ꓟ‐ꓕꓲ ꓕꓳꓽ ꓶ 5ꓽ13‐16
ꓠꓴ ꓪꓽ ꓠꓬ ꓟꓲ ꓠꓯ ꓗꓪ ꓔꓬ ꓢꓴ ꓐꓱ ꓶ ꓞꓼ ꓐꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓞꓼ ꓐꓳ ꓬꓲ ꓢꓯꓼ ꓒꓲꓼ ꓬꓰ ꓠꓬ ꓝꓮꓲ ꓛꓵꓻ ꓡ ꓝꓲ ꓟꓽ ꓠ ꓠꓬꓲ꓾ ꓣꓱꓽ ꓬꓯꓼ ꓖꓴ ꓟꓽ ꓙꓳ꓿ ꓠꓱꓸ ꓫꓱꓸ ꓟꓸꓼ ꓗꓪ ꓡꓳ ꓩꓴ ꓗꓷ ꓢꓲ ꓞꓳ ꓤ ꓕꓳꓼ ꓓꓴ ꓗꓷ ꓡꓰˍ ꓡꓳ꓿ ꓠꓴ ꓪꓽ ꓠꓬ ꓟꓲ ꓠꓯ ꓗꓪ ꓔꓬ ꓢꓴ ꓐꓱ ꓶ ꓠꓬꓲ ꓟꓳꓻ ꓓꓴ ꓥꓳ꓿ ꓪꓽ ꓚꓲ ꓗꓪ ꓔꓶ ꓔꓸ ꓟ ꓡꓳ ꓒꓱ ꓔꓯ ꓠꓬ ꓚꓵ ꓔꓸ ꓟꓽ ꓐ ꓡ꓿ ꓝꓮꓲ ꓠꓬ ꓟꓬ ꓡꓴ ꓟꓬ ꓢꓲ ꓐꓽ ꓕꓴꓽ ꓡꓰ ꓝꓴꓸ ꓔ ꓢꓴ ꓟꓽ ꓙꓳ꓿ ꓟꓬ ꓡꓴ ꓕꓲ ꓗꓪ ꓗꓶ ꓔ ꓢꓲ ꓦꓲ ꓗꓪ ꓔꓬ ꓢꓴ ꓮꓽ ꓙꓵ ꓔꓯ ꓣꓳꓺ ꓖꓶˍ ꓡꓳ꓿ ꓖꓳ ꓟ ꓡꓰ ꓐꓰ ꓞꓳ ꓤꓽ ꓠꓬ ꓠꓴ ꓪꓽ ꓙꓲꓻˍ ꓟ ꓬꓰˍ ꓟ ꓔꓯ ꓟꓳꓻ ꓢꓲ꓾ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐ ꓔꓯ ꓟꓬꓱ ꓓꓳꓽ ꓖꓶ ꓝꓲ ꓠꓹ ꓟ꓾ ꓠꓴ ꓪꓽ ꓠꓬꓲ ꓟꓳꓻ ꓓꓴ ꓠꓬ ꓬꓲ ꓪꓽ ꓟꓲꓽ ꓙꓬꓽ ꓗꓪ ꓣꓳꓺ ꓖꓶ꓾ ꓐꓯˍ ꓡꓳ꓿
ꓠꓴ ꓪ ꓠꓬ ꓟꓲ ꓠꓯ ꓗꓪ ꓔꓬ ꓢꓴ ꓐꓴ ꓐꓱ ꓶ ꓞꓼ ꓐꓳ꓾ ꓟꓲ ꓠꓯ ꓠꓬꓲ ꓟꓳ ꓓꓴ ꓥ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓲ ꓠꓬꓲ ꓘꓳ ꓣꓴ ꓢꓴ ꓐꓴ꓾ ꓖꓳ ꓓꓱꓽ ꓔꓲ, ꓟꓶ ꓔ ꓢꓴ ꓐꓴ ꓠꓬ ꓚꓲ. ꓛꓬ ꓐ ꓡˍ ꓟ ꓕꓲ ꓒꓳ, ꓗꓪ ꓐꓰ ꓟꓲ ꓠꓯ ꓞꓳ ꓤ ꓐꓴ ꓔꓯ ꓠꓬꓲ ꓟꓳꓻ ꓓꓴ ꓖꓶˍ ꓟ ꓦ ꓐ ꓛꓲ ꓒꓬꓱꓼ ꓠ ꓔ ꓟˍ ꓡꓰ ꓐꓰ꓾ ꓠꓯ, ꓞꓲˍ ꓟ ꓗꓪ ꓣꓱꓽ ꓬꓯꓼˍ ꓟ ꓮ ꓔꓳ. ꓡꓰ ꓐꓰ ꓠꓬꓲ ꓟꓳ ꓓꓴ ꓡꓬ. ꓖꓶ ꓢꓴ ꓒꓬꓱꓼ ꓡ ꓠ, ꓟ ꓐꓱ ꓶ ꓢꓲ ꓒ ꓡꓰ ꓣꓳꓽ ꓔꓯ ꓘꓴ ꓔꓬ ꓡꓳ꓿
ꓖꓳ ꓟˍ ꓡꓰ ꓐꓰ ꓟꓲ ꓠꓯ ꓞꓳ ꓤ ꓐꓴ ꓐꓱ ꓶ ꓣꓱꓽ ꓬꓯꓼˍ ꓟ ꓞꓼ ꓐꓳ ꓒꓬꓱꓼ ꓠ, ꓟ꓾ ꓕꓲ ꓚꓱ, ꓐꓯ ꓪˍ ꓠꓬ ꓟꓲ ꓠꓯ ꓞꓳ ꓤ ꓐꓴ ꓐꓱ ꓶ ꓦ ꓡꓱ ꓐꓳ ꓖꓴˍ ꓡꓰ ꓐꓰ ꓞꓳ ꓙꓳ ꓢꓯ. ꓔꓬ ꓢꓲ ꓠꓬꓲ꓾ ꓙꓲˍ ꓟ ꓔꓯ ꓢꓳ ꓓꓴ ꓒꓬꓱꓼ ꓡ ꓠ, ꓟ ꓢꓲ ꓒ ꓬꓰ‐ꓢꓴ ꓡꓰ ꓕꓵꓼ ꓪ ꓖꓶ ꓔ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓢꓲ ꓒ ꓬꓲ ꓟ. ꓖꓶ ꓡˍ ꓟ ꓔꓯ ꓙꓽ ꓜꓲꓼ ꓘꓳ ꓣꓴ ꓢꓲ ꓠꓬꓲ ꓚꓲ. ꓛꓬ ꓔꓯ ꓘꓴ ꓔ ꓟ ꓚꓱ, ꓗꓪ ꓐꓰ ꓟꓲ ꓠꓯ ꓔꓯ ꓐꓲꓻ ꓫꓴꓽ ꓗꓴ. ꓢꓴ꓾ ꓟꓲ ꓠꓯ ꓞꓳ ꓤ ꓐꓴ ꓐꓱ ꓶ ꓬꓲ ꓒꓵꓽ ꓙꓳˍ ꓟ ꓞꓳ ꓤ ꓐꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓿
