ꓚꓲ. ꓛꓬ ꓙꓻ ꓫꓱꓽ_ ꓟ ꓗꓪ ꓐꓰ ꓡꓰ ꓜꓲ ꓜꓲ ꓟꓴ ꓟꓴ ꓣꓱ ꓔ ꓟ ꓗꓪ ꓐꓰ ꓕꓲꓽ ꓠꓲ, ꓕꓲ ꓪꓼ ꓐꓯ_ ꓟ ꓔꓯ ꓫꓬ, ꓔꓶꓻ ꓟꓽ ꓐ ꓡ꓾
ꓝꓲ ꓓꓴ ꓒꓳ‐ꓡꓳ ꓐꓰ ꓒꓲ‐ꓕꓱ ꓑꓮꓲ ꓦꓬꓼ ꓠꓬꓲ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓔ. ꓑꓰꓔꓰꓣ ꓐꓮꓢꓲꓡꓲꓚꓮ ꓪꓽ ꓘꓴ ꓦꓲꓻ ꓪꓽ ꓘꓴ ꓙꓵ, ꓘꓴꓽ ꓗꓪ ꓘꓴ ꓜꓲꓼ ꓞꓳ ꓪꓽ ꓡꓯ ꓘꓳ ꓟ꓾ ꓟꓽ ꓫꓱ, ꓟ ꓐꓰ ꓮ ꓣꓳ ꓡꓳ. ꓟ ꓚꓱ, ꓔꓯ ꓟꓳ. ꓬꓲꓼ ꓠꓬꓲ. ꓐꓯ ꓖꓶ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ ꓲꓲ ꓡꓰ ꓪꓴ. ꓔꓴ ꓗꓷ ꓟ ꓡꓲꓽ ꓒꓰꓼ ꓕꓲꓽ ꓟ ꓔꓯ ꓝꓮꓲ ꓝ. ꓟ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓟꓵꓽ ꓗꓳ. ꓓꓵ ꓓꓵ ꓗꓪ ꓐꓰ ꓔꓲꓺ ꓒ ꓓꓽ ꓙꓵꓽ ꓪ ꓫꓵꓼ ꓘꓳ, ꓣꓴ ꓗꓷ ꓟ ꓔꓲꓺ ꓒ ꓓꓽ 35 ꓣꓳ ꓔꓯ ꓬꓲ ꓪ ꓔꓯ ꓮ ꓣꓳ ꓡꓳ. ꓒꓽ ꓙꓵꓽ ꓪ ꓔꓯ ꓔꓶꓻ_ ꓟ ꓮ ꓣꓳ ꓗꓪ. ꓙꓵ ꓐꓰ ꓫꓬ, ꓦ ꓟ (Pallium) ꓔꓯ ꓖꓪ ꓖꓶ ꓗꓷ ꓟ ꓥꓳ꓿
ꓝꓲ ꓓꓴ ꓒꓲ‐ꓕꓱ ꓔꓯ ꓔꓯꓺ ꓢꓲ ꓠꓬꓲ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓜꓳꓻ ꓜꓴ ꓐꓯ_ ꓟ ꓠꓬ ꓗ. ꓘꓶꓽ ꓔꓯ ꓐꓬ ꓡꓰ ꓝꓲ ꓓꓴ ꓟꓽ ꓥ ꓠꓲ, ꓡꓱ_ ꓟ ꓦꓲꓻ ꓕꓲ ꓦꓲꓻ ꓗꓷ ꓠ, ꓟ ꓒꓴ ꓖꓶ ꓠ, ꓟ ꓥ ꓟ ꓔꓯ ꓐꓯ ꓔ ꓡꓳ꓿ ꓪꓴ. ꓔꓴ ꓣꓱ ꓢꓴ ꓐꓴ ꓗꓪ ꓐꓰ ꓚꓲ. ꓛꓬ ꓦꓰꓼ ꓞ, ꓟ ꓗꓪ ꓐꓰ ꓡꓰ ꓜꓲ ꓜꓲ ꓟꓴ ꓟꓴ ꓟꓽ ꓔꓬ “ꓔꓱ, ꓟ ꓚꓱ, ꓘꓴꓽ ꓗꓪ ꓜꓲ ꓡꓯ ꓘꓳ ꓐ ꓡ ꓟ ꓬꓲ. ꓚꓱ, ꓔꓯ” ꓧꓪ ꓠ, ꓟ ꓢꓯꓼ ꓖꓶ ꓔ ꓡꓳ꓿
ꓟꓽ ꓪ ꓟ ꓟꓽ ꓫꓱ, ꓟ ꓗꓪ ꓐꓰ ꓢꓯꓼ ꓪ꓾ ꓝꓲ ꓓꓴ ꓒꓲ‐ꓕꓱ ꓐꓰ ꓒꓳ‐ꓡꓳ ꓐꓴ ꓠꓬ ꓬꓲ ꓪ ꓚꓺ ꓟꓲꓽ ꓞꓳ ꓙꓳ ꓡ ꓟ ꓟꓽ ꓫꓱ, ꓥ ꓟꓲ ꓬꓲ ꓪ ꓠꓬ ꓮ ꓕꓯ ꓥ ꓟꓲ ꓛꓴꓽ ꓙꓳ ꓢꓴ ꓟꓽ ꓒꓬꓱꓼ ꓡꓰ ꓟ ꓔꓯ ꓬꓲꓼ ꓠꓬꓲ. ꓐꓯ ꓔ ꓡꓳ꓿ ꓢꓲ‐ꓫꓬ‐ꓟ‐ꓦ ꓠꓬ ꓟꓽ ꓪ_ ꓟ ꓢꓯꓼ ꓔꓯ ꓫꓱ, ꓶꓯ ꓘꓳ ꓝꓲ ꓢꓲ ꓡꓳ. ꓐꓲ_ ꓟ ꓕꓲꓽ ꓟ ꓐꓰ ꓪꓽ ꓡꓯ ꓘꓳ ꓝꓲ ꓟ ꓑꓶ ꓓꓴ ꓟꓽ ꓫꓱ, ꓟ ꓠꓬ “ꓙꓲ_ ꓟ ꓓꓳꓽ ꓫꓵ” ꓡꓰ ꓥ ꓡꓳ꓿
ꓮ ꓣꓳ ꓡꓳ. ꓒꓽ ꓕꓲꓽ ꓣꓳ ꓙꓵꓽ ꓪ Pallium ꓠꓬ ꓚꓲ. ꓛꓬ ꓮ ꓣꓳ ꓜꓴꓻ ꓔꓯ ꓣꓳꓺ ꓟ ꓮ ꓣꓳ ꓡꓰ ꓐꓰ ꓡꓯꓼ ꓙ ꓗꓪ ꓑꓱ. ꓔ ꓢꓲ ꓬꓲ ꓪ ꓐꓱ ꓶ ꓬꓲ. ꓙꓵ,꓾ ꓢꓯꓼ ꓪ ꓐꓰ ꓚꓲ. ꓛꓬ ꓤꓶꓻ ꓔꓯ ꓥ ꓟꓲ ꓖꓶ ꓗꓷ ꓗꓪ ꓛꓲ ꓖꓶ ꓠ, ꓟ ꓕꓵꓼ ꓪ ꓔꓯ ꓟ. ꓖꓶ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓔꓲꓺ ꓒ ꓓꓽ ꓐꓴ ꓔꓯ ꓐꓯ ꓔ ꓡꓳ꓿
ꓔꓲꓺ ꓒ ꓓꓽ ꓐꓴ ꓚꓲ. ꓛꓬ ꓢ‐ꓢꓲ‐ꓠ ꓡꓳ ꓒꓱ ꓗꓪ ꓛꓲ ꓬꓰ ꓕꓯ “ꓪꓽ ꓡꓯ ꓘꓳ ꓫꓱ, ꓡꓯ ꓘꓳ ꓟ ꓔꓯ ꓫꓬ, ꓔꓶꓻ ꓢꓴ ꓒꓬꓱꓼ ꓡꓰ ꓢꓲ ꓫꓱ. ꓤ ꓠꓵꓻ ꓠꓲ, ꓐꓰ ꓔꓱ, ꓟ ꓔꓯ ꓛꓳ ꓫꓱꓽ ꓢꓴ” ꓒꓬꓱꓼ ꓡꓰ ꓠ, ꓟ ꓔꓲꓺ ꓒ ꓪ ꓔꓲ ꓐꓰ ꓕꓲ ꓪꓼ ꓪꓽ ꓘꓴ ꓙ ꓓꓴ ꓬꓰ ꓡꓯ꓿
