ꓠꓬꓲ. ꓠꓬꓲ ꓡꓲꓽ ꓒꓰꓼ ꓐꓰ ꓫ. ꓕꓱˍꓟ ꓗꓪ ꓠꓬ ꓡꓲꓽ ꓒꓰꓼ ꓕꓱ ꓟ ꓠꓬ ꓪꓴ‐ꓢ ꓠꓲ., ꓡꓲ ꓐꓰ ꓪꓽ ꓟꓽ ꓪ꓾ꓜꓳꓽ ꓟ ꓜꓳ꓾ ꓮꓽ ꓫꓵꓼ ꓗꓪ ꓐꓰ ꓕꓯ ꓡ ꓐꓯˍꓟ ꓚꓱ, ꓔꓯ ꓣꓳ ꓐꓴ ꓠꓽ ꓠ ꓓꓴ ꓬꓰ ꓡꓯ꓿ ꓡꓲꓽ ꓒꓰꓼ ꓕꓲ ꓐꓱ ꓟ ꓘꓴꓽ ꓗꓪ ꓠꓬ ꓮꓽ ꓘꓶꓽ ꓟ ꓙꓲˍꓟ ꓟꓽ ꓕꓱ ꓟ ꓙꓳ, ꓟ ꓐꓭ ꓓꓴ ꓣꓳ ꓙꓲˍꓟ ꓶ ꓓꓳ ꓫꓱꓽ ꓓꓳꓽ ꓗꓪ ꓐꓰ ꓢꓲ ꓫꓬ ꓡꓰ ꓝꓲ ꓠꓽ ꓗ. ꓡꓳ꓿ ꓖꓳ ꓡꓰ ꓠꓬꓲ ꓬꓲ. ꓪꓴ ꓕꓲ ꓟ ꓣꓳ ꓠꓽ ꓠꓬꓲ ꓠꓽ ꓗ. ꓟ ꓠꓬ ꓡꓲꓽ ꓒꓰꓼ ꓕꓲ ꓟ ꓠꓬ ꓞꓳ ꓤ ꓬꓲ. ꓶ ꓑꓬꓱꓼ ꓛꓲ ꓓꓵ ꓟ ꓡꓲꓽ ꓒꓱꓼ ꓙꓳ ꓡ? ꓐꓯˍꓟ ꓔꓯ ꓣꓳ ꓡꓳ. ꓠꓬꓲ ꓠꓽ ꓗ. ꓡꓳ꓿ ꓬꓲ‐ꓚꓰ‐ꓬꓲꓽ ꓪꓴ ꓕꓳꓽ ꓶ 1ꓽ 27 ꓗꓪ ꓠꓬ ꓞꓳ ꓤ ꓥ ꓓ ꓐꓳ ꓠꓬ ꓪꓴ‐ꓢ ꓒꓬꓱꓼ ꓔꓯ ꓕꓯ ꓢꓲ꓾ ꓠꓬꓲ ꓚꓰ, ꓔꓽ ꓟ ꓟꓶ ꓡꓳ꓿
ꓖꓳ ꓡꓰ ꓠꓬꓲ ꓞꓳ ꓤ ꓐꓯˍꓟ ꓠꓬ ꓒꓵꓽ ꓡꓳ꓿ ꓖꓳ ꓡꓰ ꓠꓬ ꓞꓳ ꓤ ꓔꓯ ꓒꓴ ꓠꓲ., ꓟꓽ ꓙꓳˍꓟ ꓫ. ꓝꓲˍꓟ ꓕꓱ ꓡꓱ ꓫꓵꓼ ꓡꓲꓽ ꓒꓰꓼ ꓙꓳ ꓠꓬ ꓕꓱ ꓟ ꓠꓬ ꓟꓽ ꓜꓳ ꓟꓽ ꓯꓬꓼ ꓟ ꓬꓲ. ꓚꓱ, ꓥ ꓡꓳ꓿ ꓕꓲ ꓐꓱ ꓟ ꓡꓲꓽ ꓒꓰꓼ ꓠꓬ ꓠꓲ., ꓠꓵ ꓗꓴ. ꓠꓯ꓾ꓟ ꓬꓰ ꓙ ꓗꓴ. ꓠ, ꓟ ꓟ. ꓖꓶ ꓔꓬ ꓡꓳ꓿ ꓕꓱ ꓟ ꓔꓯ ꓠꓬ ꓣꓳ ꓫ ꓕꓽ ꓠ ꓗ. ꓡꓳ꓿ꓝꓮꓲ ꓡꓲꓽ ꓒꓰꓼ ꓕꓲ ꓟ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓠꓲ., ꓧꓳꓼ ꓢꓲ ꓡꓳꓼ ꓠ, ꓟ ꓐꓱ ꓶ ꓢꓯꓼ ꓖꓶ ꓡ? ꓐꓯˍꓟ ꓔꓯ ꓣꓳ ꓡꓳ. ꓠꓬꓲ ꓠꓽ ꓗ. ꓡꓳ꓿ ꓬꓳ‐ꓦ ꓕꓳꓽ ꓶ 13ꓽ 35 ꓗꓪ ꓢꓲꓽ ꓒ ꓬꓰ‐ꓢꓴ ꓐꓯ ꓔꓽ ꓡꓳ꓿ ꓠꓴ ꓪ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ., ꓠꓵ ꓡꓯꓼ ꓘꓳ ꓢꓲ꓾ ꓠꓬꓲ ꓠꓱ. ꓐꓯ ꓢꓴ ꓟꓳ ꓕꓯ ꓐꓽ ꓐ ꓔꓯ ꓫꓱꓼ ꓖꓶ ꓥꓳ ꓐꓰ ꓐꓯ ꓔꓽ ꓡꓳ꓿
ꓖꓳ ꓡꓰ ꓠꓬꓲ ꓦꓲ., ꓘꓴꓽ ꓠꓯꓼ ꓘꓴ ꓗꓪ ꓠꓲ., ꓧꓳꓽ ꓢꓲ ꓧꓳꓽ ꓝꓲˍꓟ ꓣꓳ ꓔꓬ ꓟ ꓞꓳ ꓤ ꓗꓪ ꓠꓲ., ꓧꓳꓽ ꓢꓲ ꓧꓳꓽ ꓝꓲ꓾ ꓥꓳ ꓐꓯ ꓠꓬ ꓙꓲˍꓟ ꓥ ꓡꓳ꓿
ꓕꓱ ꓟ ꓡꓰ ꓐꓰ ꓟꓽ ꓥ꓾ ꓛꓲ ꓚꓬ ꓐꓱ ꓶ ꓡꓰ ꓙ ꓟꓶ ꓟ ꓔꓯ ꓠꓬ ꓫꓬ ꓐꓭ ꓠꓽ ꓗ. ꓟ ꓥ ꓡꓳ꓿ ꓝꓮꓲ ꓕꓲ ꓫꓵꓽ ꓟ ꓠꓬ ꓡꓲꓽ ꓒꓰꓼ ꓕꓱ ꓟ ꓠꓬ ꓕꓱ ꓚꓵꓽ ꓟ ꓗꓪ ꓙꓰ ꓔꓬ ꓡ? ꓐꓯˍꓟ ꓔꓯ ꓠꓽ ꓠꓬꓲ ꓠꓽ ꓗ. ꓡꓳ꓿ ꓙꓲ ꓢꓴ ꓢꓲ ꓤ ꓙꓵꓽ ꓠꓲ., ꓟꓶ ꓢꓴ ꓐꓴ ꓠꓬ ꓙꓵˍꓟ ꓕꓱ ꓚꓵꓽ ꓟ ꓔꓯ ꓧꓪꓽ ꓠ, ꓟ ꓥ ꓡꓳ꓿
