ꓔꓲꓺ ꓒ ꓪ ꓔꓲ ꓡꓰ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓘꓳ, ꓣꓴ ꓪ ꓠ, ꓟ ꓖꓶ ꓔ ꓟ (10) ꓚꓱ, Ten green commandments of Laudato si) 7
ꓧꓪ. ꓧꓪ ꓠꓬꓲ ꓟꓵꓽ ꓘꓳꓼ ꓒꓳ,ꓡ ꓟ ꓚꓱ, ꓗꓪ ꓐꓰ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓕꓳ ꓶ ꓥ ꓟ ꓡꓮꓴꓓꓮꓔꓳ ꓢꓲ ꓕꓳ ꓶ ꓗꓪ ꓐꓰ ꓟꓲ ꓠꓯ ꓔꓯ ꓠꓲ ꓛꓵꓻ ꓡꓰ ꓝꓲ ꓠ, ꓟ (10) ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓥ ꓡꓳ꓿
1 ꓠꓬ ꓣꓳ ꓮ ꓙꓵꓽ ꓢꓴ ꓔꓬ ꓦꓲꓻ ꓓꓽ ꓥ ꓟ ꓟꓲ ꓠꓯ ꓠꓬ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓔꓬ ꓡꓳ꓿ ꓖꓳ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓬꓰ ꓠ, ꓟ ꓢꓯꓼ ꓕꓵꓼ ꓠ, ꓟ ꓥꓡꓳ꓿
2 ꓠꓬ ꓣꓳ ꓮ ꓙꓵꓽ ꓢꓴ ꓔꓬ ꓦꓲꓻ ꓓꓽ ꓥ ꓟ ꓟꓲ ꓠꓯ ꓗꓪ ꓫ. ꓓꓴ ꓟꓷ ꓓꓴ ꓠꓲ, ꓫ. ꓟꓬ ꓫ. ꓓꓴ ꓔꓯ ꓮ ꓘꓶ. ꓛꓲ ꓔꓳ, ꓜꓳ ꓔꓬ ꓟ ꓞꓳ ꓫ. ꓐꓴ ꓥꓳꓽ ꓢꓯꓼ ꓔꓯ ꓠ ꓡꓳ ꓖꓶ ꓠ, ꓟ ꓐꓯ ꓖꓶ ꓔ ꓡꓳ꓿
3 ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫꓵꓽ ꓪꓴꓽ ꓔꓳ, ꓜꓳ ꓡ ꓟ ꓠꓬ ꓣꓳ ꓦꓻ ꓕꓲ ꓒꓳ, ꓐꓱ ꓶ ꓥ ꓟꓲ ꓫꓵꓽ ꓪꓴꓽ ꓓꓽ ꓕꓲ ꓟ ꓥ ꓡꓳ꓿ ꓖꓳ ꓡꓱ ꓥ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓟ ꓟꓬꓱꓽ ꓔꓯ ꓡꓯ ꓔꓲ ꓟꓬꓱꓽ ꓬꓰ ꓠ, ꓟ ꓥ ꓡꓳ꓿
4 ꓠꓬ ꓪꓴ‐ꓢ ꓡꓰ ꓚꓰꓼ ꓔꓯ ꓟꓲ ꓠꓯ ꓗꓪ ꓙꓳ ꓟ ꓢꓯ. ꓫꓵꓽ ꓢꓯꓼ ꓙꓵꓽ ꓟꓲ ꓠꓯ ꓗꓪ ꓙꓳ ꓟ ꓮ ꓙꓵꓽ ꓔꓯ ꓡ ꓞꓳ ꓕꓲ ꓣꓳ ꓐꓱ ꓶ ꓡꓰ ꓝꓮꓲ ꓠꓲ, ꓦꓯ ꓙꓵˍ ꓟ ꓠꓬ ꓝꓴꓲ ꓓꓽ ꓟ ꓕꓲ ꓟ ꓥ ꓟ ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
5 ꓠꓬ ꓣꓳ ꓮ ꓙꓵꓽ ꓢꓴ ꓔꓬ ꓦꓲꓻ ꓓꓽ ꓥ ꓟ ꓟꓲ ꓠꓯ ꓗꓪ ꓮ ꓘꓶ. ꓛꓲ ꓣꓳ ꓚꓵˍ ꓟ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓥ ꓟ ꓚꓱ, ꓔꓯ ꓮ ꓙꓵꓽ ꓢꓴ ꓘꓳ, ꓣꓴ ꓠ, ꓟ ꓣꓳ ꓚꓵˍ ꓡꓳ꓿
6 ꓠꓬ ꓣꓳ ꓟꓲ ꓠꓯ ꓗꓪ ꓪꓴ‐ꓢ ꓡꓰ ꓚꓰꓼ ꓔ ꓟ ꓢꓯꓼ ꓫꓵꓼ ꓢꓯꓼ ꓙꓵꓽ ꓮ ꓙꓵꓽ ꓠꓬ ꓕꓲ ꓫꓵꓽ ꓐꓰ ꓕꓲ ꓫꓵꓽ ꓠꓬ ꓚꓺ ꓡꓯꓽ ꓘꓳ, ꓟ ꓙꓺ ꓡꓯꓽ ꓘꓳ, ꓢꓲ ꓠꓬꓲ ꓢꓯ. ꓔꓬ ꓟ ꓔꓯ ꓟꓽ ꓟꓲ ꓡꓰ ꓠ, ꓟ ꓥ ꓡꓳ꓿
7 ꓠꓬ ꓣꓳ ꓮ ꓙꓵꓽ ꓢꓴ ꓔꓬ ꓟ ꓦꓲꓻ ꓓꓽ ꓥ ꓟꓲ ꓟꓲ ꓠꓯ ꓗꓪ ꓮ ꓙꓵꓽ ꓢꓴ ꓐꓱ ꓶ ꓙꓲ ꓟ ꓞꓳ ꓙꓳ ꓚꓱ, ꓗꓪ ꓐꓰ ꓢꓯ. ꓔꓬ ꓠ, ꓟ ꓚꓱ, ꓔꓯ ꓧꓪ ꓠ ,ꓟ ꓐꓰ ꓶꓻ ꓡꓯꓼ ꓬꓰ ꓚꓱ, ꓗꓪ ꓥ ꓟꓲ ꓮ ꓙꓵꓽ ꓢꓴ ꓐꓱ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓟꓽ ꓒꓬꓱꓼ ꓡ ꓠ, ꓟ ꓚꓱ, ꓗꓪ ꓐꓰ ꓶꓻ ꓡꓯꓼ ꓬꓰ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
8 ꓣꓳ ꓞꓳ ꓙꓳ ꓟ ꓚꓱ, ꓗꓪ ꓒꓳ, ꓡꓶ. ꓢꓲ ꓠꓬꓲ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓒꓬꓱꓼ ꓡ ꓟ ꓕꓲ ꓒꓳ, ꓗꓪ ꓐꓰ ꓞꓳ ꓙꓳ ꓢꓯ. ꓔꓬ ꓢꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓠꓯ, ꓡꓳ꓿
9. ꓪꓴ‐ꓢ ꓡꓰ ꓚꓰꓼ ꓔ ꓟ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓮ ꓙꓵꓽ ꓠꓬ ꓕꓲ ꓫꓵꓽ ꓐꓰ ꓕꓲ ꓫꓵꓽ ꓙꓻ ꓡꓯꓽ ꓘꓳ, ꓢꓲ ꓠꓬꓲ ꓢꓯ. ꓔꓬ ꓟ ꓚꓱ, ꓔꓯ ꓒꓬꓱꓼ ꓡ ꓝꓲ ꓟ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓟ ꓚꓱ, ꓗꓪ ꓐꓰ ꓢꓯ. ꓔꓬ ꓠ, ꓟ ꓥ ꓡꓳ꓿
10. ꓟꓲ ꓠꓯ ꓗꓪ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓒꓬꓱꓼ ꓡ ꓝꓲ ꓠ, ꓟ ꓣꓳ ꓟꓬꓱꓽ ꓬꓰ ꓟ ꓚꓱ, ꓗꓪ ꓐꓰ ꓓꓳ ꓟꓴ ꓓꓴ ꓬꓰ ꓡꓯ꓿ ꓟꓲ ꓠꓯ ꓫ. ꓟꓳ ꓠꓯ, ꓟ ꓟꓬꓱꓽ ꓬꓰ ꓡꓯ꓿ ꓕꓲ ꓣꓳ ꓛꓳ ꓕꓲ ꓣꓳ ꓔꓱ, ꓚꓵ ꓟ ꓠꓵꓻ ꓠꓲ, ꓡꓰ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓙꓲ ꓟ ꓚꓱ, ꓗꓪ ꓣꓱ ꓬꓰ ꓓꓴ ꓬꓰ ꓡꓯ꓿ ꓙ ꓣꓳ ꓟ ꓚꓱ, ꓗꓪ ꓐꓰ ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓓꓽ ꓔꓯ ꓗꓽ ꓕꓽ ꓡꓯ꓿ ꓙꓲ ꓟ ꓟꓵꓽ ꓘꓳꓼ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓡꓯ꓿
