ꓝꓲ ꓓꓴ ꓒꓳ ꓡꓳ ꓡꓰ ꓪꓴ‐ꓢ ꓐꓯ ꓘꓶꓽ ꓚ ꓙꓰˍ ꓟ ꓚꓱ, ꓗꓪ꓾ ꓒꓳ‐ꓡꓳ ꓡꓰ ꓒꓲ‐ꓡꓲ‐ꓒꓲ ꓡꓳ ꓒꓱ ꓗꓪ ꓛꓲ ꓬꓰˍ ꓕꓯ ꓠꓯ ꓬꓲꓻ ꓘꓶꓽ ꓗꓪ ꓪꓽ ꓘꓴ ꓔꓬ ꓟ ꓤ ꓟꓶ ꓤ ꓐꓴ ꓔꓬ ꓗꓪ ꓙꓰ ꓢꓲ ꓪꓴ‐ꓢ ꓟ. ꓟꓲꓽ ꓚ ꓟ. ꓖꓶˍ ꓡꓳ꓿ ꓖꓳ ꓤ ꓟꓶ ꓤ ꓐꓴ ꓠꓯꓸꓼ ꓗꓪ ꓚꓳ. ꓡꓱ‐ꓔꓲ‐ꓬ ꓐꓰ ꓟꓬꓱ ꓔˍ ꓟ ꓤ ꓟꓶ ꓤ ꓠꓬ ꓒꓳ‐ꓡꓳ ꓚ ꓟ. ꓖꓶˍ ꓟ ꓔꓯ ꓠ ꓠ, ꓔꓬ ꓕꓯ ꓢꓲ ꓒ ꓡꓰ ꓬꓲ ꓠꓲ, ꓟ ꓔꓯ ꓒꓴ ꓖꓶ ꓗꓷꓳ꓾ ꓐꓰ (ꓝꓲ ꓓꓴ 16ꓽ13‐15) ꓗꓪ ꓐꓳ ꓔ ꓡꓳ꓿ ꓕꓱ ꓟ ꓠꓽ ꓬꓳ. ꓚꓰꓽˍ ꓟ ꓚꓱ, ꓥ ꓡꓳ꓿ ꓝꓲ ꓓꓴ ꓒꓳ‐ꓡꓲ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓚ ꓟ. ꓖꓶˍ ꓡꓳ ꓐꓯˍ ꓥ ꓟꓲ ꓡꓱ‐ꓔꓲ‐ꓬ ꓠꓲ, ꓟ ꓔꓯ ꓒꓴ ꓖꓶ ꓢꓴ ꓠꓬ ꓪꓴ‐ꓢ ꓥ ꓡꓳ꓿
ꓕꓱ ꓟ ꓠꓬ ꓣꓳ ꓙꓵꓻ ꓠꓲ, ꓠꓬ ꓣꓳ ꓢꓯꓼ ꓕꓵꓼˍ ꓟ ꓑꓶ. ꓓꓴ ꓒꓬꓱꓼ ꓡˍ ꓟ ꓟꓽ ꓥ ꓥ꓾ ꓪꓴ‐ꓢ ꓣꓱꓽ ꓛꓰꓽ ꓑꓶ. ꓓꓴ ꓥ ꓡꓳ ꓐꓯˍ ꓟ ꓔꓯ ꓙꓽ ꓜꓲꓼ ꓡꓰ ꓝꓲˍ ꓡꓳ꓿ ꓪꓴ‐ꓢ ꓡꓰ ꓣꓳ ꓠꓲ, ꓟ ꓔꓯ ꓒꓴ ꓖꓶ ꓡˍ ꓕꓯ ꓡꓰꓽ ꓣꓳ ꓠꓬ ꓢꓲ ꓒ ꓔꓯ ꓘꓳ ꓣꓴ ꓐ ꓡ ꓢꓲ꓾ ꓣꓳ ꓔꓯ ꓪꓴ‐ꓢ ꓘꓴ ꓔꓬ ꓟ ꓔꓯ ꓓꓽ ꓔꓳ, ꓐ ꓡˍ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓬꓳ‐ꓦ 16ꓽ5‐11) ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓢꓯꓼ ꓖꓶ ꓘꓶꓽ ꓫ. ꓕꓱ ꓔꓬ ꓟ ꓔꓯ ꓟꓳꓻ ꓪ ꓓ, ꓡꓳ꓿ ꓢꓲ ꓒ ꓠꓬ ꓐ, ꓐ ꓪꓴ‐ꓢ ꓔꓬ ꓗꓪ ꓚꓱ, ꓬꓲꓼ ꓙꓰ ꓠ ꓗ, ꓟ ꓔꓯ ꓢꓷ.ˍ ꓟ ꓑꓶ. ꓓꓴ ꓬꓲ ꓪ ꓐꓴ ꓔꓯ ꓢꓲꓽ ꓫꓬ ꓟ ꓦ ꓔꓯ ꓝꓲ ꓩꓴ ꓖꓶˍ ꓥꓳ꓾ ꓐꓰ ꓙ ꓟꓳ ꓘꓶꓽ ꓖꓶ ꓗꓷꓳ꓿ ꓢꓲꓽ ꓫꓬ ꓟ ꓦ ꓠꓬ ꓬꓲ ꓪ ꓔꓯ ꓬꓰ ꓙ ꓔꓳ, ꓙ ꓖꓶ ꓢꓴ ꓥ ꓢꓲ꓾ ꓬꓲ ꓪ ꓔꓯ ꓮ ꓕꓯ ꓟꓲ ꓙ ꓖꓴ ꓟ. ꓖꓶˍ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓖꓶˍ ꓡꓳ꓿
ꓙ ꓟꓳ ꓘꓶꓽ ꓕꓱ ꓟ ꓠꓬ ꓣꓳ ꓐꓴ ꓐꓱ ꓶ ꓮ ꓘꓶ. ꓢꓯꓼ ꓙꓳ ꓡꓰ ꓝꓲˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓕꓲ ꓣꓳ ꓔꓵꓸꓼ ꓟꓽ ꓡꓳ ꓔ꓿ ꓕꓱ ꓟ ꓡꓰ ꓐꓰ ꓥꓳ꓾ ꓣꓳ ꓔꓯ ꓥˍ ꓟꓲ ꓕꓲ ꓣꓳ ꓔꓵꓸꓼ ꓬꓲ ꓟꓽ ꓡꓳ ꓔ꓿ ꓢꓲꓽ ꓫꓬ ꓟ ꓦ ꓠꓬ ꓣꓳ ꓔꓯ ꓠꓲ, ꓫ. ꓓꓴ꓾ ꓫ. ꓙꓵ ꓓꓴ ꓐꓰ ꓔꓳ, ꓜꓳꓽ ꓡ ꓕ ꓑꓳꓸꓼ ꓬꓰ ꓙ ꓔꓳ, ꓙ ꓖꓶ ꓢꓲ ꓔꓱ, ꓚꓵˍ ꓟ ꓚꓱ, ꓗꓪ ꓙ ꓖꓴ ꓟ. ꓖꓶˍ ꓡꓳ꓿ ꓖꓳ ꓟ ꓑꓶ. ꓓꓴ ꓢꓲꓽ ꓫꓬ ꓟ ꓦ ꓬꓲ ꓙ ꓖꓴ ꓟ. ꓖꓶˍ ꓟ ꓔꓯ ꓘꓳ ꓣꓴ ꓢꓲ ꓙꓵꓻ ꓠꓲ, ꓙ ꓖꓴ ꓗꓪ ꓝ. ꓢꓲ ꓙ ꓫꓱꓽ ꓠ ꓗ, ꓡꓳ꓿ ꓣꓳ ꓠꓲ, ꓟ ꓔꓯ ꓒꓴ ꓔ ꓢꓲ ꓪꓴ‐ꓢ ꓐꓯ ꓘꓶꓽ ꓔꓯ ꓘꓳ ꓣꓴ ꓓꓴ ꓬꓰ ꓡꓯ꓿
