ꓠꓬꓲ. ꓠꓬꓲ. ꓡꓲꓽ ꓒꓰꓼ ꓐꓰ ꓫ. ꓕꓱˍꓟ ꓗꓪ ꓠꓬ Vatican ꓗꓪ ꓐꓰ ꓖꓪ ꓙꓱ ꓜꓲꓽ ꓓꓴ ꓬꓰ ꓗꓷ ꓗ. ꓠꓯ.꓾ ꓒꓳ ꓡꓶꓽ ꓡ ꓟ ꓚꓱ, ꓔꓯ ꓣꓳ ꓐꓴ ꓠꓽ ꓠ ꓓꓴ ꓬꓰ ꓡꓯ꓿ ꓣꓳ ꓮꓽ ꓠꓱ ꓕꓯ ꓡꓰ ꓛꓳ ꓫꓱ ꓡ, ꓟ ꓪꓽ ꓘꓴ ꓚꓱ, ꓓꓵ ꓙ ꓚꓱ, ꓮꓽ ꓙꓵ ꓔꓯ ꓠꓬꓲꓽ ꓧꓪ ꓕꓲ ꓧꓪ ꓟ Vatican ꓖꓪ ꓙꓱ ꓜꓲꓽ ꓓꓴ ꓗꓪ ꓮ ꓟꓬ, ꓒꓳ ꓡꓶꓽ ꓗꓷ ꓟ ꓥ ꓡꓳ꓿ ꓕꓲ ꓐꓱ ꓠꓬ ꓮ ꓘꓶꓼ ꓐꓳ ꓡꓶꓽ ꓗꓷ ꓥ ꓢꓷ ꓐꓰ ꓙ ꓟꓶ ꓔꓬ ꓡꓳ꓾ ꓖꓳ ꓡꓰ ꓟꓽ ꓥ ꓕꓱ ꓗꓪ ꓠꓬ ꓣꓳ..ꓚꓵ ꓟ ꓔꓯ ꓮ ꓕꓲ ꓤ ꓡꓰ ꓒꓳ, ꓡꓶꓽ ꓗꓷ ꓟ ꓥ ꓡꓳ꓿
ꓮꓽ ꓠꓱ ꓕꓯ ꓢꓲꓽ ꓒ ꓬꓰ‐ꓢꓴ ꓡꓰ ꓮꓽ ꓡꓰ ꓐꓰ ꓐꓯ ꓔꓽ ꓕꓱ ꓟ ꓡꓰ ꓐꓰ ꓛꓳ ꓫꓱ, ꓔꓬ ꓢꓷ ꓟ ꓥ ꓡꓳ꓿ ꓕꓯ ꓥꓳ ꓐꓯ ꓠꓬ ꓢ ꓣꓳ ꓕꓲ ꓖꓳ ꓓꓱ ꓟ ꓪꓴ‐ꓢ ꓔꓯ ꓒꓳ, ꓡꓶꓽ ꓗꓷˍꓟ ꓟꓽ ꓙꓳ꓾ ꓢꓲ ꓫꓬ ꓕꓳꓽ ꓶ ꓔꓯ ꓒꓳ, ꓡꓶꓽ ꓗꓷˍꓟ ꓟꓽ ꓙꓳ꓾ ꓕꓱ ꓟ ꓡꓰ ꓐꓰ ꓣꓳ..ꓚꓵ ꓟ ꓕꓲ ꓫꓵꓽ ꓔꓯ ꓟꓲ ꓒꓳ, ꓡꓶꓽ ꓗꓷ ꓟ ꓟꓽ ꓙꓳ꓿ ꓖꓳ ꓡꓱ ꓐꓯ ꓥˍꓟꓲ ꓪꓴ‐ꓢ ꓡꓰ ꓔꓶ. ꓔꓽ ꓟ ꓘꓴꓽ ꓜꓲꓼ ꓞꓳ ꓕꓲ ꓟ ꓒꓬꓱꓽ ꓡ ꓠ, ꓟ ꓐꓱ ꓶ ꓮꓽ ꓡꓰ ꓐꓰ ꓞꓳ ꓙꓳ ꓠꓯ.ꓼ ꓡ ꓐꓰ ꓠꓽ ꓠꓬꓲ. ꓖꓶ ꓔꓯ ꓡꓰ ꓒꓳ, ꓡꓶꓽ ꓗꓷ ꓡꓳ꓿ ꓮ ꓡꓰ ꓫꓵꓽ ꓥ ꓐꓯ ꓠꓬ ꓮꓽ ꓠꓱ ꓕꓯ ꓔꓲ.. ꓒ ꓐꓴ ꓟꓲ‐ꓢ ꓬꓰ ꓕꓯ ꓖꓳ ꓒꓬꓱꓽ ꓒꓳ, ꓢꓲ꓾ ꓟꓲ‐ꓢ ꓬꓰ ꓔꓬ ꓥˍꓟꓲ ꓮ ꓟꓶ ꓠꓬ ꓓ ꓒꓬꓱꓽ ꓒꓳ, ꓢꓲ꓾ ꓟꓲ‐ꓢ ꓬꓰ ꓔꓬ ꓟ ꓕꓱ ꓡꓱ ꓫꓵꓽ ꓔꓯ ꓒꓳ ꓡꓶꓽ ꓗꓷ ꓟ ꓥ ꓡꓳ꓿ ꓟꓽ ꓞꓲ ꓠꓱ ꓐꓯꓼ ꓒꓳ, ꓡꓶꓽ ꓗꓷ ꓟ ꓟꓲ ꓮꓽ ꓟꓬ ꓙꓳ ꓡꓳ꓿ ꓖꓳ ꓟ ꓡꓰ ꓐꓰ ꓟꓽ ꓞꓲ ꓔꓲ.. ꓒ ꓓ ꓐꓴ ꓖꓪ ꓙꓰ ꓜꓲꓽ ꓓꓴ ꓗꓪ ꓐꓰ ꓠꓱꓽ ꓐꓯꓼ ꓙꓵꓽ ꓠꓲ., ꓐꓰ ꓫ. ꓕꓱ ꓠꓽ ꓟ ꓟꓲ ꓗ. ꓖꓶ ꓒꓴ ꓗꓷ ꓟ ꓥ ꓡꓳ꓿ ꓪꓴ‐ꓢ ꓔꓯ ꓟꓽ ꓦ ꓡꓱ ꓢꓴ ꓐꓴ ꓐꓰ ꓫ. ꓕꓱ ꓡꓯꓼ ꓘꓳ ꓠ, ꓟ ꓚꓱ, ꓔꓯ ꓥˍꓟꓲ Vatican ꓠꓬꓲꓽ ꓖꓪ ꓕꓲ ꓪ ꓖꓪ ꓙꓰ ꓜꓲꓽ ꓓꓴ ꓗꓪ ꓖꓪ ꓙꓱ ꓗꓷ ꓟ ꓥ ꓡꓳ꓿
ꓖꓳ ꓟ ꓡꓰ ꓐꓰ ꓟꓽ ꓞꓲ ꓣꓳ ꓙꓰ ꓢꓴ ꓢꓲ ꓤ ꓐꓴ ꓠꓯꓽ ꓘꓴ ꓗꓪ ꓥˍꓟꓲ ꓕꓱ ꓡꓱ ꓟꓽ ꓪˍꓟ ꓦ ꓡꓱ ꓚꓱ, ꓮꓽ ꓟꓬ ꓙꓳ ꓟ ꓥ ꓡꓳ꓿ ꓕꓱ ꓡꓱ ꓟꓽ ꓫꓱ, ꓡꓯꓼ ꓘꓳ, ꓟ ꓔꓯ ꓫ. ꓕꓱ ꓠꓽ ꓟ ꓐꓱ ꓶ ꓕꓱ ꓡꓱ ꓗ‐ꓕꓳ‐ꓡꓲꓘ ꓘꓴꓽ ꓜꓲꓼ ꓞꓳ ꓗꓪ ꓐꓰ ꓪꓴ. ꓓꓵ ꓗꓷ ꓟ ꓥ ꓡꓳ꓿ ꓮ ꓠꓱ ꓕꓯ ꓠꓬ ꓙꓵꓽ ꓪ ꓮꓽ ꓙꓲ ꓔꓯ ꓔꓲ.. ꓒ ꓐꓴ ꓡꓰ ꓘꓴ ꓣꓴ ꓪˍꓟ ꓥ ꓡꓳ꓾ ꓖꓳ ꓡꓰ ꓐꓯ ꓥˍꓟꓲ ꓮ ꓟꓶ ꓠꓬ ꓟ.ꓒ ꓟ.ꓟ ꓐꓴ ꓘꓴꓽ ꓜꓲꓼ ꓞꓳ ꓗꓪ ꓟ ꓟꓬꓱꓽ ꓬꓰ ꓢꓴ ꓐꓴ ꓮ ꓟꓬ, ꓔꓯ ꓙꓵꓽ ꓪ ꓗꓷ ꓡ ꓟ ꓥ ꓡꓳ꓿ ꓮ ꓟꓶ ꓠꓬ ꓑ ꓫꓬ ꓡ ꓞꓳ ꓐꓴ ꓮꓽ ꓟꓬ, ꓥˍꓟꓲ ꓟꓴ ꓕꓲ.. ꓗꓪ ꓙꓵ ꓪ ꓣꓴ ꓔꓬ ꓢꓴ ꓟꓲ ꓮꓽ ꓟꓬ, ꓙꓳ ꓡꓳ꓿
