ꓟ‐ꓘꓳ ꓕꓳꓽ ꓶ꓿ 12ꓽ13‐17

ꓖꓳ ꓗꓸ ꓠꓯꓸ ꓬꓰ-ꓢꓴ ꓔꓯ ꓬꓲ ꓚꓲꓸ ꓛꓬ ꓐꓯ ꓘꓶꓽ ꓗꓪ ꓐꓰ ꓠꓸ ꓟꓶ ꓡꓰ ꓝꓲ ꓠꓹ ꓟ꓾ ꓬꓲ ꓪꓽ ꓡꓰ ꓒ-ꓡꓲ-ꓢꓷ ꓐꓴˍ ꓐꓰ ꓩꓴ-ꓡꓲ ꓕꓲ ꓧꓳꓽ ꓟ ꓡꓽ ꓞꓳ ꓔꓯ ꓬꓲ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ ꓬꓲ ꓪꓽ ꓛꓲ ꓡ ꓠꓬ ꓬꓲ ꓔꓯ꓾ ꓟꓸ ꓒꓽꓳ꓾ ꓠꓴ ꓠꓽ ꓞꓳ ꓔꓱꓹ ꓥ ꓟ ꓐꓰ꓾ ꓮꓽ ꓟ ꓔꓯˍ ꓟꓲ ꓞꓳ ꓒꓬꓱꓽ ꓟꓽ ꓢꓲ ꓢꓲ꓾ ꓔꓱꓹ ꓔꓱꓹꓼ ꓐꓰ ꓪꓴ-ꓢ ꓙ ꓖꓴ ꓟꓸ ꓖꓶˍ ꓟ ꓥꓪ ꓠꓴꓽ ꓢꓷꓸˍ ꓡꓳ꓿ ꓢꓲ-ꓢ ꓔꓯ ꓝꓲꓸ ꓒꓴ ꓓꓳ ꓓ ꓡ?꓾ ꓟꓽ ꓓ ꓡ? ꓥꓪ ꓠꓴꓽ ꓝꓲꓸ ꓒꓴ ꓓꓳ ꓠꓯꓹ ꓡ?꓾ ꓕꓽ ꓓꓳ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿

ꓬꓲ ꓠꓽ ꓬꓲ ꓪꓽ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽˍ ꓟ ꓢꓷꓸˍ ꓠꓬꓲ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓫꓵꓽ ꓠꓬꓲˍ ꓡ? ꓓꓲ-ꓠ-ꓣꓲ ꓕꓲ ꓒꓯꓼ ꓥꓪ ꓔꓯ ꓔꓯꓹ ꓖꓶ ꓡꓯ꓾ ꓐꓯˍ ꓡꓳ꓿ ꓬꓲ ꓪꓽ ꓡꓰ ꓬꓲ ꓔꓯ ꓓꓲ-ꓠ-ꓣꓲ ꓕꓲ ꓒꓯꓼ ꓔꓯꓹ ꓖꓶ ꓡ ꓠꓬ ꓬꓲ ꓡꓰ ꓬꓲ ꓪꓽ ꓔꓯ꓾ ꓞꓳ ꓐꓬꓱꓽˍ ꓐꓰ ꓕꓳ ꓶ ꓝꓳꓹ ꓕꓱ ꓟ ꓮꓽ ꓟ ꓔꓯꓸ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓪꓽ ꓡꓰ꓾ ꓢꓲ-ꓢ ꓔꓯꓸ ꓟ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓢꓲ-ꓢ ꓔꓯ ꓟ ꓢꓲ-ꓢ ꓔꓯ ꓖꓶ꓾ ꓪꓴ-ꓢ ꓔꓯ ꓟ ꓪꓴ-ꓢ ꓔꓯ ꓖꓶ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓠꓽ ꓬꓲ ꓔꓯ ꓮꓽ ꓘꓶꓸ ꓓꓵꓽ ꓙ ꓟꓶꓻ ꓡꓰꓳ꓿

ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓔꓯ ꓧꓪ. ꓧꓪꓸꓼ꓾ ꓕꓲ ꓖ ꓕꓲ ꓧꓪ, ꓗꓪ ꓣꓳ ꓠꓬ ꓮ ꓡꓲ ꓕꓲ ꓛꓱꓽ ꓔꓯ ꓢꓲ ꓠꓯ, ꓡ꓾ ꓮ ꓡꓲ ꓕꓲ ꓛꓱꓽ ꓔꓯˍ ꓠꓬ ꓟꓽ ꓢꓲꓺ ꓠ ꓗ. ꓡ ꓐꓰ ꓓꓵꓽ ꓙꓽ ꓟꓬꓽˍ ꓟ ꓬꓲ ꓙꓵ, ꓔꓳ, ꓜꓳꓽ ꓠꓬꓲˍ ꓡ꓿ ꓮ ꓡꓲ ꓒꓳ, ꓖꓶ ꓠꓯ, ꓡ꓾ ꓥꓪ ꓕꓱ ꓡꓱ ꓒꓳ, ꓖꓶ ꓗꓷ ꓕꓯ ꓠꓽ ꓛꓳ. ꓡꓰˍ ꓥ ꓟꓽ ꓢꓷ.꓾ ꓐꓰ ꓓꓵꓽ ꓙꓽ ꓪꓴꓽ ꓧꓶ ꓪˍ ꓟ ꓬꓲ ꓙꓵ, ꓥˍ ꓟꓲ ꓣꓳ ꓔꓳ, ꓜꓳꓽ ꓠꓬꓲˍ ꓥꓳ꓿

ꓕꓱ ꓡꓱ ꓫꓵꓽ ꓫꓵꓽ ꓪꓴ ꓔꓯ ꓢꓲ ꓒ ꓬꓰ‐ꓢꓴ ꓥˍ ꓟꓲ ꓔꓳ, ꓜꓳꓽ ꓠꓬꓲ ꓗꓷꓳ꓿

ꓡ ꓞꓳ ꓕꓲ ꓧꓳꓽ ꓠꓬ ꓬꓲ ꓔꓯ ꓫꓵꓽ ꓠꓬꓲ ꓠ, ꓟ ꓐꓱ ꓶ꓾ ꓢꓲ‐ꓢ ꓔꓯ ꓝꓲ. ꓒꓴ ꓖꓶ ꓠꓯ, ꓡ꓾ ꓟꓽ ꓖꓶ ꓠꓯ, ꓡ꓾ ꓐꓰ ꓠ ꓠꓬꓲˍ ꓡꓳ꓿

ꓝꓲ. ꓒꓴ ꓖꓶ ꓠ ꓗ, ꓡꓳ ꓐꓯ ꓗꓷ  ꓠꓬ ꓕꓲ ꓐꓱ ꓠꓽ ꓟꓽ ꓧꓳ, ꓗꓷ ꓡꓰ ꓐ ꓡˍ ꓡꓳ꓾ ꓕꓽ ꓖꓶ ꓖꓶ ꓟꓽ ꓛꓵ ꓐꓰ ꓐꓯ ꓗꓷ ꓕꓯ ꓠꓽ ꓢꓲ‐ꓢ ꓙꓵꓽ ꓗ ꓔꓯ ꓟꓽ ꓛꓳ ꓒꓵꓽ ꓟ ꓡꓰ ꓗꓷ ꓡꓰˍ ꓥꓳ꓾ ꓕꓱ ꓟ ꓠꓬ ꓬꓲ ꓔꓯ ꓠ. ꓡˍ ꓟ ꓬꓲ ꓪ ꓕꓲ ꓟ ꓥ ꓡꓳ꓿

ꓖꓳ ꓡꓱ ꓐꓯ ꓥ ꓟꓲ ꓬꓰ‐ꓢꓴ ꓠꓬ ꓢꓷ. ꓠꓲ, ꓙꓳ ꓙꓳˍ ꓡꓰꓽ ꓒꓳ, ꓖꓶˍ ꓡꓳ꓿ ꓢꓲ‐ꓢ ꓔꓯ ꓟ ꓢꓲ‐ꓢ ꓔꓯ ꓖꓶ꓾ ꓪꓴ‐ꓢ ꓔꓯˍ ꓟ ꓪꓴ‐ꓢ ꓔꓯ ꓖꓶ꓾ ꓐꓰ ꓒꓳ, ꓖꓶˍ ꓡꓳ꓿

ꓐꓯ ꓘꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓔꓬ ꓟ ꓬꓲ ꓪꓴ. ꓕꓲ ꓫꓵꓽ ꓠꓬꓲ꓾ ꓮ ꓡꓲ ꓕꓲ ꓟ ꓔꓯ ꓥˍ ꓟꓲ ꓬꓲ ꓖ ꓬꓲ ꓗꓶ ꓔ ꓐꓯˍ ꓟ ꓥ ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓣꓳ ꓬꓰ ꓠ ꓗ, ꓟ ꓮ ꓟꓬ, ꓙꓳˍ ꓡꓳ꓾ ꓶꓻ ꓮ ꓟꓬ, ꓙꓳˍ ꓡꓳ꓿ ꓒꓴ ꓟꓶˍ ꓟ ꓟꓬꓱꓽ꓾ ꓕꓲ ꓦꓲ ꓡ ꓞꓳ꓾ ꓠꓱ. ꓐꓯ ꓢꓴ ꓐꓰ ꓙ ꓡꓯ ꓘꓳˍ ꓟ꓾ ꓕꓱ ꓡꓱ ꓫꓵꓽ ꓚꓱ, ꓗꓪ ꓣꓳ ꓠꓬ ꓦ ꓡꓱ ꓐꓳ ꓐꓳ ꓡꓰꓽ ꓬꓰ ꓠ, ꓟ ꓥ ꓡꓳ꓿ ꓣꓳ ꓠꓬ ꓣꓳ ꓟꓬꓱꓽ꓾ ꓣꓳ ꓦꓲ ꓘꓴꓽ꓾ ꓝꓮꓲ ꓠꓶꓽ ꓛꓳꓽ ꓕꓲ ꓛꓳꓽ ꓕꓯꓽ ꓢꓲ ꓗꓪ ꓦ ꓡꓱ ꓐꓳ ꓐꓳ ꓡꓰꓽ ꓬꓰˍ ꓟ ꓡꓰ ꓐꓰ ꓣꓳ ꓠꓲ, ꓟ ꓠꓬ ꓪꓴ‐ꓢ ꓔꓯ ꓟ ꓥ ꓟ ꓑꓶ. ꓓꓴ꓾ ꓪꓴ‐ꓢ ꓔꓯ ꓖꓶ ꓔ ꓠ ꓗ, ꓡꓳ꓿

ꓝꓮꓲ ꓠꓬꓲꓽ ꓙꓰꓽ ꓕꓲ ꓙꓰꓽ ꓟ ꓠꓬ ꓮꓽ ꓟ ꓔꓯ ꓬꓲ ꓪꓴ. ꓗꓶ ꓔ ꓡ ꓐꓯˍ ꓟ ꓢꓷ. ꓠ ꓗ, ꓡꓳ꓿ ꓕꓲ ꓖ ꓕꓲ ꓧꓪ, ꓗꓪ ꓒꓴ ꓫꓵ꓾ ꓟꓬꓱꓽ꓾ ꓞꓳ ꓤ ꓐꓴ ꓔꓯ ꓪ ꓜꓲ ꓬꓲ ꓙꓵ, ꓖꓶ ꓢꓲ ꓪꓴ‐ꓢ ꓔꓯ ꓡꓳ, ꓬꓰˍ ꓟ ꓗꓪ ꓬꓲ ꓟꓶꓽ ꓗꓪ ꓗꓶ ꓔ ꓗꓴ.ˍ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓪꓴ‐ꓢ ꓔꓯ ꓠ‐ꓐ ꓕꓲꓽ ꓗꓪ ꓗꓶ ꓔ꓾ ꓐꓰ ꓐꓯ ꓖꓶ ꓡ ꓔꓬ ꓡꓳ꓿

ꓝꓮꓲ ꓢ ꓙꓰꓽ ꓕꓲ ꓙꓰꓽ ꓟ ꓠꓬ꓾ ꓮ ꓫꓵꓽ ꓗꓪ ꓥˍ ꓟꓲ ꓢꓷ. ꓠꓲ, ꓙꓳ ꓙꓳ ꓡꓰꓽ ꓒꓳ, ꓖꓶ꓾ ꓐꓯˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓠꓲ, ꓟ ꓘꓶ ꓡꓶ ꓓꓴ ꓟꓽ ꓙꓳ ꓙꓳ ꓢꓲ ꓡꓲ ꓡꓲ ꓡꓰꓽ꓾ ꓠꓲ, ꓪꓴꓽ ꓪꓴꓽ ꓡꓰꓽ꓾ ꓬꓲ ꓖ ꓙꓳ ꓙꓳ ꓡꓰꓽ ꓒꓳ, ꓖꓶ ꓗꓷꓳ꓿ ꓣꓳ ꓥˍ ꓟꓲ ꓫ. ꓓꓴ ꓠꓯꓸꓼ ꓗꓪ ꓠꓲ, ꓟ ꓓꓵꓽ ꓙꓽ ꓟꓬꓽˍ ꓟ ꓟꓽ ꓬꓰ ꓬꓰ ꓪꓴ‐ꓢ ꓡꓰ ꓖꓶ ꓔˍ ꓟ ꓢꓷ. ꓠꓲ, ꓡꓰ ꓓꓵꓽ ꓙꓽ ꓞꓷ, ꓗꓴ. ꓠ ꓗ, ꓡꓳ꓿

ꓖꓳ ꓡꓱ ꓠꓬ ꓣꓳ ꓠꓬ ꓟꓲ ꓠꓯ ꓟꓬꓱꓽ ꓗꓪ ꓦ ꓡꓱ ꓐꓳ ꓐꓳˍ ꓡꓰꓽ ꓬꓰ ꓢꓲ꓾ ꓚꓲ. ꓛꓬ ꓠꓲ, ꓟ ꓔꓯ ꓠꓬ ꓪꓴ‐ꓢ ꓔꓯ ꓡꓯ ꓙꓱ ꓐ ꓡ ꓠ, ꓟ꓾ ꓮ ꓡꓲ ꓕꓲ ꓫꓵꓽ ꓗꓪ ꓥˍ ꓟꓲ ꓪꓴ‐ꓢ ꓡꓰ ꓖꓶ ꓔ ꓟ ꓢꓷ. ꓠꓲ, ꓗꓪ ꓐꓰ ꓠꓲ, ꓪꓴꓽ ꓪꓴꓽ ꓡꓰꓽ ꓒꓳ, ꓖꓶ ꓐ ꓡ ꓠ, ꓟ ꓣꓱꓽ ꓬꓰ ꓐ ꓡ ꓠ, ꓟ ꓐꓱ ꓶ ꓣꓱꓽ ꓛꓰꓽ ꓓꓰꓽ ꓓꓴ ꓬꓰ ꓡꓯ꓿