ꓢꓲ ꓡꓲ ꓗ, ꓛꓲꓽˍ ꓟ ꓠꓯꓼ ꓠꓯꓼ ꓙꓵ, ꓗꓪ ꓮ ꓙꓵꓽ ꓔꓯ ꓧꓪꓸ ꓧꓪꓸꓼ꓾ ꓠꓬꓲ. ꓠꓬꓲ ꓠꓯꓼ ꓗꓪ ꓣꓳ ꓐꓱ ꓶ ꓪꓴ‐ꓢ ꓡꓰ ꓖꓶ ꓔˍ ꓟ ꓙꓲˍ ꓟ ꓓꓳꓽ ꓔꓯ (ꓬꓳ‐ꓦ 3ꓽ7‐15) ꓗꓪ ꓟꓳꓻ ꓪ ꓓˍ ꓡꓳ꓿
ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓠꓲ‐ꓘꓳ‐ꓓꓲ‐ꓟꓴ ꓔꓯ “ꓠꓴ ꓠꓽ ꓫꓬ, ꓦꓵꓻ ꓠ ꓗ, ꓢꓰꓽ ꓡꓳ” ꓐꓰ ꓐꓯˍ ꓡꓳ꓿ ꓕꓱ ꓗꓪ “ꓬꓲ ꓫꓵꓼ ꓫꓬ, ꓦꓵꓻˍ ꓟ” ꓐꓯˍ ꓟ ꓠꓬ ꓖꓳ ꓓꓱꓽ ꓝꓮꓲ ꓕꓲ ꓧꓪ, ꓬꓲ ꓫꓵꓼ ꓦꓵꓻ ꓡˍ ꓟ ꓟꓽ ꓥ ꓥ꓾ ꓢꓲꓽ‐ꓫꓬ‐ꓟ‐ꓦ ꓗꓪ ꓐꓰ ꓒꓳ, ꓡꓶ. ꓗꓷˍ ꓟ ꓔꓯ ꓐꓯ ꓠꓲ, ꓫꓵˍ ꓟ ꓥ ꓡꓳ꓿
ꓣꓳ ꓤꓶꓻ ꓗꓪ ꓕꓲ ꓧꓪ, ꓧꓪ, ꓗꓪ ꓣꓳ ꓬꓰ ꓗꓳ. ꓗꓷ ꓟ ꓥꓳꓽ ꓡꓰ ꓛꓬ ꓡꓰ ꓟ꓾ ꓠꓻ ꓙꓵ ꓗꓷ ꓟ꓾ ꓠꓲ, ꓟ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶˍ ꓟ ꓕꓱ ꓡꓱ ꓫꓵꓽ ꓑꓶ. ꓓꓴ ꓣꓳ ꓠꓬ ꓮ ꓕꓯ ꓟꓲ ꓒꓳ, ꓡꓶ. ꓗꓷ ꓟꓽ ꓐ ꓡꓺꓳ꓾ ꓐꓰ ꓓꓵꓽ ꓙꓽ ꓟꓶ ꓗꓴ.ˍ ꓡꓳ꓿
ꓖꓳ ꓡꓱ ꓥˍ ꓟꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓡꓳ꓿ “ꓫꓬ, ꓦꓵꓻ ꓠ ꓗ, ꓢꓰꓽ ꓡꓳ” ꓐꓰ ꓐꓯ ꓖꓶ ꓡ ꓔꓬ ꓡꓳ꓿
ꓢꓲꓽ‐ꓫꓬ‐ꓟ‐ꓦ ꓡꓰ ꓣꓳ ꓔꓯ ꓣꓳ ꓠꓯꓸꓼ ꓗꓪ ꓐꓰ ꓬꓲ ꓫꓵꓼ ꓝꓮꓲ ꓫꓬ, ꓔꓱ, ꓖꓶ ꓐ ꓡˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓟꓲꓽ ꓦꓲ ꓔꓯꓺ ꓥꓳꓽ ꓣꓱꓽ ꓢꓲ ꓐꓯ ꓖꓶ ꓡˍ ꓡꓳ꓿ ꓟꓲꓽ ꓦꓲ ꓠꓬ ꓮ ꓡꓲ ꓗꓪ ꓐꓰ ꓡˍ ꓟ ꓐꓰ ꓮ ꓡꓲ ꓗꓪ ꓙꓱꓼ ꓙꓰˍ ꓟ ꓔꓯ ꓟꓽ ꓢꓷ. ꓥˍ ꓟꓲ ꓬꓲ ꓢꓯꓼ ꓔꓯ ꓠꓽ ꓑ ꓙꓽ ꓢꓲ ꓠꓬꓲ꓾ ꓟꓲꓽ ꓦꓲ ꓙꓱꓼ ꓔꓬ ꓟ ꓔꓯ ꓢꓲ, ꓜꓲ ꓓꓵ ꓔꓬ ꓟ ꓔꓯ ꓡꓳ. ꓢꓲ ꓢꓷ. ꓐ ꓡˍ ꓡꓳ꓾ ꓐꓰ ꓐꓯˍ ꓡꓳ꓿
ꓖꓳ ꓟˍ ꓡꓰ ꓐꓰ ꓢꓲꓽ‐ꓫꓬ‐ꓟ‐ꓦ ꓬꓲ ꓟꓬꓱꓽ ꓬꓰ ꓔꓬ ꓟ ꓔꓯ ꓕꓲ ꓖ ꓕꓲ ꓧꓪ, ꓣꓳ ꓟꓬ ꓢꓶꓽ ꓡꓰ ꓟꓳꓻ ꓟꓽ ꓐ ꓡ ꓥˍ ꓟꓲ ꓣꓳ ꓠꓯꓸꓼ ꓗꓪ ꓚꓵ ꓚꓵ ꓟꓬꓱꓽ ꓬꓰ ꓔꓬ ꓡꓳ꓿
ꓟꓳꓻ ꓟꓽ ꓓ ꓟ ꓑꓶ. ꓓꓴ ꓙꓵꓻ ꓠꓲ, ꓟꓽ ꓫꓵ ꓟ ꓦꓬꓼ ꓠꓬꓲ ꓣꓳ ꓠꓯꓸꓼ ꓗꓪ ꓙꓳˍ ꓡꓳ꓿ ꓖꓳ ꓡꓱ ꓥˍ ꓟꓲ ꓙꓵꓻ ꓠꓲ, ꓐꓯˍ ꓟ ꓠꓽ ꓟꓳꓻ ꓓˍ ꓕꓯ ꓡꓰꓽ ꓙꓵˍ ꓟ ꓟꓽ ꓥ꓿ ꓟꓬ ꓢꓶꓽ ꓡꓰ ꓡꓳ. ꓟꓽ ꓟꓳꓻ ꓥˍ ꓟꓲ ꓪꓴ‐ꓢ ꓔꓯ ꓕꓲ ꓖꓳ ꓓꓱꓽ ꓕꓲ ꓶ ꓟꓬ ꓡꓱꓸꓼ ꓙꓵꓻ ꓢꓲ ꓡꓯꓼ ꓙꓱ ꓐ ꓡˍ ꓟ ꓥ ꓡꓳ꓿
ꓬꓰ‐ꓢꓴ ꓡꓰ ꓐꓯˍ ꓡꓳ꓿ “ꓡ‐ꓞꓳ‐ꓮ‐ꓐꓲ ꓔꓯ ꓔꓳ, ꓔꓴˍ ꓟ ꓗꓪ ꓐꓰ ꓙꓵꓻ ꓢꓴ ꓮꓽ ꓟ ꓥˍ ꓟꓲ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶˍ ꓥꓳ” ꓐꓰ ꓐꓯˍ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓗꓪ ꓣꓳ ꓐꓱ ꓶ ꓢꓳ ꓣꓴ ꓓꓴ ꓕꓲ ꓟ ꓠꓬ꓾ ꓙꓵꓻ ꓠꓲ, ꓠꓬ ꓞꓳ ꓤ ꓟꓬ ꓢꓶꓽ ꓡꓰ ꓟꓳꓻ ꓟꓽ ꓓꓻ ꓟ ꓔꓯ ꓘꓳ ꓣꓴˍ ꓟ ꓥ ꓡꓳ꓾ ꓐꓯˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓣꓳ ꓤꓶꓻ ꓗꓪ ꓕꓲ ꓖ ꓕꓲ ꓧꓪ, ꓗꓪ ꓮ ꓫꓵꓽ ꓒꓬꓱꓼ ꓡ ꓓꓴ ꓥ ꓐꓯˍ ꓟ ꓔꓯ ꓔꓷꓼ ꓟꓽ ꓢꓷ. ꓟ ꓙꓵ,꓾ ꓓꓵꓽ ꓙꓽ ꓪꓴꓽ ꓧꓶˍ ꓟ ꓙꓵ, ꓕꓱ ꓡꓱ ꓫꓵꓽ ꓙꓳˍ ꓥˍ ꓟꓲ ꓢꓲꓽ‐ꓫꓬ‐ꓟ‐ꓦ ꓔꓯ ꓙꓵꓻ ꓡꓯ꓿
ꓪꓴ‐ꓢ ꓡꓰ ꓣꓳ ꓤꓶꓻ ꓔꓯ ꓬꓲ ꓫꓵꓼ ꓫꓬ, ꓦꓵꓻ ꓖꓶ ꓐ ꓡˍ ꓡꓳ꓿ ꓠꓬꓲ. ꓠꓬꓲ ꓕꓲ ꓠꓬꓲ ꓡꓱꓸꓼ ꓐꓱ ꓶ ꓙꓵꓻ ꓠꓲ, ꓡꓰ ꓪꓴ. ꓔꓴ ꓢꓲ ꓠꓬꓲ꓾ ꓢꓲꓽ‐ꓫꓬ‐ꓟ‐ꓦ ꓬꓲ ꓧꓳꓽ ꓣꓱꓽˍ ꓟ ꓗꓪ ꓐꓰ ꓙ ꓫꓱꓽ ꓐ ꓡ ꓝꓲ꓿
