ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓗꓪ ꓐꓰ ꓮ ꓕꓯ ꓟꓲ ꓛꓬ ꓡꓰ ꓟꓽ ꓓ ꓟ ꓟ. ꓖꓶ ꓚꓱ, ꓠꓬꓲꓽ ꓚꓱ,
ꓬꓲ. ꓪꓴ. (1) ꓠꓬ ꓙꓵꓻ ꓠꓲ, ꓐꓰ (2) ꓠꓬ ꓞꓳ ꓙꓳ ꓚꓱ, ꓥ ꓡꓳ꓾ ꓝꓮꓲꓔꓧ ꓮꓠꓝ ꓟꓳꓣꓮꓡ ꓥ ꓡꓳ꓿
ꓙꓵꓻ ꓠꓲ, ꓚꓱ, ꓗꓪ ꓠꓬ ꓮ ꓡꓰ ꓫꓵ ꓥ ꓡ? ꓔꓯ ꓥꓳꓽ꓾ ꓐ, ꓐ ꓪꓴ‐ꓢ ꓠꓬ ꓟꓲ ꓠꓯ ꓔꓯ ꓚꓰꓼ ꓢꓴ ꓢꓲ ꓒ ꓥ ꓡꓳ꓾ ꓕꓱ ꓟ ꓔꓯ ꓟꓽ ꓙꓵꓻ ꓟꓽ ꓓ ꓟ ꓥ ꓡꓳ꓿ ꓪꓴ‐ꓢ ꓦ ꓡꓱ ꓢꓴ ꓕꓲꓽ ꓣꓳ ꓥꓳ ꓐꓯ ꓠꓬ ꓙꓵꓻ ꓠꓲ, ꓕꓱ ꓟ ꓔꓯ ꓮ ꓡꓰ ꓥ ꓟꓲ ꓙꓵꓻ ꓪ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓪꓴ‐ꓢ ꓠꓬ 3 ꓣꓳ ꓐꓯ ꓥ ꓟꓲ ꓕꓲꓽ ꓖꓳ ꓓꓱ ꓪꓴ‐ꓢ ꓥ ꓡꓳ꓿ ꓖꓳ ꓟ ꓔꓯ ꓪꓴ‐ꓢ ꓦ ꓡꓱ ꓢꓴ ꓕꓲ ꓣꓳ ꓠꓬ ꓟꓽ ꓙꓵꓻ ꓠꓬ ꓟꓽ ꓓ꓾ ꓕꓱ ꓟ ꓔꓯ ꓟꓽ ꓙꓵꓻ ꓠꓬ ꓬꓲ ꓠꓬ ꓪꓴ‐ꓢ ꓦ ꓡꓱ ꓢꓴ ꓟꓽ ꓥ꓾ ꓕꓱ ꓟ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓥ ꓟꓲ ꓐ,ꓐ ꓪꓴ‐ꓢ ꓡꓰ ꓝꓲ ꓩꓴ ꓗꓷ ꓟ ꓢꓲ ꓒ ꓬꓰ‐ꓢꓴ ꓬꓲ ꓤ ꓔꓲ ꓬꓰ‐ꓢꓴ ꓙꓲ ꓢꓴ ꓚꓬꓴ ꓢꓲ ꓒ ꓥ ꓡꓳ ꓐꓰ ꓕꓱ ꓟ ꓔꓯ ꓟꓽ ꓙꓵꓻ ꓐꓯ ꓠꓬ ꓟꓽ ꓓ ꓟ ꓖꓳ ꓟ ꓑꓶ ꓓꓴ ꓪꓴ‐ꓢ ꓔꓯ ꓙꓵꓻ ꓢꓴ ꓕꓲꓽ ꓣꓳ ꓠꓬ ꓙꓵꓻ ꓠꓲ, ꓗꓪ ꓐꓰ ꓘꓴ ꓜꓲꓼ ꓞꓳ ꓗꓪ ꓐꓰ ꓟ. ꓖꓶ ꓔ ꓟ ꓛꓬ ꓡꓰ ꓟꓽ ꓓ ꓟ ꓙꓵꓻ ꓠꓲ, ꓔꓯ ꓙꓵꓻ ꓪ ꓟ ꓥ ꓡꓳ꓿ ꓕꓱ ꓟ ꓔꓯ ꓝꓮꓲꓔꓧ ꓐꓰ ꓐꓯ ꓟ ꓥ ꓡꓳ꓿
(2) ꓠꓬ ꓟꓳꓣꓮꓡ ꓐꓯ ꓟ ꓥ ꓡꓳ꓾ ꓡ ꓞꓳ ꓕꓲ ꓣꓳ ꓠꓬ ꓮ ꓡꓰ ꓐꓰ ꓞꓳ ꓙꓳ ꓠꓯ, ꓟ꓾ꓔꓯ ꓥꓳꓽ ꓚꓲ ꓛꓬ ꓤ ꓠꓱ ꓔꓯ ꓢꓰꓼ ꓟꓽ ꓓ ꓟ꓾ ꓤ ꓟꓶ ꓤ ꓕꓲꓽ ꓣꓳ ꓠꓬ ꓬꓲ ꓖꓳ ꓓꓱ ꓠꓯꓼ ꓗꓪ ꓤ ꓶ ꓡꓰꓳ꓾ꓖꓳ ꓡꓱ ꓥ ꓟꓲ ꓬꓲ ꓠꓬ ꓤ ꓶ ꓔ ꓟ ꓬꓲ ꓤ ꓠꓱ ꓔꓯ ꓚꓲ ꓛꓬ ꓖꓳ ꓓꓱ ꓒꓬ ꓛꓬ, ꓟ꓾ ꓥ ꓠꓬ ꓬꓲ ꓚꓲ ꓛꓬ ꓤ ꓠꓱ ꓖꓳ ꓟ ꓔꓯ ꓟꓽ ꓠꓵꓻ ꓟ ꓕꓱ ꓟ ꓠꓬ ꓡ ꓞˍ ꓕꓲ ꓣꓳ ꓡꓰ ꓐꓰ ꓞꓳ ꓙꓳ ꓟ ꓟꓽ ꓥ ꓟ ꓑꓶ ꓓꓴ ꓣꓳ ꓘꓴ ꓜꓲꓼ ꓞꓳ ꓗꓪ ꓐꓰ ꓕꓱ ꓞꓳ ꓙꓳ ꓚꓱ, ꓠꓬ ꓟꓽ ꓥ꓾ ꓟꓽ ꓜꓳ꓾ ꓟꓽ ꓙꓲ ꓐꓰ ꓟ. ꓖꓶ ꓟ ꓬꓲ ꓚꓱ, ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓘꓴ ꓜꓲꓼ ꓞꓳ ꓗꓪ ꓐꓰ ꓝꓮꓲꓔꓧ ꓮꓠꓓ ꓟꓳꓣꓮꓡ ꓐꓯ ꓟ ꓙꓵꓻ ꓠꓲ, ꓐꓰ ꓞꓳ ꓙꓳ ꓚꓱ, ꓗꓪ ꓠꓬ ꓮ ꓔꓯ ꓟꓲ ꓛꓬ ꓡꓰ ꓟꓽ ꓓ ꓟ ꓔꓯ ꓟ. ꓖꓶ ꓐꓱ ꓖꓶ_ ꓟ ꓬꓲ. ꓚꓱ, ꓥ ꓡꓳ꓿ ꓕꓱ ꓟ ꓔꓯ ꓣꓳ ꓮ ꓗꓪ ꓐꓰ ꓣꓴ ꓔ ꓡ? ꓟ. ꓟꓲꓽ ꓗꓪ ꓐꓰ ꓣꓴ ꓔ ꓟ ꓥ ꓡꓳ꓿ ꓟ. ꓟꓲꓽ ꓗꓪ ꓐꓰ ꓪꓴ‐ꓢ ꓐꓯ ꓘꓶꓽ ꓗꓪ ꓐꓰ ꓛꓳ ꓫꓱ, ꓟ ꓕꓲ ꓡꓲ, ꓐꓰ ꓖꓳ ꓗꓪ ꓐꓰ ꓣꓴ ꓓꓳ ꓔ ꓢꓲ ꓠꓬꓲ ꓙꓵꓻ ꓠꓲ, ꓚꓱ, ꓐꓰ ꓞꓳ ꓙꓳ ꓚꓱ, ꓐꓰ ꓐꓯ ꓗꓷ ꓟ ꓥ ꓡꓳ꓿ ꓕꓱ ꓠꓬꓲꓽ ꓫꓵ ꓔꓯ ꓠꓬ ꓮ ꓡꓰ ꓕꓯ ꓐꓯ ꓑꓶ ꓡ? ꓮꓡꓰ ꓕꓯ ꓡꓰ ꓟ. ꓖꓶ ꓡ ꓐꓯ ꓠꓬ ꓔꓲꓺ ꓒ ꓪ ꓔꓲ ꓡꓰ ꓒꓲ‐ꓕꓱ ꓠꓬꓲ. ꓠ. ꓖꓴ ꓗꓪ ꓠꓬꓲ. ꓔ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓕꓲ ꓟ ꓡꓱꓼ ꓐꓰ ꓗꓴ. ꓙꓰ ꓙꓳ_ ꓟ ꓬꓲ ꓦꓬꓼ ꓠꓬꓲ ꓗꓪ ꓠꓬ ꓖꓳ ꓟ ꓔꓯ ꓐꓯ ꓑꓶ. ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓡꓰ ꓐ ꓯꓑꓶ ꓗꓷ ꓗ. ꓠꓯ. ꓠꓬ ꓔꓱ ꓟ ꓠꓬ ꓮ ꓕꓯ ꓟꓲ ꓛꓬ ꓡꓰ ꓟꓽ ꓓ ꓟ ꓙꓵꓻ ꓠꓲ, ꓐꓰ ꓞꓳ ꓙꓳ ꓚꓱ, ꓥ ꓡꓳ꓿ ꓖꓳ ꓟ ꓑꓶ ꓓꓴ ꓠꓬꓲ. ꓠꓬꓲ ꓕꓱ ꓠꓬꓲꓽ ꓚꓱ, ꓔꓯ ꓣꓳ ꓢꓷ. ꓡꓰ ꓥꓳ ꓐꓯ ꓠꓬ ꓕꓱ ꓟ ꓠꓯꓼ ꓗꓪ ꓝꓮꓲ ꓮ ꓟꓬ, ꓙꓳ_ ꓢꓰ ꓡꓳ꓿ ꓙꓵꓻ ꓠꓲ, ꓠꓯꓼ ꓗꓪ ꓮ ꓡꓰ ꓟ ꓔꓯ ꓠꓬ ꓙꓵꓻ ꓪ ꓮ ꓡꓰ ꓟ ꓔꓯ ꓠꓬ ꓟꓽ ꓙꓵꓻ ꓪ ꓮ ꓙꓵ ꓮ ꓟꓬ, ꓙꓳ_ ꓡꓳ꓾ꓞꓳ ꓙꓳ ꓚꓱ, ꓗꓪ ꓥ ꓟꓲ ꓮ ꓡꓰ ꓟ ꓠꓬ ꓞꓳ ꓙꓳ ꓪ ꓮ ꓡꓰ ꓟ ꓠꓬ ꓕꓽ ꓞꓳ ꓙꓳ ꓐꓯ ꓟ ꓬꓲ ꓚꓱ, ꓥ ꓟꓲ ꓮ ꓟꓬ, ꓙꓳ_ ꓡꓳ꓿
