ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓢꓯꓼ ꓕꓵꓼ ꓢꓴ Param Jaggi (Param Jaggi)
ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓙ ꓖꓴ ꓗꓪ ꓙꓰ ꓟ ꓙꓰ ꓕꓯ ꓟꓳ‐ꓓꓳ ꓢ‐ꓗꓮꓲ ꓣꓱ ꓟ ꓑꓶ. ꓓꓴ ꓟꓴꓽ ꓘꓴ ꓮ ꓟꓬ, ꓓꓳ ꓔꓬ ꓟ ꓔꓯ ꓣꓳ ꓡꓳ. ꓟꓳ ꓟ ꓥ ꓡꓳ꓿ ꓕꓱ ꓟ ꓟꓴꓽ ꓘꓴ ꓐꓴ ꓠꓬ ꓟꓵꓽ ꓘꓳꓼ ꓒꓳ, ꓡ ꓝꓲˍ ꓟ ꓔꓯ ꓒꓬꓱꓼ ꓡ ꓝꓲˍ ꓟ ꓥ ꓡꓳ꓿ ꓝꓮꓲ ꓟꓳ‐ꓓꓳ꓾ ꓢ‐ꓗꓮꓲ ꓗꓪ ꓐꓰ ꓟꓴꓽ ꓘꓴ ꓠꓬ ꓣꓳ ꓟꓲ ꓠꓯ ꓡ ꓞꓳ ꓐꓴ ꓔꓯ ꓠꓻ ꓫꓵꓽ ꓠꓻ ꓙꓲ ꓒꓬꓱꓼ ꓡ ꓝꓲˍ ꓟ ꓥ ꓡꓳ꓿
ꓕꓱ ꓡꓰ ꓕꓲ ꓟꓲ ꓠꓯ ꓡꓱꓼ ꓔꓳ, ꓜꓳ ꓔꓬ ꓟ ꓫꓵꓽ ꓪꓴꓽ ꓔꓯ (16) ꓘꓳꓼ ꓡꓳꓼ ꓟ ꓞꓳ ꓡꓱ ꓤ ꓕꓲ ꓣꓳ ꓡꓰ ꓫꓵꓽ ꓪꓴꓽ ꓔꓯ ꓫꓬ, ꓓ ꓡꓰ ꓝꓲ ꓠ, ꓟ ꓢꓯꓼ ꓕꓵꓼ ꓔꓬ ꓡ ꓐꓯ ꓠꓬ ꓠꓴ ꓙꓵꓻ ꓡ?
ꓬꓲ ꓟꓬꓱꓺ ꓠꓬ ꓑꓮꓣꓮꓟ ꓙꓮꓖꓖꓲ ꓥ ꓡꓳ꓿ ꓬꓲ ꓔꓯ ꓴꓢꓮ ꓗꓴꓷꓼ (ꓔꓰꓫꓮꓢ) ꓡꓳ ꓒꓱ ꓗꓪ ꓦꓵꓻ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓞꓲꓼ ꓣꓳ ꓟ ꓙꓵ, ꓔꓯ ꓡꓰ ꓣꓳ ꓔꓬ ꓟ ꓟꓲ ꓠꓯ ꓔꓯ ꓗ, ꓛꓲ ꓢꓲ ꓡꓲ ꓟ ꓠꓲ, ꓛꓵ, ꓛꓵ ꓙꓳ ꓝꓲ ꓠꓲ, ꓫꓵˍ ꓢꓴ ꓥ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓐꓱ ꓶ ꓟꓳ‐ꓓꓳ ꓗꓪ ꓐꓰ ꓓꓳ ꓟꓽ ꓙꓲ ꓟ ꓟꓴꓽ ꓘꓴ ꓔꓯ ꓗꓽ ꓕꓽ ꓖꓶ ꓠ, ꓟ ꓐꓱ ꓶ ꓙꓼ ꓬꓲ ꓫꓵꓼ ꓫꓬ, ꓢꓴ ꓞꓳ ꓡꓱ ꓤ ꓕꓲ ꓣꓳ ꓥ ꓡꓳ꓿
ꓬꓲ ꓮ ꓡꓲ ꓐꓰ ꓟꓳ‐ꓓꓳ ꓗꓪ ꓐꓰ ꓓꓳ ꓟ ꓟꓴꓽ ꓘꓴꓽ ꓔꓯ ꓗꓽ ꓕꓽ ꓠ, ꓟ ꓙꓼ ꓫꓬ, ꓗꓷ ꓟ ꓚꓱ,
ꓬꓲ ꓞꓲꓼ (16) ꓘꓳꓼ ꓙꓳ ꓟ ꓙꓵ, ꓔꓯ ꓬꓲ ꓠꓬ ꓟꓳ‐ꓓꓳ ꓫꓲ. ꓢꓳ ꓠ, ꓟ ꓬꓰ ꓗꓷ ꓟ ꓙꓵ, ꓕꓯ ꓬꓲ ꓫꓲ. ꓔ ꓟ ꓟꓳ‐ꓓꓳ ꓗ. ꓠꓯ ꓢꓲ ꓗꓪ ꓐꓰ ꓟꓽ ꓙꓲ ꓟ ꓟꓴꓽ ꓘꓴꓽ ꓮ ꓟꓬ, ꓓꓳ ꓔꓬ ꓟ ꓔꓯ ꓡꓳ. ꓟꓳ ꓗꓷꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓐꓰ ꓬꓲ ꓠꓬ ꓟꓳ‐ꓓꓳ ꓗꓪ ꓐꓰ ꓟꓽ ꓙꓲ ꓟ ꓟꓴꓽ ꓘꓴꓽ ꓔꓯ ꓙꓲ ꓟ ꓟꓲ ꓦꓲꓻ ꓒꓬꓱꓼ ꓡ ꓠ, ꓟ ꓮ ꓡꓲ ꓐꓰ ꓟꓬꓱꓽ ꓬꓰ ꓠ, ꓟ ꓓꓴꓽ ꓗꓷꓳ꓿
ꓕꓱ ꓡꓰ ꓐꓰ ꓬꓲ ꓠꓬ (ꓮꓡꓖꓮꓰ ꓟꓳꓐꓲꓡꓐꓰ) ꓟꓬꓱꓺ ꓔ ꓟ ꓙꓼ ꓔꓯ ꓫꓬ, ꓗꓷ ꓟ ꓥ ꓡꓳ꓿
ꓕꓱ ꓙꓼ ꓔꓯ ꓟꓳ‐ꓓꓳ ꓟꓴꓽ ꓘꓴꓽ ꓓꓳ ꓟ ꓮ‐ꓢꓳ ꓗꓪ ꓝ. ꓗꓷ ꓕꓯ ꓟꓽ ꓙꓲ ꓟ ꓟꓴꓽ ꓘꓴꓽ ꓔꓯ ꓕꓱ ꓙꓼ ꓠꓬ ꓣꓴ ꓔꓯꓺ ꓙꓰ ꓢꓲ ꓠꓬꓲ ꓙꓲ ꓟ ꓟꓲꓽ ꓦꓲꓻ ꓝꓮꓲ ꓓꓳ ꓡ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓙꓲ ꓟ ꓟꓲꓽ ꓦꓲꓻ ꓔꓯ ꓖꓶ ꓐ ꓡ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓐꓱ ꓮ ꓘꓶ. ꓛꓲ ꓙꓲ ꓖꓴ ꓙꓳ ꓟ ꓥ ꓡꓳ꓿
ꓕꓱ ꓡꓰ ꓫꓵꓽ ꓙꓼ ꓔꓯ ꓫꓬ, ꓓꓳ ꓗꓷ ꓟ ꓪꓴ. ꓠꓬꓲ ꓴꓢꓮ ꓗꓴꓷꓼ ꓗꓪ ꓟꓲ ꓠꓯ ꓗꓪ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓟ ꓝꓳꓣꓐꓰꓢ ꓟꓮꓖꓮꓜꓲꓠꓰ ꓕꓳ ꓶ ꓗꓪ (30) ꓘꓳꓼ ꓡꓳ ꓟ ꓞꓳ ꓡꓱ ꓐꓴ ꓘꓴꓽ ꓠꓯ, ꓗꓪ ꓙꓮꓖꓖꓲ ꓠꓬ 1. ꓮ ꓘꓶ. ꓟꓬꓱꓺ ꓓꓳꓽ ꓙꓳ ꓢꓴ ꓒꓬꓱꓼ ꓡ ꓟ ꓥ ꓡꓳ꓿
ꓑꓮꓣꓮꓟ ꓙꓮꓖꓖꓡꓰ ꓠꓬ ꓟꓲ ꓠꓯ ꓔꓯ ꓝꓮꓲ ꓒꓳ, ꓡꓰ ꓝꓲ ꓐ ꓡ ꓡꓳ ꓐꓰ ꓙꓵꓻ ꓢꓴ ꓕꓲ ꓣꓳ ꓥ ꓡꓳ꓿
ꓙꓮꓖꓖꓲ (19) ꓘꓳꓼ ꓙꓳ ꓟ ꓙꓵ, ꓔꓯ ꓬꓲ ꓡꓰ ꓡ ꓞꓳ ꓮ ꓟꓬ, ꓔꓯ ꓜꓲꓼ ꓢꓲ ꓠꓬꓲ ꓫ. ꓕꓱ ꓗꓷ ꓟ ꓙꓵ, ꓕꓯ ꓲ ꓔꓧꓲꓠꓗ ꓲ ꓚꓮꓠ ꓚꓧꓮꓠꓖꓰ ꓔꓧꓰ ꓪꓳꓣꓡꓓ ꓐꓰ ꓫ. ꓕꓱ ꓗꓷ ꓟ ꓥ ꓡꓳ꓿
ꓬꓲ ꓡꓰ ꓫ. ꓕꓱ ꓟ ꓠꓬ ꓡ ꓞꓳ ꓐꓴ ꓠꓬ ꓬꓲ ꓔꓯ ꓞꓲꓼ ꓮ ꓘꓶ. ꓣꓳ ꓐꓰ ꓓꓴꓽ ꓙ ꓢꓴ ꓮ ꓟꓬ, ꓔꓬ ꓡꓳ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓟꓲ ꓠꓯ ꓔꓯ ꓙꓲ ꓟ ꓚꓱ, ꓔꓯ ꓒꓳ, ꓡꓰ ꓝꓲ ꓠ, ꓟ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓐꓱ ꓶ ꓠꓬ ꓞꓲꓼ ꓣꓳ ꓟ ꓠꓬ ꓟꓽ ꓣꓳ ꓚꓵˍ ꓐꓰ ꓐꓯ ꓔ ꓡꓳ꓿
ꓠꓴ ꓥꓪ ꓠꓯ, ꓗꓪ ꓟꓬꓱꓽ ꓬꓰ ꓠ, ꓟ ꓔꓶ ꓙꓱ ꓙꓳ ꓠ, ꓟ ꓢꓯꓼ ꓕꓵꓼ ꓠꓲ, ꓫꓵˍ ꓠ, ꓟ ꓡꓰ ꓣꓳ ꓚꓵˍ ꓡꓳ ꓐꓰ ꓫ. ꓕꓱ ꓗꓷꓳ꓿
ꓬꓲ ꓡꓰ ꓝꓮꓲ ꓫ. ꓕꓱ ꓟ ꓠꓬ ꓬꓲ ꓔꓶ ꓙꓱ ꓠꓬ ꓟꓲ ꓠꓯ ꓔꓯ ꓠꓲ ꓛꓵꓽ ꓛꓵꓽ ꓗꓷ ꓡꓰ ꓝꓲ ꓠ, ꓟ ꓐꓰ ꓟꓽ ꓞꓲ ꓞꓲꓼ ꓣꓳ ꓟ ꓞꓳ ꓡꓱ ꓞꓳ ꓡꓯ. ꓐꓴ ꓓꓴꓽ ꓙ ꓚꓱ, ꓗꓪ ꓐꓰ ꓥ ꓟꓲ ꓟꓲ ꓠꓯ ꓔꓯ ꓒꓳ, ꓡꓶꓽ ꓝꓲˍ ꓐ ꓡ ꓟ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓔꓯ ꓗꓽ ꓕꓽ ꓐ ꓡ ꓡꓳ ꓐꓰ ꓢꓯꓼ ꓕꓵꓼ ꓠ, ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓣꓳ ꓠꓬꓲ. ꓠꓬꓲ ꓟꓬ‐ꓟ ꓗꓴꓷꓼ ꓗꓪ ꓔꓬ ꓟ ꓞꓳ ꓡꓱ ꓞꓳ ꓡꓯ. ꓐꓴꓽꓳ ꓣꓳ ꓗꓴꓷꓼ ꓘꓴꓽ ꓗꓪ ꓬꓲꓻ ꓙꓬ ꓙꓵꓽ ꓟ ꓟꓵꓽ ꓡꓶꓽ ꓟ ꓟꓵꓽ ꓘꓳꓼ ꓒꓳ, ꓡ ꓟ ꓠꓬ ꓕꓲ ꓠꓬꓲ ꓕꓯ ꓢꓲ ꓕꓲ ꓠꓬꓲ ꓔꓳ, ꓜꓳ ꓔꓬ ꓟ ꓥ ꓡꓳ꓿ ꓠꓬꓲ.ꓠꓬꓲ ꓣꓳ ꓐꓴ ꓥ ꓟꓲ ꓑꓮꓣꓮꓟ ꓙꓮꓖꓖꓲ ꓡꓰ ꓐꓰ ꓟꓲ ꓠꓯ ꓔꓯ ꓙꓲ ꓟ ꓟꓲ ꓠꓯ ꓒꓬꓱꓼ ꓡ ꓝꓲ ꓐ ꓡ ꓟ ꓥ ꓡꓳ꓿ ꓝꓮꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓐ ꓡ ꓠ, ꓟ ꓠꓴ ꓥꓪ ꓠꓯ, ꓗꓪ ꓢꓯꓼ ꓪ ꓙꓳ ꓟ ꓥꓡꓳ꓿
ꓞꓲꓼ ꓣꓳ ꓟ ꓑꓶ. ꓓꓴ ꓬꓰ ꓟꓽ ꓐ ꓡ ꓐꓰ ꓓꓽ ꓓꓴ ꓙ꓾ ꓠꓴ ꓠꓯ, ꓗꓪ ꓙꓳ ꓟ ꓢꓷ. ꓠꓲ, ꓚꓳ ꓬꓲꓻ ꓐꓰ ꓣꓳ ꓔꓬ ꓟ ꓟꓵꓽ ꓔꓯ ꓠꓲ, ꓠꓵ ꓟ ꓠꓲ, ꓟ ꓗꓪ ꓐꓰ ꓠꓬꓲ. ꓠꓬꓲ ꓗꓪ ꓐꓰ ꓢꓯꓼ ꓕꓵꓼ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓔꓯ ꓬꓰ ꓔꓴ ꓡꓯ꓿
ꓞꓲꓼ ꓣꓳ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓔꓯ ꓗꓽ ꓕꓽ ꓠ, ꓟ ꓐꓱ ꓶ ꓬꓰ ꓐ ꓡ ꓟ ꓢꓯꓼ ꓪ ꓙꓳ ꓟ ꓥ ꓡꓳ꓿ ꓠꓴ ꓥꓪ ꓠꓬ ꓟꓲ ꓠꓯ ꓔꓯ ꓮ ꓘꓶ. ꓙꓲ ꓟ ꓟꓲ ꓠꓯ ꓒꓬꓱꓼ ꓡ ꓝꓲ ꓐ ꓡ ꓠ,ꓟ ꓢꓯꓼ ꓪ ꓙꓳ ꓟ ꓥ ꓡꓳ꓿ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓔꓯ ꓗꓽ ꓕꓽ ꓠ, ꓟ ꓢꓯꓼ ꓕꓵꓼ ꓡꓯ꓿ ꓣꓳ ꓔꓬ ꓟ ꓟꓵꓼ ꓗꓪꓽ ꓥ ꓟꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓬꓰ ꓠ, ꓟ ꓢꓯꓼ ꓕꓵꓼ ꓡꓯ꓿
