ꓶꓻ ꓟꓯꓼ ꓢꓴ ꓪꓴꓽ ꓧꓶ ꓠꓽ ꓟꓶ ꓠ, ꓟ
ꓧꓪ. ꓧꓪ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 11ꓽ25‐27 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓪꓽ ꓘꓴ ꓚꓱ, ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓐ, ꓐꓽꓳ ꓟꓴ ꓗꓪ ꓟꓲ ꓠꓯ ꓢꓲ ꓒꓽꓳ ꓠꓴ ꓔꓯ ꓫ. ꓟꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓙꓽ ꓙꓽ ꓜꓲꓼ ꓢꓴˍ ꓐꓰ ꓢꓷ. ꓠꓲ, ꓙꓳ ꓢꓴ ꓔꓯˍ ꓐꓰ ꓕꓱ ꓟꓬ ꓫꓵꓽ ꓟ ꓚꓵ ꓔ ꓢꓲ ꓤ ꓠꓱ ꓤ ꓔꓯ ꓟ. ꓖꓶ ꓡꓳ ꓐꓰ ꓪꓽ ꓘꓴ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓙꓺ ꓣꓳ ꓠꓲ, ꓟ ꓗꓪ ꓐꓰ ꓪꓽ ꓘꓴ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓤ ꓠꓱ ꓤ ꓐꓰ ꓐꓯ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓙ ꓣꓳ ꓟ ꓠꓲ, ꓟ ꓙꓳ ꓢꓴ ꓐꓰ ꓐꓯ ꓟ ꓥ ꓡꓳ꓿ ꓚꓲ. ꓛꓬ ꓮ ꓘꓶ. ꓓ ꓢꓴ ꓟꓽ ꓥ ꓪꓴ‐ꓢ ꓢꓯꓼ ꓪ ꓗꓪ ꓐꓰ ꓮ ꓫꓵꓽ ꓔꓯ ꓥ ꓟꓲ ꓬꓰ ꓐ ꓡ ꓟ ꓑꓶ. ꓓꓴ ꓪꓴ‐ꓢ ꓠꓯ, ꓗꓪ ꓙ ꓣꓳ ꓟ ꓠꓲ, ꓟ ꓠꓬ ꓮ ꓘꓶ. ꓣꓳ ꓚꓵˍ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓙ ꓣꓳ ꓠꓲ, ꓟ ꓣꓱ ꓢꓲ ꓠꓬꓲ ꓮ ꓫꓵꓽ ꓬꓰ ꓥ ꓟꓲ ꓪꓴ‐ꓢ ꓔꓯ ꓠꓵꓻ ꓠꓲ, ꓢꓲ ꓠꓬꓲ ꓙ ꓣꓳ ꓟ ꓠꓲ, ꓟ ꓙꓳ ꓠ, ꓟ ꓢꓯꓼ ꓠ, ꓟ ꓥ ꓡꓳ꓿
ꓪꓴ‐ꓢ ꓣꓱ ꓛꓰ ꓔꓯ ꓣꓳ ꓶ ꓓꓰ ꓟ ꓔꓯ ꓟꓽ ꓐꓲ ꓜ ꓟ ꓔꓯ ꓠ ꓠꓬꓲ ꓢꓴ ꓟꓽ ꓥ ꓥ꓾ ꓣꓳ ꓠꓬ ꓣꓳ ꓙ ꓠꓲ, ꓟ ꓗꓪ ꓐꓰ ꓪꓴ‐ ꓢ ꓔꓯ ꓮ ꓕꓯ ꓥ ꓟꓲ ꓣꓱ ꓬꓯꓼ ꓬꓲ ꓢꓯꓼ ꓪ ꓔꓯ ꓖꓶ ꓠ, ꓟ ꓐꓱ ꓶ ꓙ ꓣꓳ ꓠꓲ, ꓟ ꓗꓪ ꓐꓰ ꓶ ꓓꓰ ꓓꓴ ꓬꓰ ꓡꓯ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓐ, ꓐ ꓟꓽ ꓥ ꓠꓬ ꓮ ꓐꓲ ꓔꓯ ꓢꓷ. ꓢꓴ ꓟꓽ ꓙꓳ꓿ ꓝꓮꓲ ꓮ ꓐꓲ ꓡꓰ ꓟ. ꓖꓶ ꓠꓲ, ꓫꓵ ꓢꓴ ꓖꓳ ꓕꓲ ꓣꓳ ꓟꓽ ꓥ ꓠꓬ ꓐ, ꓐꓽ ꓔꓯ ꓢꓷ. ꓢꓴ ꓟꓽ ꓙꓳ ꓐꓰ ꓐꓯ ꓔ ꓟ ꓥ ꓡꓳ꓿
ꓐ, ꓐ ꓤ ꓔꓲ ꓢꓲꓽ ꓫꓬ ꓟꓽ ꓦ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓠꓬ ꓠꓵꓻ ꓠꓲ, ꓗꓪ ꓐꓰ ꓮ ꓙꓵꓽ ꓠꓬ ꓪꓽ ꓡꓯꓽ ꓘꓳ, ꓟ ꓥ ꓡꓳ꓿ ꓖꓳ ꓡꓱ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓙꓵꓽ ꓗ ꓔꓯ ꓛꓳꓽ ꓢꓴ ꓐꓴ ꓡꓰ ꓟꓽ ꓥ꓾ ꓣꓳ ꓠꓬ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓠꓵꓻ ꓠꓲ, ꓠꓯ, ꓗꓪ ꓓꓵꓽ ꓡꓰ ꓠ, ꓟ ꓘꓴ ꓟꓶ ꓡꓰ ꓢꓴ ꓐꓴ ꓥ ꓡꓳ꓿
ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓪꓴ‐ꓢ ꓣꓱ ꓛꓰ ꓠꓬ ꓮ ꓘꓶ. ꓚꓲ ꓣꓳ ꓚꓵˍ ꓟ ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓪꓴ‐ꓢ ꓡꓰ ꓬꓲ ꓧꓶ. ꓕꓯ ꓣꓳ ꓟꓲ ꓠꓯ ꓡ ꓞꓳ ꓔꓬ ꓗꓪ ꓡ ꓗꓷ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓠꓬꓲ. ꓠꓬꓲ ꓬꓲ ꓠꓬ ꓣꓳ ꓐꓰ ꓔꓬ ꓟ ꓔꓯ ꓟꓲ‐ꓢ ꓔꓶ ꓖꓶ ꓟ ꓙꓵ, ꓕꓯ ꓢꓲꓽ ꓫꓬ ꓖꓳ ꓓꓱ ꓠꓯ, ꓗꓪ ꓬꓲ ꓚꓵ. ꓚꓵ. ꓔꓬ ꓟ ꓔꓯ ꓟꓳ. ꓖꓶ ꓔ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓣꓳ ꓠꓬ ꓙ ꓣꓳ ꓠꓲ, ꓟ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓔꓯ ꓘꓳ, ꓣꓴ ꓢꓲ ꓠꓬꓲ ꓪꓴ‐ꓢ ꓠꓵꓻ ꓠꓲ, ꓔꓯ ꓣꓳ ꓠꓲ, ꓟ ꓘꓴ ꓗꓪ ꓓꓵ ꓡ ꓠ, ꓟ ꓒꓴ ꓔ ꓟ ꓣꓳ ꓚꓵˍ ꓡꓳ꓿ ꓢꓲꓺ ꓒ ꓔꓯ ꓘꓳ, ꓣꓴ ꓓꓴ ꓬꓰ ꓡꓯ꓿
ꓣꓳ ꓚꓲ, ꓛꓬ ꓔꓯ ꓠ, ꓠꓬꓲ ꓔꓬ ꓟ ꓠꓬ ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓣꓳ ꓚꓲ. ꓛꓬ ꓢꓯꓼ ꓪ ꓗꓪ ꓐꓰ ꓞꓳ ꓙꓳ ꓢꓯ. ꓔꓬ ꓕꓯ ꓓꓴ ꓙ ꓪꓴꓽ ꓧꓶ ꓔꓬ ꓡ? ꓝꓮꓲ ꓪꓴ‐ꓢ ꓔꓯ ꓣꓳ ꓪꓴ. ꓠꓶ ꓡꓰ ꓣꓱ ꓢꓲ ꓠꓬ ꓬꓲ ꓔꓯ ꓧꓪ, ꓔꓬ ꓢꓴ ꓒꓬꓱꓼ ꓔꓬ ꓡ? ꓖꓳ ꓡꓱ ꓥ ꓠꓬ ꓕꓲ ꓑ ꓤ ꓠꓽ ꓠ, ꓟ ꓣꓳ ꓔꓯ ꓐꓯ ꓔꓬ ꓡꓳ꓿
ꓠꓬꓲ. ꓠꓬꓲ ꓣꓳ ꓔꓯ ꓪꓴ‐ꓢ ꓠꓵꓻ ꓠꓲ, ꓔꓯ ꓘꓳ, ꓣꓴ ꓟꓶ ꓠ, ꓟ ꓙ ꓣꓳ ꓠꓲ, ꓟ ꓙꓳ ꓠ, ꓟ ꓟ. ꓖꓶ ꓔ ꓡꓳ꓿
ꓠꓬꓲ. ꓠꓬꓲ ꓣꓳ ꓚꓲ. ꓛꓬ ꓔꓯ ꓟꓬꓱꓺ ꓓꓳꓽ ꓧꓪ ꓟ ꓚꓲ. ꓛꓬ ꓓ ꓟ ꓚꓱ, ꓮ ꓙꓵꓽ ꓔꓯ ꓢꓲꓺ ꓒ ꓟꓲ ꓙꓬ ꓗꓪ ꓛ ꓔ ꓢꓲ ꓠꓬꓲ ꓙ ꓣꓳ ꓟ ꓠꓲ, ꓟ ꓡꓰ ꓢꓲꓺ ꓒ ꓠꓵꓻ ꓠꓲ, ꓔꓯ ꓘꓳ, ꓣꓴ ꓠ, ꓟ ꓟ. ꓖꓶ ꓔ ꓡꓳ꓿ ꓢꓲꓺ ꓒ ꓔꓯ ꓧꓪ. ꓓꓴ ꓬꓰ ꓡꓯ꓿
