ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓧꓪ. ꓧꓪ.꓿ ꓣꓳ ꓤꓶꓻ ꓗꓪ ꓮ ꓡꓲ ꓕꓲ ꓫꓵꓽ꓾ ꓮ ꓫꓵꓽ ꓕꓲ ꓚꓱ, ꓗꓪ ꓓꓵꓽ ꓙꓽ ꓠꓬꓲˍ ꓥ ꓟꓲ ꓠꓲ, ꓟ ꓙꓬ ꓝꓲ ꓝꓲ꓾ ꓠꓲ, ꓟ ꓘꓴꓽ ꓗꓪ ꓢꓯꓼ ꓟꓽ ꓙꓳ꓾ ꓡꓯꓼ ꓙꓴꓽ ꓟꓽ ꓙꓳ꓿ ꓮ ꓡꓲ ꓓꓵꓽ ꓙˍ ꓥ ꓟꓲ ꓡꓱ. ꓙꓰ ꓠ. ꓠ. ꓡꓰꓽ ꓕꓱ ꓡꓱ ꓫꓵꓽ ꓦꓬꓼ ꓠꓬꓲ ꓔꓳ, ꓜꓳꓽ ꓠꓬꓲˍ ꓡ꓿ ꓔꓽ ꓪꓴꓽ ꓖꓴ ꓔꓯ ꓮ ꓡꓲ ꓓꓵꓽ ꓙˍ ꓥ ꓟꓲ ꓟꓽ ꓓꓳ ꓡ ꓫꓵꓽ꓾ ꓪꓴꓽ ꓧꓶ ꓓꓴˍ ꓡꓰꓽ ꓓꓳ ꓡˍ ꓫꓵꓽ꓾ ꓢꓯꓼ ꓐꓽ ꓓꓴˍ ꓡꓰꓽ ꓓꓳ ꓡˍ ꓫꓵꓽ ꓦꓬꓼ ꓠꓬꓲ ꓠꓴ ꓤꓶꓻ ꓗꓪ ꓔꓳ, ꓜꓳꓽ ꓠꓬꓲˍ ꓡ꓿ ꓕꓱ ꓡꓱ ꓐꓰ ꓔꓳ, ꓜꓳꓽ ꓠꓬꓲˍ ꓕꓯ ꓡꓴ‐ꓘ ꓕꓳꓽ ꓶ 24ꓽ13‐35 ꓗꓪ ꓵ ꓠꓬꓲ꓿ ꓟ. ꓟꓲꓽ ꓕꓱ ꓟ ꓠꓬ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿
ꓮ ꓫꓵꓽ ꓬꓲ ꓚꓱ, ꓥˍ ꓐꓯ ꓠꓬ ꓝꓲ ꓓꓴ ꓠꓬꓲꓽ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓫꓵꓻ ꓘꓪꓽ ꓡꓰ ꓗ ꓠꓯ. ꓬꓲ‐ꓟ‐ꓪꓴ‐ꓢꓶ ꓟꓬꓱ ꓔ ꓟ ꓘ, ꓗꓪ ꓙ ꓖꓴ ꓫꓱꓽ ꓙꓰˍ ꓡꓳ꓿ ꓬꓲ ꓪ ꓠꓬ ꓠꓲ, ꓟ ꓫ. ꓠꓬꓲ ꓒꓬꓱꓽ ꓟꓬ ꓗꓪ ꓠꓬ ꓗ, ꓛꓲꓽˍ ꓟ ꓒꓬꓱꓽ ꓠꓽ ꓟꓽ ꓙꓳ꓿ ꓗꓴ ꓗꓴ ꓡꓰꓽ ꓙꓰ ꓢꓲ ꓠꓬꓲ ꓫ. ꓕꓱ ꓢꓲ ꓙꓰ ꓔꓬ ꓡꓳ꓿ ꓕꓱ ꓡꓱ ꓐꓰ ꓙꓰ ꓔꓬ ꓟ ꓗꓪ ꓘꓳ ꓗꓳ. ꓡ ꓟ ꓦꓬꓼ ꓠꓬꓲ ꓚꓱ, ꓔꓯ ꓬꓲ ꓪ ꓖꓪ ꓙꓱ ꓡꓯ ꓘꓳ ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓪ ꓠꓬ ꓮ ꓡꓲ ꓐꓰ ꓥꓳ ꓡꓳ. ꓔꓬ ꓟ꓾ ꓬꓲ ꓪ ꓥꓳ ꓡꓳ. ꓔ ꓟ ꓡꓰ ꓟꓽ ꓒꓬꓱꓼ ꓡ ꓟ꓾ ꓬꓲ ꓪ ꓥꓳ ꓡꓳ. ꓔ ꓟ ꓡꓰ ꓬꓲ ꓪ ꓔꓯ ꓣꓳ‐ꓟ ꓡꓯ ꓒꓯ, ꓗꓪ ꓐꓰ ꓫꓴ, ꓣꓴ ꓢꓴ ꓟꓽ ꓥ ꓟ ꓚꓱ, ꓔꓯ ꓠꓲ, ꓟ ꓫ. ꓫ. ꓡꓰꓽ ꓐꓯ ꓔꓬ ꓡꓳ꓿
ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓞꓼ ꓐꓰ ꓬꓲ ꓪ ꓟꓲꓽ ꓙꓬ ꓗꓪ ꓡˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓪ ꓠꓬ ꓢꓲ ꓒ ꓬꓰ‐ꓢꓴ ꓥ ꓟ ꓚꓬ, ꓟꓽ ꓪ꓿ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓪ ꓔꓯ ꓠꓴ ꓪ ꓮ ꓫꓵꓽ ꓖꓪ ꓙꓱ ꓡꓯ ꓘꓳ ꓔꓬ ꓡ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓪ ꓠꓬꓲꓽ ꓫꓵ. ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓢꓲ ꓒ ꓬꓰ‐ꓢꓴ ꓥ ꓟ ꓟꓽ ꓚꓬ, ꓪ꓿ ꓮ ꓟꓶ ꓕꓱ ꓕꓲ ꓫꓬ. ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴ ꓓꓽ ꓟ ꓕꓱ ꓟ ꓟꓽ ꓢꓷ. ꓢꓴ ꓠꓬ ꓠꓴ ꓕꓲ ꓣꓳˍ ꓡꓰ ꓥ ꓐꓷ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪ ꓠꓬꓲꓽ ꓫꓵ. ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓱꓽ ꓠꓱꓽ ꓟ. ꓖꓶˍ ꓡꓳ꓿ ꓮ ꓡꓲ ꓐꓰ ꓬꓲ ꓪ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓥꓳ ꓡꓳ. ꓔ ꓟ꓾ ꓬꓲ ꓪ ꓥꓳ ꓡꓳ. ꓔ ꓟ ꓡꓰ ꓟꓽ ꓒꓬꓱꓼ ꓡ ꓟ ꓐꓯ ꓟꓳ. ꓖꓶˍ ꓡꓳ꓿
ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓞꓳ ꓜꓲꓽ ꓐꓴꓳ꓾ ꓮ ꓫꓵꓽ ꓑꓶ. ꓓꓴ ꓟꓷꓽ ꓠꓷ, ꓝ. ꓢꓴ ꓐꓯ ꓔ ꓟ ꓔꓯ ꓟꓽ ꓙꓵꓻ ꓡ꓿ ꓚꓬꓴ. ꓢꓲ ꓒ ꓙꓲ‐ꓢꓴ ꓖꓳ ꓕꓲ ꓣꓳ ꓠꓬ ꓒ‐ꓡꓲ‐ꓢꓷ ꓐꓴ꓾ ꓟ. ꓟꓲꓽ ꓢꓷ. ꓢꓴ ꓡꓯ ꓒꓯ, ꓗꓪ ꓫꓵꓻ ꓪˍ ꓥꓳ꓾ ꓐꓰ ꓐꓳ ꓔ ꓟ ꓟꓽ ꓢꓷ. ꓡ꓾ ꓐꓰ ꓟ. ꓟꓲꓽ ꓕꓲ ꓔꓳ. ꓗ ꓠꓯ. ꓕꓲ ꓔꓳ. ꓒꓶ ꓟ. ꓖꓶˍ ꓡꓳ꓿ ꓕꓱ ꓡꓱ ꓐꓰ ꓕꓲ ꓔꓳ. ꓗ ꓠꓯ. ꓕꓲ ꓔꓳ. ꓒꓶ ꓟ. ꓖꓶˍ ꓕꓯ ꓬꓲ ꓪ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓮ ꓔꓳ.ˍ ꓡꓰ ꓐꓰ ꓗꓷ ꓡꓰˍ ꓡꓳ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ꓿
ꓖꓳ ꓕꓯ ꓟꓶ ꓘꓶꓽ ꓟꓰ ꓡ ꓕꓯ ꓝꓲ ꓓꓴ ꓠꓬꓲꓽ ꓣꓳ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓘꓴˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓔꓯ ꓙ ꓙꓰˍ ꓐꓰ ꓬꓰˍ ꓕꓯ ꓗꓪ ꓛꓳꓽꓳ꓾ ꓠꓬꓲ. ꓟꓶ ꓘꓶꓽ ꓠꓬ ꓮ ꓘꓶ. ꓟꓰ ꓬꓰꓳ꓿ ꓥꓪ ꓠꓴꓽ ꓐꓰ ꓕꓲ ꓡꓰ, ꓔꓬ ꓡꓯ꓾ ꓐꓰ ꓘꓴˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓥˍ ꓟꓲ ꓬꓲ ꓪ ꓐꓰ ꓕꓲ ꓡꓰ, ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓑ ꓑ ꓔꓯ ꓣꓴ ꓢꓲ ꓠꓬꓲ ꓦꓶ ꓗꓷ ꓢꓲ ꓠꓬꓲ ꓶꓼ ꓥꓳꓽ ꓙꓱꓽ ꓖꓶˍ ꓡꓳ꓿ ꓖꓳ ꓡꓱ ꓢꓲ ꓠꓬꓲ ꓬꓲ ꓪ ꓔꓯ ꓖꓶˍ ꓡꓳ꓿
ꓕꓱ ꓡꓱ ꓑ ꓑ ꓔꓯ ꓦꓶ ꓢꓲ ꓶꓼ ꓥꓳꓽ ꓙꓱꓽ ꓖꓶˍ ꓕꓯ ꓬꓲ ꓪ ꓠꓬꓲꓽ ꓫꓵ. ꓟꓬ ꓢꓶꓽ ꓠꓬ ꓒꓴ ꓡ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓥ ꓟ ꓔꓯ ꓡꓳ. ꓟꓳ ꓡꓰꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓟꓲꓽ ꓙꓬ ꓗꓪ ꓟꓶꓽ ꓬꓰˍ ꓡꓳ꓿ ꓬꓲ ꓪ ꓠꓬꓲꓽ ꓫꓵ. ꓠꓬ ꓮ ꓘꓶ. ꓗ, ꓛꓲꓽ ꓠꓬꓲ ꓖꓳ ꓕꓲ ꓦꓬ ꓖꓳ ꓗꓪ ꓟꓽ ꓬꓲꓼ ꓔ ꓔ ꓐꓰ ꓝꓲ ꓓꓴ ꓐꓴ ꓔꓬ ꓗꓪ ꓔꓷ, ꓙꓰˍ ꓟ ꓔꓯ ꓣꓳ ꓑ ꓙꓽˍ ꓡꓳ꓿ ꓬꓲ ꓪ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓐꓯ ꓡꓯ ꓘꓳ ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓢꓲꓽ ꓫꓬ ꓕꓳ ꓶ ꓒꓶ ꓟꓳ. ꓖꓶˍ ꓕꓯ ꓣꓳ ꓠꓲ, ꓟ ꓠꓬ ꓮ ꓔꓳ.ˍ ꓡꓰ ꓐꓰ ꓗꓷ ꓡꓰˍ ꓡꓳ ꓟꓽ ꓥ ꓡ ꓐꓰ ꓐꓯ ꓡꓯ ꓘꓳˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓣꓳ ꓮ ꓫꓵꓽ ꓡꓳ. ꓟꓳˍ ꓡ ꓐꓰ ꓐꓯˍ ꓠꓬ ꓝꓲ ꓓꓴ ꓖꓳ ꓠꓬꓲꓽ ꓣꓳ ꓟ ꓠꓬ ꓬꓲ ꓪ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓠꓲ, ꓟ ꓫ. ꓓꓴ ꓓꓳ ꓡˍ ꓡꓳ꓿ ꓬꓲ ꓪ ꓕꓲ ꓤꓶꓻ ꓡꓱꓸꓼ ꓚꓬꓴ. ꓢꓲ ꓒ ꓥꓳ ꓐꓱ ꓓꓵꓽ ꓙꓽ ꓔˍ ꓟ ꓢꓲ ꓒ ꓬꓰ‐ꓢꓴ ꓬꓲ ꓪ ꓮ ꓙꓵꓽ ꓔꓯ ꓡꓳ ꓒꓰ, ꓢꓲ ꓠꓬꓲ ꓖꓼ ꓛꓳ ꓗꓷ ꓟ ꓢꓲ ꓒ ꓬꓰ‐ꓢꓴ ꓠꓬ ꓢꓴ ꓡꓰ ꓢꓰꓼ ꓗꓷ ꓟ ꓟꓶ ꓡꓰꓳ꓾ ꓠꓲ, ꓫ ꓔꓬ ꓡꓳ꓾ ꓠꓲ, ꓥꓴ ꓔꓬ ꓡꓳ꓾ ꓢꓯꓼ ꓐꓽ ꓔꓬ ꓡꓳ꓾ ꓪꓴꓽ ꓧꓶ ꓔꓬ ꓡꓳ꓿
ꓢꓲ ꓒ ꓬꓲ ꓬꓰ‐ꓢꓴ ꓐꓯ ꓘꓶꓽ ꓥ ꓟ ꓢꓽ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓬꓲ ꓢꓯ. ꓬꓲꓼ ꓡˍ ꓥꓳ꓾ ꓐꓯˍ ꓟ ꓔꓯ ꓬꓲ ꓪ ꓚꓲ. ꓟꓽ ꓟꓶ꓿ ꓬꓲ ꓪ ꓚꓬ, ꓟꓽ ꓪ꓿ ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓫꓵꓳ꓾ ꓐꓰ ꓓꓵꓽ ꓙꓽ ꓔ ꓟ ꓑꓶ. ꓓꓴ ꓠꓲ, ꓫ. ꓔꓬ ꓫꓵꓽ ꓥ ꓡꓳ꓿ ꓮ ꓡꓲ ꓓꓵꓽ ꓙꓽˍ ꓥ ꓟꓲ ꓢꓯꓼ ꓟꓽ ꓙꓳ꓿ ꓗꓳ. ꓙꓰ ꓟ ꓦꓬꓼ ꓠꓬꓲ ꓗꓪ ꓐꓰ ꓬꓲ ꓪ ꓠꓬ ꓡꓲ, ꓗꓷ ꓟꓽ ꓐ ꓡ꓿ ꓣꓳ ꓤꓶ ꓗꓪ ꓥˍ ꓟꓲ ꓕꓲ ꓖ ꓕꓲ ꓧꓪ, ꓢꓲ ꓒ ꓬꓰ‐ꓢꓴ ꓠꓬ ꓢꓯ. ꓬꓲꓼ ꓡ ꓟ ꓣꓳ ꓟꓽ ꓢꓷ.꓿ ꓣꓳ ꓤꓶꓻ ꓗꓪ ꓥˍ ꓟꓲ ꓕꓲ ꓖ ꓕꓲ ꓧꓪ, ꓢꓲ ꓒ ꓬꓰ‐ꓢꓴ ꓠꓬ ꓫꓵˍ ꓟ ꓗꓪ ꓐꓰ ꓝꓮꓲ ꓢꓯ. ꓬꓲꓼ ꓡ ꓟ ꓚꓬ, ꓟꓽ ꓪ ꓟ ꓦꓬꓼ ꓠꓬꓲ ꓙꓳ ꓗꓴ.ˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓢꓯ. ꓬꓲꓼ ꓡꓺꓳ ꓐꓯˍ ꓟ ꓚꓬ, ꓟꓽ ꓪ꓿ ꓣꓳ ꓠꓬ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓓꓯ, ꓟ ꓫ. ꓙꓵ ꓟꓶ ꓙꓵ ꓓꓴ꓾ ꓠꓲ, ꓥꓴ ꓓꓴ꓾ ꓓꓵꓽ ꓙꓽ ꓪꓴꓽ ꓧꓶ ꓓꓴ ꓕꓱ ꓟ ꓔꓯ ꓡꓰꓽ ꓓꓵꓽ ꓙꓽ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓢꓯ. ꓬꓲꓼ ꓡ ꓗꓷ ꓟ ꓔꓯ ꓣꓳ ꓟꓲ ꓡꓰ, ꓗꓷ ꓗꓴ.ˍ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓢꓯꓼ ꓖꓶ ꓔꓬ ꓡꓳ꓿
