YO-V=17:1-11
ꓬꓰ-ꓢꓴ ꓡꓰ ꓕꓱ ꓟꓬ ꓙꓰꓽ ꓐꓯ ꓗꓷ ꓠꓬ꓾ ꓟꓴꓽ ꓗꓪ ꓔꓯ ꓟꓳꓸ ꓡꓳꓸ ꓢꓲ ꓕꓱ ꓡꓱ ꓐꓯˍ ꓡꓳ꓿ ꓐꓹ ꓐꓽꓳ꓾ ꓬꓲ ꓙꓵꓹ ꓛꓲ ꓡꓺꓳ꓿ ꓮ ꓐꓲ ꓠꓬ ꓠꓴ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ꓾ ꓠꓴ ꓮ ꓐꓲ ꓔꓯ ꓟꓬꓱ ꓓꓳꓽ ꓖꓶ ꓡꓯ꓿ ꓮ ꓡꓲꓳ ꓐꓯ ꓠꓬ ꓠꓴ ꓡꓰ ꓬꓲ ꓔꓯ ꓖꓶ ꓔ ꓢꓴ ꓮꓽ ꓙꓵ ꓔꓯ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶ ꓠꓹ ꓟ꓾ ꓠꓴ ꓠꓬ ꓡ ꓞꓳ ꓮꓽ ꓙꓵ ꓟ ꓕꓯꓽ ꓢꓲ ꓗꓪ ꓬꓲ ꓔꓯ ꓙꓵ ꓪꓽ ꓖꓶ ꓗꓷꓳ꓿ ꓔꓱꓹˍ ꓟ ꓪꓴ-ꓢ ꓕꓲ ꓣꓳˍ ꓡꓰꓽ ꓙꓳˍ ꓟ ꓐꓰ꓾ ꓠꓴꓻˍ ꓐꓰ ꓠꓴꓻ ꓡꓰ ꓝꓲ ꓩꓴ ꓔ ꓟ ꓬꓰ-ꓢꓴ ꓙꓲ-ꓢꓴ ꓔꓯ ꓢꓷˍ ꓟ ꓕꓱ ꓟ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓥ ꓡꓳ꓿
ꓠꓴ ꓡꓰ ꓥꓪ ꓔꓯ ꓖꓶ ꓔ ꓟ ꓟꓬꓱꓽ ꓬꓰ ꓓꓳ ꓡꓰ ꓠꓬꓲ꓾ ꓥꓪ ꓠꓬ ꓟꓲ ꓠꓯ ꓗꓪ ꓠꓴ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓐꓹ ꓐꓽꓳ꓾ ꓟꓲ ꓠꓯ ꓟꓽ ꓙꓳ ꓕꓯˍ ꓡꓰ꓾ ꓠꓴˍ ꓐꓰ ꓕꓲ ꓡꓰꓹꓼ ꓥꓪ ꓙꓳˍ ꓟ ꓟꓬꓱ ꓓꓳꓽ ꓕꓱ ꓟ꓾ ꓮ ꓟꓶ ꓠꓴ ꓟꓲꓽ ꓙꓬ ꓗꓪ ꓥꓪ ꓔꓯ ꓖꓶ ꓡꓯ꓿ ꓠꓴ ꓡꓰ ꓟꓲ ꓠꓯ ꓗꓪ ꓐꓰ ꓥꓪ ꓔꓯ ꓖꓶ ꓔ ꓟ ꓡ ꓞꓳ ꓔꓯ ꓥꓪ ꓡꓰ ꓠꓴ ꓟꓬꓱꓺ ꓟꓳꓸ ꓖꓶ ꓗꓷꓳ꓿ ꓬꓲ ꓪꓽ ꓠꓬ ꓠꓴ ꓔꓯ ꓟ ꓥ ꓢꓲ꓾ ꓠꓴ ꓡꓰ ꓥꓪ ꓔꓯ ꓖꓶ ꓔ ꓟ ꓥ ꓢꓲ ꓠꓬꓲ꓾ ꓠꓴ ꓐꓯ ꓘꓶ ꓔꓯ ꓬꓲ ꓪꓽ ꓒꓵꓽ ꓛꓳ ꓗꓷꓳ꓿
ꓥꓪ ꓔꓯ ꓖꓶ ꓔ ꓟ ꓮꓽ ꓙꓵ ꓠꓬ ꓠꓴ ꓗꓪ ꓐꓰ ꓥ ꓟ ꓮ ꓟꓶ ꓬꓲ ꓪꓽ ꓢꓷꓸ ꓡꓰꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓡꓰ ꓥꓪ ꓔꓯ ꓖꓶꓽ ꓔ ꓟ ꓐꓯ ꓘꓶ ꓠꓬ ꓥꓪ ꓡꓰ ꓬꓲ ꓪꓽ ꓔꓯ ꓖꓶ ꓗꓷꓳ꓿ ꓬꓲ ꓪˍ ꓟꓲ ꓘꓳ ꓣꓴ ꓢꓲ꓾ ꓥꓪ ꓠꓬ ꓠꓴ ꓔꓯ ꓐꓰ ꓓꓳ ꓡ ꓢꓴ ꓥ ꓟ ꓬꓲ ꓪꓽ ꓚꓵ ꓚꓵ ꓢꓷꓸ ꓡꓰ ꓢꓲ ꓠꓬꓲ꓾ ꓠꓴ ꓡꓰ ꓥꓪ ꓔꓯ ꓝꓲ ꓩꓴ ꓡ ꓟ ꓔꓯˍ ꓟꓲ ꓬꓲ ꓪꓽ ꓙꓵꓻ ꓗꓷꓳ꓿ ꓥꓪ ꓠꓬ ꓬꓲ ꓪꓽ ꓐꓱ ꓶ ꓓꓰꓽˍ ꓡꓳ꓿ ꓟꓲ ꓠꓯ ꓐꓱ ꓶ ꓠꓽ ꓥꓪ ꓟꓽ ꓓꓰꓽ꓿ ꓠꓴ ꓡꓰ ꓥꓪ ꓔꓯ ꓖꓶ ꓔ ꓢꓴ ꓐꓱ ꓶˍ ꓡꓰꓽ ꓓꓰꓽˍ ꓥꓳ꓿ ꓮ ꓡꓲꓳ ꓐꓯˍ ꓠꓬ ꓬꓲ ꓪꓽ ꓠꓽ ꓠꓴ ꓔꓯ ꓟ ꓥ ꓡꓳ꓿ꓥꓪ ꓔꓯ ꓟ ꓮꓽ ꓙꓵ ꓠꓬ ꓠꓴ ꓔꓯ ꓟ ꓥꓳ꓿ ꓠꓴ ꓔꓯ ꓟˍ ꓟꓲ ꓥꓪ ꓔꓯ ꓟ ꓥꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓗꓪ ꓐꓰ ꓥꓪ ꓟꓬꓱ ꓓꓳꓽ ꓟꓶˍ ꓡꓳ꓿ꓕꓱ ꓡꓱ ꓖꓳ ꓑꓳ ꓥꓪ ꓠꓬ ꓟꓲ ꓠꓯ ꓗꓪ ꓟꓽ ꓔꓬ ꓔꓬ ꓠꓴ ꓔꓯ ꓡꓻˍ ꓥꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓟꓲ ꓠꓯ ꓗꓪ ꓔꓬ ꓢꓰꓽ ꓡꓳ꓿ ꓢꓲꓽ ꓫꓬ ꓟ ꓐꓹ ꓐꓽꓳ꓾ ꓣꓳ ꓕꓲ ꓟˍ ꓡꓰꓽ ꓥ ꓟ ꓡꓰ ꓐꓰ꓾ ꓠꓴ ꓡꓰ ꓥꓪ ꓔꓯ ꓖꓶ ꓔ ꓢꓴ ꓐꓴˍ ꓟꓲ ꓕꓲ ꓟˍ ꓡꓰꓽ ꓒꓬꓱꓼ ꓡ ꓠꓹ ꓟ꓾ ꓠꓴ ꓡꓰ ꓥꓪ ꓔꓯ ꓖꓶ ꓔ ꓟ ꓠꓴ ꓟꓬꓱ ꓗꓪ ꓐꓰ ꓬꓲ ꓪꓽ ꓔꓯ ꓫ ꓙ꓾ ꓐꓯˍ ꓡꓳ꓿
ꓢꓲ ꓡꓲ ꓗ, ꓛꓲꓽˍ ꓟ ꓠꓯꓼ ꓠꓯꓼ ꓙꓵ, ꓗꓪ ꓮ ꓙꓵꓽ ꓔꓯ ꓢꓲ ꓒ ꓠꓯꓸꓼ ꓗꓪ “ꓧꓪ. ꓧꓪꓸꓼ” ꓐꓰ ꓐꓯ ꓩꓴ ꓡˍ ꓥꓳ꓿ ꓠꓬꓲ. ꓠꓬꓲ ꓗꓪ ꓣꓳ ꓢꓯꓼ ꓪ ꓣꓴ ꓠ ꓔˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓡꓰ ꓬꓲ ꓝꓲ ꓓꓴ ꓐꓴ ꓐꓱ ꓶ ꓐ, ꓐ ꓔꓬ ꓗꓪ ꓪꓽ ꓘꓴ ꓙ ꓖꓶˍ ꓟ ꓚꓱ,꓾ (ꓬꓳ‐ꓦ꓿17ꓽ1‐11) ꓥ ꓡꓳ꓿
ꓬꓰ‐ꓢꓴ ꓬꓲ ꓪꓽ ꓘꓴˍ ꓟ ꓠꓯꓸꓼ ꓗꓪ ꓬꓲ ꓪꓴ. ꓕꓯ ꓠꓬ ꓐ,ꓐꓽꓳ꓾ ꓮ ꓐꓲ ꓠꓬ ꓠꓴ ꓔꓯ ꓟꓬꓱ ꓓꓳꓽ ꓖꓶ ꓠ, ꓟ꓾ ꓠꓴ ꓮ ꓐꓲ ꓔꓯ ꓟꓬꓱ ꓓꓳꓽ ꓖꓶ ꓡꓯ꓾ ꓐꓰ ꓘꓴˍ ꓡꓳ꓿ ꓬꓰ‐ꓢꓴ ꓙꓲ‐ꓢꓴ ꓠꓬ ꓬꓲ ꓚꓲ. ꓛꓬ ꓤꓶꓻ ꓐꓱ ꓶ ꓟꓽ ꓥ ꓥ ꓐꓰ ꓐ, ꓐ ꓟꓬꓱ ꓓꓳꓽ ꓓꓳ ꓠ, ꓟ ꓬꓲ ꓞꓳ ꓙꓳ ꓗꓷꓳ꓿ ꓣꓳ ꓥˍ ꓟꓲ ꓠꓬꓲ. ꓠꓬꓲ ꓠꓯꓼ ꓠꓯꓼ ꓗꓪ “ꓠꓬꓲ. ꓠꓬꓲ ꓥꓪ ꓬꓰˍ ꓟ ꓮ ꓙꓵꓽ ꓗꓪ ꓐꓰ ꓪꓴ‐ꓢ ꓟꓬꓱ ꓓꓳꓽ ꓓꓳ ꓡꓰ ꓝꓲ” ꓐꓯ ꓢꓲ ꓪꓽ ꓘꓴ ꓡꓯ꓿ ꓣꓳ ꓣꓱꓽ ꓬꓰ ꓚꓱ, ꓮ ꓙꓵꓽ ꓪꓴ‐ꓢ ꓔꓯ ꓧꓶ. ꓕꓯ ꓔꓲꓺ ꓖꓶ ꓡꓯꓼ ꓙꓱ ꓓꓴ ꓬꓰ ꓡꓯ꓿
