ꓬꓰ‐ꓢꓴ ꓟꓴ ꓗꓪ ꓓꓯ ꓙꓰ_ ꓟ ꓠꓬ ꓣꓳ ꓔꓯ ꓐ, ꓐ ꓠꓯꓼ ꓗꓪ ꓧꓳꓽ ꓔꓯ, ꓖꓶ ꓢꓲ꓾ ꓪꓽ ꓡꓯ ꓘꓳ ꓠ, ꓟ ꓐꓰ ꓢꓲ ꓡꓲ, ꓟ ꓔꓯ ꓫꓬ, ꓔꓶꓻ ꓖꓶ_ ꓡꓳ꓿

ꓡꓳ, ꓬꓰ ꓟ ꓠꓽ ꓦꓬꓼ ꓠꓬꓲ ꓗꓪ ꓠꓬ ꓟꓵꓽ ꓗꓳ ꓓꓵ ꓓꓵ ꓗꓪ ꓢꓲ ꓒ ꓬꓰ‐ꓢꓴ ꓟꓴ ꓗꓪ ꓗꓪ ꓓꓯ ꓙꓰ_ ꓟ ꓑꓮꓲ (solemnity of the Ascension of the Lord) ꓔꓯ ꓬꓰ ꓔꓬ ꓟ ꓥ ꓡꓳ꓿

ꓢꓲ ꓫꓬ ꓕꓳ ꓶ ꓝꓲ ꓓꓴ ꓕꓳ ꓶ 1ꓽ1‐11 ꓗꓪ ꓐꓯ ꓔ ꓟ ꓡꓰ ꓐꓰ ꓟꓲ ꓠꓯ ꓗꓪ ꓐꓰ ꓛꓵꓽ ꓓꓯ ꓙꓰ ꓢꓲ ꓟꓴ ꓗꓪ ꓗꓪ ꓓꓯ ꓙꓰ ꓟ ꓢꓲ ꓒ ꓬꓰ‐ꓢꓴ ꓬꓲ. ꓒꓬꓱꓽ ꓬꓲ. ꓠꓯ. ꓟ ꓔꓯ ꓡꓳ, ꓬꓰ ꓟ ꓙꓵ, ꓗꓪ ꓒꓬꓱꓼ ꓡꓰ ꓟ ꓕꓲ ꓟ ꓐꓰ ꓣꓳ ꓔꓯ ꓓꓵꓽ ꓙ ꓡꓰ ꓝꓲ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓡꓱ ꓟꓽ ꓥ꓾ ꓪꓴ. ꓔꓴ ꓐꓰ ꓕꓲꓽ ꓪ ꓥ ꓟ ꓖꓳ ꓓꓱ ꓡꓰ ꓐꓰ ꓣꓳ ꓥ ꓟꓲ ꓢꓲ ꓒ ꓬꓰ‐ꓢꓴ ꓐꓰ ꓕꓲꓽ ꓪ ꓥ ꓟ ꓑꓶ ꓓꓴ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓢꓲ ꓒ ꓠꓬ ꓟꓴ ꓗꓪ ꓗꓪ ꓓꓯ ꓟ ꓗꓪ ꓐꓰ ꓐ, ꓐ ꓪꓴ‐ꓢ ꓐꓰ ꓕꓲ ꓠꓲ, ꓕꓲ ꓪꓼ ꓗꓷ ꓠ, ꓟ ꓠꓯꓼ ꓗꓪ ꓬꓲ ꓐꓰ ꓕꓲ ꓪ ꓘꓴ ꓔꓯ, ꓖꓶ ꓟ ꓥ ꓡꓳ꓿ ꓕꓱ ꓟ ꓔꓯ ꓟꓳ. ꓢꓲ ꓫꓬ ꓢꓴ ꓮꓴꓖꓴꓢꓔꓲꓠꓰ ꓡꓰ “ꓪꓴ. ꓔꓴ ꓠꓬ ꓟꓲ ꓕꓯ ꓗꓪ ꓙ ꓫꓱ_ ꓟ ꓠꓬ ꓖꓳ ꓓꓱ ꓐꓱ ꓶ ꓥꓳ ꓡꓳ. ꓓꓴ ꓥ ꓡꓳ꓾” ꓐꓰ ꓐꓯ ꓔ ꓡꓳ꓾ (ꓢꓰꓣꓟꓳꓠ 265ꓽ1.2)

ꓚꓵ ꓚꓵ ꓢꓲ ꓒ ꓬꓰ‐ꓢꓴ ꓬꓲ ꓕꓲ ꓤꓶꓻ ꓡꓱꓼ ꓠꓬ ꓮ ꓟꓴ ꓗꓪ ꓓꓯ ꓙꓰ_ ꓟ ꓚꓱ, ꓡꓰ ꓥ ꓡꓳ꓿ ꓢꓲ ꓒ ꓠꓬ ꓟꓲ ꓠꓯ ꓗꓪ ꓞꓳ ꓤ ꓘꓳ, ꓣꓴ ꓡ ꓟ ꓗꓪ ꓐꓰ ꓕꓲ ꓟꓲ ꓠꓯ ꓡꓱꓼ ꓔꓯ ꓐꓲ. ꓞ, ꓢꓲ ꓞꓳ ꓤ ꓐꓴ ꓔꓯ ꓬꓲ ꓪ ꓝꓴꓲ ꓗꓪ ꓐꓰ ꓡꓲ, ꓙꓰ ꓠ, ꓟ ꓛꓵ ꓔꓴ ꓖꓶ_ ꓟ ꓚꓬꓴ ꓙ ꓖꓶ ꓡꓳ꓿ ꓖꓳ ꓟ ꓑꓶ ꓓꓴ ꓡꓳ, ꓬꓰ ꓟ ꓙꓵ, ꓗꓪ ꓠꓯꓻ ꓞꓲ, ꓟ꓾ ꓟꓽ ꓔꓱ, ꓟ꓾ ꓠꓲ, ꓟ ꓐꓬ ꓓꓴ ꓙꓳ ꓟ ꓔꓶ. ꓗꓪ ꓠꓬꓲ ꓟꓳ ꓓꓴ꓾ ꓖꓽ ꓖꓶ_ ꓟ꓾ ꓥꓳ ꓡꓳ. ꓓꓴ ꓔꓯ ꓔꓯ, ꓖꓶ_ ꓟ ꓥ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓬꓲ ꓤ ꓔꓲ ꓠꓬ ꓫꓵꓻ ꓙ ꓗꓷ ꓟ ꓗꓪ ꓐꓰ “ ꓣꓳ ꓫꓵꓻ ꓚꓱ, ꓔꓯ ꓐꓬ ꓡꓰ ꓝꓲ ꓢꓲ꓾ ꓢꓯ. ꓬꓲꓼ ꓡ ꓟ ꓗꓪ ꓐꓰ ꓣꓳ ꓢꓯꓼ ꓟꓬ ꓔꓯ ꓝꓮꓲ ꓖꓶ ꓡ ꓡꓳ꓾” ꓐꓯ_ ꓟ ꓢꓯ. ꓬꓲꓼ ꓡ ꓟ ꓧꓪ. ꓡꓰ ꓟ ꓔꓯ ꓟꓲ ꓠꓯ ꓡ ꓞꓳ ꓐꓴ ꓮ ꓙꓵ ꓘꓳ, ꓣꓴ ꓪ ꓟꓶ ꓠ, ꓟ ꓐꓱ ꓶ ꓥ ꓡꓳ꓿

ꓖꓳ ꓟ ꓑꓶ ꓓꓴ ꓟꓴ ꓗꓪ ꓗꓪ ꓓꓯ ꓙꓰ ꓟ ꓠꓬ ꓣꓳ ꓔꓯ ꓟꓴ ꓗꓪ ꓗꓪ ꓧꓳꓽ ꓔꓯ, ꓖꓶ_ ꓟ ꓢꓯ. ꓔꓬ ꓟ ꓙ ꓡꓯ ꓘꓳ ꓓꓴ ꓕꓲꓽ ꓟ ꓥ ꓟ ꓔꓯ ꓐꓯ ꓔ ꓟ ꓥ ꓡꓳ꓿ ꓖꓳ ꓟ ꓠꓬ ꓮ ꓟꓶ ꓤꓶꓻ ꓗꓪ ꓣꓳ ꓥꓳ ꓡꓳ. ꓓꓴ ꓔꓯ ꓪꓴ ꓟꓴ ꓡ ꓝꓲ ꓢꓲ꓾ ꓣꓳ ꓓꓵ ꓙ_ ꓟ꓾ ꓣꓳ ꓙ ꓟꓶ_ ꓟ ꓰ ꓣꓳ ꓬꓰ_ ꓟ ꓔꓯ ꓪꓴ‐ꓢ ꓬꓲ. ꓠꓲ, ꓟ ꓐꓰ ꓠꓶꓽ ꓞ, ꓠ, ꓟ ꓬꓲ. ꓚꓱ, ꓟꓳ. ꓖꓶ_ ꓡꓳ꓿

ꓖꓳ ꓟ ꓡꓰ ꓐꓰ ꓟꓴ ꓗꓪ ꓗꓪ ꓓꓯ ꓙꓰ_ ꓟ ꓚꓱ, ꓔꓯ ꓣꓳ ꓢꓷ. ꓡꓳ꓾ ꓬꓳ‐ꓦ 14ꓽ1‐6 ꓣꓳ ꓠꓬ ꓕꓱ ꓙ ꓖꓴ ꓔꓯ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓢꓲ ꓒ ꓬꓲ ꓢꓯꓼ ꓟꓬ ꓔꓯ ꓖꓶ_ ꓟ꓾ ꓬꓲ ꓔꓯ ꓛꓳ ꓠ, ꓟ ꓐꓰ ꓟ. ꓖꓶ_ ꓟ ꓔꓯ ꓡꓳ. ꓟꓳ ꓪ ꓡꓳ꓿ ꓟ, ꓟ ꓟ‐ꓡꓲ ꓐꓰ ꓢꓲ ꓫꓬ ꓢꓴ ꓐꓴ ꓥ ꓟꓲ ꓣꓳ ꓐꓱ ꓶ ꓕꓱ ꓟ ꓔꓯ ꓟ. ꓖꓶ ꓔ ꓟ ꓔꓯ ꓡꓳ. ꓟꓳ ꓪ ꓡꓳ꓾ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓕꓲꓲ ꓠꓬꓲ ꓡꓲ ꓕꓲ ꓠꓬꓲ ꓢꓯ. ꓔꓬ ꓟ ꓤꓶꓻ ꓗꓪ ꓕꓲ ꓪ ꓔꓬ ꓟ ꓠꓶꓽ ꓛꓳ ꓕꓲ ꓛꓳ ꓐꓴ ꓢꓲ ꓫꓬ ꓢꓴ ꓐꓴ ꓔꓯ ꓥ ꓟꓲ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓮꓽ ꓐ꓾ ꓮꓽ ꓟ꓾ ꓮ ꓑ ꓮ ꓤ ꓐꓴ ꓬꓲ ꓞꓲꓼ ꓮ ꓟꓬ, ꓬꓲ. ꓚꓱ, ꓮ ꓟꓬ ꓔꓬ ꓟ ꓞꓳ ꓤ ꓐꓴ ꓥ ꓢꓲ꓾ ꓕꓱ ꓟ ꓠꓬ ꓗ, ꓛꓲ_ ꓟ꓾ ꓕꓵꓼ ꓪ ꓛꓳ_ ꓟ꓾ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳ ꓐꓰ ꓢꓯꓼ ꓕꓵꓼ ꓛꓳ ꓫꓱꓽ ꓔꓬ ꓢꓴ ꓐꓴ ꓥ ꓡꓳ꓿

ꓖꓳ ꓟ ꓡꓰ ꓐꓰ ꓬꓲ ꓪ ꓡꓰ ꓬꓰ ꓙ ꓔꓳ, ꓙ ꓪꓽ ꓘꓴ ꓙ ꓖꓶ ꓡ ꓟ ꓣꓱ ꓛꓰ ꓑꓶ ꓓꓴ ꓣꓳ ꓥ ꓟꓲ ꓟꓴ ꓗꓪ ꓗꓪ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓟꓬ ꓠꓬꓲ ꓠꓶꓽ ꓞ, ꓠ, ꓟ ꓢꓳꓻ ꓣꓴ ꓪ ꓡꓳ꓿ ꓢꓲ ꓫꓬ ꓢꓴ ꓒꓳ‐ꓡꓳ ꓡꓰ ꓐꓯ ꓔ ꓟ ꓡꓰ ꓐꓰ ꓔꓱ, ꓟ ꓮ ꓫꓵ ꓥ ꓟꓲ꓾ ꓔꓱ, ꓜꓳ ꓟ ꓮ ꓫꓵ ꓥ ꓟꓲ꓾ꓒꓵꓽ ꓠꓯ, ꓟ ꓮ ꓫꓵ ꓥ ꓟꓲ ꓕꓱ ꓡꓱ ꓡꓴ ꓫꓵꓽ ꓔꓯ ꓓꓵ ꓙ ꓔ꓾ (ꓒꓲ‐ꓡꓲ‐ꓒꓲ 4ꓽ8) ꓪꓴ‐ꓢ ꓡꓰ ꓬꓰ ꓙ ꓟ ꓗꓪ ꓐꓰ ꓣꓳ ꓑ ꓙ ꓟ ꓟꓳ ꓪ ꓟ ꓮ ꓙꓵ ꓔꓯ ꓚꓵ ꓚꓵ ꓛꓳ ꓠ ꓔ ꓡꓳ꓿ ꓕꓱ ꓟ ꓠꓬ ꓣꓳ ꓖꓳ ꓓꓱ ꓔꓲ, ꓟ ꓣꓱ ꓛꓰ ꓔꓯ ꓘꓳ, ꓣꓴ ꓟꓶ ꓢꓲ꓾ ꓪꓴ‐ꓢ ꓔꓬ ꓟ ꓟꓴ ꓗꓪ ꓗꓴꓷꓼ ꓗꓪ ꓣꓳ ꓔꓯ ꓮ ꓕꓯ ꓟꓲ ꓧꓳꓽ ꓔꓯ, ꓖꓶ_ ꓟ ꓪꓴ‐ꓢ ꓬꓲ ꓤꓶꓻ ꓠꓬ ꓣꓳ ꓠꓯꓼ ꓗꓪ ꓣꓳ ꓠꓶꓽ ꓛꓳ ꓕꓲ ꓛꓳ ꓠꓯꓼ ꓗꓪ ꓪꓴꓽ ꓟꓴ ꓡ ꓢꓲ꓾ ꓟꓲ ꓠꓯ ꓗꓪ ꓕꓲ ꓠꓲ, ꓕꓲ ꓪ ꓐꓰ ꓢꓲ ꓡꓲ, ꓟ ꓔꓯ ꓛꓱꓻ ꓓꓳ ꓡ ꓠ, ꓟ ꓥ ꓡꓳ꓿

ꓣꓳ ꓔꓯ ꓮ ꓔꓯ ꓟꓲ ꓙ ꓖꓴ ꓟꓳ. ꓖꓶ ꓢꓲ꓾ ꓠꓬꓲ ꓟꓳ ꓓꓴ ꓖꓶ_ ꓟ ꓟ, ꓟ ꓟ‐ꓡꓲ ꓠꓬ ꓣꓳ ꓙ ꓫꓱ_ ꓟ ꓙ ꓖꓴ ꓗꓪ ꓙ ꓖꓴ ꓟꓳ. ꓖꓶ ꓝꓲ ꓐꓰ ꓪꓽ ꓘꓴ ꓖꓶ_ ꓡꓳ꓿