ꓙꓲꓻ ꓫꓬ ꓢꓴ ꓧꓰꓠꓮꓣꓬ ꓑꓮꓲꓽ (St. Henary)
ꓧꓪ. ꓧꓪ ꓠꓬꓲ. ꓠꓬꓲ ꓠꓬ ꓙꓰꓟꓮꓠꓬ ꓗꓴꓷꓼ ꓗꓪ ꓐꓰ ꓮ ꓘꓶ. ꓛꓲ ꓙꓵꓻ ꓠꓲ, ꓙꓳ ꓟ ꓪ ꓔꓲ ꓧꓰꓠꓮꓣꓬ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿
7 ꓦ ꓟ 13 ꓠꓬꓲ ꓠꓬ ꓙꓲꓻ ꓫꓬ ꓢꓴ ꓧꓰꓠꓮꓣꓬ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓙꓲ ꓫꓬ ꓢꓴ ꓧꓰꓠꓮꓣꓬ ꓠꓬ ꓖꓰꓟꓮꓠꓮꓬ ꓗꓴꓷꓼ ꓗꓪ ꓐꓰ ꓪ ꓔꓲ ꓕꓲ ꓣꓳ ꓥ ꓢꓲ ꓠꓬꓲ ꓬꓲ ꓠꓬ ꓮ ꓘꓶ. ꓛꓲ ꓙꓵꓻ ꓠꓲ, ꓙꓳ ꓟ ꓪ ꓔꓲ ꓕꓲ ꓣꓳ ꓥ ꓡꓳ꓿
ꓙꓲꓻ ꓫꓬ ꓢꓴ ꓧꓰꓠꓮꓣꓬ ꓔꓯ (973) ꓘꓳꓼ ꓔꓯ ꓒꓬꓱꓼ ꓟꓳ ꓗꓷ ꓟ ꓥ ꓡꓳ꓿ ꓬꓲ ꓞꓲꓼ ꓣꓳ ꓟ ꓙꓵ, ꓕꓯ ꓔꓲꓺ ꓒ ꓓꓽ ꓪꓳꓡꓝꓖꓳꓠꓖ ꓠꓬ ꓬꓲ ꓔꓯ ꓪꓴ‐ꓢ ꓐꓯ ꓘꓶꓽ ꓮ ꓟꓬ, ꓛꓲ ꓟ. ꓖꓶ ꓗꓷ ꓟ ꓪꓴ. ꓠꓬꓲ ꓬꓲ ꓠꓬ ꓮ ꓘꓶ. ꓛꓲ ꓙꓵꓻ ꓠꓲ, ꓙꓳ ꓟ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ꓿
ꓬꓲ ꓞꓲꓼ (23) ꓘꓳꓼ ꓬꓲ ꓐ, ꓐ ꓥ ꓟꓲ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳ ꓬꓰꓳ꓿ ꓖꓳ ꓗ ꓠꓯ. ꓬꓲ ꓮ ꓬꓲ (3) ꓣꓳ ꓥ ꓟꓲ ꓫꓵꓻ ꓡꓰ ꓟ ꓑꓶ. ꓓꓴ ꓬꓲ ꓙꓲꓻ ꓫꓬ ꓢꓴ ꓧꓰꓠꓮꓣꓬ ꓠꓬ ꓬꓲ ꓞꓲꓼ (30) ꓘꓳꓼ ꓙꓳ ꓟ ꓙꓵ, ꓕꓯ ꓖꓰꓟꓮꓠꓬ ꓗꓴꓷꓼ ꓗꓪ ꓪ ꓔꓲ ꓒꓬꓱꓼ ꓡꓰꓳ꓿
ꓪ ꓔꓲ ꓧꓰꓠꓮꓣꓬ ꓠꓬ ꓙꓵꓻ ꓠꓲ, ꓮ ꓟꓬ, ꓛꓲ ꓙꓳ ꓟ ꓪ ꓔꓲ ꓥ ꓟ ꓪꓴ. ꓠꓬꓲ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓑ ꓫꓬ ꓐꓴ ꓔꓯ ꓥ ꓟꓲ ꓠꓵꓻ ꓠꓲ, ꓗꓪ ꓐꓰ ꓡꓰ ꓙꓵꓽ ꓢꓴ ꓪ ꓔꓲ ꓥ ꓡꓳ꓿
ꓗꓴꓷꓼ ꓘꓴꓽ ꓗꓪ ꓥ ꓟꓲ ꓪꓴ‐ꓢ ꓟꓬꓱꓽ ꓟꓯ ꓢꓴ ꓐꓴ ꓐꓰ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓔꓯ ꓮ ꓟꓬ, ꓛꓲ ꓬꓰ ꓙ ꓔ ꓙ ꓗꓷ ꓟ ꓥ ꓡꓳ꓿
ꓙꓲꓻ ꓫꓬ ꓢꓴ ꓧꓰꓠꓮꓣꓬ ꓠꓬ ꓙꓵꓻ ꓠꓲ, ꓮ ꓘꓶ. ꓙꓳ ꓟ ꓪ ꓔꓲ ꓥ ꓟ ꓪꓴ. ꓠꓬꓲ ꓗꓴꓷꓼ ꓔꓯ ꓙꓵꓽ ꓟ ꓙꓵ, ꓕꓯ ꓥ ꓟꓲ ꓙꓵꓻ ꓠꓲ, ꓡꓰ ꓙꓵ, ꓟ ꓑꓶ. ꓓꓴ ꓮ ꓘꓶ. ꓛꓲ ꓪꓴꓽ ꓟꓴ ꓡ ꓟ ꓥ ꓡꓳ꓿
ꓝꓮꓲ ꓦꓻ ꓡꓱ ꓚꓱ, ꓥ ꓟꓲ ꓪꓴ‐ꓢ ꓟꓬꓱꓽ ꓟꓯ ꓢꓴ ꓔꓯ ꓬꓲ ꓒꓳ, ꓒꓳ, ꓗꓪ ꓮ ꓟꓬ, ꓛꓲ ꓬꓰ ꓙ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓫ. ꓢꓴ ꓟꓷ ꓢꓴ ꓐꓴ ꓔꓯ ꓥ ꓟꓲ ꓮ ꓘꓶ. ꓛꓲ ꓬꓰ ꓙ ꓢꓴ ꓪ ꓔꓲ ꓥ ꓡꓳ꓿
ꓬꓲ ꓠꓬ ꓙ ꓣꓳ ꓠꓲ, ꓟ ꓮ ꓘꓶ. ꓛꓲ ꓙꓳ ꓢꓴ ꓪ ꓔꓲ ꓥ ꓟ ꓪꓴ. ꓠꓬꓲ ꓪ ꓔꓲ ꓕꓲ ꓣꓳ ꓥ ꓟꓲ ꓑ ꓫꓬ ꓕꓲ ꓣꓳ ꓡꓰ ꓐꓰ ꓦꓻ ꓡꓱ ꓗꓪ ꓐꓰ ꓝꓮꓲ ꓗꓴꓷꓼ ꓘꓴꓽ ꓗꓪ ꓣꓱ ꓬꓯꓼ ꓟ ꓔꓶ. ꓗꓪ ꓬꓰ ꓚꓲ. ꓛꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷ ꓟ ꓥ ꓡꓳ꓿
ꓬꓲ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓪꓽ ꓘꓴ ꓢꓴ ꓪ ꓔꓲ ꓥ ꓡꓳ꓿ ꓙꓲ ꓫꓬ ꓢꓴ ꓪ ꓔꓲ ꓧꓰꓠꓮꓣꓬ ꓠꓬ ꓗꓴꓷꓼ ꓘꓴꓽ ꓗꓪ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓘꓴ ꓜꓲꓼ ꓞꓳ ꓬꓲ ꓔꓶ. ꓮ ꓟꓬ, ꓔꓯ ꓔꓶ. ꓖꓶ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓢꓴ ꓐꓴ ꓔꓯ ꓬꓰ ꓙ ꓗꓷꓳ꓿
ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓚꓱ, ꓔꓯ ꓗꓴꓷꓼ ꓘꓴꓽ ꓗꓪ ꓮ ꓟꓬ, ꓛꓲ ꓶꓼ ꓓꓳ ꓫꓱ, ꓓꓳ ꓚꓺ ꓖꓶ ꓠ, ꓟ ꓢꓯꓼ ꓖꓶ ꓗꓷꓳ꓿
ꓙꓲꓻ ꓫꓬ ꓢꓴ ꓧꓰꓠꓮꓣꓬ ꓠꓬ ꓮ ꓐꓲ ꓮ ꓟꓲ ꓟꓽ ꓪ ꓟ ꓟꓽ ꓔꓬ ꓟ ꓪ ꓔꓲ ꓟꓲ ꓥ ꓡꓳ꓿ ꓙꓲꓻ ꓫꓬ ꓢꓴ ꓧꓰꓠꓮꓣꓬ ꓠꓬ ꓦꓲꓻ ꓢꓲ ꓟ ꓕꓲ ꓣꓳ ꓡꓰ ꓣꓴ ꓢꓴ ꓪ ꓔꓲ ꓥ ꓡꓳ꓿ ꓙꓲ ꓫꓬ ꓢꓴ ꓧꓰꓠꓮꓣꓬ ꓠꓬ (1024) ꓘꓳꓼ ꓕꓯ ꓧꓪꓽ ꓖꓳ ꓓꓱ ꓡꓳ ꓬꓰꓳ꓿
ꓙꓲꓻ ꓫꓬ ꓢꓴ ꓧꓰꓠꓮꓣꓬ ꓔꓯ ꓮꓓ (1146) ꓘꓳꓼ ꓕꓯ ꓔꓲꓺ ꓒ ꓪ ꓔꓲ ꓑꓳꓑꓰ ꓰꓴꓖꓰꓠꓲꓴꓢ (3) ꓡꓰ ꓙꓲꓻ ꓫꓬ ꓢꓴ ꓟꓬꓱꓺ ꓓꓳꓽ ꓖꓶ ꓗꓷ ꓟ ꓥ ꓡꓳ꓿
