ꓑꓡꓮꓢꓔꓲꓚ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓝꓲˍ ꓟ ꓔꓯ ꓒꓬꓱꓼ ꓡ ꓝꓲ ꓟ (plastic pollution)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓑꓡꓮꓢꓔꓲꓚ ꓐꓰ ꓑꓶ. ꓛꓵꓽ ꓐꓴ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓒꓬꓱꓼ ꓡ ꓝꓲ. ꓡꓳ ꓐꓰ ꓐꓯ ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓡ ꓓꓴ ꓥꓳ꓿
ꓠꓬꓲ. ꓠꓬꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓣꓱ ꓗꓷ ꓟ ꓑꓶ. ꓛꓵꓽ ꓐꓰ ꓑꓡꓮꓢꓔꓲꓚ ꓐꓴ ꓠꓬ ꓮ ꓡꓲ ꓗꓪ ꓟꓶ ꓡꓰ ꓔꓬ ꓡ ꓮ ꓡꓲ ꓗꓪ ꓛꓲ ꓡꓰ ꓔꓬ ꓡ ꓐꓰ ꓣꓳ ꓐꓴ ꓓꓴ ꓙ ꓠꓬꓲ ꓢꓴ ꓙꓳ ꓟ ꓟꓲ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓕꓲ ꓧꓪ, ꓤ ꓡꓰ ꓓꓳ ꓗꓷ ꓢꓲ ꓠꓬꓲ ꓡꓳ ꓗꓷ ꓟ ꓑꓡꓮꓢꓔꓲꓚ ꓬꓲꓻ ꓙꓬ ꓐꓴ ꓠꓬ (450) ꓘꓳꓼ ꓟꓽ ꓟꓶ ꓡꓰ ꓟꓽ ꓐꓬ ꓡꓰ ꓙꓳ ꓟ ꓔꓯ ꓟꓲ ꓠꓯ ꓢꓷ. ꓠꓲ, ꓙꓳ ꓒꓽ ꓐꓴ ꓡꓰ ꓐꓯ ꓔ ꓟ ꓙꓳ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓐꓴ ꓡꓰ ꓡꓳ ꓗꓷ ꓟ ꓑꓡꓮꓢꓔꓲꓚ ꓐꓰ ꓑꓶ. ꓛꓵꓽ ꓮ ꓟꓬ, ꓠꓬ ꓬꓲꓻ ꓙꓬ ꓡꓳ ꓗ ꓗꓪ ꓛꓲ ꓔꓬ ꓠꓬ ꓣꓳ ꓤ ꓣꓳ ꓠꓱ ꓝꓮꓲ ꓡꓲ ꓑ ꓡꓲ. ꓒꓲ ꓐꓴ ꓔꓯ ꓫꓵꓽ ꓪꓴꓽ ꓓꓽ ꓟ ꓒꓬꓱꓼ ꓡ ꓝꓲ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓮ ꓟꓶ ꓟ ꓙꓵ, ꓗꓪ ꓣꓳ ꓔꓬ ꓟ ꓟꓲ ꓠꓯ ꓠꓬ ꓑꓶ ꓛꓵꓽ ꓓꓽ ꓟꓲ ꓠꓯ ꓒꓬꓱꓼ ꓔꓬ ꓟ ꓥ ꓡꓳ꓿ ꓕꓱ ꓟ ꓔꓯ ꓝꓮꓲ ꓫꓬ, ꓖꓶ ꓢꓴ ꓟꓬꓱꓽ ꓬꓰ ꓖꓶ ꓢꓴ ꓐꓴ ꓠꓬ ꓮ ꓡꓲ ꓟ ꓐꓴ ꓥ ꓡ ꓐꓰ ꓐꓯ ꓠꓬ ꓣꓳ ꓞꓳ ꓡꓱ ꓞꓳ ꓡꓯ. ꓐꓴ ꓥ ꓡꓳ꓿
ꓣꓳ ꓔꓬ ꓟ ꓟꓲ ꓠꓯ ꓦꓲꓻ ꓓꓽ ꓠꓬ ꓗ, ꓛꓲ ꓢꓲ ꓡꓲ ꓟ ꓔꓬ ꓗ, ꓛꓲ ꓟ ꓟꓲ ꓠꓯ ꓒꓬꓱꓼ ꓡ ꓝꓲ ꓠ,ꓟ ꓞꓳ ꓡꓯ. ꓐꓴ ꓠꓯ, ꓗꓪ ꓶꓻ ꓙꓳ ꓟ ꓥ ꓡꓳ꓿
ꓣꓳ ꓐꓴ ꓟꓲ ꓠꓯ ꓡ ꓞꓳ ꓐꓴ ꓡꓰ ꓡꓳ ꓗꓷ ꓟ ꓑꓡꓮꓢꓔꓲꓚ ꓐꓰ ꓑꓶ ꓛꓵꓽ ꓐꓴ ꓠꓬ ꓫꓵꓽ ꓪꓴꓽ ꓓ ꓟ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓒꓬꓱꓼ ꓡ ꓔꓬ ꓟ ꓥ ꓡꓳ꓿
ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓑꓶ. ꓛꓵꓽ ꓡꓳ ꓟꓽ ꓓ ꓐꓯ ꓔ ꓟ ꓔꓲ. ꓗꓪ ꓑꓶ. ꓛꓵꓽ ꓡꓳ ꓗꓷ ꓟ ꓪꓴ. ꓠꓬꓲ ꓙꓲ ꓟ ꓟꓲ ꓠꓯ ꓠꓬ ꓐꓬ ꓡꓰ ꓢꓲ ꓠꓬꓲ ꓮ ꓫꓵꓽ ꓥ ꓟꓲ ꓔꓶ ꓜ ꓔꓶ ꓓꓳ ꓟꓽ ꓙꓲ ꓗꓷ ꓡꓰ ꓟ ꓥ ꓡꓳ꓿
ꓝꓮꓲ ꓖꓳ ꓟ ꓡꓰ ꓟꓽ ꓞꓲ ꓬꓲꓻ ꓙꓬ ꓡꓳ ꓗ ꓟꓽ ꓢꓲꓽ ꓫꓬ ꓡꓰ ꓢꓲ ꓠꓬꓲ ꓬꓲꓻ ꓙꓬ ꓘꓴꓽ ꓗꓪ ꓢꓯ. ꓔꓬ ꓟ ꓢꓯ. ꓫꓵꓽ ꓢꓯ. ꓙꓵꓽ ꓐꓴ ꓮ ꓟꓬ, ꓥ ꓟꓲ ꓫꓵꓻ ꓡꓰ ꓟ ꓥ ꓡꓳ꓿
ꓑꓡꓮꓢꓔꓲꓚ ꓐꓰ ꓑꓶ. ꓛꓵꓽ ꓔꓯ ꓮꓽ ꓔꓳꓽ ꓔꓳꓽ ꓡꓳ ꓗꓷ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓡꓰ ꓟꓽ ꓞꓲ꓾ ꓢꓯ. ꓫꓵꓽ ꓢꓯ. ꓙꓰ ꓐꓴ ꓥ ꓟꓲ ꓮ ꓘꓶ. ꓛꓲ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡꓰ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓫꓵꓽ ꓪꓴꓽ ꓓꓽ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓣꓳ ꓐꓴ ꓑꓡꓮꓢꓔꓲꓚ ꓐꓰ ꓑꓶ. ꓛꓵꓽ ꓔꓯ ꓮ ꓘꓶ. ꓛꓲ ꓟꓽ ꓙꓳ ꓡꓰ ꓠ, ꓟ ꓮ ꓡꓲ ꓐꓰ ꓟꓬꓱ ꓠꓯ, ꓟ ꓔꓯ ꓣꓳ ꓐꓴ ꓡꓳ. ꓠꓬꓲ ꓓꓴ ꓡꓯ꓿
1. ꓠꓬ ꓣꓰꓓꓴꓚꓰ (ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱ ꓟ ꓠꓯ, ꓗꓪ ꓑꓶ ꓛꓵꓽ ꓒꓬꓱꓼ ꓡꓰ ꓟ ꓑꓡꓮꓢꓔꓲꓚ ꓔꓯ ꓤ ꓟꓳ ꓓꓴ ꓬꓰ ꓡꓯ꓿
2. ꓣꓰꓴꓢꓰ ꓕꓲ ꓧꓪ, ꓣꓱ ꓗꓷ ꓟ ꓶꓻ ꓤ ꓔꓯ ꓝꓮꓲ ꓮ ꓟꓬ, ꓧꓪ, ꓮ ꓡꓲ ꓐꓰ ꓣꓱ ꓠ, ꓟ ꓟꓬꓱꓽ ꓬꓰ ꓓꓴ ꓬꓰ꓿ ꓔꓯꓺ ꓥꓳꓽ ꓐꓯ ꓠꓬ ꓕꓲ ꓧꓪ, ꓓꓳ ꓟ ꓬꓲꓻ ꓙꓬ ꓐꓴ ꓣꓱ ꓟ ꓔꓯ ꓤ ꓟꓳ ꓢꓲ ꓠꓬꓲ ꓮ ꓟꓬ, ꓧꓪ, ꓣꓱ ꓙꓲ ꓗꓶ. ꓚꓴ, ꓔꓯ ꓣꓱ ꓠ, ꓟ꓿
3. ꓣꓰꓚꓬꓚꓡꓰ ꓣꓳ ꓐꓴ ꓡꓳ. ꓗꓷ ꓟ ꓑꓶ. ꓛꓵꓽ ꓔꓯ ꓝꓮꓲ ꓕꓲ ꓧꓪ, ꓮ ꓡꓲ ꓐꓰ ꓣꓱ ꓠ, ꓟ ꓘꓶꓽ ꓢꓲ ꓠꓬꓲ ꓡꓳ ꓠ, ꓟ ꓥ ꓡꓳ꓿
ꓣꓳ ꓡꓱ ꓐꓴ ꓑꓶ ꓛꓵꓽ ꓕꓲ ꓟ ꓡꓳ ꓗꓷ ꓠꓬ ꓟꓲ ꓠꓯ ꓐꓬ ꓡꓰ ꓐꓯ ꓟ ꓐꓯ ꓘꓶꓽ ꓙꓳ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓮ ꓙꓵꓽ ꓢꓴ ꓐꓴ ꓣꓳ ꓓꓲ ꓟ ꓫꓱ ꓔꓯ ꓒꓳ, ꓢꓲ ꓠꓬꓲ ꓟꓲ ꓠꓯ ꓔꓯ ꓚꓬꓴ ꓙ ꓟꓬꓱꓽ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓟ ꓟꓬꓱꓽ ꓔꓯ ꓬꓰ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓡꓯ꓿
ꓣꓳ ꓔꓬ ꓟ ꓦꓲꓻ ꓘꓴꓽ ꓣꓳ ꓔꓬ ꓟ ꓡꓳ ꓒꓱ ꓞꓳ ꓘ, ꓮ ꓟꓬ, ꓗꓪ ꓑꓶ ꓛꓵꓽ ꓔꓯ ꓤ ꓟꓳ ꓢꓲ ꓠꓬꓲ ꓡꓳ. ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓿ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓒꓬꓱꓼ ꓡ ꓝꓲ ꓟ ꓚꓱ, ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓟꓲ ꓠꓯ ꓔꓯ ꓠꓲ, ꓛꓵ ꓛꓵ ꓒꓬꓱꓼ ꓡꓰ ꓝꓲ ꓟ ꓔꓯ ꓣꓳ ꓟꓬꓱꓽ ꓬꓰ ꓡꓯ ꓫ. ꓟꓳ ꓪ꓿
