ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓕꓯꓽ ꓢꓲ ꓗꓪ ꓟ ꓟꓴꓽ ꓗꓪ ꓠꓬ ꓠꓯ. ꓘꓪ ꓟ ꓟꓲ ꓠꓯ ꓐꓰ ꓮ ꓫꓵꓽ ꓗꓴ. ꓙꓲꓽ ꓟꓽ ꓙꓳ꓾ ꓐꓰ ꓐꓯˍ ꓟ ꓟ. ꓟꓲꓽ ꓗꓪ ꓐꓰ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ (ꓬꓳ‐ꓦ 3ꓽ31‐36) ꓗꓪ ꓟ ꓥꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓕꓱ ꓡꓱ ꓐꓯˍ ꓡꓳ꓿ ꓬꓲ ꓠꓽ ꓕꓯꓽ ꓢꓲ ꓗꓪ ꓐꓰ ꓬꓯꓼ ꓡˍ ꓟ ꓥ ꓡꓳ꓿ ꓬꓲ ꓠꓽ ꓟꓲ ꓠꓯ ꓖꓳ ꓟ ꓐꓰ ꓗꓴ. ꓙꓲꓽ ꓟꓽ ꓙꓳ꓿ ꓕꓱ ꓟ ꓑꓶ. ꓓꓴ ꓬꓲ ꓠꓬ ꓟꓴ ꓗꓪ ꓕꓯꓽ ꓢꓲ ꓗꓪ ꓟ ꓬꓯꓼ ꓡ ꓟ ꓮ ꓙꓵꓽ ꓟ ꓕꓯꓽ ꓢꓲ ꓗꓪ ꓪꓴꓽ ꓓꓰ ꓡꓰˍ ꓟ ꓥ ꓡꓳ꓾ ꓐꓰ ꓐꓯˍ ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓟ. ꓖꓶ ꓡ ꓔꓬ ꓟ ꓠꓬ ꓕꓯꓽ ꓢꓲ ꓗꓪ ꓐꓰ ꓡˍ ꓟ ꓥ ꓡꓳ꓿ ꓕꓯꓽ ꓢꓲ ꓗꓪ ꓟ ꓙꓲˍ ꓟ ꓧ. ꓟ ꓮ ꓙꓵꓽ ꓗꓪ ꓐꓰ ꓡꓰꓽ ꓗꓴ. ꓙꓲꓽ ꓙꓳˍ ꓡꓳ꓿ ꓟꓲ ꓠꓯ ꓗꓪ ꓟꓽ ꓙꓲ ꓟ ꓮ ꓙꓵꓽ ꓠꓬ ꓬꓲ ꓐꓰ ꓗꓴ. ꓙꓲꓽ ꓟꓽ ꓙꓳ꓾ ꓐꓰ ꓐꓯˍ ꓟ ꓟ. ꓟꓲꓽ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓘꓳ ꓣꓴ ꓔꓬ ꓟ ꓠꓬ ꓣꓳ ꓠꓽ ꓕꓯꓽ ꓢꓲ ꓗꓪ ꓟ ꓔꓯ ꓥꓳ ꓡꓳ. ꓓꓴ ꓥꓳ꓿ ꓣꓳ ꓠꓽ ꓕꓯꓽ ꓢꓲ ꓗꓪ ꓟ ꓡˍ ꓟ ꓪꓴ‐ꓢ ꓗꓪ ꓐꓰ ꓡˍ ꓟ ꓑꓶ. ꓓꓴ ꓣꓳ ꓠꓬ ꓪꓴ‐ꓢ ꓐꓰ ꓗꓴ. ꓙꓲꓽ ꓙꓳˍ ꓟ꓾ ꓕꓯꓽ ꓢꓲ ꓟꓴ ꓗꓪ ꓗꓪ ꓙꓳˍ ꓟ ꓮ ꓙꓵꓽ ꓐꓰ ꓗꓴ. ꓙꓲꓽ ꓙꓳˍ ꓡꓳ꓿ ꓟꓲ ꓠꓯ ꓗꓪ ꓟꓽ ꓙꓲꓻ ꓥꓶˍ ꓟ ꓢ‐ꓓꓯ ꓟꓬꓱꓽ ꓐꓰ ꓗꓴ. ꓙꓲꓽ ꓟꓽ ꓙꓳ ꓟ ꓥ ꓡꓳ꓾ ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓠꓬꓲ. ꓠꓬꓲ ꓔꓯꓺ ꓥꓳꓽ ꓕꓱ ꓟ ꓢꓲ ꓒ ꓬꓰ‐ꓢꓴ ꓐꓯˍ ꓟ ꓠꓬ ꓮ ꓪꓯꓼ ꓠꓬ ꓮ ꓣꓳ ꓒꓬꓱꓼ ꓡ ꓟꓽ ꓓ꓾ ꓮ ꓣꓳ ꓥˍ ꓟꓲ ꓮ ꓪꓯꓼ ꓒꓬꓱꓼ ꓡ ꓟꓽ ꓓ꓿ ꓐꓯ ꓪˍ ꓠꓬ ꓮ ꓣꓳ ꓠꓽ ꓡ. ꓑ. ꓦꓯ. ꓟ ꓔꓯ꓾ ꓥ ꓠꓬ꓾ ꓟꓽ ꓙꓲꓻ ꓟ ꓔꓯ ꓮ ꓣꓳ ꓠꓬ ꓟꓽ ꓠꓵꓻ ꓟ ꓥ ꓡꓳ꓿ ꓮ ꓪꓯꓼ ꓠꓽ ꓟꓽ ꓙꓲꓻ ꓟ ꓬꓲꓻ ꓙꓬ꓾ ꓟꓽ ꓙꓲꓻ ꓟ ꓡ. ꓑ. ꓔꓯ ꓮ ꓘꓶ. ꓠꓲ, ꓠꓵˍ ꓡꓳ꓿ ꓖꓳ ꓟ ꓑꓶ. ꓓꓴ ꓟꓽ ꓙꓲꓻ ꓟ ꓔꓯ ꓠꓲ, ꓠꓵˍ ꓟ ꓠꓬ ꓮ ꓪꓯꓼ ꓥ ꓡꓳ꓿ ꓙꓲꓻ ꓫꓬˍ ꓟ ꓔꓯ ꓠꓲ, ꓠꓵˍ ꓟ ꓠꓬ ꓮ ꓣꓳ ꓥ ꓡꓳ꓿
ꓕꓱ ꓟ ꓕꓲ ꓡꓰˍ ꓥꓳ ꓣꓳ ꓠꓬ ꓮ ꓪꓯꓼ ꓡꓰ ꓐꓰ ꓟꓽ ꓙꓲꓻ ꓟ꓾ ꓠꓲ, ꓒꓳ ꓓꓴ꓾ ꓟꓽ ꓙꓲꓻ ꓟ ꓔꓯ ꓠꓲ, ꓠꓵˍ ꓥꓳ ꓐꓯˍ ꓠꓬ ꓣꓳ ꓠꓬ ꓮ ꓣꓳ ꓤ ꓒꓬꓱꓼ ꓡ ꓟꓽ ꓓ꓿ ꓕꓱ ꓟ ꓑꓶ. ꓓꓴ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓟꓽ ꓙꓲ ꓟꓽ ꓜꓳꓽ ꓖꓴꓽ ꓙꓴꓽ ꓔꓯˍ ꓡꓰꓽ ꓠꓲ, ꓥꓳ ꓔꓬ ꓥꓳ ꓐꓯˍ ꓠꓬ ꓣꓳ ꓠꓬ ꓕꓯꓽ ꓢꓲ ꓗꓪ ꓟ ꓪꓴ‐ꓢ ꓐꓰ ꓗꓴ. ꓙꓲꓽ ꓙꓳˍ ꓟ ꓒꓬꓱꓼ ꓡ ꓟꓽ ꓓ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ꓾ ꓣꓳ ꓠꓽ ꓕꓯꓽ ꓢꓲ ꓗꓪ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓟꓽ ꓙꓲꓻ ꓟ ꓐꓰ ꓣꓳ ꓠꓬ ꓗꓴ. ꓙꓲꓽ ꓟꓽ ꓙꓳ꓿ ꓕꓱ ꓟ ꓑꓶ. ꓓꓴ ꓟꓲ ꓠꓯ ꓗꓪ ꓟ ꓟꓽ ꓙꓲ ꓟ ꓔꓯ ꓠꓴ ꓪ ꓠꓲ, ꓠꓵˍ ꓥꓳ ꓐꓯ ꓠꓬ ꓟꓲ ꓠꓯ ꓗꓪ ꓟꓽ ꓙꓲꓻ ꓟ ꓚꓲ. ꓛꓬ ꓟꓽ ꓙꓲꓻ ꓟ ꓐꓱ ꓶˍ ꓡꓰꓽ ꓒꓬꓱꓼ ꓬꓰˍ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓬ ꓕꓯꓽ ꓢꓲ ꓗꓪ ꓟ ꓔꓯ ꓥꓳ ꓡꓳ. ꓓꓴ ꓥꓳ꓿ ꓕꓯꓽ ꓢꓲ ꓗꓪ ꓟ ꓔꓯ ꓧꓪ ꓓꓴ ꓥꓳ꓿ ꓕꓯꓽ ꓢꓲ ꓗꓪ ꓟ ꓟꓬꓱꓽ ꓣꓳ ꓬꓰ ꓓꓴ ꓥꓳ꓾ ꓐꓯˍ ꓟ ꓟ. ꓟꓲꓽ ꓝꓲ. ꓥ ꓡꓳ꓿
