ꓛꓰꓼ ꓡꓱꓼ ꓚˍ ꓐꓰ ꓬꓲ ꓡꓯꓼ ꓗ. ꓟ. ꓟꓲꓽ (Daily reflection)
ꓧꓪ. ꓧꓪ ꓠꓬꓲ. ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 15ꓽ1‐8 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓛꓰꓼ ꓡꓱꓼ ꓚ ꓐꓰ ꓬꓲ ꓡꓯꓼ ꓗ. ꓟ. ꓟꓲꓽ ꓔꓯ ꓣꓳ ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓠꓽ ꓛꓱꓼ ꓡꓱꓼ ꓚ ꓚꓵˍ ꓥ ꓡꓳ꓿ ꓥꓪ ꓐ, ꓐ ꓠꓬ ꓐꓱ ꓫꓬ, ꓡꓲ. ꓢꓴ ꓥ ꓡꓳ꓿ ꓥꓪ ꓔꓯ ꓠꓳꓽ ꓞ, ꓢꓲ ꓬꓲ ꓢꓶꓽ ꓟꓽ ꓓꓱꓼ ꓟ ꓡꓯꓼ ꓗ. ꓥ ꓕ ꓑꓳ ꓔꓯ ꓬꓲ ꓡꓰ ꓧꓳꓽ ꓩꓴ ꓗꓷ ꓥꓳ꓿ ꓬꓲ ꓢꓶꓼ ꓟ ꓥ ꓕ ꓑꓳ. ꓔꓯ ꓠꓬ ꓬꓲ ꓢꓶꓽ ꓟꓬꓽ ꓠꓬꓲ ꓓꓱꓼ ꓡ ꓠ, ꓟ ꓬꓲ ꓡꓰ ꓫꓬ, ꓡꓲ. ꓖꓶ ꓥꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓔꓯꓽ ꓥꓳꓽ ꓗꓪ ꓐꓰ ꓛꓱꓼ ꓡꓱꓼ ꓚ ꓔꓯ ꓗꓪ ꓐꓰ ꓣꓳ ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓮ ꓙꓵꓽ ꓢꓴ ꓐꓴ ꓬꓲ ꓠꓯ, ꓗꓪ ꓟꓽ ꓠꓳꓽ ꓔ ꓢꓴ ꓬꓲ ꓠꓯ, ꓗꓪ ꓟꓽ ꓡ ꓢꓴ ꓢꓯ. ꓔꓬ ꓠ, ꓟ ꓫ. ꓟ ꓚꓱ, ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓬꓲ ꓠꓯ, ꓗꓪ ꓠꓳꓽ ꓞ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓛꓱꓼ ꓡꓱꓼ ꓚ ꓠꓬ ꓬꓲ ꓚꓰ. ꓠꓬ ꓮ ꓘꓶ. ꓣꓳ ꓚꓵˍ ꓟ ꓥ ꓢꓲ ꓠꓬꓲ ꓬꓲ ꓚꓰ. ꓗꓪ ꓟꓽ ꓠꓳꓽ ꓞ ꓟ ꓠꓬ ꓫꓵꓻ ꓡꓰ ꓟ ꓥ ꓡꓳ꓿ ꓕꓱ ꓟ ꓡꓰ ꓐꓰ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓤꓶꓻ ꓦꓬꓼ ꓠꓬꓲ ꓠꓯ, ꓗꓪ ꓟꓽ ꓔꓬ ꓠꓬ ꓣꓳ ꓦꓻ ꓠꓬ ꓫꓵꓻ ꓡꓰ ꓟ ꓥ ꓟꓲ ꓛꓱꓼ ꓡꓱꓼ ꓚ ꓡꓰ ꓐꓰ ꓗꓷ ꓡꓰ ꓟ ꓥ ꓡꓳ꓿
ꓐ, ꓐ ꓪꓴ‐ꓢ ꓠꓬ ꓐꓱ ꓫꓬ, ꓡꓲ. ꓢꓴ ꓐꓱ ꓡꓳ. ꓢꓴ ꓥ ꓟ
ꓛꓱꓼ ꓡꓱꓼ ꓘꓴꓽ ꓗꓪ ꓬꓲ ꓢꓶꓽ ꓟꓽ ꓓꓱꓽ ꓛꓱꓼ ꓡꓱꓼ ꓚ ꓔꓯ ꓮꓽ ꓔꓳ ꓛꓴꓽ ꓩꓴ ꓠ, ꓟ ꓬꓰ ꓟ ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓤꓶꓻ ꓠꓯ, ꓗꓪ ꓟꓽ ꓙꓲ ꓟ ꓟꓬꓱꓽ ꓟꓽ ꓙꓲ ꓟ ꓔꓯ ꓡꓰ ꓧꓪ ꓠ, ꓟ ꓠꓬ ꓝꓴꓲ ꓓꓽ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓟꓽ ꓙꓲ ꓟ ꓔꓯ ꓣꓳ ꓚꓲ. ꓛꓬ ꓢꓯꓼ ꓪ ꓗꓪ ꓐꓰ ꓧꓪ. ꓡꓰ ꓟꓽ ꓘꓴ ꓠꓬ ꓢꓲꓺ ꓒ ꓔꓯ ꓘꓴꓽ ꓠ, ꓟ ꓣꓳ ꓚꓵˍ ꓢꓲ ꓠꓬꓲ ꓝꓴꓲ ꓠꓯ, ꓗꓪ ꓟꓽ ꓔꓬ ꓠ, ꓟ ꓐꓱ ꓶ ꓣꓳ ꓚꓵ ꓡꓳ꓿
ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓤꓶꓻ ꓠꓯ, ꓗꓪ ꓫ. ꓓꓴ ꓟꓷ ꓓꓴ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳ ꓡ ꓟ ꓙꓵ, ꓕꓯ ꓢꓲꓺ ꓒ ꓠꓬ ꓣꓳ ꓔꓯ ꓮ ꓘꓶ. ꓙꓲ ꓟ ꓢꓶꓽ ꓢꓶ ꓓꓱ ꓡ ꓝꓲ ꓠ, ꓟ ꓣꓳ ꓦꓻ ꓕꓲ ꓒꓳ ꓗꓪ ꓦꓻ ꓢꓯꓼ ꓪ ꓙꓳ ꓡ ꓠ, ꓟ ꓣꓳ ꓔꓯ ꓫꓬ, ꓐꓱ ꓖꓶ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓮ ꓕꓯ ꓥ ꓟꓲ ꓬꓲ ꓔꓯ ꓠꓳ ꓞ ꓠ, ꓟ ꓬꓲ ꓐꓰ ꓔꓬ ꓠ, ꓟ ꓣꓳ ꓚꓵˍ ꓟ ꓔꓯ ꓐꓯ ꓟ. ꓖꓶ ꓔ ꓡꓳ꓿
ꓣꓳ ꓮ ꓡꓲ ꓐꓰ ꓢꓲꓺ ꓒ ꓬꓰ‐ꓢꓴ ꓐꓰ ꓕꓲ ꓪ ꓔꓬ ꓠ, ꓟ ꓠꓬ ꓢꓲꓽ ꓫꓬ ꓖꓳ ꓓꓱꓽ ꓕꓯ ꓘꓳ, ꓣꓴ ꓠ, ꓟ ꓝꓮꓲ ꓣꓳ ꓝꓴꓲ ꓔꓯ ꓓꓵꓽ ꓙ ꓒꓳ, ꓡꓶꓽ ꓢꓲ ꓠꓬꓲ ꓢꓲꓺ ꓒ ꓠꓯ, ꓗꓪ ꓡ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓢꓲꓺ ꓒ ꓮ ꓕꓯ ꓥ ꓟꓲ ꓫ. ꓕꓱ ꓠ ꓟ ꓬꓲ ꓐꓰ ꓙ ꓡꓯꓽ ꓘꓳ, ꓟ ꓣꓳ ꓚꓵˍ ꓥ ꓡꓳ꓿
ꓠꓬꓲ. ꓠꓬꓲ ꓙꓲ ꓟ ꓢꓶꓽ ꓢꓶꓽ ꓐꓯ ꓟ ꓠꓬ ꓟꓲ ꓠ ꓯ ꓗꓪ ꓮ ꓘꓶ. ꓛꓲ ꓟꓬꓱꓽ ꓓꓳ ꓙꓳ ꓢꓴ ꓒꓬꓱꓼ ꓡ ꓠ, ꓟ ꓒꓴ ꓫꓵꓽ ꓮ ꓘꓶ. ꓙꓳ ꓡ ꓢꓴ ꓔꓯ ꓐꓯ ꓔ ꓟ ꓟꓽ ꓥ꓾ ꓢꓲꓺ ꓒ ꓠꓵꓻ ꓠꓲ, ꓠꓲ, ꓟ ꓘꓴꓽ ꓗꓪ ꓙꓳ ꓢꓲ ꓠꓬꓲ ꓢꓴ ꓔꓯ ꓙꓲ ꓟ ꓟꓬꓱꓽ ꓬꓰ ꓖꓶ ꓢꓴ ꓒꓬꓱꓼ ꓡ ꓝꓲ ꓠ, ꓟ ꓦꓻ ꓕꓲ ꓒꓳ, ꓗꓪ ꓪꓴꓽ ꓟꓴ ꓢꓴ ꓒꓬꓱꓼ ꓡ ꓠ, ꓟ ꓐꓯ ꓔ ꓟ ꓥ ꓡꓳ꓿
ꓟꓲ ꓠꓯ ꓗꓪ ꓠꓴ ꓠꓲ, ꓠꓬ ꓮ ꓘꓶ. ꓛꓲ ꓙꓲ ꓟ ꓢꓶꓽ ꓢꓶꓽ ꓥ ꓡꓳ꓿ ꓣꓳ ꓙꓵꓻ ꓠꓲ, ꓔꓯ ꓪꓴꓽ ꓟꓴ ꓡ ꓝꓲ ꓠ, ꓟ ꓙꓲ ꓟ ꓟꓬꓱꓽ ꓗꓪ ꓮ ꓘꓶ. ꓢꓯꓼ ꓕꓵꓼ ꓡꓯ꓿
ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓽ ꓠꓬꓲ ꓔꓬ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓠꓳꓽ ꓞ ꓔꓬ ꓢꓴ ꓒꓬꓱꓼ ꓔꓬ ꓡ? ꓬꓲ ꓠꓬ ꓛꓱꓼ ꓡꓱꓼ ꓚ ꓚꓵˍ ꓥ ꓡꓳ꓿ ꓣꓳ ꓠꓬ ꓛꓱꓼ ꓡꓱꓼ ꓚꓵˍ ꓗꓪ ꓠꓳꓽ ꓞ ꓢꓴ ꓒꓬꓱꓼ ꓔꓬ ꓟꓽ ꓔꓬ ꓡ> ꓚꓲ. ꓛꓬ ꓔꓯ ꓓꓴ ꓬꓰ ꓡꓯ꓿
ꓥꓪ ꓠꓬ ꓛꓱꓼ ꓡꓱꓼ ꓚ ꓥ ꓡꓳ꓿ ꓠꓴ ꓪ ꓠꓽ ꓬꓲ ꓡꓯꓼ ꓗ. ꓥ ꓡꓳ꓿ ꓥꓪ ꓠꓯꓼ ꓗꓪ ꓔꓬ ꓢꓲ ꓥꓪ ꓠꓬ ꓬꓲ ꓠꓯꓼ ꓗꓪ ꓔꓬ ꓟ ꓖꓳ ꓕꓲ ꓣꓳ ꓠꓬ ꓬꓲ ꓢꓶꓽ ꓮꓽ ꓟꓬ, ꓓꓱꓼˍ ꓥꓳ꓿
ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿ ꓬꓲ ꓔꓯ ꓧꓪ. ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
