ꓬꓲꓼ ꓤ ꓠꓬꓲ ꓤ ꓐꓴꓳ꓾ “ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓐꓰ ꓬꓲ ꓧꓪꓽ ꓔꓯ ꓣꓳ ꓜꓽ ꓓꓳꓻ ꓡꓯ” ꓐꓯˍ ꓟ ꓬꓲ ꓕꓲꓽ ꓟꓴꓽ ꓗꓪ ꓐꓰ ꓕꓱ ꓕꓲ ꓠꓽ ꓟ. ꓟꓲꓽ ꓔꓯ ꓐꓯ ꓟ. ꓖꓶ ꓠꓲ, ꓫꓵˍ ꓡꓳ꓿ ꓬꓳ‐ꓦ ꓕꓳꓽ ꓶ 6ꓽ51‐58 ꓗꓪ ꓛꓲ꓾ ꓪꓴ‐ꓢ ꓐꓯ ꓘꓶꓽ ꓔꓯ ꓧꓶ. ꓕꓯ ꓠ ꓠ, ꓓꓴ ꓬꓰ ꓡꓯ꓿
ꓥꓪ ꓠꓽ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓬꓲ ꓢꓯꓸ ꓥ ꓡꓳ꓿ ꓑ ꓑ ꓕꓱ ꓟ ꓜꓽ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓥꓳ꓿ ꓝꓮꓲ ꓠꓬ ꓟꓲ ꓠꓯ ꓡ ꓞꓳ ꓢꓯꓼ ꓟꓬ ꓐꓱ ꓶ꓾ ꓥꓪ ꓖꓶ ꓠꓹ ꓟ ꓑ ꓑ ꓠꓬ꓾ ꓥꓪ ꓧꓪꓽ ꓥ ꓡꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓠꓬ꓾ ꓡ ꓞꓳ ꓕꓱ ꓟ ꓮ ꓡꓲ ꓐꓰ ꓢꓲꓸ ꓥꓪ ꓠꓴꓽ ꓔꓯ ꓬꓲ ꓧꓪꓽ ꓖꓶ ꓜꓽˍ ꓐꓯˍ ꓡ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿
ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓡ-ꓞꓳ-ꓮ-ꓐꓲ ꓬꓲꓸ ꓧꓪꓽ ꓟꓽ ꓜ ꓬꓲꓸ ꓫꓵꓽ ꓟꓽ ꓓꓳꓻ ꓠꓬ꓾ ꓠꓴ ꓪꓽ ꓠꓯꓸꓼ ꓗꓪ ꓢꓯꓼ ꓟꓬ ꓟꓽ ꓓꓯꓹ꓿ ꓥꓪ ꓧꓪꓽ ꓜ ꓢꓲ ꓥꓪ ꓫꓵꓽ ꓓꓳ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓙꓳˍ ꓡꓳ꓿ ꓝꓮꓲ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓥꓪ ꓬꓲ ꓔꓯ ꓢꓯꓸ ꓬꓲꓼ ꓡ ꓝꓲˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓧꓪꓽ ꓠꓬ ꓜ ꓓꓴ ꓚꓵꓺ ꓥ ꓡꓳ꓿ ꓥꓪ ꓫꓵꓽˍ ꓟꓲ ꓓꓳꓻ ꓓꓴ ꓚꓵꓺ ꓥ ꓡꓳ꓿ꓥꓪ ꓧꓪꓽ ꓜ ꓢꓲ ꓥꓪ ꓫꓵꓽ ꓓꓳ ꓢꓴ ꓬꓲ ꓠꓬ ꓥꓪ ꓠꓯꓸꓼ ꓗꓪ ꓢꓯꓸ ꓔꓬ ꓟꓶ ꓢꓲ꓾ ꓥꓪˍ ꓟꓲ ꓬꓲ ꓠꓯꓸꓼ ꓗꓪ ꓔꓬ ꓡꓳ꓿
ꓢꓯꓸ ꓔꓬ ꓟ ꓐꓹ ꓐ ꓡꓰ ꓥꓪ ꓔꓯ ꓝꓲ ꓩꓴ ꓡ ꓢꓲ꓾ ꓐꓹ ꓐ ꓗꓪ ꓐꓰ ꓥꓪˍ ꓟꓲ ꓢꓯꓸ ꓔꓬ ꓟ ꓡꓰ ꓐꓰ꓾ ꓥꓪ ꓔꓯ ꓜꓽ ꓢꓴˍ ꓟꓲ ꓥꓪ ꓗꓪ ꓐꓰ ꓢꓯꓸ ꓔꓬ ꓥꓳ꓿ ꓕꓱ ꓟ ꓠꓽ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓥ ꓡꓳ꓿ ꓒꓵꓽ ꓒ ꓐꓴ ꓜ ꓗꓷ ꓟ ꓑ ꓑˍ ꓡꓰ ꓐꓰ ꓟꓽ ꓗꓹ꓿ ꓬꓲ ꓪꓽ ꓠꓽ ꓫꓵꓻꓳ꓿ ꓑ ꓑ ꓕꓱ ꓟ ꓜ ꓢꓴ ꓠꓽ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓥꓳ꓾ ꓐꓯˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓥ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓬ ꓒꓵꓽ ꓓꓰ ꓡꓰˍ ꓟ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪꓽ ꓑꓮꓲꓽ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓫꓵꓽ ꓐꓰ ꓬꓲ ꓧꓪꓽ ꓔꓯ ꓣꓳ ꓜꓽ ꓓꓴ ꓓꓳꓻ ꓓꓴ ꓗꓶ ꓔꓲ. ꓖꓶˍ ꓡꓳ꓿ ꓣꓳ ꓧꓪꓽ ꓖꓳ ꓓꓱꓽ ꓠꓬ ꓮ ꓫꓵꓽ ꓗꓪ ꓐꓰ ꓢꓯ. ꓔꓬ ꓡ꓿ ꓜꓽ ꓓꓴ ꓗꓪ ꓐꓰ ꓢꓯ. ꓔꓬ ꓡꓳ꓿ ꓧꓪꓽ ꓖꓳ ꓓꓱꓽ ꓐꓯˍ ꓟ ꓠꓬ ꓮ ꓫꓵꓽ ꓜꓽ ꓔˍ ꓡ ꓐꓯˍ ꓟ ꓔꓯ ꓟꓳ. ꓖꓶˍ ꓟ ꓬꓲ ꓔꓶ. ꓕꓲ ꓟ ꓥ ꓡꓳ꓿ ꓠꓴ ꓜꓽˍ ꓟ ꓓꓳˍ ꓟ ꓗꓪ ꓐꓰ ꓠꓴ ꓧꓪꓽ ꓖꓳ ꓓꓱꓽ ꓠꓯꓸꓼ ꓘꓴꓽ ꓗꓪ ꓟꓳ. ꓖꓶ ꓡˍ ꓡꓳ꓿ ꓠꓴ ꓠꓬ ꓘꓪꓽˍ ꓡ꓾ ꓚꓱ.ˍ ꓡ꓾ ꓥ ꓠꓬ ꓠꓴ ꓖꓳ ꓓꓱꓽ ꓗꓪ ꓮ ꓫꓵꓽ ꓓꓵˍ ꓡ꓿ ꓠꓴ ꓙꓳˍ ꓟ ꓠꓬ ꓠꓴ ꓜꓽ ꓔˍ ꓟ ꓥ ꓡꓳ꓿ ꓠꓴ ꓮ ꓫꓵꓽ ꓜꓽ ꓢꓲ ꓠꓬꓲ ꓞꓳ ꓙꓳ ꓔꓬ ꓡ ꓐꓯˍ ꓟ ꓔꓯ ꓠꓬ ꓠꓴ ꓖꓳ ꓓꓱꓽ ꓔꓯ ꓡꓳ. ꓢꓲ ꓢꓷ. ꓓ, ꓡꓳ꓿
