ꓡꓲ‐ꓢꓴ ꓫꓵꓽ ꓘꓴ ꓜꓲꓼ ꓞꓳ ꓮ ꓙꓵꓽ ꓔꓺ ꓡꓯ ꓘꓳ ꓢꓲ ꓖꓪ ꓙꓱ ꓜꓲꓼ ꓓꓴ ꓬꓰˍ ꓟ
ꓠꓬꓲ. ꓠꓬꓲ 7 ꓦ ꓟ 18 ꓠꓬꓲ 2026 ꓘꓳꓼ ꓠꓽ ꓛꓳꓼ ꓠꓬꓲ ꓕꓯ ꓗ‐ꓛꓲ ꓗꓴꓷꓼ ꓫꓴꓻ ꓟꓲ‐ꓚꓲ‐ꓠ ꓡꓳ ꓒꓱ ꓗꓪ ꓡꓲ‐ꓢꓴ ꓫꓵꓽ ꓘꓴ ꓜꓲꓼ ꓞꓳ ꓮ ꓙꓵꓽ ꓔꓺ ꓡꓯ ꓘꓳ ꓢꓲ ꓠꓬꓲ ꓖꓪ ꓙꓱ ꓜꓲꓼ ꓓꓴ ꓔꓯ ꓬꓰ ꓗꓷ ꓟ ꓥ ꓡꓳ꓿
ꓡꓲ‐ꓢꓴ ꓫꓵꓽ ꓘꓴ ꓜꓲꓼ ꓞꓳ ꓮ ꓙꓵꓽ ꓔꓺ ꓡꓯ ꓘꓳ, ꓢꓲ ꓠꓬꓲ ꓕꓲ ꓦ ꓕꓲ ꓧꓪ, ꓪꓽ ꓘꓴ ꓔꓬ ꓟ ꓮ ꓟꓶ ꓠꓬ (4) ꓘꓳꓼ ꓙꓳ ꓡꓰꓳ꓿ ꓝꓮꓲ ꓕꓲ ꓦ ꓕꓲ ꓧꓪ, ꓪꓽ ꓘꓴ ꓙꓵ, ꓬꓲ ꓔꓶ ꓙꓱꓼ ꓠꓬ ꓟꓬ‐ꓟ ꓗꓴꓷꓼ ꓢꓲ ꓡꓲ ꓟꓶ ꓠ, ꓟ ꓐꓱ ꓶ ꓐꓰ ꓣꓳ ꓡꓲ‐ꓢꓴ ꓫꓵꓽ ꓐꓴ ꓮ ꓙꓵꓽ ꓐꓱ ꓶ ꓪꓽ ꓘꓴ ꓙ ꓖꓶ ꓔꓬ ꓟ ꓥ ꓡꓳ ꓐꓰ ꓟ. ꓒ ꓓꓽ ꓡꓯ‐ꓟꓯ‐ꓢꓲ ꓡꓰ ꓐꓯ ꓡꓳ꓿
ꓝꓮꓲ ꓖꓪ ꓙꓱ ꓜꓲꓼ ꓗꓷ ꓟ ꓠꓬ ꓛꓲ ꓡ ꓟ (9) ꓦ ꓕꓯ ꓪꓽ ꓘꓴ ꓜꓲꓼ ꓓꓴ ꓬꓰ ꓗꓷ ꓟ (4) ꓘꓳꓼ ꓙꓳ ꓡ ꓟ ꓑꓶ. ꓓꓴ ꓮ ꓡꓲ ꓐꓰ ꓬꓰ ꓠꓯˍ ꓟ ꓚꓱ, ꓔꓯ ꓥ ꓟꓲ ꓖꓪ ꓙꓱ ꓗꓷꓳ꓿
ꓡꓲ‐ꓢꓴ ꓕꓳ ꓶ ꓟ. ꓖꓶ ꓔꓬ ꓟ ꓠꓬ (10) ꓘꓳꓼ ꓙꓳ ꓡ ꓔꓬ ꓡꓳ ꓬꓲ ꓔꓶ ꓙꓱꓼ ꓠꓬ ꓡ ꓠ, ꓟ (100) ꓘꓳꓼ ꓕꓯ ꓡꓲ‐ꓢꓴ ꓮ ꓟꓬ ꓫꓵꓽ ꓙꓳˍ ꓥ ꓟꓲ ꓕꓲ ꓫꓵꓽ ꓡꓰꓽ ꓗꓷ ꓡꓰ ꓠ, ꓟ ꓖꓳ ꓡꓱ ꓠꓬ ꓘꓴ ꓜꓲꓼ ꓞꓳ ꓕꓲ ꓟ ꓗꓪ ꓚꓳ. ꓡꓲ‐ꓢꓴ ꓕꓳ ꓶ ꓮ ꓘꓶ. ꓢꓷ. ꓢꓴ ꓕꓲ ꓣꓳ ꓟ. ꓖꓶ ꓠ, ꓟ ꓚꓱ, ꓔꓯ ꓥ ꓟꓲ ꓐꓯ ꓖꓶ ꓗꓷꓳ꓿
ꓖꓪ ꓙꓱ ꓜꓲꓼ ꓓꓴ ꓗꓪ ꓔꓺ ꓡ ꓢꓴ ꓟ. ꓒ ꓓꓽ ꓐꓴ ꓐꓰ ꓟꓽ ꓒ ꓐꓴ ꓮ ꓙꓵꓽ ꓠꓬ (11) ꓣꓳ ꓥ ꓡꓳ ꓐꓰ ꓢꓷ. ꓪ ꓡꓳ꓿ ꓡꓲ‐ꓢꓴ ꓘꓴ ꓜꓲꓼ ꓞꓳ ꓮ ꓙꓵꓽ ꓗꓪ ꓐꓰ ꓟ. ꓒ ꓓꓽ ꓐꓴ ꓠꓬ ꓦ‐ꓐ ꓕꓲ ꓟ ꓕꓯ ꓕꓲ ꓧꓪ, ꓪꓽ ꓘꓴ ꓔꓬ ꓟ ꓠꓬ ꓮ ꓟꓶ (4) ꓘꓳꓼ ꓐꓲ ꓡꓰ ꓢꓲ ꓠꓬꓲ ꓛꓲ ꓡ ꓟ (9) ꓦ ꓕꓯ ꓠꓬ ꓪꓽ ꓘꓴ ꓑꓮꓲꓽ ꓓꓽ ꓟ ꓙꓳ ꓡꓳ ꓐꓰ ꓢꓷ. ꓪ ꓡꓳ꓿
ꓪꓽ ꓘꓴ ꓙꓵ, ꓗꓪ ꓗꓴꓷꓼ ꓢꓲ, ꓡꓲ ꓟꓶ ꓠ, ꓟ ꓐꓱ ꓶ ꓝꓮꓲ ꓡꓲ‐ꓢꓴ ꓫꓵꓽ ꓐꓴ ꓶꓻ ꓡꓯꓼ ꓬꓰ ꓢꓴ ꓐꓴ ꓟꓲ ꓠꓯ ꓢꓷ. ꓠꓲ, ꓧꓪ ꓢꓴ ꓐꓴ ꓮ ꓙꓵꓽ ꓢꓴ ꓐꓱ ꓶ ꓪꓽ ꓘꓴ ꓙ ꓔꓬ ꓟ ꓥ ꓡꓳ ꓐꓰ ꓢꓷ. ꓪ ꓡꓳ꓿
