ꓢꓲ ꓒ ꓠꓯꓸꓼ ꓗꓪ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓬꓴ‐ꓔ ꓡ ꓞꓳ ꓐꓴ ꓡꓰ “ꓠꓴ ꓠꓬ ꓙꓲ‐ꓢꓴ ꓥ ꓡ” ꓐꓰ ꓠꓺ ꓠꓬꓲˍ ꓕꓯ꓾ ꓢꓲ ꓒ ꓬꓰ‐ꓢꓴ ꓡꓰ “ꓥꓪ ꓮ ꓣꓳ ꓠꓬ ꓥꓪ ꓢꓯꓼ ꓔꓯ ꓠ ꓠ, ꓡꓳ꓿ ꓥꓪ ꓠꓬ ꓬꓲ ꓪ ꓔꓯ ꓢꓷ. ꓢꓲ꓾ ꓬꓲ ꓪˍ ꓟꓲ ꓥꓪ ꓔꓯ ꓛꓳ ꓡˍ ꓡꓳ” ꓐꓰ ꓐꓯ ꓖꓶˍ ꓡꓳ꓿ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ (ꓬꓳ‐ꓦ 10ꓽ22‐30) ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓠ ꓠꓬꓲ ꓔꓬ ꓟ ꓠꓬ꓾ “ꓠꓴ ꓠꓬ ꓥꓪ ꓢꓯꓼ ꓔꓯ ꓚꓵ ꓚꓵ ꓑ ꓙꓽˍ ꓡ” ꓐꓯˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓲ ꓢꓯꓼ ꓔꓯ ꓑ ꓙꓽ ꓠ, ꓟ ꓐꓱ ꓶ ꓠꓬ꓾ ꓟꓲ ꓠꓯ ꓬꓲ ꓢꓯꓼ ꓐꓴ ꓥ ꓟ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶˍ ꓟ꓾ ꓠꓲ, ꓟ ꓘꓶꓻ ꓡꓶˍ ꓟ꓾ ꓚꓬ, ꓟꓽ ꓠ ꓟ ꓕꓱ ꓟꓬ ꓫꓵꓽ ꓠꓯꓸꓼ ꓗꓪ ꓐꓰ ꓢꓲ ꓒ ꓬꓲ ꓢꓯꓼ ꓔꓯ ꓑ ꓙꓽ ꓠ, ꓟ ꓐꓱ ꓶ ꓠꓽ ꓟꓽ ꓢꓻ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔˍ ꓟ ꓠꓬ꓾ “ꓥꓪ ꓮ ꓣꓳ ꓠꓬ ꓥꓪ ꓢꓯꓼ ꓔꓯ ꓠ ꓠˍ ꓡꓳ” ꓐꓰ ꓐꓯˍ ꓡꓳ꓿
ꓖꓳ ꓟ ꓑꓶ. ꓓꓴ ꓪꓽ ꓘꓴˍ ꓟ ꓠꓯꓸꓼ ꓗꓪ꓾ ꓢꓲꓽ ꓫꓬ ꓕꓳꓽ ꓶ ꓵˍ ꓟ ꓠꓯꓸꓼ ꓗꓪ꓾ ꓢꓲ ꓡꓲ ꓐꓰ ꓔꓬ ꓟ ꓠꓯꓸꓼ ꓗꓪ ꓐꓰ ꓢꓲ ꓒ ꓬꓲ ꓢꓯꓼ ꓔꓯ ꓣꓳ ꓑ ꓙꓽ ꓐ ꓡˍ ꓟ ꓥ ꓡꓳ꓿
ꓝꓮꓲ ꓬꓲ ꓡꓰ ꓐꓯˍ ꓟ ꓠꓬ “ꓥꓪ ꓠꓬ ꓬꓲ ꓪ ꓔꓯ ꓢꓷ.ˍ ꓡꓳ” ꓐꓰ ꓐꓯˍ ꓡꓳ꓿ “ꓬꓲ ꓪ ꓥꓪ ꓔꓯ ꓢꓷ.ˍ ꓡꓳ” ꓐꓰ ꓟꓽ ꓐꓯ ꓔ꓿ ꓕꓱ ꓟ ꓠꓽ ꓬꓳ. ꓚꓵˍ ꓟ ꓥ ꓡꓳ꓿ ꓣꓳ ꓠꓬ ꓮ ꓡꓲ ꓟꓬ ꓛꓲ ꓢꓯꓼ ꓐꓽˍ ꓥ ꓟꓲ꓾ ꓮ ꓡꓲ ꓟꓬ ꓛꓲ ꓙ ꓖꓴ ꓥꓳꓽ ꓙꓰ ꓧꓶ. ꓙꓰ ꓥˍ ꓟꓲ꓾ ꓢꓲ ꓒ ꓠꓬ ꓣꓳ ꓔꓯ ꓟꓽ ꓟꓲ ꓡꓰ,꓿ ꓣꓳ ꓔꓯ ꓬꓲ ꓢꓷ.ˍ ꓟ ꓥ ꓢꓲ ꓮ ꓕꓯ ꓟꓲ ꓣꓳ ꓔꓯ ꓘꓴ ꓔꓬ ꓟ ꓥ ꓡꓳ꓿
ꓬꓳ‐ꓦ ꓕꓳꓽ ꓶ 10ꓽ28 ꓗꓪ꓾ “ꓥꓪ ꓡꓰ ꓬꓲ ꓪ ꓔꓯ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶ ꓢꓲ꓾ ꓬꓲ ꓪ ꓠꓬ ꓮ ꓕꓯˍ ꓟꓲ ꓟꓽ ꓟꓶꓽ ꓬꓰ ꓢꓲ ꓠꓬꓲ꓾ ꓮ ꓟˍ ꓟꓲ ꓥꓪ ꓡꓯ ꓒꓯ, ꓗꓪ ꓐꓰ ꓬꓲ ꓪ ꓔꓯ ꓦꓴ ꓔꓯ, ꓙꓰ ꓟꓽ ꓐ ꓡ꓾” ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓢꓯꓼ ꓪ ꓖꓶ ꓔˍ ꓟˍ ꓟꓲ ꓙꓳˍ ꓡꓳ꓿
ꓟꓲ ꓠꓯ ꓕꓱ ꓟ ꓠꓬ ꓮ ꓫꓵꓽ ꓕꓲ ꓙꓰꓽ ꓥˍ ꓟꓲ ꓟꓽ ꓕꓶ ꓞ, ꓐꓯ ꓥ ꓟꓲ꓾ ꓢꓲ ꓒ ꓡꓰ ꓖꓶˍ ꓟ ꓢꓯꓼ ꓟꓬ ꓠꓽ ꓟꓽ ꓟꓶꓽ ꓬꓰ꓿ ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓐꓱ ꓶ ꓪꓴꓽ ꓓꓰˍ ꓟ ꓙꓵꓻ ꓠꓲ, ꓕꓲ ꓟ ꓠꓬ꓾ “ꓢꓲ ꓒ ꓡꓯ ꓒꓯ, ꓗꓪ ꓥꓪ ꓔꓬ ꓡꓳ” ꓐꓯˍ ꓟ ꓔꓯ ꓙꓵꓻ ꓔ ꓠ ꓗ, ꓡꓳ꓿
ꓕꓲ ꓖ ꓕꓲ ꓧꓪ, ꓣꓳ ꓤꓶꓻ ꓠꓯꓸꓼ ꓗꓪ ꓙꓳꓺ ꓓꓴ ꓛꓱꓽ ꓓꓴ ꓔꓯ ꓔꓳ, ꓜꓳꓽ ꓪˍ ꓥꓳ꓿ ꓖꓳ ꓡꓱ ꓥˍ ꓟꓲ ꓢꓲ ꓒ ꓡꓯ ꓒꓯ, ꓗꓪ ꓔꓬ ꓢꓴ ꓔꓯ ꓮ ꓡꓲ ꓕꓲ ꓫꓵꓽ ꓥˍ ꓟꓲ ꓦꓴ ꓔꓯ, ꓙꓰ ꓟꓽ ꓐ ꓡ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓢꓲ ꓒ ꓬꓲ ꓢꓯꓼ ꓔꓯ ꓑ ꓙꓽ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓠꓬ ꓬꓲ ꓡꓯ ꓒꓯ, ꓠꓯꓸꓼ ꓗꓪ ꓙꓳꓺ ꓛꓱꓽ ꓓꓴ ꓟꓽ ꓙꓳ꓾ ꓣꓳ ꓔꓯ ꓬꓲ ꓠꓬꓲ ꓙ ꓔꓬ ꓡꓳ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓡ ꓔꓬ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓢꓲ ꓒ ꓬꓲ ꓢꓯꓼ ꓔꓯ ꓑ ꓙꓽ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓠꓬ ꓬꓲ ꓡꓯ ꓒꓯ, ꓠꓯꓸꓼ ꓗꓪ ꓙꓳꓺ ꓛꓱꓽ ꓓꓴ ꓟꓽ ꓙꓳ꓾ ꓣꓳ ꓔꓯ ꓬꓲ ꓠꓬꓲ ꓙ ꓔꓬ ꓡꓳ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓡ ꓔꓬ ꓡꓳ꓿
