ꓠꓬꓲ. ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳ ꓮ ꓙꓵ ꓔꓯ ꓣꓳ. ꓚꓵ_ ꓟ ꓠ ꓠꓬꓲ ꓘꓶꓽ ꓔꓯ ꓓꓵꓽ ꓙ ꓡꓰ ꓝꓲ ꓡꓳ꓾ ꓪꓴ‐ꓢ ꓠꓵꓻ ꓠꓲ, ꓔꓯ ꓣꓳ ꓮ ꓡꓰ ꓐꓰ ꓢꓷ. ꓓꓻ ꓡ? ꓝꓮꓲ ꓣꓳ ꓬꓰ ꓔꓬ ꓟ ꓠꓬ ꓪꓴ‐ꓢ ꓐꓰ ꓮ ꓡꓰ ꓫꓱ, ꓡ? ꓐꓰ ꓥ ꓡꓳ꓿
ꓬꓲ. ꓪꓴ. ꓠꓬ ꓒꓳ‐ꓡꓳ ꓐꓰ ꓐ‐ꓠ‐ꓐ ꓐꓴ ꓠꓬ ꓡꓴ‐ꓢꓶ‐ꓔꓷ ꓗꓪ ꓓꓵꓽ ꓙ ꓟꓶ ꓓꓴ ꓢꓷ. ꓡꓰ ꓓꓴ ꓕꓲ ꓟ ꓬꓰ ꓗꓷ ꓟ ꓔꓯ ꓡꓳ. ꓟꓳ ꓪ ꓡꓳ꓿ ꓛꓲ ꓒꓯ, ꓫꓳ. ꓡꓰ ꓢꓲ ꓛꓲ ꓒꓯ, ꓢꓯꓼ ꓟꓽ ꓙꓳ ꓢꓴ ꓕꓲꓽ ꓣꓳ ꓔꓯ ꓫꓬ, ꓓꓻ ꓡꓰ ꓝꓲ ꓟ ꓥ ꓡꓳ꓿ ꓕꓱ ꓟ ꓔꓯ ꓡꓳ. ꓟꓳ ꓠꓬ ꓡ ꓞꓳ ꓐꓴ ꓠꓬ ꓒꓳ‐ꓡꓳ ꓐꓰ ꓐ‐ꓠ‐ꓐ ꓐꓴ ꓔꓯ ꓪꓴ‐ꓢ ꓐꓰ ꓓꓵꓽ ꓙ ꓢꓲ ꓔꓲ ꓖꓶ ꓠꓲ, ꓫꓵ_ ꓡꓳ꓾ ꓖꓳ ꓡꓱ ꓥ ꓟꓲ ꓒꓳ‐ꓡꓳ ꓐꓰ ꓐ‐ꓠ‐ꓐ ꓐꓴ ꓠꓬ ꓥꓪ ꓠꓴ ꓠꓬ ꓠꓴ ꓪ ꓡꓰ ꓐꓰ ꓟꓲ ꓠꓯ ꓡ ꓞꓳ ꓐꓴ ꓥ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿ ꓬꓲ ꓪ ꓠꓬ ꓡ ꓞꓳ ꓐꓴ ꓔꓯ ꓢꓯ. ꓔꓬ ꓟ ꓪꓴ‐ꓢ ꓠꓯꓼ ꓗꓪ ꓬꓲꓼ ꓡ ꓠ, ꓟ ꓢꓯꓼ ꓖꓶ ꓗꓷ ꓟ ꓥ ꓡꓳ꓿
ꓕꓱ ꓟ ꓗꓪ ꓐꓰ ꓣꓳ ꓮ ꓫꓵ ꓢꓷ. ꓡꓰ ꓓꓴ ꓪ ꓟꓶ ꓡ? ꓢꓷ. ꓡꓰ ꓓꓴ ꓔꓯ ꓟꓳ ꓪ ꓟ ꓗꓪ ꓐꓰ ꓪꓴ‐ꓢ ꓔꓯ ꓚꓵ ꓚꓵ ꓢꓷ. ꓡꓰ ꓟꓽ ꓓ꓾ ꓔꓱ, ꓟ ꓙꓵꓻ ꓠꓲ, ꓠꓬ ꓢꓷ. ꓡꓰ ꓓꓴ ꓓꓵ ꓙ ꓟꓶ ꓓꓴ ꓓꓰ ꓢ ꓟꓬ ꓠꓬꓲ ꓬꓲ. ꓠꓯ. ꓡꓳ꓾ ꓞꓳ ꓤ ꓐꓴ ꓠꓬ ꓒꓳ‐ꓡꓳ ꓬꓰ ꓟ ꓔꓯ ꓟꓳ ꓥ ꓟꓲ ꓒꓳ‐ꓡꓳ ꓠꓲ, ꓟ ꓘꓴꓽ ꓠꓯꓼ ꓗꓪ ꓟꓳ ꓡꓰ ꓟꓽ ꓓ꓾ ꓒꓳ‐ꓡꓳ ꓬꓲ ꓠꓲ, ꓟ ꓘꓴꓽ ꓗꓪ ꓪꓴ‐ꓢ ꓠꓯꓼ ꓗꓪ ꓔꓬ ꓟ ꓠꓵꓻ ꓠꓲ, ꓙꓵꓻ ꓠꓲ, ꓒ ꓐꓲ ꓔꓬ ꓡꓳ꓾ ꓖꓳ ꓟ ꓑꓶ ꓓꓴ ꓬꓲ ꓠꓬ ꓪꓴ‐ꓢ ꓬꓲ ꓟꓯꓼ ꓶꓻ ꓕꓲꓽ ꓟ ꓡꓰ ꓐꓰ ꓣꓱ ꓟ ꓟꓶ ꓗꓷ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓠꓵꓻ ꓠꓲ, ꓚꓱ, ꓔꓯ ꓐꓯ ꓖꓶ ꓔ ꓡꓳ꓿ ꓬꓲ ꓕꓵꓼ ꓪ ꓔꓯ ꓛꓳ ꓢꓴ ꓠꓬ ꓬꓲ ꓔꓯ ꓠꓲ, ꓠꓵ ꓢꓴ ꓥ ꓡꓳ꓿ ꓥꓪ ꓔꓯ ꓠꓲ, ꓠꓵ ꓢꓴ ꓔꓯ ꓠꓬ ꓥꓪ ꓐ, ꓐ ꓡꓰ ꓬꓲ ꓔꓯ ꓠꓲ, ꓠꓵ ꓥꓳ꓿ ꓥꓪ ꓟꓲ ꓬꓲ ꓔꓯ ꓠꓲ, ꓠꓵ ꓢꓲ꓾ ꓥꓪ ꓚꓲ ꓛꓬ ꓬꓲ ꓔꓯ ꓟꓳ. ꓖꓶ_ ꓥꓳ꓿
ꓢꓲ ꓒ ꓬꓰ‐ꓢꓴ ꓐꓯ ꓘꓶ ꓗꓪ ꓐꓰ ꓬꓲ ꓔꓯ ꓠꓲ, ꓠꓵ ꓟ ꓠꓬ ꓬꓲ ꓐꓯ ꓘꓶꓽ ꓔꓯ ꓠ ꓠ, ꓢꓲ ꓒꓵꓽ ꓛꓳ ꓟ ꓥ ꓡꓳ꓿ ꓣꓳ ꓠꓵ ꓠꓲ, ꓠꓬ ꓫ ꓪ ꓐꓯ ꓘꓶꓽ ꓡꓰ ꓟꓽ ꓥ ꓚꓵ ꓚꓵ ꓟꓬꓱꓽ ꓗꓪ ꓐꓰ ꓟ. ꓖꓶ ꓠ ꓔ ꓡꓳ꓿ ꓪꓴ‐ꓢ ꓠꓬ ꓢ ꓒ ꓔꓯ ꓠ, ꓠꓵꓻ ꓢꓲ ꓬꓲ ꓐꓯ ꓘꓶꓽ ꓔꓯ ꓠ ꓠ, ꓒꓵꓽ ꓛꓳ ꓢꓴ ꓠꓲ, ꓟ ꓠꓯꓼ ꓗꓪ ꓔꓬ ꓟ ꓥ ꓡꓳ꓿ ꓚꓵ ꓚꓵ ꓙꓵꓻ ꓢꓲ ꓠꓵꓻ ꓠꓲ, ꓙꓳ ꓢꓴ ꓐꓴ ꓐꓱ ꓶ ꓪꓴ‐ꓢ ꓠꓬ ꓬꓲ ꓚꓲ ꓛꓬ ꓟ. ꓖꓶ ꓔ ꓡꓳ꓿
ꓠꓬꓲ. ꓠꓬꓲ ꓣꓳ ꓮ ꓙꓵ ꓠꓬ ꓒꓳ‐ꓡꓳ ꓐꓰ ꓐ‐ꓠ‐ꓐ ꓡꓰ ꓐꓰ ꓪꓴ‐ꓢ ꓢꓷ. ꓡꓰ ꓓꓴ ꓟꓬꓱꓽ ꓠꓯꓼ ꓗꓪ ꓬꓰ ꓠ, ꓟ ꓘꓴ ꓔ ꓟꓶ ꓢꓴ ꓡꓰ ꓥꓳ꓿ ꓖꓳ ꓡꓰ ꓥ ꓟꓲ ꓣꓳ ꓚꓵ ꓟ ꓠꓬ ꓢꓲ ꓒ ꓬꓲ ꓕꓵꓼ ꓪ ꓔꓯ ꓒꓵꓽ ꓛꓳ_ ꓟ ꓗꓪ ꓐꓰ ꓢꓲ ꓒ ꓠꓵꓻ ꓠꓲ, ꓔꓯ ꓟ. ꓖꓶ ꓠ, ꓟ ꓥ ꓡꓳ꓿ ꓣꓳ ꓤꓶꓻ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓒꓵꓽ ꓛꓳ ꓢꓲ ꓢꓲ ꓒ ꓠꓬꓲ ꓟꓳ ꓓꓴ ꓢꓯꓼ ꓪ ꓔꓯ ꓠꓱ. ꓐꓯꓼ ꓢꓴ ꓔꓯ ꓥ ꓟꓲ ꓟ. ꓖꓶ ꓠ, ꓟ ꓚꓺ ꓒꓬꓱꓽ ꓢꓲ ꓪꓴ‐ꓢ ꓠꓵꓻ ꓠꓲ, ꓔꓯ ꓢꓯ. ꓔꓬ ꓟ ꓢꓷ. ꓙ ꓟꓳ ꓙ ꓢꓴ ꓒꓬꓱꓼ ꓡꓰ ꓠ, ꓟ ꓢꓯꓼ ꓕꓵꓽ ꓓꓴ ꓬꓰ ꓡꓯ꓾
