ꓴꓗꓣꓮꓲꓠꓰ ꓗꓴꓷꓼ ꓗꓪ ꓐꓰ ꓔꓲꓺ ꓒ ꓓꓽ ꓡꓦꓲꓦ ꓡꓰ ꓥꓪ ꓠꓴ ꓥꓳꓽ ꓡꓳ ꓓꓴ ꓠꓬ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓡꓰ ꓙꓳ ꓡꓳ ꓐꓰ ꓐꓯ ꓔ ꓟ
7 ꓦ ꓟ 19 ꓠꓬꓲ 2026 ꓘꓳꓼ ꓕꓯ ꓴꓗꓣꓮꓲꓠꓰ ꓗꓴꓷꓼ ꓗꓪ ꓐꓰ ꓔꓲꓺ ꓒ ꓓꓽ ꓡꓦꓲꓦ ꓡꓰ ꓥꓪ ꓠꓴ ꓥꓳ ꓡꓳ. ꓓꓴ ꓠꓬ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓡꓰ ꓙꓳ ꓡꓳ ꓐꓰ ꓐꓯ ꓖꓶ ꓗꓷ ꓟ ꓥ ꓡꓳ꓿
ꓔꓲꓺ ꓒ ꓓꓽ ꓡꓰ ꓴꓗꓣꓮꓲꓠꓰ ꓗꓴꓷꓼ ꓗꓪ ꓑ ꓫꓬ ꓐꓴ ꓮ ꓙꓵꓽ ꓠꓬ ꓣ‐ꓫ ꓗꓴꓷꓼ ꓗꓪ ꓐꓰ ꓢꓰꓼ ꓡꓯꓽ ꓘꓳ, ꓔꓬ ꓟ ꓪꓴ. ꓠꓬꓲ ꓠꓲ, ꓫ. ꓟꓬ ꓫ. ꓓꓴ ꓮ ꓟꓬ, ꓔꓳ, ꓜꓳ ꓔꓬ ꓢꓲ ꓠꓬꓲ ꓑ ꓫꓬ ꓐꓴ ꓥ ꓟꓲ ꓮ ꓘꓶ. ꓠꓲ, ꓟ ꓐꓬ ꓡꓰ ꓓꓴ ꓙ ꓪꓴꓽ ꓧꓶ ꓔꓬ ꓡꓳ ꓐꓰ ꓐꓯ ꓖꓶ ꓔ ꓡꓳ꓿
ꓝꓮꓲ ꓔꓲꓺ ꓒ ꓓꓽ ꓡꓰ ꓟꓯꓼ ꓢꓰꓼ ꓡꓯꓽ ꓘꓳ, ꓔꓬ ꓟ ꓠꓬ ꓞ ꓞ ꓠꓽ ꓡꓰ ꓠ, ꓟ ꓬꓲ ꓚꓱ, ꓟꓽ ꓟꓳ. ꓐꓰ ꓫ. ꓕꓱ ꓔ ꓟ ꓥ ꓡꓳ꓿
ꓦꓮꓔꓲꓚꓮꓠ ꓗꓴꓷꓼ ꓗꓪ ꓴꓗꓣꓮꓲꓠꓰ ꓗꓴꓷꓼ ꓗꓪ ꓡ ꓗꓷ ꓟ ꓔꓲꓺ ꓒ ꓪ ꓔꓲ ꓝꓲ ꓓꓴ ꓔꓯ ꓴꓗꓣꓮꓲꓠꓰ ꓔꓲꓺ ꓒ ꓓꓽ ꓠꓬ ꓗꓴꓷꓼ ꓘꓴꓽ ꓗꓪ ꓮ ꓡꓲ ꓐꓰ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓚꓱ, ꓔꓯ ꓐꓯ ꓟ. ꓖꓶ ꓗꓷ ꓟ ꓥ ꓡꓳ꓿
ꓔꓲꓺ ꓒ ꓓꓽ ꓡꓰ ꓗꓴꓷꓼ ꓗꓪ ꓟꓯꓼ ꓢꓰꓼ ꓡꓯꓽ ꓘꓳ, ꓔꓬ ꓟ ꓠꓬ (4) ꓙꓳ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓫ. ꓓꓴ ꓟꓷꓼ ꓓꓴ ꓮ ꓟꓬ, ꓛꓲ ꓔꓳ, ꓜꓳ ꓔꓬ ꓟ ꓥ ꓡꓳ꓿
ꓟꓯꓼ ꓢꓰꓼ ꓡꓯꓽ ꓘꓳ, ꓔꓬ ꓟ ꓪꓴ. ꓠꓬꓲ ꓫꓵꓻ ꓡꓰ ꓢꓴ ꓐꓴ ꓑ ꓫꓬ ꓐꓴ ꓮ ꓟꓬ, ꓙꓳ ꓟ ꓐꓰ ꓠꓻ ꓓꓴ ꓡꓰ ꓢꓴ ꓔꓬ ꓦꓲꓻ ꓟꓽ ꓙꓳ ꓡꓰ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓔꓬ ꓟ ꓚꓱ, ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓔꓲꓺ ꓒ ꓓꓽ ꓡꓰ ꓫ. ꓕꓱ ꓔ ꓟ ꓠꓬ ꓕꓱ ꓟꓬ ꓛꓲ ꓫ. ꓓꓴ ꓟꓷ ꓓꓴ ꓠꓲ, ꓫ. ꓟꓬ ꓫ. ꓓꓴ ꓙꓳ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓘꓴ ꓦꓲꓻ ꓗꓪ ꓡ ꓢꓲ ꓠꓬꓲ ꓟꓲ‐ꓢ ꓔꓶ ꓓꓴ ꓙꓵ, ꓗꓪ ꓡ ꓢꓲ ꓠꓬꓲ ꓪꓽ ꓘꓴ ꓢꓴ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓔꓬ ꓟ ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓞꓳ ꓜꓴꓻ ꓗꓴꓷꓼ ꓐꓴ ꓴꓗꓣꓮꓲꓠꓰ ꓗꓴꓷꓼ ꓗꓪ ꓔꓳ, ꓜꓳ ꓔꓬ ꓟ ꓫꓵꓽ ꓪꓴꓽ ꓔꓯ ꓟꓲ ꓡꓲ ꓔꓬ ꓡꓳ ꓐꓰ ꓐꓯ ꓖꓶ ꓔ ꓡꓳ꓿ ꓴꓗꓣꓮꓲꓠꓰ ꓗꓴꓷꓼ ꓔꓯ ꓮ ꓟꓬ, ꓛꓲ ꓬꓰ ꓙ ꓔꓳ, ꓙ ꓠ, ꓟ ꓐꓯ ꓔ ꓡꓳ ꓐꓰ ꓦꓮꓔꓲꓚꓮꓠ ꓠꓰꓪꓢ ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
