ꓮ ꓙꓵꓽ ꓢꓴ ꓧꓪ. ꓧꓪ.꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓠꓴ ꓙꓵꓻ ꓠꓲ, ꓠꓬ ꓠꓴ ꓔꓯ ꓓꓻ ꓡꓰ ꓝꓲꓳ꓾ ꓐꓰ ꓐꓯˍ ꓟ ꓐꓯ ꓘꓶꓽ ꓗꓪ ꓐꓰ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ꓿ ꓟ. ꓟꓲꓽ ꓠꓬ ꓟ‐ꓘꓳ 10ꓽ46‐52 ꓗꓪ ꓥꓳ꓿ ꓟ. ꓟꓲꓽ ꓬꓲ ꓕꓲꓽ ꓟꓴ ꓠꓬ ꓕꓱ ꓡꓱ ꓥꓳ꓿

ꓢꓲ ꓒ ꓬꓰ‐ꓢꓴ ꓠꓬ ꓐ‐ꓕꓲ‐ꓟꓲ‐ꓪꓴ ꓐꓰ ꓟꓬꓱ ꓔ ꓟ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓢꓴ ꓔꓯ ꓫꓬ, ꓖꓶˍ ꓟ ꓬꓲ ꓕꓲꓽ ꓟꓴꓽ ꓥ ꓡꓳ꓿ ꓐ‐ꓕꓲ‐ꓟꓲ‐ꓪꓴ ꓠꓬ ꓢꓲ ꓒ ꓬꓰ‐ꓢꓴ ꓗꓳ. ꓡ ꓟ ꓬꓲ ꓓꓳꓽ ꓔꓯ ꓑ ꓙꓽˍ ꓕꓯ ꓬꓲ ꓠꓬ꓾ ꓓ‐ꓪꓵ ꓞꓲꓼ ꓤ ꓡꓯ, ꓤꓽꓳ꓾ ꓥꓪ ꓔꓯ ꓫꓱ. ꓤ ꓡꓯ꓾ ꓐꓰ ꓮ ꓘꓶ. ꓘꓴ ꓓꓰꓽˍ ꓡꓳ꓿ ꓖꓳ ꓕꓯ ꓠꓬ ꓕꓲ ꓐꓱ ꓙꓳˍ ꓟ ꓠꓬ ꓬꓲ ꓔꓯ ꓟꓽ ꓪꓳ, ꓔꓬ꓾ ꓢꓲ ꓡꓲ ꓐꓰ ꓔꓬ꓾ ꓐꓰ ꓕꓰ ꓡꓰ ꓕꓼˍ ꓥ ꓟꓲ ꓬꓲ ꓠꓬ ꓟꓽ ꓓꓻ ꓟꓽ ꓞꓽ ꓢꓲ ꓒ ꓬꓰ‐ꓢꓴ ꓑ ꓙꓽˍ ꓗꓪ ꓛꓲ ꓘꓴꓻ ꓓꓰꓽˍ ꓡꓳ꓿

ꓖꓳ ꓗ ꓠꓯ. ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓑ ꓙꓽ ꓡꓰ ꓢꓲ ꓠꓬꓲ ꓬꓲ ꓔꓬ ꓗꓪ ꓛꓲ ꓡˍ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓔꓯ ꓕꓰ ꓡꓰ ꓐꓰ ꓠ ꓠꓬꓲˍ ꓡꓳ꓿ ꓠꓴ ꓥꓪ ꓗꓪ ꓐꓰ ꓮ ꓫꓵꓽ ꓕꓲ ꓙꓰꓽ ꓓꓰꓽ ꓠꓲ, ꓫꓵˍ ꓡ꓾ ꓐꓰ ꓐꓯˍ ꓕꓯ ꓐ‐ꓕꓲ‐ꓟꓲ‐ꓪꓴ ꓠꓬ꓾ ꓥꓪ ꓠꓬꓲ ꓟꓳꓻ ꓡ ꓠꓲ, ꓫꓵˍ ꓡꓳ꓾ ꓐꓰ ꓕꓰ ꓡꓰ ꓓꓰꓽˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓠꓬ꓾ ꓕꓱ ꓡꓱ ꓠꓬ ꓙꓰ꓾ ꓠꓴ ꓙꓵꓻ ꓠꓲ, ꓠꓬ ꓠꓴ ꓔꓯ ꓓꓻ ꓡꓰ ꓝꓲꓳ꓾ ꓐꓰ ꓐꓯ ꓗꓷ ꓗ ꓠꓯ. ꓠꓬ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓢꓴ ꓐ‐ꓕꓲ‐ꓟꓲ‐ꓪꓴ ꓠꓬ ꓟꓬ ꓢꓶ ꓠꓬꓲ ꓟꓳꓻ ꓡ ꓢꓲ ꓠꓬꓲ ꓪꓴ‐ꓢ ꓔꓯ ꓫꓱ. ꓖꓶˍ ꓡꓳ꓿

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ. ꓟꓲꓽ ꓬꓲ ꓕꓲꓽ ꓟꓴꓽ ꓗꓪ ꓠꓬ꓾ ꓢꓲ ꓒ ꓬꓰ‐ꓢꓴ ꓐꓯ ꓘꓶ ꓥ ꓟ ꓠꓴ ꓙꓵꓻ ꓠꓲ, ꓠꓬ ꓠꓴ ꓔꓯ ꓓꓻ ꓡꓰ ꓝꓲꓳ꓾ ꓐꓰ ꓐꓯˍ ꓟ ꓐꓯ ꓘꓶꓽ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓪꓴ‐ꓢ ꓔꓯ ꓮ ꓡꓲ ꓙꓵꓻ ꓔꓬ ꓡ ꓐꓯˍ ꓟ ꓣꓳ ꓓꓵꓽ ꓙꓽ ꓠꓬꓲ ꓓꓴ ꓥꓳ꓿ ꓠꓬꓲ. ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓮ ꓫꓵꓽ ꓒꓬꓱꓼ ꓡ ꓟ꓾ ꓮ ꓡꓲ ꓫꓵꓽ ꓫꓵꓽ ꓪꓴ ꓒꓬꓱꓼ ꓡˍ ꓟ ꓮ ꓙꓵꓽ ꓡꓰ. ꓠꓬꓲ ꓣꓳ ꓙꓵꓻ ꓠꓲ, ꓐꓰ ꓗꓴ. ꓙꓲꓽ ꓙꓳˍ ꓡꓳ꓿ ꓣꓳ ꓮ ꓡꓲ ꓙꓵˍ ꓠꓬ ꓖꓳ ꓡꓱ ꓒꓬꓱꓼ ꓡˍ ꓥꓳ꓿ ꓣꓳ ꓟꓽ ꓙꓵꓻ ꓠꓬ ꓟꓽ ꓙꓵꓻ ꓟ ꓡꓰ ꓒꓬꓱꓼ ꓡˍ ꓥꓳ꓿ ꓖꓳ ꓟ ꓑꓶ. ꓓꓴ ꓣꓳ ꓙꓵꓻ ꓠꓲ, ꓠꓬ ꓔꓱ, ꓚꓵˍ ꓡ꓾ ꓟꓽ ꓔꓱ, ꓚꓵ ꓡ ꓐꓯˍ ꓟ ꓣꓳ ꓕꓱ ꓗꓪ ꓡꓳ. ꓠꓬꓲ ꓠ, ꓟ ꓥꓳ꓿

ꓙꓵꓻ ꓠꓲ, ꓟꓽ ꓔꓱ, ꓚꓵ ꓕꓯ ꓠꓽ ꓕꓱ ꓟ ꓔꓯ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓥˍ ꓟꓲ ꓬꓲ ꓠꓬ ꓫꓬ, ꓖꓶ ꓟꓽ ꓐ ꓡ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓠꓴ ꓥꓪ ꓔꓯ ꓮ ꓫꓵꓽ ꓬꓰ ꓝꓲ ꓠꓲ, ꓫꓵˍ ꓡ꓾ ꓐꓰ ꓐꓯˍ ꓟ ꓠꓬ ꓠꓴ ꓥꓪ ꓔꓯ ꓚꓵ ꓚꓵ ꓙꓵꓻˍ ꓡ ꓐꓰ ꓐꓯˍ ꓟ ꓥꓳ꓿

ꓠꓬꓲ. ꓠꓬꓲ ꓟꓬ ꓢꓶ ꓠꓬꓲ ꓟꓽ ꓟꓳꓻ ꓢꓴ ꓮ ꓟꓬ, ꓙꓳˍ ꓥꓳ꓿ ꓖꓳ ꓗꓪ ꓮ ꓟꓬ, ꓔꓬˍ ꓟꓲ ꓔꓬˍ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓐ‐ꓕꓲ‐ꓟꓲ‐ꓪꓴ ꓬꓲ ꓙꓵꓻ ꓠꓲ, ꓠꓬ ꓬꓲ ꓔꓯ ꓓꓻ ꓡꓰˍ ꓗꓪ ꓛꓲ ꓙꓵˍ ꓟ ꓙꓵꓻ ꓠꓲ, ꓕꓱ ꓗꓪ ꓟꓳꓻˍ ꓡꓳ꓿

ꓕꓱ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ꓾ ꓠꓴ ꓥꓪ ꓔꓯ ꓙꓵꓻˍ ꓡ꓿ ꓠꓴ ꓙꓵꓻ ꓠꓲ, ꓠꓬ ꓮ ꓡꓲ ꓙꓳˍ ꓠꓬ ꓖꓳ ꓡꓱ ꓠꓴ ꓤꓶꓻ ꓠꓯꓸꓼ ꓗꓪ ꓒꓬꓱꓼ ꓡ ꓐ ꓡˍ ꓟ ꓥꓳ꓿ ꓥꓪ ꓔꓯ ꓙꓵꓻ ꓐꓰ ꓐꓯˍ ꓟ ꓪꓴ‐ꓢ ꓐꓯ ꓘꓶꓽ ꓥ ꓡꓳ꓿