ECECCD (Early Childhood Care and Development) ꓢꓳ ꓜꓲꓼ ꓓꓴ ꓬꓰ ꓓꓳ ꓡꓰ ꓟ ꓓꓳꓽ
ꓟꓲ‐ꓚꓲ‐ꓠ ꓫꓱ. ꓤ ꓟꓬꓱꓽ ꓬꓰ ꓜꓴ (KMSS-Myitkyina) ꓡꓰ ꓧꓳꓽ ꓪꓴ. ꓟꓳ ꓢꓲ ꓠꓬꓲ ꓬꓰˍ ꓟ ECCD ꓢꓳ ꓜꓲꓼ ꓓꓴ ꓠꓬ꓾ ꓠꓬꓲ. ꓠꓬꓲ (4.24.2026 ꓗꓪ ꓬꓰ ꓓꓳ ꓡꓰꓳ꓿ ꓢꓳ ꓜꓲꓼ ꓓꓴ ꓕꓱ ꓟ ꓔꓯ ꓠꓬ ꓟꓲ‐ꓚꓲ‐ꓠ ꓡꓳ ꓒꓱ ꓮꓴꓠꓖ‐ꓠꓮꓠG ꓗꓪ ꓙꓳˍ ꓟ ꓙꓲꓻ ꓫꓬ ꓢꓴ ꓚꓳꓡꓴꓟꓐꓮꓠ ꓤ ꓑ ꓤ ꓐꓴ ꓔꓬ ꓔꓶ. ꓗꓪ ꓬꓰˍ ꓟ ꓥ ꓡꓳ꓿
ECCD ꓢꓳ ꓜꓲꓼ ꓓꓴ ꓡꓳ, ꓬꓰ ꓑꓮꓲꓽ ꓗꓪ ꓔꓲꓺ ꓒ ꓐꓴ ꓐꓰ ꓟ. ꓒ ꓟ. ꓟ ꓐꓴ ꓡꓰ꓾ ꓤ ꓠꓱ ꓤ ꓔꓯ ꓟ. ꓖꓶꓽ ꓗꓪꓼ ꓫꓵꓼ ꓚꓱ, ECCD(ꓞꓲꓼ ꓣꓳˍ ꓟ ꓤ ꓠꓱ ꓤ ꓐꓴ ꓔꓯ ꓟ. ꓖꓶˍ ꓟ) ꓚꓱ, ꓐꓰ ꓗꓴ. ꓙꓲꓽ ꓙꓳ ꓢꓲ ꓤ ꓠꓱ ꓤ ꓐꓴ ꓔꓯ ꓮ ꓡꓲ ꓬꓰ ꓢꓲ ꓟ. ꓖꓶ ꓠ ꓔ ꓟ꓾ ꓠꓵꓻ ꓠꓲ, ꓡꓰ ꓟ. ꓖꓶ ꓠ ꓔ ꓟ ꓔꓯ ꓐꓯ ꓟ. ꓖꓶ ꓗꓷ ꓢꓲ ꓠꓬꓲ꓾ ꓬꓲ ꓪ ꓐꓴ ꓔꓯ ꓢꓯꓼ ꓖꓶꓽ ꓘꓶꓽˍ ꓟꓲ ꓫ. ꓕꓱ ꓗꓷꓳ꓿
ꓢꓳ ꓜꓲꓼ ꓓꓴ ꓦꓬꓼ ꓠꓬꓲ ꓠꓬ 3 ꓦ 25 ꓠꓬꓲ ꓗꓪ ꓐꓰ 4 ꓦ 24 ꓠꓬꓲ ꓗꓪ ꓛꓲ꓾ ꓦ ꓐ ꓕꓲꓽ ꓟ ꓥ ꓢꓲ ꓠꓬꓲ꓾ ꓢꓳ ꓜꓲꓼ ꓓꓴ ꓠꓯꓸꓼ ꓗꓪ ꓢꓷ. ꓠꓲ, ꓢꓳ ꓙꓵ, ꓟꓽ ꓛꓲ ꓡ ꓢꓰꓽ ꓟ ꓞꓲꓼ ꓮ ꓘꓶ. ꓣꓳˍ ꓟ ꓤ ꓠꓱ ꓤ ꓐꓴ ꓔꓯ ꓮ ꓡꓲ ꓐꓰ ꓠꓲ, ꓟ ꓫꓵ ꓢꓲ ꓗꓪꓼ ꓫꓵꓼ ꓠꓯ, ꓟ꓾ ꓮ ꓡꓲ ꓟ. ꓖꓶ ꓠ, ꓟ ꓐꓰ꓾ ꓤ ꓠꓱ ꓤ ꓐꓴ ꓔꓯ ꓟ. ꓖꓶˍ ꓟ ꓔꓯ ꓚꓲ. ꓟꓶ ꓠ, ꓟ꓾ ꓤ ꓠꓱ ꓤ ꓐꓴ ꓗ, ꓛꓲꓽ ꓠ ꓮ ꓡꓲ ꓫꓵꓽ ꓚꓱ, ꓗꓪ ꓐꓰ ꓟ. ꓖꓶ ꓠ, ꓟ ꓐꓴ ꓔꓯ꓾ ꓢꓳ ꓣꓴ ꓪˍ ꓟ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓢꓳ ꓜꓲꓼ ꓓꓴ ꓕꓱ ꓟ ꓗꓪ ꓠꓬ ꓔꓲꓺ ꓒ ꓙꓵꓽ ꓔꓶ. (13) ꓟ ꓗꓪ ꓐꓰ ꓡˍ ꓟ ꓟ. ꓒ ꓟ. ꓟ ꓐꓴ ꓡꓰ ꓢꓳ ꓣꓴ ꓡ ꓟ ꓥ ꓢꓲ ꓠꓬꓲ꓾ ꓮ ꓙꓵꓽ ꓠꓬ (48) ꓣꓳ ꓛꓲ ꓙꓳˍ ꓟ ꓥ ꓡꓳ꓿
