ ꓠꓶꓽ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿ ꓐꓯ ꓠꓲ, ꓫꓵˍ ꓟ ꓠꓬ ꓬꓲ ꓔꓯ ꓟꓯꓼ ꓐꓴ ꓡꓰ ꓟꓽ ꓢꓰꓼ ꓢꓰ ꓢꓲꓽ ꓫꓬ ꓠꓽ ꓥꓪꓽ ꓠꓬꓲ ꓗꓪ ꓡ ꓙꓰ ꓟꓽ ꓓ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓲ ꓢꓲꓽ ꓫꓬ ꓖꓳ ꓓꓱ ꓥ ꓟ ꓢꓲꓽ ꓫꓬ ꓖꓳ ꓓꓱ ꓗꓪ ꓟꓲ ꓠꓯ ꓧꓪꓽ ꓖꓳ ꓓꓱ ꓐꓰ ꓦꓻ ꓢꓯꓼ ꓪ ꓟꓶ ꓠ, ꓟ ꓐꓱ ꓶ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓖꓶ ꓔ ꓟ ꓥ ꓡꓳ꓿ ꓬꓲ ꓧꓪꓽ ꓖꓳ ꓓꓱ ꓚꓵˍ ꓔꓯ ꓢꓲꓽ ꓫꓬ ꓠ, ꓟ ꓐꓱ ꓶ ꓟ. ꓖꓶ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓗꓪ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓶꓼ ꓓꓳ ꓫꓱ, ꓓꓳ ꓔꓯ ꓟ‐ꓡ ꓲ ꓡꓰ ꓓꓽ ꓪꓴ. ꓚꓺ ꓟ. ꓙꓰ ꓟ ꓥꓡꓳ꓿
ꓖꓳ ꓟ ꓠꓬ ꓤ ꓠꓱ ꓤ ꓐꓴ ꓥ ꓟꓲ ꓪꓴ‐ꓢ ꓬꓲ ꓶꓼ ꓓꓳ ꓫꓱ, ꓓꓳ ꓬꓰ ꓟ ꓗꓪ ꓙꓵꓻ ꓠꓲ, ꓮ ꓟꓬ, ꓛꓲ ꓙꓳ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥꓡꓳ꓿
ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓗꓪ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓚꓺ ꓒꓬꓱꓼ ꓙꓰ ꓠ, ꓟ ꓐꓱ ꓶ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓠꓯ, ꓗꓪ ꓶꓻ ꓙꓳ ꓟ ꓥꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓝꓴꓲ ꓔꓲ ꓟꓶ ꓡꓰ ꓢꓴ ꓮ ꓙꓵꓽ ꓠꓬ ꓶꓼ ꓓꓳ ꓫꓱ, ꓓꓳ ꓚꓺ ꓠ,ꓟ ꓶꓻ ꓙꓳ ꓢꓴ ꓐꓴ ꓡꓰ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓔꓯ ꓠ ꓠꓬꓲ ꓔꓬ ꓟ ꓠꓬ ꓣꓳ ꓤꓶꓻ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓜꓲꓼ ꓪ ꓥ ꓟꓲ ꓬꓲ ꓔꓯ ꓟꓽ ꓢꓷ. ꓢꓲ ꓠꓬꓲ ꓠꓱ. ꓐꓯꓼ ꓔꓶ. ꓗꓪ ꓧꓪ ꓔꓬ ꓢꓴ ꓒꓬꓱꓼ ꓔꓬ ꓡ?
ꓣꓳ ꓢꓯ. ꓔꓬ ꓟ ꓙꓵ, ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓡꓳ. ꓙ ꓔꓬ ꓟ ꓔꓯ ꓣꓳ ꓟꓽ ꓡꓳ ꓟꓳ ꓢꓴ ꓒꓬꓱꓼ ꓔꓬ ꓡ?
ꓢꓲꓺ ꓒ ꓬꓰ‐ꓢꓴ ꓔꓯ ꓧꓪ ꓓꓴ ꓬꓰ ꓡꓯ꓿ ꓢꓲꓺ ꓒ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
