ꓟꓲ ꓠꓯ ꓞ ꓡ ꓟ ꓑꓶ. ꓓꓴ ꓪꓽ ꓪꓴꓽ ꓫꓳꓻ ꓟ ꓪꓳꓽ ꓙꓲꓻ ꓡꓰ ꓝꓲˍ ꓟ ꓐꓰ ꓬꓲ‐ꓡꓴ‐ꓐꓱ ꓬꓲꓻ ꓙꓬ ꓟꓴ ꓡ ꓟ ꓚꓱ, (Global warning)1
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓚꓱ, ꓗꓪ ꓐꓰ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓑꓶ. ꓓꓴ ꓪꓽ ꓪꓴꓽ ꓙꓲꓻ ꓡꓰ ꓟ ꓐꓰ ꓬꓲꓻ ꓡꓴ ꓐꓱ ꓬꓲꓻ ꓠꓬ ꓓꓯˍ ꓡ ꓟ ꓚꓱ, ꓗꓪ ꓐꓰ ꓮ ꓙꓵꓽ ꓢꓴ ꓔꓯ ꓐꓯ ꓟ. ꓖꓶ ꓡ ꓓꓴ ꓥꓳ꓿
ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓮ ꓘꓶ. ꓛꓲ ꓟꓴ ꓟ ꓪꓽ ꓚꓰ ꓗꓪ ꓙꓳ ꓟ ꓪꓽ ꓠꓬ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓮ ꓘꓶ. ꓛꓲ ꓣꓳ ꓚꓵˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓟꓶ ꓟ ꓙꓵ, ꓗꓪ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓑꓶ. ꓓꓴ ꓬꓲ ꓙꓵ, ꓟꓶ ꓫꓵˍ ꓫꓵˍ ꓙꓳ ꓟ ꓪꓽ ꓪꓳꓽ ꓙꓬ ꓠꓬ ꓙꓲˍ ꓡꓰ ꓢꓲ ꓡꓰ ꓢꓲ ꓠꓬꓲ ꓬꓲꓻ ꓡꓴ‐ꓓꓱ ꓬꓲꓻ ꓠꓬ ꓮ ꓘꓶ. ꓛꓲ ꓓꓯˍ ꓡ ꓡꓳ ꓐꓰ ꓢꓷ. ꓠꓲ, ꓙꓳ ꓒ ꓐꓴ ꓡꓰ ꓐꓯ ꓔ ꓡꓳ꓿
ꓕꓱ ꓡꓱ ꓒꓬꓱꓼ ꓡ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓫꓵꓽ ꓪꓴꓽ ꓓꓽ ꓟ ꓥ ꓡꓳ꓿
ꓮ ꓫꓵꓽ ꓑꓶ. ꓓꓴ ꓮ ꓘꓶ. ꓛꓲ ꓟꓴ ꓟ ꓪꓽ ꓚꓲ ꓗꓪ ꓔꓶ ꓟ ꓪꓽ ꓠꓬ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓣꓳ ꓚꓵˍ ꓡ ꓐꓯ ꓟ ꓔꓯ ꓣꓳ ꓡꓳ. ꓠꓬꓲ ꓓꓴ ꓬꓰ ꓡꓯ꓿
ꓟꓲ ꓠꓯ ꓗꓪ ꓮ ꓘꓶ. ꓛꓲ ꓟꓴ ꓡꓳ ꓬꓰ ꓟ ꓪꓽ ꓚꓲ ꓗꓪ ꓙꓳ ꓟ ꓪꓽ ꓠꓬ ꓟꓲ ꓠꓯ ꓗꓪ ꓞ ꓢꓯꓼ ꓙꓰ ꓡꓰ ꓝꓲ ꓠ, ꓟ ꓟꓬꓱꓽ ꓬꓰ ꓖꓶ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓟꓴ ꓗꓪ ꓪꓽ ꓚꓲ ꓗꓪ ꓙꓳ ꓟ ꓪꓽ ꓠꓬ ꓮꓲꓣꓚꓳꓠ ꓡꓰ ꓐꓰ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓗꓽ ꓕꓽ ꓖꓶ ꓟ ꓥ ꓡꓳ꓿
ꓖꓳ ꓡꓰ ꓠꓬ ꓮ ꓘꓶ. ꓛꓲ ꓟꓴ ꓗꓪ ꓪꓽ ꓚꓲ ꓗꓪ ꓙꓳ ꓟ ꓪꓽ ꓠꓬ ꓮ ꓡꓲ ꓐꓰ ꓪꓽ ꓙꓲ ꓡꓰ ꓔꓬ ꓡ?
ꓮ ꓘꓶ. ꓛꓲ ꓟꓴ ꓟ ꓪꓽ ꓚꓲ ꓗꓪ ꓙꓳ ꓟ ꓪꓽ ꓔꓯ ꓙꓲ ꓡꓰ ꓝꓲ ꓟ ꓠꓬ (ꓖꓡꓳꓐꓮꓡ ꓪꓮꓣꓟꓲꓠꓖ) ꓐꓯ ꓟ ꓟꓲ ꓠꓯ ꓕꓲ ꓠꓬꓲ ꓡꓪ ꓕꓲ ꓠꓬꓲ ꓞ ꓡ ꓟ ꓑꓶ. ꓓꓴ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓐꓴ ꓡꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬꓱꓽ ꓬꓰ ꓗꓷ ꓗꓪ ꓐꓰ ꓟꓽ ꓙꓲ ꓟ ꓮ ꓟꓬꓱꓽ ꓫꓵꓽ ꓔꓯ ꓒꓬꓱꓼ ꓡ ꓝꓲˍ ꓟ ꓥ ꓡꓳ꓿
ꓔꓯꓺ ꓥꓳꓽ ꓐꓯ ꓠꓬ ꓙꓼ ꓦꓲꓻ ꓓꓽ ꓗꓪ ꓐꓰ ꓓꓳ ꓡ ꓟ ꓟꓴ ꓘꓴ ꓢꓯꓼ꓾ ꓟꓳ‐ꓓꓳ ꓗꓪ ꓐꓰ ꓓꓳ ꓡ ꓟ ꓟꓴ ꓘꓴ꓾ ꓝꓮꓲ ꓖꓣꓰꓰꓠ ꓧꓳꓴꓢꓰ ꓗꓪ ꓐꓰ ꓓꓳ ꓡ ꓟ ꓬꓲ ꓢꓯꓼ ꓮ ꓟꓬ, ꓠꓬ ꓟꓲ ꓠꓯ ꓞ ꓡ ꓟ ꓔꓯ ꓒꓬꓱꓼ ꓡ ꓝꓲˍ ꓟ ꓥ ꓡꓳ꓿ ꓝꓮꓲ ꓟꓲ ꓠꓯ ꓗꓪ ꓬꓲ ꓙꓵ, ꓟꓶ ꓫꓵˍ ꓫꓵˍ ꓣꓳ ꓔꓬ ꓟ ꓢꓲ, ꓜꓲ ꓮ ꓟꓬ, ꓔꓯ ꓘꓶ ꓗꓷ ꓟ ꓑꓶ. ꓓꓴ ꓥ ꓡꓳ꓿
ꓖꓳ ꓡꓱ ꓫꓵꓽ ꓐꓴ ꓠꓬ ꓟꓲ ꓠꓯ ꓔꓯ ꓮ ꓘꓶ. ꓛꓲ ꓞ ꓡ ꓝꓲ ꓟ ꓑꓶ. ꓓꓴ ꓬꓲ ꓙꓵ, ꓟꓶ ꓫꓵ ꓫꓵˍ ꓮ ꓘꓶ.ꓛꓲ ꓟꓴ ꓟ ꓪꓽ ꓚꓲ ꓗꓪ ꓙꓳ ꓟ ꓪꓽ ꓪꓳꓽ ꓬꓲꓻ ꓠꓬ ꓙꓲˍ ꓡꓰ ꓝꓲ ꓟ ꓔꓯ ꓒꓬꓱꓽ ꓡ ꓟ ꓥ ꓡꓳ꓿
ꓝꓮꓲ ꓮ ꓫꓵꓽ ꓑꓶ. ꓓꓴ ꓬꓲꓻ ꓡꓴ ꓓꓱ ꓗꓪ ꓬꓲꓻ ꓙꓬ ꓠꓬ ꓓꓯˍ ꓡ ꓟ
ꓪꓽ ꓪꓳꓽ ꓬꓲꓻ ꓮ ꓘꓶ. ꓛꓲ ꓙꓲˍ ꓟ ꓑꓶ. ꓓꓴ ꓕꓱ ꓡꓱ ꓫꓵꓻ ꓬꓲꓻ ꓙꓬ ꓠꓬ ꓬꓲꓻ ꓡꓴ ꓓꓱ ꓘꓴꓽ ꓗꓪ ꓓꓵꓽ ꓡ ꓢꓲ ꓠꓬꓲ ꓬꓲ ꓡꓴ ꓐꓱ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓓꓯˍ ꓡ ꓟ ꓥ ꓡꓳ꓿
ꓕꓱ ꓡꓱ ꓫꓵꓽ ꓪꓴꓽ ꓒꓬꓱꓼ ꓡ ꓟ ꓑꓶ. ꓓꓴ ꓟꓲ ꓠꓯ ꓞꓳ ꓤ ꓔꓯ ꓮ ꓘꓶ. ꓛꓲ ꓫ. ꓓꓴ ꓟꓷꓽ ꓓꓴ ꓔꓳ, ꓜꓳ ꓡꓰ ꓝꓲ ꓟ ꓥ ꓡꓳ꓿
ꓬꓲꓻ ꓡꓴ ꓓꓱ ꓘꓶꓽ ꓗꓪ ꓙꓳ ꓟ ꓡꓳ ꓒꓱ ꓞꓳ ꓘ, ꓮ ꓟꓬ, ꓠꓬ ꓬꓲꓻ ꓡꓴ ꓓꓱ ꓬꓲꓻ ꓙꓬ ꓓꓯˍ ꓡ ꓟ ꓑꓶ. ꓓꓴ ꓬꓲꓻ ꓙꓬ ꓙꓵꓽ ꓟꓶ ꓡꓰˍ ꓟ ꓝꓮꓲ ꓕꓱ ꓡꓱ ꓫꓵꓽ ꓟꓵꓽ ꓗꓪ ꓮ ꓫꓵꓽ ꓥ ꓟꓲ ꓔꓶ ꓜ ꓟꓽ ꓙꓲ ꓗꓷ ꓡꓰ ꓟ ꓥ ꓡꓳ꓿
ꓝꓮꓲ ꓬꓲꓻ ꓡꓴ ꓓꓱ ꓬꓲꓻ ꓙꓬ ꓓꓯ ꓡ ꓠꓬ ꓖꓳ ꓕꓲ ꓟꓵꓽ ꓗꓪ ꓓꓳ ꓓꓴ ꓬꓲꓻ ꓙꓬ ꓮ ꓘꓶ. ꓛꓲ ꓫ. ꓡ ꓟ ꓚꓱ, ꓔꓯ ꓒꓬꓱꓼ ꓡ ꓝꓲ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓕꓱ ꓡꓱ ꓫꓵꓽ ꓫꓵꓽ ꓪꓴꓽ ꓔꓯ ꓗꓽ ꓕꓽ ꓠ, ꓟ ꓞꓳ ꓡꓱ ꓞꓳ ꓡꓯ. ꓐꓴ ꓮ ꓡꓲ ꓐꓰ ꓟꓬꓱꓽ ꓬꓰ ꓠꓽ ꓗ ꓡ ꓐꓯ ꓠꓬ
ꓟꓲ ꓠꓯ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓢꓷ. ꓠꓲ, ꓚꓴ, ꓬꓲ ꓔꓯ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓔꓯ ꓐꓯ ꓟ. ꓖꓶ ꓠ ,ꓟ꓾
ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬ ꓣꓱ ꓔꓬ ꓟ ꓮ. ꓔꓳ ꓔꓯ ꓤ ꓟꓳ ꓢꓲ ꓠꓬꓲ ꓣꓱ ꓠ, ꓟ꓾ ꓟꓲ ꓠꓯ ꓔꓯ ꓞ ꓡ ꓝꓲ ꓟ ꓚꓱ, ꓔꓯ ꓤ ꓟꓳ ꓠ, ꓟ꓾
ꓢꓲ, ꓜꓲ ꓔꓶ ꓠꓯ, ꓟ꓾ ꓢꓲ, ꓜꓲ ꓠꓬ ꓟꓲ ꓠꓯ ꓔꓯ ꓞꓼ ꓡ ꓝꓲ ꓟ ꓢꓯꓼ ꓔꓯ ꓣꓴ ꓔꓯˍ ꓙꓰ ꓟ ꓢꓯꓼ ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲ, ꓜꓲ ꓔꓯ ꓮ ꓟꓬ, ꓔꓶ ꓠ, ꓟ ꓣꓳ ꓢꓯꓼ ꓕꓵꓼ ꓡꓯ꓿
ꓟꓲ ꓠꓯ ꓠꓬ ꓣꓳ ꓞꓲꓼ ꓣꓳ ꓟ ꓞꓳ ꓡꓱ ꓞꓳ ꓡꓯ. ꓐꓴ ꓡꓯꓽ ꓒꓯ, ꓗꓪ ꓙꓳ ꓟ ꓥ ꓡꓳ꓿ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓬꓰ ꓠ, ꓟ ꓣꓳ ꓞꓳ ꓡꓯ. ꓐꓴ ꓟꓬꓱꓽ ꓥ ꓡꓳ꓿ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓘꓳ, ꓣꓴ ꓪ ꓠ, ꓟ ꓣꓳ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓡꓯ꓿ ꓫ. ꓟꓳ ꓪ꓿
